Philimon THANGNAI 1
1 Ang Pol Jisu Khristoni bagwi alongo chopjaknai tei chini takhuk Timothi chini khájani Philimonno omono swihoro; 2 Chini khájani Aphiano, chwng bai baksa sengkrak Arkhipno tei nini nogo tongnai mothani bororokno omono swihoro. 3 Chini Apha Kaitor bai Subrai Jisu Khristo norokno khairok thung, norokno khá kwchang rw thung. 4 Suri san brúm brúm nono muitu khlai brúm brúm ang ani Kaitorno hambai rw-o. 5 Nwng Subrai Jisuno hamjakma bai nwng Kaitorni bebak bororokno hamjakma kókno ang khna kha. 6 Nwng Khristo Jisu bai thansa wngma bising tẃi norok bebak kahamrokno saui manna tẃi khe norok poito khlaima bai chwng norok bai thansa wng thung hwnwi suri-o. 7 Takhuk, nwng hamjakma bai chwng belai khe tongthogo, khá rak rw-o, tamni hwn khe nwng Kaitorni bororokno khá kwchang rw-o. 8 Aboni bagwi’-no ang Khristo bai thansa wngwi nono tamo khlai di hwnwi dagiui mano. 9 Hai phano ang Pol hai khe chakra, tabuk Khristo Jisuni bagwi alongo chopjagwi tongma bai ang nono hamjakmani bagwi se ma koi ja-o. 10 Ani angsla Onisimni bagwi ang nono ma sa-o, alongo chopjagwi tong phuru bo’-bo ang bwsa wng kha. 11 Agi omo nini bagwi samung chúk ya, tabuk le abo nini bagwi tei ani bagwi se samung nangjak si-o. 12 Ang nono rohor phi kha, aboni bagwi nwng bono yachak sok di, abo ani bwkhani simi se. 13 Kothoma Kahamni bagwi alongo chopjak phano bo nini yakchu-o ano chuba thung hwnwi ang bono ani thani ton rwna nai-o. 14 Tamo khe nini kók kwrwi khe ang mungsa phano khlaina muchung ya; hakhe norokni chubamung nangma hai ya, norok muchungma bai se wng thung. 15 Tamni hwn khe bo nwng bai mol brúm brúm manna tẃi khe nwng bai srapsani bagwi kakma wngwi mano. 16 Tabuk bo seleng wng ya, selengni slái phano bo wng kha bo khájani takhuk. 17 Nwng ano kiching hwnwi chong khe ano yachak tẃi’-no bonobo yachak sok di. 18 Bo mungsa swk hamya khlai khe, eba mungsa swk nono lakai tong khe abono ani mungwi ton di; 19 Ang Pol ani yak baithang omono swi-o, ang abono su anw; 20 Au’-no takhuk, Subraini bising tẃi nwng bai ano tongthok rw ja di. 21 Nwng ani kók khna anw hwnwi ang poito khlaiwi nono swihoro, tamni hwn ba nwng ang samani slái teibo khlainai hwnwi ang saui mano. 22 Aboni slái bo ani bagwi tongthai snamwi rw di, tamni hwn khe norok suri sanma bai Kaitor ano norokni thani kiphilwi rohor anw hwnwi ang khá ka-o. 23 Ang bai baksa Khristo Jisuni samungo alongo chopjaknai Epaphra nono ang khápang rohoro. 24 Ang bai baksa samung tangnairok, Mark, Aristark, Dema tei Luka. 25 Chubagra Jisu Khristo ni uaingsouhmo nrao ni phola bai tong thou. Amen.