ʻO ka Hipa Nalowale, ʻO ke Kālā Nalowale, a me ke Keiki Hoʻohemahema Luka 15:1-32 1 A LAILA, hele mai la io na la ka poe lunaauhau a pau a me ka poe hewa e hoolohe ia ia. 2 A ʻōhumu ihola ka poʻe Parisaio a me ka poʻe kākau ʻōlelo, ʻī aʻela, Ua hoʻokipa kēia kanaka i ka poʻe hewa, a ua ʻai pū nō hoʻi me lākou. 3 A ʻōlelo maila ʻo ia i kēia ʻōlelo nane iā lākou, ʻī maila, 4 ʻO wai ke kanaka o ʻoukou he mau hipa kāna hoʻokahi haneri, a nalowale kekahi o lākou, ʻaʻole anei ia e waiho i nā hipa kanaiwakumamāiwa ma ka wao nahele, a ʻimi aku i ka mea i nalowale a loaʻa iā ia? 5 A loaʻa iā ia, a laila e kau iā ia ma luna o kona mau poʻohiwi me ka ʻoliʻoli. 6 A hiki mai ia i ka hale, hoʻākoakoa ʻo ia i kona mau hoaaloha a me kona mau hoalauna, me ka ʻōlelo ʻana iā lākou, E hauʻoli pū me aʻu; no ka mea, ua loaʻa iaʻu kaʻu hipa i nalowale. 7 Ke ʻōlelo aku nei au iā ʻoukou, pēlā nō ka ʻoliʻoli ma ka lani no kekahi kanaka hewa e mihi ana, ma mua o nā kānaka pono he kanaiwakumamāiwa, ʻaʻole pono iā lākou ke mihi. 8 A ʻo wai lā hoʻi ka wahine he ʻumi kālā kāna, a nalowale kekahi, ʻaʻole anei ia e hoʻā i ke kukui a kāhili i ka hale, a ʻimi pono a loaʻa ia iā ia? 9 A loaʻa iā ia, e hōʻuluʻulu ʻo ia i kona mau hoaaloha a me kona mau hoalauna, e ʻōlelo ana, E hauʻoli pū me aʻu; no ka mea, ua loaʻa iaʻu ka ʻāpana i nalowale iaʻu. 10 Pēlā hoʻi, ke ʻōlelo aku nei au iā ʻoukou, He ʻoliʻoli nō ia i mua o ke alo o nā ʻānela o ke Akua no ke kanaka hewa hoʻokahi e mihi ana. 11 ʻĪ maila ia, ʻElua āna keiki kāne a kekahi kanaka. 12 ʻŌlelo akula ke kaikaina i kona makua kāne, E ka makua, e hāʻawi mai ʻoe iaʻu i koʻu puʻu waiwai. A māhele ihola ʻo ia i kāna waiwai no lāua. 13 ʻAʻole nui nā lā ma hope iho, hōʻuluʻulu mai ke keiki muli loa i kāna a pau, hele akula ia i ka ʻāina lōʻihi aku; a ma laila i hoʻonele ai i kāna waiwai me ka noho ʻuhaʻuha. 14 A pau kāna waiwai i ka hoʻopau ʻia, nui ka wī ma ia ʻāina, a nele ihola ia. 15 Hele akula ia a hoʻopili aku i kekahi kamaʻāina o ia ʻāina; a hoʻouna akula ʻo ia iā ia i kona mau mahina ʻai e hānai puaʻa.
1
16 A makemake nō ia e hoʻopiha i kona ʻōpū me nā hua ʻai a nā puaʻa i ʻai ai, ʻaʻohe mea nāna i hāʻawi iā ia. 17 A loaʻa iā ia ka manaʻo maopopo, ʻī ihola ia, He nui ka poʻe paʻahana a koʻu makua kāne e ʻai ana me ka nui, a ke make nei au i ka pōloli! 18 E kū aʻe au a e hele aku i kuʻu makuakāne, a e ʻōlelo aku iā ia, E ka makua, ua hana hewa wau i ka lani a i mua ou. 19 ʻAʻole au e pono hou ke kapa ʻia he keiki nāu; e hoʻohālike mai ʻoe iaʻu me kekahi o kāu poʻe kauwā hoʻolimalima. 20 Kū aʻela ia, a hele maila i kona makuakāne: a iā ia ma kahi mamao aku, ʻike akula kona makuakāne iā ia, aloha maila, holo akula ia, ʻapo ihola ma kona ʻāʻī, a honi akula iā ia. 21 ʻĪ maila ke keiki iā ia, E ka makua, ua hana hewa aku au i ka lani, a iā ʻoe, ʻaʻole au e pono hou ke kapa ʻia he keiki nāu. 22 Akā, ʻī akula ka makua kāne i kāna mau kauwā, E lawe mai i ka ʻaʻahu maikaʻi loa, a e hōʻaʻahu iā ia; a e hoʻokomo i ke apo ma kona lima, a me nā kāmaʻa ma kona mau wāwae. 23 A e lawe mai i ke keiki bipi i momona ʻia, e pepehi; a e ʻai kākou me ka ʻoliʻoli; 24 No ka mea, ua make kēia keiki aʻu, a ua ola hou mai nei; ua nalowale hoʻi ia, a ua loaʻa mai nei. A hoʻomaka lākou e ʻoliʻoli. 25 A ʻo kāna keiki hiapo, aia nō ia ma ke kula; a i kona hele ʻana mai a kokoke i ka hale, lohe ihola ia i ke mele a me ka hula ʻana. 26 Kāhea akula ia i kekahi o nā kauwā, nīnau akula i ke ʻano o ia mau mea. 27 ʻĪ akula ʻo ia iā ia, Ua hiki mai kou kaikaina; a ua pepehi kou makua kāne i ke keiki bipi i kūpalu ʻia, no ka mea, ua loaʻa mai ʻo ia iā ia me ke ola. 28 Huhū ihola ia, ʻaʻole i makemake e komo i loko. No laila, hele akula kona makuakāne i waho, a nonoi akula iā ia. 29 ʻŌlelo maila ia i kona makuakāne, Eia hoʻi, he nui nō kēia mau makahiki aʻu i mālama aku ai iā ʻoe, ʻaʻole hoʻi au i hoʻohalahala iki i kāu kauoha; ʻaʻole hoʻi ʻoe i hāʻawi mai iaʻu i kahi keiki kao e ʻoliʻoli pū ai au me koʻu mau hoaaloha; 30 Akā, i ka hoʻi ʻana mai o kēia keiki āu, ka mea i hoʻopau i kou waiwai me nā wahine hoʻokamakama, ua kālua koke ʻoe i ke keiki bipi i kūpalu ʻia nona. 31 ʻĪ maila ʻo ia iā ia, E ke keiki, ua noho mau ʻoe me aʻu, a ʻo nā mea a pau aʻu, ʻo kāu ia. 32 He mea pono nō kākou e ʻoliʻoli a me ka hauʻoli; no ka mea, ua make kou kaikaina nei, a ua ola hou mai nei; ua nalowale hoʻi, a ua loaʻa mai nei.
2