Ka Hānai ʻana i nā 5000 Mataio 14:13-21 13 A lohe aʻela ʻo Iesū, holo akula ia ma ka moku i kahi neoneo; a lohe aʻela nā kānaka, hahai akula lākou iā ia ma ka wāwae, mai loko mai o nā kūlanakauhale. 14 A hele akula ʻo Iesū, ʻike akula ia i ka lehulehu, haehae ke aloha iā lākou, a hoʻōla ihola ia i ko lākou poʻe maʻi. 15 A ahiahi aʻela, hele maila kāna poʻe haumāna i ona lā, ʻī akula, He wahi neoneo kēia, a ua hala ka manawa; e hoʻokuʻu aku ʻoe i nā kānaka, i hele lākou i nā kauhale e kūʻai i ka ʻai na lākou. 16 ʻĪ maila ʻo Iesū iā lākou, ʻAʻole pono lākou e hele aku; e hāʻawi aku ʻoukou i ka ʻai na lākou. 17 ʻĪ akula lākou iā ia, ʻElima wale nō berena a mākou, a me nā iʻa ʻelua. 18 ʻĪ maila ia, E lawe mai ia mau mea i oʻu nei. 19 Kauoha akula ia i nā kānaka e noho i lalo ma luna o ka mauʻu, lālau ihola ia i nā berena ʻelima, a me nā iʻa ʻelua, nānā aʻela i luna i ka lani, hoʻomaikaʻi akula, wāwahi ihola, hāʻawi akula i nā berena i nā haumāna āna, a hāʻawi akula hoʻi nā haumāna i nā kānaka. 20 ʻAi ihola lākou a pau a māʻona: a hōʻiliʻili ihola lākou i nā ʻāpana i koe, a piha aʻela nā hīnaʻi he ʻumikumamālua. 21 A ʻo ka poʻe i ʻai, ʻelima paha tausani kāne, he ʻokoʻa nā wāhine a me nā kamaliʻi.
Mareko 6:30-44 30 ʻĀkoakoa maila ka poʻe lunaʻōlelo i o Iesū lā, haʻi akula iā ia i nā mea a pau, ʻo nā mea a lākou i hana ai, a me nā mea a lākou i aʻo aku ai. 31 ʻĪ maila ʻo ia iā lākou, E hele kaʻawale mai ʻoukou a i kahi mehameha, a e hoʻomaha iki: no ka mea, ua nui ka poʻe i hele mai, a i hele aku, ʻaʻole hoʻi o lākou manawa kaʻawale e ʻai ai. 32 Holo aku la lakou ma ka moku a i kahi neoneo. 33 ʻIke akula nā kānaka i ko lākou hele ʻana, a nui hoʻi ka poʻe i ʻike iā ia, holo wāwae akula lākou mai loko mai o nā kūlanakauhale a pau, a hiki mua akula iā lākou, a ʻākoakoa ihola i ona lā.
1
34 A puka akula ʻo Iesū i waho, ʻike akula ia i nā kānaka he nui loa, a aloha akula iā lākou; no ka mea, ua like lākou me nā hipa kahu ʻole: a hoʻomaka ʻo ia e aʻo aku iā lākou i nā mea he nui. 35 A kokoke e po ka lā, hele maila kāna poʻe haumāna i ona lā, ʻī akula, He wahi neoneo kēia, a kokoke e po ka lā. 36 E hoʻokuʻu aku iā lākou, i hele ai lākou ma ka ʻāina a puni, a ma nā kauhale, e kūʻai i ka berena na lākou; no ka mea, ʻaʻohe a lākou mea e ʻai ai. 37 ʻŌlelo maila ʻo ia iā lākou, E hāʻawi aku ʻoukou i ʻai na lākou. ʻĪ maila lākou iā ia, E hele anei mākou e kūʻai aku i ʻelua haneri denari ka nui o ka berena, a e hāʻawi aku iā lākou e ʻai? 38 Nīnau maila ʻo ia iā lākou, ʻEhia mau berena a ʻoukou? E hele ʻoukou e ʻike. A i ko lākou ʻike ʻana, ʻī akula lākou, ʻElima, a me nā iʻa ʻelua. 39 Kauoha maila ia iā lākou, e hoʻonoho papa i nā kānaka a pau ma luna o ka mauʻu uliuli. 40 Noho papa iho la lakou, ma na haneri, a ma na kanalima. 41 A lawe ihola ia i nā berena ʻelima a me nā iʻa ʻelua, nānā akula ia i luna i ka lani, hoʻomaikaʻi akula, a wāwahi ihola i nā berena, hāʻawi akula i kāna poʻe haumāna e kau aku i mua o lākou; a puʻunaue ihola ia i nā iʻa ʻelua na lākou a pau. 42 ʻAi ihola lākou a pau, a māʻona. 43 Hōʻiliʻili ihola lākou i nā koena ʻai, a me nā iʻa, a piha aʻela nā hīnaʻi he ʻumikumamālua. 44 A ʻo ka poʻe i ʻai i nā berena, ʻelima tausani kāne paha.
