1 Mga Hari KAPITULO 1 Karon ang hari nga si David tigulang na ug hataas na ang panuigon; ug ilang gitabonan siya sa mga saput, apan siya wala mainit. 2 Busa ang iyang mga alagad miingon kaniya: Pangitaon unta ang akong ginoong hari ug usa ka batan-ong ulay: ug patindoga siya sa atubangan sa hari, ug paalimaha siya kaniya, ug pahigdaa siya sa imong sabakan, aron ang akong ginoong hari mahimong mainiton. 3 Busa sila nangita ug usa ka maanyag nga dalaga sa tibook nga utlanan sa Israel, ug nakakaplag kang Abisag nga Sunamitanhon, ug gidala siya ngadto sa hari. 4 Ug ang dalaga maanyag kaayo, ug nag-amoma sa hari, ug nag-alagad kaniya: apan ang hari wala makaila kaniya. 5 Unya si Adonia ang anak nga lalake ni Haggith nagpadaku sa iyang kaugalingon, nga nagaingon: Ako mahimong hari: ug siya nag-andam alang kaniya ug mga carro ug mga magkakabayo, ug kalim-an ka tawo sa pagdalagan sa unahan niya. 6 Ug ang iyang amahan wala magpasuko kaniya sa bisan unsang panahon sa pag-ingon: Nganong nagbuhat ka sa ingon? ug siya usab usa ka maayo kaayo nga tawo; ug ang iyang inahan nanganak kaniya sunod kang Absalom. 7 Ug siya nakigsabut kang Joab ang anak nga lalake ni Sarvia, ug kang Abiathar ang sacerdote: ug sila nga mingnunot kang Adonia mingtabang kaniya. 8 Apan si Sadoc ang sacerdote, ug si Benaia ang anak nga lalake ni Joiada, ug si Nathan ang manalagna, ug si Semei, ug si Rei, ug ang mga gamhanang tawo nga iya ni David, wala uban kang Adonia. 9 Ug si Adonia nag-ihaw ug mga carnero ug mga vaca ug mga pinatambok nga mga vaca tupad sa bato sa Zoheleth, nga haduol sa Enrogel, ug gitawag ang tanan niyang mga igsoon nga mga anak nga lalake sa hari, ug ang tanang mga tawo sa Juda nga mga alagad sa hari; 10 Apan si Nathan ang manalagna, ug si Benaia, ug ang mga gamhanang tawo, ug si Salomon nga iyang igsoon, wala niya tawga. 11 Busa si Nathan misulti kang Bath-sheba ang inahan ni Salomon, nga nagaingon: Wala ba ikaw makadungog nga si Adonia ang anak nga lalake ni Haggith nagahari, ug si David nga atong ginoo wala mahibalo niini? 12 Busa karon umari ka, tugoti ako, nangaliyupo ako kanimo, nga maghatag kanimo ug tambag, aron imong maluwas ang imong kaugalingong kinabuhi, ug ang kinabuhi sa imong anak nga si Salomon. 13 Lakaw ug umadto ka kang hari David, ug ingna siya: Wala ba ikaw, ginoo ko, Oh hari, nanumpa sa imong sulogoon nga babaye, nga nagaingon: Sa pagkamatuod si Salomon nga imong anak nga lalake magahari sunod kanako, ug siya molingkod sa akong trono? Ngano man diay nga si Adonia naghari? 14 Ania karon, samtang nga nagasulti pa ikaw didto uban sa hari, ako usab mosulod sunod kanimo, ug magapamatuod sa imong mga pulong. 15 Ug si Bath-sheba misulod ngadto sa hari didto sa lawak: ug ang hari tigulang na kaayo; ug si Abisag ang Sunamitanhon nag-alagad sa hari.
16 Ug si Bath-sheba miyukbo, ug mihatag katahuran sa hari. Ug ang hari miingon: Unsay buot mo? 17 Ug siya miingon kaniya: Ginoo ko, ikaw nanumpa pinaagi kang Jehova nga imong Dios sa imong ulipon nga babaye, nga nagaingon: Sa pagkamatuod si Salomon nga imong anak nga lalake magahari sunod kanako, ug siya molingkod sa akong trono. 18 Ug karon, tan-awa, si Adonias naghari; ug karon, ginoo ko nga hari, ikaw wala mahibalo niini: 19 Ug siya nakaihaw ug mga vaca ug mga pinatambok nga mga baka ug mga carnero sa tinagdaghan, ug nagtawag sa tanang mga anak nga lalake sa hari, ug kang Abiathar nga sacerdote, ug kang Joab ang capitan sa panon: apan si Salomon nga imong alagad wala niya tawga. 20 Ug ikaw, ginoo ko, Oh hari, ang mga mata sa tibook Israel anaa kanimo, aron sultihan mo sila kong kinsa ang molingkod sa trono sa akong ginoong hari sunod kaniya. 21 Kay kon dili kini mahitabo, sa diha nga ang akong ginoong hari matulog uban sa iyang mga amahan, nga ako ug ang akong anak nga si Salomon pagaisipon nga mga sad-an. 22 Ug, ania karon, samtang nakigsulti pa siya sa hari, si Nathan nga manalagna misulod usab. 23 Ug ilang gisuginlan ang hari, nga nagaingon: Ania karon, si Nathan ang manalagna. Ug sa paghiadto niya sa atubangan sa hari, siya miyukbo sa atubangan sa hari uban ang iyang nawong ngadto sa yuta. 24 Ug si Nathan miingon: Ginoo ko, Oh hari, nag-ingon ba ikaw: Si Adonia magahari sunod kanako, ug siya molingkod sa akong trono? 25 Kay milugsong siya niining adlawa, ug nakaihaw ug mga vaca ug mga pinatambok nga mga vaca ug mga carnero sa tinagdaghan, ug nagtawag sa tanang mga anak nga lalake sa hari, ug sa mga capitan sa panon, ug kang Abiathar ang sacerdote; ug, ania karon, sila nangaon ug nanginum sa atubangan niya, ug nanag-ingon: Mabuhi ang hari nga si Adonia. 26 Apan ako, bisan ako nga imong alagad, ug si Sadoc ang sacerdote, ug si Benaia ang anak nga lalake ni Joiada, ug ang imong alagad nga si Salomon, wala niya tawga. 27 Kini ba nga butanga gibuhat sa akong ginoong hari, ug ikaw wala magpakita niini sa imong alagad, kong kinsa ang molingkod sa trono sa akong ginoong hari sunod kaniya? 28 Unya ang hari nga si David mitubag ug miingon: Tawga kanako si Bath-sheba. Ug siya miadto sa atubangan sa hari, ug mitindog sa atubangan sa hari. 29 Ug ang hari nanumpa, ug miingon: Ingon nga si Jehova buhi, nga nagluwas sa akong kalag gikan sa tanang kalisdanan, 30 Ingon nga ako nanumpa kanimo pinaagi kang Jehova, ang Dios sa Israel, nga nagaingon: Sa pagkamatuod si Salomon nga imong anak nga lalake magahari sunod kanako, ug siya molingkod sa akong trono ilis kanako; mao usab ang akong pagabuhaton niining adlawa. 31 Unya si Bath-sheba miyukbo uban ang iyang nawong ngadto sa yuta, ug mihatag ug katahuran sa hari, ug miingon: Mabuhi ang akong ginoong hari nga si David sa walay katapusan. 32 Ug ang hari nga si David miingon: Tawga kanako si Sadoc ang sacerdote, ug si Nathan nga manalagna, ug si Benaia ang anak nga lalake ni Joiada. Ug sila miadto sa atubangan sa hari.