Kilat ug Dalugdog Sa dihang naghimo siyag balaod alang sa ulan, ug usa ka dalan alang sa kilat sa dalugdog: Unya iyang nakita kini, ug gimantala kini; iyang giandam kini, oo, ug gisusi kini. Ug sa tawo miingon siya: Ania karon, ang pagkahadlok sa Ginoo, nga mao ang kaalam; ug ang pagbiya sa dautan mao ang salabutan. Job 28:26-28
Pentateuko Ug gituy-od ni Moises ang iyang sungkod paingon sa langit; ug si Jehova nagpadala ug dalugdog ug ulan-nga-yelo, ug ang kalayo midalagan ngadto sa yuta; ug si Jehova nagpaulan ug ulan-nga-yelo sa ibabaw sa yuta sa Egipto. Pag-ampo kamo kang Jehova (kay igo na kini) nga mawala na ang kusog nga mga dalugdog ug ulan nga yelo; ug palakton ko kamo, ug dili na kamo magpabilin pa. Ug si Moises miingon kaniya: Sa diha nga ako makagula sa lungsod, ibayaw ko ang akong mga kamot ngadto kang Jehova; ug ang dalugdog mohunong, ug wala nay ulan-nga-yelo; aron ikaw mahibalo nga ang yuta iya ni Jehova. Ug si Moises migula sa siyudad gikan kang Faraon, ug gibayaw niya ang iyang mga kamot ngadto kang Jehova: ug ang mga dalugdog ug ang ulan-nga-yelo mihunong, ug ang ulan wala na ibubo sa ibabaw sa yuta. Ug sa pagkakita ni Faraon nga ang ulan, ug ang ulan-nga-yelo, ug ang mga dalugdog mihunong na, siya nagpakasala pag-usab, ug nagpatig-a sa iyang kasingkasing, siya ug ang iyang mga alagad. Exodo 9:23 , 28-29, 33-34 Ug nahitabo sa ikatulong adlaw sa pagkabuntag, nga may mga dalugdog ug mga kilat, ug ang mabaga nga panganod sa ibabaw sa bukid, ug ang tingog sa trumpeta hilabihan kakusog; mao nga ang tanan nga katawohan nga diha sa campo nangurog. Exodo 19:16 Ug ang tanang katawohan nakakita sa mga dalugdog, ug sa mga kilat, ug sa tingog sa trumpeta, ug sa bukid nga nag-aso: ug sa pagkakita sa katawohan niini, mikurog sila, ug nanagtindog sa halayo. Exodo 20:18
Kasaysayan Ang mga kaaway sa Ginoo pagadugmokon; gikan sa langit siya modalugdog batok kanila: ang Ginoo magahukom sa mga kinatumyan sa yuta; ug siya magahatag ug kusog sa iyang hari, ug magabayaw sa sungay sa iyang dinihog. 1 Samuel 2:10 Ug samtang si Samuel naghalad sa halad-nga-sinunog, ang mga Filistehanon nagpaduol aron sa pagpakig-away batok sa Israel: apan si Jehova nagpadalugdog ug dakong dalugdog niadtong adlawa sa ibabaw sa mga Filistehanon, ug gigubot sila; ug sila nangapukan sa atubangan sa Israel. 1 Samuel 7:10