Daniel KAPITULO 1 1 Sa ikatolo ka tuig sa paghari ni Joacim nga hari sa Juda, si Nabucodonosor nga hari sa Babilonia miadto sa Jerusalem, ug gilibutan kini. 2 Ug si Jehova nagtugyan kang Joacim nga hari sa Juda ngadto sa iyang kamot, uban ang usa ka bahin sa mga sudlanan sa balay sa Dios: nga iyang gidala ngadto sa yuta sa Shinar ngadto sa balay sa iyang dios; ug iyang gidala ang mga sudlanan ngadto sa balay nga tipiganan sa iyang dios. 3 Ug ang hari misulti kang Aspenaz, ang agalon sa iyang mga eunuco, nga iyang dad-on ang pipila sa mga anak sa Israel, ug sa kaliwat sa hari, ug sa mga principe; 4 Mga anak nga walay buling, apan maayo ang pabor, ug batid sa tanang kaalam, ug batid sa kahibalo, ug pagsabot sa siyensiya, ug ang ingon nga adunay katakos diha kanila sa pagbarog sa palasyo sa hari, ug kang kinsa sila makatudlo sa kinaadman ug sa pinulongan sa mga Caldeanhon. 5 Ug ang hari nagtudlo kanila ug usa ka adlaw-adlaw nga balon sa kalan-on sa hari, ug sa vino nga iyang ginainum: sa ingon nagpakaon kanila sa totolo ka tuig, nga sa katapusan niana sila makatindog sa atubangan sa hari. 6 Karon sa taliwala niini mao ang mga anak ni Juda, si Daniel, si Hananias, si Misael, ug si Azarias: 7 Nga kaniya ang principe sa mga eunuco mihatag ug mga ngalan: kay iyang gihatag kang Daniel ang ngalan nga Beltsasar; ug kang Hananias, kang Sadrach; ug kang Misael, kang Mesach; ug kang Azarias, sa Abednego. 8 Apan gituyo ni Daniel sa iyang kasingkasing nga dili niya paghugawan ang iyang kaugalingon sa bahin sa kalanon sa hari, ni sa vino nga iyang ginainum: busa siya mihangyo sa principe sa mga eunuco nga dili niya hugawan ang iyang kaugalingon. 9 Karon ang Dios midala kang Daniel ngadto sa pabor ug malumo nga gugma uban sa principe sa mga eunuco. 10 Ug ang principe sa mga eunuco miingon kang Daniel: Nahadlok ako sa akong ginoong hari, nga nagbuot sa inyong kalan-on ug sa inyong ilimnon; unya himoon ninyo ako nga ibutang sa peligro ang akong ulo ngadto sa hari. 11 Unya miingon si Daniel kang Melzar, nga gibutang sa principe sa mga eunuco ibabaw kang Daniel, Hananias, Misael, ug Azarias, 12 Sulayi ang imong mga alagad, nangaliyupo ako kanimo, sa napulo ka adlaw; ug pahatagi sila kanato ug pulso nga atong kan-on, ug tubig nga imnon. 13 Unya himoa nga ang among mga nawong makita sa imong atubangan, ug ang nawong sa mga bata nga nagakaon sa bahin sa kalan-on sa hari: ug sumala sa imong nakita, buhata ang imong mga alagad. 14 Busa siya miuyon kanila niining butanga, ug nagsulay kanila sulod sa napulo ka adlaw. 15 Ug sa katapusan sa napulo ka adlaw ang ilang mga nawong nakita nga labi pang matahum ug labing tambok sa unod kay sa tanang mga bata nga nangaon sa bahin sa kalan-on sa hari. 16 Sa ingon si Melzar mikuha sa bahin sa ilang pagkaon, ug sa bino nga ilang pagaimnon; ug gihatagan sila sa pulso.
17 Mahitungod niining upat ka mga anak, ang Dios naghatag kanila ug kahibalo ug kahanas sa tanang kahibalo ug kaalam: ug si Daniel may salabutan sa tanang mga panan-awon ug mga damgo. 18 Karon sa katapusan sa mga adlaw nga giingon sa hari nga iyang pasudlon sila, unya ang principe sa mga eunuco midala kanila sa atubangan ni Nabucodonosor. 19 Ug ang hari nakigsulti kanila; ug taliwala kanilang tanan walay hingkaplagan nga sama kang Daniel, Hananias, Misael, ug Azarias: busa sila nanagtindog sa atubangan sa hari. 20 Ug sa tanang mga butang sa kaalam ug pagsabut, nga gipangutana sa hari kanila, iyang nakita nga sila labing maayo sa napulo ka pilo kay sa tanang mga mago ug mga astrologo nga diha sa tibook niya nga gingharian. 21 Ug si Daniel mipadayon bisan hangtud sa nahaunang tuig ni hari Ciro. KAPITULO 2 1 Ug sa ikaduhang tuig sa paghari ni Nabucodonosor, si Nabucodonosor nagdamgo ug mga damgo, diin ang iyang espiritu nasamok, ug ang iyang pagkatulog mibulag gikan kaniya. 2 Unya ang hari nagsugo sa pagpatawag sa mga mago, ug sa mga astrologo, ug sa mga salamangkiro, ug sa mga Caldeahanon, aron sa pagpahayag sa hari sa iyang mga damgo. Busa sila nangadto ug mingtindog sa atubangan sa hari. 3 Ug ang hari miingon kanila: Ako nagdamgo ug usa ka damgo, ug ang akong espiritu nasamok sa pagpakisayud sa damgo. 4 Unya ang mga Caldeahanon mingsulti sa hari sa pinulongan nga Siriahanon: Oh hari, mabuhi ka sa walay katapusan: isulti sa imong mga alagad ang damgo, ug kami magasaysay sa kahulogan. 5 Ang hari mitubag ug miingon sa mga Caldeahanon: Ang butang mipahawa gikan kanako: kong kamo dili magpahibalo kanako sa damgo, uban sa kahulogan niini, kamo pagati-onon, ug ang inyong mga balay himoon nga usa ka pundok sa kinalibang. 6 Apan kong igapahayag ninyo ang damgo, ug ang kahulogan niini, makadawat kamo gikan kanako ug mga gasa ug mga balus ug dakung dungog: busa ipahayag kanako ang damgo, ug ang kahulogan niini. 7 Sila mingtubag pag-usab ug ming-ingon: Ipasugilon sa hari sa iyang mga alagad ang damgo, ug kami magasaysay sa kahulogan niini. 8 Ang hari mitubag ug miingon: Ako nahibalo sa pagkatinuod nga kamo buot mogahin ug panahon, tungod kay nakita ninyo nga ang butang nawala gikan kanako. 9 Apan kong kamo dili magpahibalo kanako sa damgo, adunay usa lamang ka sugo alang kaninyo: kay kamo nagandam ug bakak ug malimbongon nga mga pulong nga igasulti sa akong atubangan, hangtud nga ang panahon mausab: busa isulti kanako ang damgo, ug ako makaila nga kamo makapahayag kanako sa kahulogan niana. 10 Ang mga Caldeanhon mitubag sa atubangan sa hari, ug miingon: Walay usa ka tawo sa ibabaw sa yuta nga makapahayag sa butang sa hari: busa walay hari, ginoo, ni punoan, nga nangutana sa maong mga butang sa bisan kinsa nga mago, kun astrologo, kun Caldeanhon.