Batak Toba - The Book of Jude

Judas BINDU 1 1 Sian si Judas, naposo ni Jesus Kristus jala anggi ni si Jakobus, mandapothon angka na pinabadia ni Debata Ama i, jala na niondingan ni Jesus Kristus. 2 Sai lam ganda ma di hamu asi ni roha dohot dame dohot holong ni roha. 3 Hamu angka haholongan, nang pe marsitutu ahu manurathon tu hamu taringot tu haluaon na taadopi, alai ringkot do ahu manurat tu hamu laho mangapoi hamu, asa marsitutu hamu mamparjuanghon haporseaon naung sahali dipasahat tu angka na badia. 4 Ai adong do deba halak na bongot tu bagasan, naung ditontuhon hian tu nasida uhuman on, angka halak na so daulat, na pabalikhon asi ni roha ni Debata gabe ulaon na rorang jala na mansoadahon Tuhanta na sasada i, i ma Tuhanta Jesus Kristus. 5 Dibahen i naeng ma paingotonku hamu, nang pe naung tangkas diboto hamu i, naung dipalua Tuhan i bangso i sian tano Misir, alai dilengsehon do angka na so porsea. 6 Jala angka surusuruan, angka na so mangaradoti hajongjongannasida na parjolo i, na manadingkon inganannasida sandiri, diramoti Ibana do di bagasan rante saleleng ni lelengna di bagasan haholomon, paima uhum di ari bolon i. 7 Songon Sodom dohot Gumora ro di angka huta na humaliang nasida, angka na mangulahon parmainanon dohot daging sileban, dipajongjong do nasida gabe tiruan, ala manaon uhum tu api na so ra mintop. 8 Songon i ma nang angka parnipi na ramun on, diramuni do dagingna, dileai do panggomgomion, jala dileai angka na sangap. 9 Alai uju marbadai si Mikael, sintua ni surusuruan i dohot Sibolis taringot tu bangke ni si Musa, ndang barani ibana mandok hata na mangaleai, ai didok do: Dipinsang Tuhan i ma ho! 10 Alai dileai nasida do angka na so binotonasida, alai na binotonasida sian dagingna, songon binatang na so marroha, i do dibahen nasida manegai dirina. 11 Marjea ma nasida! Ai diihuthon nasida do dalan ni si Kain, jala dieahi nasida haliluon ni si Bileam, ala ni si Kor. 12 Nasida do angka rindang di angka pesta holong ni rohamuna, tingki rap marpesta nasida dohot hamu, ndang mabiar nasida marmahan dirina. angka hau na malos parbuena, na so marparbue, na mate dua hali, naung dibutbut sian uratna; 13 Galumbang ni laut na margaor, na margubogubo di hailaonnasida; angka bintang na lilu do nasida, disimpan do di nasida haholomon na holom ro di saleleng ni lelengna. 14 Alai dohot do si Henok, na papituhon sian si Adam, manurirangi taringot tu nasida, ninna ma: Na ro ma Tuhan i rap dohot angka na badia na marriburibu. 15 Laho mandabuhon uhum tu saluhut halak jala mangaluhon saluhut halak na so daulat di tongatonga nasida taringot tu saluhut ulaonnasida na jahat, angka na niulahonnasida na jahat dohot taringot tu saluhut hata na garang, angka na hinatahon ni angka pardosa na jahat dompak Ibana. 16 Nasida ma angka parmungutmungut, parungutungut, na mangihuthon hisaphisap ni rohanasida; jala dihatahon pamangannasida do hata na balga, jala dihatahon nasida do bohi ni jolma, ala ni hasurungan. 17 Alai, hamu angka dongan na hinaholongan, ingot hamu ma hata na hinatahon ni angka apostel ni Tuhanta Jesus Kristus najolo. 18 Nunga dipaboa nasida tu hamu, adong ma angka pangarehei di tingki parpudi, angka na mangihuthon hisaphisap ni nasida na so daulat. 19 I ma angka na manirang dirina, parroha ni daging, na so martondi di nasida. 20 Alai anggo hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang ma hamu di bagasan Tondi Parbadia. 21 Sai tongtong ma hamu di bagasan holong ni roha ni Debata, huhut paimahon asi ni roha ni Tuhanta Jesus Kristus tu hangoluan na saleleng ni lelengna. 22 Jala marasi ni roha ma hamu tu na deba, bahen hamu ma imbar. 23 Jala na deba nari, palua hamu ma nasida mardongan biar; manghasogohon nang abit na hona ramun ni daging. 24 Alai tu Ibana do na marhuaso mangaramoti hamu asa unang madabu jala pajongjonghon hamu so martihas tu adopan ni hasangaponna mardongan las ni roha na sumurung. 25 Di Debata na sasada i, Sipalua hita, hasangapon dohot hamuliaon, harajaon dohot hagogoon, sian saonari ro di saleleng ni lelengna. Amen.