Nehemias KAPITULO 1 1 Ang mga pulong ni Nehemias ang anak nga lalake ni Hachalias. Ug nahitabo sa bulan sa Chisleu, sa ikakaluhaan ka tuig, sa didto ako sa palacio sa Susan, 2 Nga si Hanani, usa sa akong mga igsoon, miabut, siya ug ang pipila ka mga tawo sa Juda; ug ako nangutana kanila mahitungod sa mga Judio nga nakagawas, nga nanghibilin sa pagkabinihag, ug mahitungod sa Jerusalem. 3 Ug sila miingon kanako: Ang salin nga nanghibilin sa pagkabinihag didto sa lalawigan anaa sa dakung kasakitan ug pagkatalamayon: ang kuta sa Jerusalem usab nalumpag, ug ang mga ganghaan niini nangasunog sa kalayo. 4 Ug nahitabo, sa pagkadungog ko niining mga pulonga, nga ako milingkod ug mihilak, ug nagbalata sa pila ka adlaw, ug nagpuasa, ug nag-ampo sa atubangan sa Dios sa langit, 5 Ug miingon: Ako nangamuyo kanimo, Oh Jehova nga Dios sa langit, ang daku ug makalilisang nga Dios, nga nagabantay sa tugon ug sa kalooy alang kanila nga nahigugma kaniya ug nagabantay sa iyang mga sugo: 6 Pamatii karon ang imong igdulungog, ug bukha ang imong mga mata, aron mapatalinghugan mo ang pag-ampo sa imong alagad, nga akong giampo sa imong atubangan karon, adlaw ug gabii, alang sa mga anak sa Israel nga imong mga alagad, ug isugid ang mga sala sa mga anak sa Israel, nga kami nakasala batok kanimo: ako ug ang balay sa akong amahan nakasala. 7 Kami nagbuhat sa pagkadautan gayud batok kanimo, ug wala magbantay sa mga sugo, ni sa kabalaoran, ni sa mga tulomanon, nga imong gisugo sa imong alagad nga si Moises. 8 Hinumdumi, nangaliyupo ako kanimo, ang pulong nga imong gisugo sa imong alagad nga si Moises, nga nagaingon: Kong kamo makalapas, pagapatlaagon ko kamo ngadto sa halayo sa taliwala sa mga nasud; 9 Apan kong kamo mobalik kanako, ug magabantay sa akong mga sugo, ug magabuhat kanila; bisan pa diha kaninyo ang gisalibay ngadto sa kinatumyan sa langit, apan tigumon ko sila gikan didto, ug dad-on ko sila ngadto sa dapit nga akong gipili aron ibutang ang akong ngalan didto. 10 Karon kini mao ang imong mga alagad ug ang imong katawohan, nga imong gitubos pinaagi sa imong dakung gahum, ug pinaagi sa imong kusgan nga kamot. 11 Oh Ginoo, ako nangaliyupo kanimo, patalinghugi karon ang imong igdulungog sa pag-ampo sa imong alagad, ug sa pag-ampo sa imong mga alagad, nga nagtinguha sa pagkahadlok sa imong ngalan: ug pagmauswagon, ako nangaliyupo kanimo, nga imong alagad niining adlawa, ug hatagi siya ug kalooy sa panan-aw niining tawhana. Kay ako mao ang magtitiing sa hari. KAPITULO 2 1 Ug nahitabo sa bulan sa Nisan, sa ikakaluhaan ka tuig ni Artajerjes nga hari, nga ang vino diha sa iyang atubangan: ug akong gikuha ang vino, ug gihatag kini sa hari. Karon wala pa ako maguol kaniadto sa iyang atubangan.
2 Busa ang hari miingon kanako: Ngano nga ang imong nawong masulob-on, sanglit nga ikaw dili masakiton? kini walay lain kondili kasubo sa kasingkasing. Unya nahadlok kaayo ko, 3 Ug siya miingon sa hari: Hinaut nga ang hari mabuhi sa walay katapusan: ngano nga ang akong nawong dili masubo, sa diha nga ang ciudad, ang dapit sa mga lubnganan sa akong mga amahan, nangagun-ob, ug ang mga ganghaan niini nangasunog sa kalayo? 4 Unya ang hari miingon kanako: Unsay imong gipangayo? Busa nag-ampo ako sa Diyos sa langit. 5 Ug ako miingon sa hari: Kong kini makapahimuot sa hari, ug kong ang imong alagad nakakaplag ug kalooy sa imong mga mata, nga ikaw magpadala kanako ngadto sa Juda, ngadto sa ciudad sa mga lubnganan sa akong mga amahan, aron akong matukod kini. 6 Ug ang hari miingon kanako, (ang reina usab naglingkod tupad kaniya,) Unsa kadugay ang imong panaw? ug kanusa ka mobalik? Busa kini nakapahimuot sa hari sa pagpadala kanako; ug gitakda ko siya ug panahon. 7 Labut pa ako miingon sa hari: Kong kini makapahimuot sa hari, pahatagi ako ug mga sulat ngadto sa mga gobernador unahan sa Suba, aron ilang ihatud ako hangtud nga ako makaabut sa Juda; 8 Ug usa ka sulat ngadto kang Asaph ang magbalantay sa kalasangan sa hari, aron siya mohatag kanako ug kahoy aron himoong mga sagbayan alang sa mga ganghaan sa palasyo nga iya sa balay, ug alang sa kuta sa siyudad, ug alang sa balay nga akong pagasudlan. Ug ang hari naghatag kanako, sumala sa maayong kamot sa akong Dios nga ania kanako. 9 Unya miadto ako sa mga gobernador unahan sa Suba, ug gihatag kanila ang mga sulat sa hari. Karon ang hari nagpadala ug mga kapitan sa kasundalohan ug mga magkakabayo uban kanako. 10 Sa diha nga si Sanballat ang Horonhanon, ug si Tobias ang alagad, ang Ammonhanon, nakadungog niini, kini nakapaguol kanila sa hilabihan gayud nga may miabut nga usa ka tawo aron sa pagpangita sa kaayohan sa mga anak sa Israel. 11 Busa ako miadto sa Jerusalem, ug didto ako sa totolo ka adlaw. 12 Ug ako mibangon sa pagkagabii, ako ug ang pipila ka mga tawo uban kanako; ni magsugilon ako kang bisan kinsa nga tawo kong unsa ang gibutang sa akong Dios sa akong kasingkasing nga pagabuhaton didto sa Jerusalem: ni may bisan unsa nga mananap uban kanako, gawas sa mananap nga akong gisakyan. 13 Ug ako migula sa kagabhion agi sa ganghaan sa walog, bisan atubangan sa atabay sa dragon, ug ngadto sa pantalan sa kinalibang, ug mitan-aw sa mga kuta sa Jerusalem, nga nangalumpag, ug ang mga ganghaan niini nangasunog sa kalayo. 14 Unya miadto ako sa ganghaan sa tuburan, ug ngadto sa linaw sa hari: apan walay dapit nga kaagian sa mananap nga diha sa ilalum nako. 15 Unya mitungas ako sa pagkagabii haduol sa sapa, ug gitan-aw ko ang kuta, ug mibalik, ug misulod sa ganghaan sa walog, ug sa ingon niana mibalik. 16 Ug ang mga punoan wala mahibalo kong asa ako paingon, kun unsay akong gibuhat; ni wala pa ako makasugilon niini sa mga Judio, ni sa mga sacerdote, ni sa