ʻO ka ʻōlelo nane a ka mea lūlū hua Mataio 13:1-23 1 IA lā hoʻi, hele akula ʻo Iesū i waho o ka hale, a noho ihola ma kapa o ka loko. 2 A ʻākoakoa maila nā kānaka he nui i ona lā, eʻe akula ia i luna o ka moku, noho ihola; a kū ihola ka ʻaha kanaka a pau ma kahakai. 3 A ʻōlelo maila ʻo ia iā lākou i nā mea he nui ma nā ʻōlelo nane, i ka ʻī ʻana mai, Aia hoʻi, hele akula kekahi mea lūlū hua e lūlū; 4 A i kāna lūlū ʻana, hāʻule ihola kekahi mau hua ma kapa alanui, a lele maila nā manu, a ʻai ihola ia mau mea. 5 Hāʻule ihola kekahi ma nā wahi pōhaku, kahi i nui ʻole ai ka lepo; a kupu koke aʻela ia, no ka mea, ʻaʻohe hohonu o ka lepo. 6 A puka mai ka lā, mae ihola ia, a maloʻo akula no ke aʻa ʻole. 7 A hāʻule ihola kekahi ma waena o nā kākalaioa; a kupu aʻela nā kākalaioa, a ʻānai ihola ia mea. 8 Akā, hāʻule ihola kekahi ma ka lepo maikaʻi, a hua maila i ka hua, he haneri ka nui o kekahi, he kanaono ka nui o kekahi, a he kanakolu ka nui o kekahi. 9 ʻO ka mea pepeiao lohe, e hoʻolohe ia. 10 Hele mai la kana poe haumana, ninau aku la ia ia, No ke aha la oe e olelo mai ai ia lakou ma na olelonane? 11 ʻŌlelo maila ʻo ia iā lākou, ʻī maila, No ka mea, ua hāʻawi ʻia aku iā ʻoukou e ʻike i nā mea pohihihi o ke aupuni o ka lani, ʻaʻole naʻe i hāʻawi ʻia aku iā lākou. 12 No ka mea, ʻo ka mea i loaʻa, e hāʻawi ʻia aku iā ia, a e nui loa aku; akā, ʻo ka mea i loaʻa ʻole, e lawe ʻia aku kāna mai ona aku lā. 13 No laila, ke ʻōlelo aku nei au iā lākou ma nā ʻōlelo nane; no ka mea, ke ʻike nei lākou, ʻaʻole lākou e ʻike; a ke lohe nei, ʻaʻole lākou e lohe, ʻaʻole hoʻi e hoʻomaopopo. 14 A ua kō ia mau mea ka wānana a ʻIsaia, ka mea i ʻī mai, I ka lohe ʻana, e lohe auaneʻi ʻoukou, ʻaʻole naʻe e hoʻomaopopo; a i ka nānā ʻana, e ʻike auaneʻi ʻoukou, ʻaʻole naʻe e ʻike.
1
15 No ka mea, ua palaka ka naʻau o kēia poʻe kānaka, ua hoʻolohe ʻole ko lākou mau pepeiao, ua pani lākou i ko lākou mau maka; o ʻike lākou me ko lākou mau maka, a lohe me ko lākou mau pepeiao, a hoʻomaopopo me ko lākou naʻau, a huli mai, a hoʻōla aku au iā lākou. 16 Akā, pōmaikaʻi ko ʻoukou mau maka, no ka mea, ʻike lākou: a me ko ʻoukou mau pepeiao, no ka mea, lohe lākou. 17 No ka mea, he ʻoiaʻiʻo kaʻu e ʻōlelo aku nei iā ʻoukou, He nui nā kāula a me nā kānaka pono i makemake e ʻike i nā mea a ʻoukou e ʻike nei, ʻaʻole naʻe lākou i ʻike; a e lohe i nā mea a ʻoukou e lohe nei, ʻaʻole naʻe lākou i lohe. 18 E hoʻolohe mai ʻoukou i ke ʻōlelo nane no ka mea lūlū. 19 Aia lohe kekahi i ka ʻōlelo o ke aupuni, ʻaʻole hoʻi i hoʻomaopopo, a laila hele mai ka mea ʻino, a kāʻili akula i ka mea i lūlū ʻia i loko o kona naʻau. ʻO ia ka mea i lūlū ʻia ma ke alanui. 20 ʻO ka mea i lūlū ʻia ma nā wahi pōhaku, ʻo ia ka mea i lohe i ka ʻōlelo, a lawe koke ihola ia me ka ʻoliʻoli; 21 ʻAʻole naʻe ona aʻa i loko ona, akā, ʻaʻole ia i mau no kekahi manawa; a hiki mai ka pilikia a me ka hoʻomaʻau ʻia no ka ʻōlelo, a laila, lilo koke ihola ia. 22 ʻO ka mea i lūlū ʻia ma waena o nā kākalaioa, ʻo ia ka mea i lohe i ka ʻōlelo; a ʻo ka manaʻo nui i nā mea o kēia ao, a me ka hoʻopunipuni ʻana o ka waiwai, e ʻānai i ka ʻōlelo, a lilo ia i mea hua ʻole. 23 Akā, ʻo ka mea i lūlū ʻia ma ka lepo maikaʻi, ʻo ia ka mea i lohe i ka ʻōlelo a hoʻomaopopo hoʻi; a hua mai i ka hua, he haneri ka kekahi, he kanaono ka kekahi, a he kanakolu ka kekahi.
