IslaOnline 5 September 2023

SEPTEMBER TA E LUNA DI CONSIENTISACION

NACIONAL DI E MALESA ALZHEIMER

Luna di September ta conoci pa ta e luna di conscientisacion nacional di e malesa Alzheimer. Prome Minister Evelyn Wever-Croes a splica, cu Alzheimer ta un malesa cruel, cu no solamente tin un impacto grandi riba esnan cu ta sufri di e malesa, sino riba tur esnan cu ta rond di dje, y cu ta stime. E ta normal cu un persona na un edad halto ta cuminsa lubida y ripiti cosnan, pero lamentablemente un persona cu ta sufri di Alzheimer no solamente ta lubida cierto actividadnan den su bida, sino tambe ken ta su sernan keri.

E ta sumamente importante pa para keto na e malesa di Alzheimer, na tur esnan cu ta sufri di dje, y na esnan cu ta cuida di e pashentnan aki. Unabes un persona cuminsa sufri di

e malesa aki, ta manera un despedida e persona ta tumando poco poco di bida. Esaki sigur ta un golpi duro pa esnan mas serca di e pashent, specialmente ora un mama no por corda mas ken ta su yiunan.

Prome Minister Evelyn Wever Croes ta gradici tur esnan cu ta traha cu personanan cu tin Alzheimer, pa nan pasenshi y dedicacion na e pashentnan aki. Tambe ta gradici Fundacion Alzheimer Aruba y tur otro fundacion cu ta ofrece informacion y ayudo valioso di e malesa aki na comunidad. Pa Gabinete Wever-Croes, bienestar general ta un prioridad, y pesey ta purba di tur manera pa yuda tur esnan cu ta sufri di e malesa aki, y nan famianan.

"Gobierno tin tur atencion pa cu e malesa aki, y ta purba yuda esnan cu alzheimer y nan famianan"

Prome Minister Evelyn Wever-Croes: PROME MINISTER A ATENDE E PROME

CONGRESO DI FAMIA; "CENDE E CHISPA DI BO RELACION"

Diadomingo ultimo, a tuma luga na Renaissance Convention Center, pa prome biaha, un congreso special pa pareha yama "Cende e Chispa di bo Relacion". E congreso importante aki a wordo organisa pa Comision Vision Pedagogico, consistiendo di Departamento di Asuntonan Social, Centro pa Hoben y Famia, Fundacion pa Nos Muchanan, Stichting Wit Gele Kruis, Fundacion Respeta Mi y Tienda di Educacion. Como invitado special, Prome Minister Evelyn Wever-Croes tabata tin e oportunidad di dirigi su mes na e publico, na unda el a gradici e organisadornan pa su invitacion.

Durante su discurso, Prome Minister a indica cu un prioridad di Gabinete Wever-Croes ta e bienestar di nos muchanan, y pa nan por lanta den un ambiente sigur y amoroso, ta importante pa e mayornan ta bon cu otro. El a a splica cu famia ta e prome fundeshi di socialisacion den bida di e muchanan, y ta hunga un rol decisivo den e mucha su desaroyo. Un mucha chikito ta orienta y ripiti accionnan cu e ta mira, y experimenta den entorno familiar. Comportacion di un mucha ta wordo mayoria bes influencia pa su mayornan, p’esey ta importante pa un mayor percura cu e ambiente na unda e mucha ta lanta, ta di confiansa y proteccion, contribuyendo asina na formacion di un personalidad fuerte, sano, empatico y resiliente cerca e mucha. Ora ta lanta un mucha, den un ambiente cu tin insiguridad y violencia, esaki lo por conduci e mucha na lanta cu un actitud agresivo y cu poco auto-estima. P’esey ta importante pa mayornan semper brinda un clima familiar di calidad, na unda e mucha por desenvolve cu naturalidad su personalidad y carácter.

Un di e retonan mas grandi den mayoria relacion, ta comunicacion. Importante ta pa no djies papia di comunicacion sino di comunicacion asertivo, cu ta un herment ideal pa

aumenta e capacidad di comunica cu eficacia. Un persona cu comunicacion asertivo por expresa su emocionnan y ideanan tanto negativo como positivo den un forma directo, honesto, empatico, respetuoso sin huzga of culpa otro. Sinembargo, mirando tur beneficio cu comunicacion asertivo tin, ta importante pa enfoca pa crea ciudadanonan asertivo cu ta autentico y cu tin curashi, personanan compasivo y bondadoso, cu ta acepta su erornan y ta respeta e postura di otro aunke e no ta comparti su pensamento. P’esey ta fundamental pa cuminsa desaroya e habilidadnan asertivo cerca un ciudadano, cuminsando for di su infancia.

Finalmente, Prome Minister a invita pueblo di Aruba pa uni y ban hunto inculca e respet na otro y na nos mes, promoviendo asina un cultura di comunicacion, y creando personanan asertivo for di chikito. "Un famia y comunidad ta proporciona e balornan cu ta keda pa bida completo. Un famia uni y yena di amor ta e luho di mas grandi cu un mucha por tin,ooo" Prome Minister a expresa.

