Hawaiian - Courage Is Beautiful - Psalm 27

Wiwo ʻole Pentateuka A e kau mai ka makaʻu iā ʻoukou a me ka weliweli iā ʻoukou ma luna o nā holoholona a pau o ka honua, a ma luna o nā manu a pau o ka lewa, a ma luna o nā mea a pau e kolo ana ma ka honua, a ma luna hoʻi o nā iʻa a pau o ke kai; ua hāʻawi ʻia lākou i loko o ko ʻoukou lima. Kinohi 9:2 Ma hope iho o kēia mau mea, hiki maila ka ʻōlelo a Iēhova iā ʻAberama ma ka hihiʻo, ʻī maila, Mai makaʻu ʻoe, e ʻAberama: ʻo wau nō kou pale kaua, a me kou uku nui loa. Kinohi 15:1 A lohe ke Akua i ka leo o ke keiki; a kāhea maila ka ʻānela o ke Akua iā Hagara mai ka lani mai, ʻī maila iā ia, He aha kāu e Hagara? Mai makaʻu ʻoe; no ka mea, ua lohe ke Akua i ka leo o ke keiki ma kona wahi i noho ai. Kinohi 21:17 A ʻikea maila ʻo Iēhova iā ia ia pō hoʻokahi, ʻī maila, ʻO wau nō ke Akua o ʻAberahama kou makua kāne: mai makaʻu ʻoe, no ka mea, ʻo wau pū me ʻoe, a e hoʻomaikaʻi aku au iā ʻoe, a e hoʻonui aku i kāu poʻe mamo no kaʻu kauwā ʻo ʻAberahama. Kinohi 26:24 A i ke kolu o ka lā, i ko lākou ʻeha ʻana, ʻelua o nā keiki kāne a Iakoba, ʻo Simeona lāua ʻo Levi, nā kaikunāne o Dina, lālau akula lāua i kā lāua pahi kaua, a hele akula i ke kūlanakauhale me ka wiwo ʻole, a pepehi akula i nā kāne a pau. Kinohi 34:25 ʻĪ maila kēlā, Aloha ʻoukou, mai makaʻu: na ko ʻoukou Akua, a me ke Akua o ko ʻoukou makua kāne, nāna i hāʻawi mai i ka waiwai iā ʻoukou i loko o kā ʻoukou mau ʻeke: ua loaʻa iaʻu kā ʻoukou kālā. A lawe maila ʻo ia iā Simeona i waho i o lākou lā. Kinohi 43:23 ʻĪ maila kēlā, ʻO wau nō ke Akua, ke Akua o kou makua kāne: mai makaʻu ʻoe e iho i lalo i ʻAigupita; no ka mea, ma laila au e hoʻolilo ai iā ʻoe i lāhui kanaka nui: Kinohi 46:3 ʻĪ maila ʻo Iosepa iā lākou, Mai makaʻu ʻoukou; no ka mea, ʻo wau anei ma kahi o ke Akua? Akā, no ʻoukou, ua manaʻo ʻino mai ʻoukou iaʻu; akā, ua manaʻo ke Akua ia mea i mea maikaʻi, e hoʻokō mai, e like me ia i kēia lā, e hoʻōla i nā kānaka he nui. No laila, mai makaʻu ʻoukou: naʻu nō ʻoukou e hānai aku, a me kā ʻoukou poʻe keiki. A hōʻoluʻolu akula ʻo ia iā lākou, a ʻōlelo lokomaikaʻi akula iā lākou. Kinohi 50:19-21 ʻĪ akula ʻo Mose i nā kānaka, Mai makaʻu ʻoukou, e kū mālie, a e ʻike i ka hoʻōla a Iēhova, āna e hōʻike mai ai iā ʻoukou i kēia lā: no ka mea, ʻo ko ʻAigupita a ʻoukou i ʻike ai i kēia lā, ʻaʻole ʻoukou e ʻike hou iā lākou a mau loa aku. Pukaana 14:13