Mareko 4:1-20 1 A HOOMAKA hou aku la ia e ao ma kapa o ka moanawai; a nui loa ka poe i akoakoa mai io na la, ee aku la ia maluna o ka moku, noho iho la maluna o ka moanawai, a pau ka ahakanaka ma uka, ma kapa o ka moanawai. 2 Aʻo akula ʻo ia iā lākou i nā mea he nui ma nā ʻōlelo nane, ʻī akula iā lākou ma kāna aʻo ʻana, 3 E hoʻolohe mai; Aia hoʻi, ua hele aku kekahi mea lūlū e lūlū. 4 A i kāna lūlū ʻana, hāʻule ihola kekahi ma kapa alanui, a lele maila nā manu o ka lewa, a ʻai ihola ia mea. 5 A hāʻule ihola kekahi ma kahi pōhaku, kahi i nui ʻole ai ka lepo; a kupu koke aʻela ia, no ka mea, ʻaʻohe hohonu o ka lepo. 6 A puka mai ka lā, mae ihola ia; a no ke aʻa ʻole, mae ihola ia. 7 A hāʻule ihola kekahi ma waena o nā kākalaioa; a kupu aʻela nā kākalaioa, a ʻānai ihola ia mea, ʻaʻole ia i hua mai ka hua. 8 A hāʻule ihola kekahi ma ka lepo maikaʻi, a hua maila i ka hua, i kupu aʻe a nui, a hua mai, he kanakolu, he kanaono, a he haneri kekahi. 9 ʻĪ maila ia iā lākou, ʻO ka mea pepeiao lohe, e hoʻolohe mai ia. 10 A iā ia i noho mehameha ai, nīnau akula iā ia ka poʻe e kū pū ana me ia, a me ka poʻe ʻumikumamālua, i ke ʻano o ka ʻōlelo nane. 11 ʻĪ maila ʻo ia iā lākou, Ua hāʻawi ʻia mai iā ʻoukou e ʻike i nā mea pohihihi o ke aupuni o ke Akua; akā, i ka poʻe ma waho, ua hana ʻia kēia mau mea a pau ma nā ʻōlelo nane. 12 I ʻike lākou a ʻike, ʻaʻole naʻe e ʻike; i lohe hoʻi a lohe, ʻaʻole naʻe e hoʻomaopopo, o hoʻohuli ʻia mai lākou, a e kala ʻia mai ko lākou hewa. 13 ʻĪ maila ʻo ia iā lākou, ʻAʻole anei ʻoukou i ʻike i kēia ʻōlelo nane? Pehea lā ʻoukou e ʻike ai i nā ʻōlelo nane a pau? 14 ʻO ka mea lūlū, ua lūlū ʻo ia i ka ʻōlelo. 15 Eia ka poʻe ma kapa alanui, kahi i lūlū ʻia ai ka ʻōlelo; a lohe lākou, hele koke mai ʻo Sātana a kāʻili akula i ka ʻōlelo i lūlū ʻia i loko o ko lākou naʻau.
