Jingpo - The Book of the Prophet Obadiah

Obadia DAW KAJI 1 1 Obadia mu ai shingran. Edom a lam Madu Yehowa ning nga ai; Yehowa kaw na shi ga anhte na yu saga ai rai nna, Rawt mu, shi hpe gasat na rawt sa wa saga, nga nna maigan amyu ni hpang de kasa shangun dat nu ai. 2 Yu u, maigan amyu ni hta ngai nang hpe kaji shatai nna, nang gaw ja ja n kaw n law rai nga ndai. 3 Lunghkrung nhkun ni hta shanu nga nna, tsaw ai shara hta nga ai wa e, na myit gumrawng gumtawng ai gaw nang hpe hkalem kau nu ai. Ngai hpe ga de kadai jahkrat kau na rai ta? 4 Nang gaw langda zawn na a hkum hpe shagrau nna, shagan ni a lapran e, na a tsip hpe gap timung, dai kaw nna ngai nang hpe jahkrat kau na nngai, nga nna Yehowa tsun ai. 5 Lagut ni nang hpang de sa nna, shana e lagut ni sa wa yang, (nang kaning rai sat kau hkrum n ta?) shanhte hkru kat hkra lagu la na n rai ni? Tsabyi du ai ni nang hpang de sa wa ma yang, shanhte loi mi ngam da ya na ma ai n rai ni? 6 Esaw a arai ni hpe kaning rai sawk yu lu a hka! shi a makoi magap da ai arai ni hpe kaning rai tam nga ma hka! 7 Na a hpung masha ni yawng gaw, lamu ga jarit du hkra nang hpe woi sa wa manu ai: nang hte ngwi pyaw simsa nga ai masha ni gaw, nang hpe hkalem nna dang kau manu ai; na a lusha sha ai ni gaw, na a npu e hkala nba tawn da ma ai: shi hta nyan hpaji rawng ai wa kadai mung n nga ai. 8 Dai shani e, ngai gaw Edom mung na hpaji byeng-ya rawng ai ni hpe mung, Esaw a bum na nyan rawng ai ni hpe mung, ngai jahten kau na n rai ni? 9 Teman e, na a hpyenla ni gaw, Esaw a bum ga na masha shagu sat kau hkrum hkra, hkrit kajawng mat na mara ai. 10 Kaning rai nme law, na nhpu Yaku hpe zingri zingrat ai gaw, kaya kahpa nang hpe ka-up nna, nang htani htana shamyit kau ai hkrum na rin dai. 11 Nang wora maga de tsap nga ai shani e, maigan masha ni shi a luksuk ni hpe bawng hku woi mat wa nna, maigan masha ni shi a mare chyinghka ni de shang nna, Yerusalem mare hpe hpaida da ai shani e, nang gaw dai ni hta na langai mi zawn rai nga ndai. 12 Rai ti mung, na a nhpu nnau wa manam tai mat ai shani e, nang gaw shi a nhtoi hpe n yu ging ai. Yuda kashu kasha ni hten byak hkrum ai nhtoi hta mung, nang shanhte a matu kabu gara lu na n rai; tsin-yam tsindam hkrum ai shani e mung, gumrawng gumtawng ai ga n tsun lu ndai. 13 Nang gaw nye a amyu masha ni tsin-yam tsindam hkrum ai shani e, shanhte a mare chyinghka de shang lu na n rai; gaja wa, shanhte tsin-yam tsindam hkrum ai shani e, shanhte a nni nkri hpe nang n yu yu nna, shanhte tsinyam tsindam hkrum ai shani e, shanhte a sutgan hta lata n ahtu ya ndai; 14 Dai hta n-ga, shi a lawt lu ai ni hpe sat kau na matu, lam makau e nang tsap lu na ndai n rai; tsin-yam tsindam hkrum ai shani hta naw ngam nga ai shi a amyu masha ni hpe mung, nang ap kau lu na n rai. 15 Kaning rai nme law, dai Madu a nhtoi gaw maigan amyu ni mahkra a ntsa e ni wa ra ai: nang galaw ai hte maren, nang hpe hkam na ra ai: na a shabrai gaw na a baw ntsa de bai nhtang wa na ra ai. 16 Kaning rai nme law, nye a chyoi pra ai bum ntsa e nanhte lu manit dai hte maren, maigan amyu ni yawng tut nawng lu na mara ai, rai sa, shanhte lu nna, shanhte mayu kau nna, shanhte n nga mat sai zawn, tai na mara ai. 17 Ziun bum ntsa e chyawm gaw, lawt lu ai lam nga nna, chyoi pra ai lam nga na ra ai; Yaku a nta masha ni mung shanhte a sut gan ni hpe madu la na mara ai. 18 Yaku a dap gaw wan hte, Yosep a dap gaw wan hkut, Esaw a dap gaw yikaw tai nna, dai ni gaw shanhte hta wan hkru nna hkru kau na mara ai. Esaw a amyu matu ni kadai mung ngam nga na n rai; kaning rai nme law, dai Madu tsun nu ai. 19 Dingda masha ni gaw Esaw a bum hpe madu la na mara ai; pa ga na ni gaw Hpilisti masha ni rai nga ma ai: shanhte gaw Ehprim hte Samari lamu ga ni hpe madu la na mara ai: Benyamin mung gaw Gilead mung hpe madu la na mara ai. 20 Ndai bawng dung hkrum ai Israela hpyen luksuk ni gaw Zarephta du hkra Hkanan masha ni a lamu ga hpe madu la na mara ai. Sehparad mung e nga ai Yerusalem masha ni gaw dingda maga na mare ni hpe madu la na mara ai. 21 Esaw a bum hpe tara dara na matu, hkye hkrang la ai ni gaw Ziun Bum de lung wa na mara ai. dai mungdan mung dai Madu a matu tai na ra ai,” ngu nna tsun wu ai.