Luka 9:10-17 10 A hoʻi mai ka poʻe lunaʻōlelo, haʻi akula lākou iā ia i nā mea a pau a lākou i hana ai: a lawe pū akula ʻo ia iā lākou, a hele malū akula i kahi neoneo no ke kūlanakauhale i kapa ʻia ʻo Betesaida. 11 A ʻike nā kānaka, hahai akula lākou iā ia; a hālāwai maikaʻi ʻo ia me lākou, ʻōlelo maila iā lākou no ke aupuni o ke Akua, a hoʻōla ihola i ka poʻe e pono ai ke hoʻōla ʻia. 12 A i ka hoʻomaka ʻana o ke ao e pō, hele maila ka ʻumikumamālua, ʻī akula iā ia, E hoʻokuʻu aku i ka ʻaha kanaka e hele lākou i nā kauhale, a me nā ʻāina e kokoke mai ana, e moe ai, a e loaʻa ai ka ʻai; no ka mea, aia kākou ma ʻaneʻi ma kahi wao nahele. 13 ʻĪ maila ʻo ia iā lākou, E hāʻawi aku ʻoukou iā lākou e ʻai. ʻĪ maila lākou, ʻElima wale nō berena a me nā iʻa ʻelua, ke ʻole mākou e hele e kūʻai i ka ʻai na kēia poʻe kānaka a pau. 14 No ka mea, ʻelima paha tausani kānaka lākou. ʻĪ maila ʻo ia i kāna poʻe haumāna, E hoʻonoho iā lākou i lalo, he kanalima pākahi. 15 A hana ihola lākou pēlā, a hoʻonoho ihola iā lākou a pau i lalo. 16 A laila lālau ihola ia i nā berena ʻelima a me nā iʻa ʻelua, nānā aʻela i luna i ka lani, hoʻomaikaʻi akula ia mau mea, a wāwahi ihola, hāʻawi maila hoʻi i nā haumāna e waiho aku i mua o ka ʻaha kanaka. 17 ʻAi ihola lākou a pau, a māʻona ihola: a ua hōʻiliʻili ʻia nā koena i koe na lākou a piha nā hīnaʻi he ʻumikumamālua.
Ioane 6:1-14 1 MAHOPE iho o keia mau mea, holo aku la o Iesu ma kela kapa o ka moanawai o Galilaia, oia o Tiberia. 2 A nui ka poʻe i hahai aku iā ia, no ko lākou ʻike ʻana i nā hana mana āna i hana ai i ka poʻe maʻi. 3 Piʻi aʻela ʻo Iesū i luna o ka mauna, a noho ihola i laila me kāna poʻe haumāna. 4 A ua kokoke mai ka mōliaola, he ʻahaʻaina na ka poʻe Iudaio. 5 A ʻalawa aʻela ko Iesū mau maka i luna, ʻike akula i ka poʻe nui e hele mai ana i ona lā, nīnau maila ia iā Pilipo, Ma hea kākou e kūʻai ai i ka berena e ʻai ai kēia poʻe? 6 ʻO kēia kāna i ʻōlelo mai ai i mea e hoʻāʻo ai iā ia; no ka mea, ua ʻike nō ia i kāna mea e hana ai.
2
7 ʻĪ akula ʻo Pilipo iā ia, ʻAʻole e lawa ka berena no nā haneri denari ʻelua no lākou, i loaʻa ai i kēlā me kēia o lākou kahi ʻāpana liʻiliʻi. 8 ʻŌlelo akula iā ia kekahi o kāna poʻe haumāna, ʻo ʻAnederea, ke kaikaina o Simona Petero, 9 Aia maanei kekahi keiki, he ʻelima kāna mau berena bale, a me ʻelua iʻa liʻiliʻi; a he aha lā ia mau mea i kēia poʻe he nui? 10 ʻĪ maila ʻo Iesū, E hoʻonoho i nā kānaka i lalo. He nui ka mauʻu ma ia wahi. Noho ihola nā kānaka, ʻelima tausani paha ka nui. 11 A laila lawe ʻo Iesū i nā berena; a hoʻomaikaʻi akula, a hāʻawi akula i nā haumāna, a ʻo nā haumāna hoʻi i ka poʻe e noho ana; pēlā nō hoʻi nā iʻa, a like ka nui me ko lākou makemake. 12 A māʻona lākou, ʻī maila ia i kāna poʻe haumāna, E hōʻiliʻili i nā hakina i koe, i hoʻolei ʻole ʻia kekahi mea. 13 Hoiliili iho la lakou, a piha na hinai he umikumamalua me na hakina o na berena bale elima, i koe i ka poe i ai. 14 A laila, ʻike aʻela kēlā poʻe kānaka i ka hana mana a Iesū i hana ai, ʻōlelo ihola lākou, ʻOiaʻiʻo, ʻo ke kāula kēia e hele mai ana i ke ao nei.
3