2
16 Eia nō hoʻi ka poʻe i lūlū ʻia ma kahi pāpaʻa; a lohe lākou i ka ʻōlelo, ʻapo koke lākou ia me ka ʻoliʻoli; 17 ʻAʻohe o lākou aʻa i loko o lākou iho, no laila, ʻaʻole mau lākou no kekahi manawa: a laila, i ka hiki ʻana mai o ka pilikia a me ka hoʻomaʻau ʻia no ka ʻōlelo, a laila lilo koke lākou. 18 Eia nō hoʻi ka poʻe i lūlū ʻia ma waena o nā kākalaioa; ʻo ka poʻe i lohe i ka ʻōlelo, 19 A ʻo ka manaʻo nui i nā mea o kēia ao, a me ka hoʻopunipuni ʻana o ka waiwai, a me ke kuko ʻana i nā mea ʻē aʻe, ʻo ia ke kumu e ʻānai ai i ka ʻōlelo, a lilo ia i mea hua ʻole. 20 Eia nō hoʻi ka poʻe i lūlū ʻia ma ka lepo maikaʻi; ʻo ka poʻe i hoʻolohe i ka ʻōlelo, a hoʻopaʻa iho, a hua mai i ka hua, kanakolukumamākolu, kanaonokumamākolu, a hanerikumamākolu.
Luka 8:4-15 4 A i ka ʻākoakoa ʻana mai o nā kānaka he nui, a hele maila hoʻi i ona lā, mai loko mai o nā kūlanakauhale, ʻōlelo maila ʻo ia ma ka ʻōlelo nane; 5 Hele akula kekahi mea lūlū hua e lūlū i kāna hua; a i kona lūlū ʻana, hāʻule kekahi ma kapa alanui; a hehi ʻia ihola, a ua ʻai ʻia e nā manu o ka lewa. 6 A hāʻule ihola kekahi ma luna o ka pōhaku; a kupu aʻela, mae koke ihola ia, no ka mea, ʻaʻohe ona maʻū. 7 A hāʻule ihola kekahi ma waena o nā kākalaioa; a kupu pū aʻela nā kākalaioa me ia, a ʻānai ihola ia mea. 8 A hāʻule ihola kekahi ma ka lepo maikaʻi, a kupu aʻela, a hua maila i ka hua he haneri. A pau kāna ʻōlelo ʻana i kēia mau mea, kāhea akula ia, ʻO ka mea pepeiao lohe, e hoʻolohe ia. 9 Ninau aku la kana poe haumana ia ia, i aku la, Heaha la ke ano o keia olelonane? 10 ʻĪ maila ʻo ia, Ua hāʻawi ʻia iā ʻoukou e ʻike i nā mea pohihihi o ke aupuni o ke Akua; akā, i kekahi poʻe ma nā ʻōlelo nane, i ʻike lākou, ʻaʻole naʻe e ʻike, a i lohe hoʻi, ʻaʻole naʻe e hoʻomaopopo. 11 Eia hoʻi ke ʻōlelo nane: ʻO ka hua, ʻo ia ka ʻōlelo a ke Akua. 12 A ʻo ka poʻe ma kapa alanui, ʻo ia ka poʻe i lohe; a laila hele mai ka diabolo, a kāʻili akula i ka ʻōlelo mai loko aku o ko lākou mau naʻau, o manaʻoʻiʻo lākou a e hoʻōla ʻia. 13 A ʻo ka poʻe ma luna o ka pōhaku, ʻo ia ka poʻe i lohe, ʻapo lākou i ka ʻōlelo me ka ʻoliʻoli; ʻaʻohe o lākou aʻa, manaʻoʻiʻo lākou i kekahi manawa, a i ka wā e hoʻāʻo ʻia ai, hāʻule lākou. 14 A ʻo ka mea i hāʻule ma waena o nā kākalaioa, ʻo ia ka poʻe i lohe, a hele akula lākou, a hihia i nā manaʻo, a me ka waiwai, a me nā leʻaleʻa o kēia ola ʻana, ʻaʻole hoʻi lākou i hoʻohua mai i ka hua a hiki i ka wā e oʻo ai. 15 Akā, ʻo ka mea ma ka lepo maikaʻi, ʻo ia ka poʻe i lohe i ka ʻōlelo ma ka naʻau maikaʻi a me ka maikaʻi, a mālama lākou ia mea, a hoʻohua mai i ka hua me ke ahonui.
3