Genesis TOKO 1 1 Tamin’ny voalohany Andriamanitra nahary ny lanitra sy ny tany. 2 Ary ny tany dia tsy nisy endrika sady foana; ary aizina no tambonin'ny lalina. Ary ny Fanahin'Andriamanitra nanomba tambonin'ny rano. 3 Ary Andriamanitra nanao hoe: Misia mazava : dia nisy mazava. 4 Ary hitan'Andriamanitra fa tsara ny mazava; ary nampisarahin'Andriamanitra ny mazava sy ny maizina. 5 Ary Andriamanitra nanao ny mazava hoe andro, ary ny maizina nataony hoe alina. Ary ny hariva sy ny maraina no andro voalohany. 6 Ary Andriamanitra nanao hoe: Misia habakabaka eo afovoan'ny rano, ary aoka hampisaraka ny rano amin'ny rano izy. 7 Ary Andriamanitra nanao ny habakabakaka ka nampisaraka ny rano ambanin’ny habakabaka tamin’ny rano ambonin’ny habakabaka; dia nisy izany. 8 Ary Andriamanitra nanao ny habakabaka hoe lanitra. Ary nisy hariva sy maraina, andro faharoa izany. 9 Ary Andriamanitra nanao hoe: Aoka hiangona ny rano eny ambanin'ny lanitra ho eo amin'ny fitoerana iray, ary aoka hiseho ny maina; dia nisy izany. 10 Ary Andriamanitra nanao ny maina hoe tany; ary ny rano tafangona dia nataony hoe ranomasina; ary hitan'Andriamanitra fa tsara izany. 11 Ary Andriamanitra nanao hoe: Aoka ny tany haniry ahitra sy anana mamoa ary hazo fihinam-boa izay mamoa, samy araka ny karazany avy, izay ao aminy ao aminy ny voa, eny ambonin’ny tany; dia nisy izany. 12 Ary ny tany naniry ahitra sy anana mamoa, samy araka ny karazany avy, ary hazo mamoa izay ao anatiny, samy araka ny karazany avy, ary hitan'Andriamanitra fa tsara izany. 13 Ary nisy hariva sy maraina no andro fahatelo. 14 Ary Andriamanitra nanao hoe: Misia fanazavana eny amin'ny habakabaky ny lanitra hampisaraka ny andro sy ny alina; ary aoka ho famantarana sy ho vanim-potoana sy ho andro ary taona ireny; 15 Ary aoka ho fanazavana eny amin'ny habakabaky ny lanitra izy hanazava ny tany; dia nisy izany. 16 Ary Andriamanitra nanao fanazavana roa lehibe; ny fahazavana lehibe ho mpanapaka ny andro, ary ny fahazavana kely ho mpanapaka ny alina; Izy no nanao ny kintana koa. 17 Ary Andriamanitra nametraka azy teo amin’ny habakabaky ny lanitra hanazava ny tany, 18 Ary ho mpanapaka ny andro sy ny alina sy hampisaraka ny mazava sy ny maizina; ary hitan'Andriamanitra fa tsara izany. 19 Ary nisy hariva ary nisy maraina no andro fahefatra. 20 Ary Andriamanitra nanao hoe: Aoka ny rano hamoaka zava-manan'aina mihetsiketsika be dia be, ary vorona hanidina ambonin'ny tany eny amin'ny habakabaky ny lanitra. 21 Ary Andriamanitra nahary ny trozona lehibe sy ny zavamanan'aina mihetsiketsika rehetra, izay nateraky ny rano be,
samy araka ny karazany avy, ary ny voro-manidina rehetra, samy araka ny karazany avy; ary hitan'Andriamanitra fa tsara izany. 22 Ary Andriamanitra nitso-drano azy hoe: Maroa fara sy mihabetsaha ary mamenoa ny rano ao amin'ny ranomasina, ary aoka ny vorona hihamaro ambonin'ny tany. 23 Ary nisy hariva sy maraina no andro fahadimy. 24 Ary Andriamanitra nanao hoe: Aoka ny tany hamoaka zava-manan'aina, samy araka ny karazany avy, dia biby fiompy sy biby mandady na mikisaka ary bibi-dia, samy araka ny karazany avy; dia nisy izany. 25 Ary Andriamanitra nanao ny bibi-dia, samy araka ny karazany avy, sy ny biby fiompy, samy araka ny karazany avy, ary ny biby rehetra izay mandady na mikisaka amin’ny tany, samy araka ny karazany avy; ary hitan’Andriamanitra fa tsara izany. 26 Ary Andriamanitra nanao hoe: Andeha Isika hamorona olona tahaka ny endritsika, araka ny tarehintsika; ny biby rehetra izay mandady na mikisaka amin'ny tany. 27 Ary Andriamanitra nahary ny olona tahaka ny endriny, tahaka ny endrik'Andriamanitra no namoronany azy; lahy sy vavy no namoronany azy. 28 Ary Andriamanitra nitahy azy, ary Andriamanitra nanao taminy hoe: Maroa fara sy mihabetsaha ary mamenoa ny tany, ka mampanompoa azy; izay mihetsiketsika ambonin'ny tany. 29 Ary hoy Andriamanitra: Indro, efa nomeko anareo ny anana manintsam-boa rehetra izay ambonin’ny tany rehetra sy ny hazo rehetra izay misy voan’ny hazo mamoa; ho hanina ho anareo izany. 30 Ary ny bibi-dia rehetra sy ny voro-manidina rehetra ary ny biby rehetra izay mandady na mikisaka amin'ny tany, izay misy aina, dia efa nomeko ho fihinany ny anana maitso rehetra; dia nisy izany. 31 Ary hitan'Andriamanitra izay rehetra nataony, ary, indro, tsara indrindra izany. Ary nisy hariva sy maraina no andro fahenina. TOKO 2 1 Dia vita ny lanitra sy ny tany mbamin'izay rehetra ao aminy. 2 Ary tamin’ny andro fahafito dia vitan’Andriamanitra ny asa efa nataony; ary nitsahatra tamin'ny andro fahafito tamin'ny asany rehetra izay efa nataony izy. 3 Ary Andriamanitra nitahy ny andro fahafito sy nanamasina azy, satria tamin'izany no nitsaharany tamin'ny asany rehetra izay noforonin'Andriamanitra sy nataony. 4 Ary izao no taranaky ny lanitra sy ny tany, fony namoronana azy, tamin’ny andro nanaovan’i Jehovah Andriamanitra ny tany sy ny lanitra, 5 Ary ny zava-maniry rehetra eny an-tsaha, fony tsy mbola tambonin’ny tany, ary ny anana rehetra tany an-tsaha, fony tsy mbola naniry; fa Jehovah Andriamanitra tsy nandatsaka ranonorana tambonin’ny tany, ary tsy nisy olona hiasa ny tany. 6 Fa nisy zavona niakatra avy tamin'ny tany ka nandena ny tany rehetra. 7 Ary vovo-tany no namoronan'i Jehovah Andriamanitra ny olona, ary nofofoniny fofonaina mahavelona ny vavorony; ary tonga fanahy velona ny olona.