"Un famia y comunidad uni, yena di amor, ta e luho di mas grandi cu un mucha por tin"

MINISTER URSELL ARENDS TA SIGURA

Diabierna ultimo Minister Arends a presenta na un reunion cu a wordo organisa door di piscadonan na Spaans Lagoen, encuanto e preocupacionnan cu fishfarming of tambe yama Aquacultura na Aruba.

Ta asina cu den media tanto local como internacional a wordo publica cu "inversionistanan a sigura permiso caba pa construi criadero di pesca riba lama cerca di Aruba".

Minister Arends mesora a cuminsa haya mensahenan di piscadonan concerni cu e malinformacion aki mirando cu nan ta di opinion cu e lo tin conscecuencia devastador pa nan pan di cada dia.

Den transcurso di diahuebs anochi e piscadonan a dicidi pa haci un reunion entre nan pa atende cu e noticia aki. Aunke ta di aprecia con piscadonan ta uniendo mas, e ta un lastima cu e ta pa motibo di malinformacion cu ta trece discordia innecesario. Minister Arends a tuma e oportunidad pa puntra prensa presente cu si nan a purba acerc'e y verifica prome cu a publica e noticia, y asina purba pa haya e otro banda di medaya.

Durante Minister Arends su splicacion e la menciona cu tur e asunto di “aquaculture” e yega cerca dje pa prome biaha door di un concepto di MoU. E concepto pa cual su persona y Minister di Economia, Sr. Geoffrey Wever lo por a firma cu e compania. Na momento di e ricibi e concepto aki mesora e la pidi advies di departamentonan concerni na unda tur 4 di nan a bin negativo. Teniendo na cuenta e advies di Fundacion Parke Nacional Aruba, Directie Natuur en Milieu, Directie Scheepvaart y Santa Rosa ta hacie iresponsabel pa firma e

MoU cu e inversionista. Tambe e minister ta menciona cu e opcion pa por a haya permiso ta mara na condicionnan cu no a cumpli cu ne, y tur es tempo esaki a caduca tambe.

Pa conclui Minister Arends ta enfatisa cu ta importante pa kibra noticia falso(break the fake), y verifica cu e informacion cu ta comparti ta corecto. Ta pa es motibo mes e la presenta e anochi di reunion pa duna claridad na piscadonan ariba e proceso di e MoU, e peticion di permiso como tambe ariba e carta cu Minister Arends hunto cu Mininster Wever a manda na e inversionista Petros Aquaculture Operations VBA. E carta ta informa e inversionista cu e mester cumpli cu tur ley y reglamento di Aruba entre otro tambe provee un raportahe di e impacto ambiental di nan proyecto.

"Na momento cu presenta plan of proposicion cu ta toca e sector di pesca cerca e Ministerio, mi lo trece esaki cerca e piscadonan manera a bin ta haci, trahando cu pueblo, pa pueblo." - Minister Ursell Arends

Minister Maduro di Finansa ta informa:

PARLAMENTO TA APROBA E PROME

PRESUPUESTO SUPLETORIO PA AÑA 2023 MAS

TEMPRAN DEN E AÑA PRESUPUESTARIO

Dialuna Parlamento di Aruba a aproba Presupuesto Supletorio 2023 di Pais Aruba. Esaki ta e prome biaha cu Minister di Finansa ta presenta un Nota di Comienso di Aña y hunto cune un Presupuesto Supletorio cu ta introduci cambionan den Presupuesto 2023 mas tempran den e aña presupuestario. E cambio aki ta beneficia e 'budgetrecht' di Parlamento di Aruba.

UN NOVUM PA MAS TRANSPARENCIA

Ta pa prome biaha na Aruba cu un Minister di Finansa ta entrega un Nota di Comienso di Aña na Parlamento. E novum aki den nos finansa publico ta pa asina Parlamento por ta miho informa di cualkier cambio den e maneho di gobernacion desde un momento hopi tempran den aña. Cu e conocemento aki Parlamento por haci un miho uzo di nan 'budgetrecht' pa propone of aproba cualkier cambio. Haciendo uzo di un Nota di Comienso di Aña, Gobierno ta brinda mas transparencia financiero na Parlamento y Pueblo en general. E novum aki sigur ta contribui na un mehoracion di e ciclo presupuestario di Aruba.

CONTENIDO PRESUPUESTO SUPLETORIO 2023

Debi cu algun cambio den maneho ta resulta den cambio

financiero, e Nota di Comienso di Aña ta wordo compaña pa un Presupuesto Supletorio pa asina pidi Parlamento aprobacion pa e cambio den e cifranan den Presupuesto 2023. E Presupuesto Supletorio ta conta cu e projeccion di crecemento economico nobo publica recientemente pa Departamento Economico, ta integra fondonan cu nos ta haya di Hulanda pa ehecuta proyectonan di Landspakket den presupuesto di Pais Aruba y ta refleha e decentralisacion di e gastonan di utilidad bou di cada ministerio. Cambionan cu ta resalta ta, por ehempel, fondonan cu ta wordo realoca di Ministerio di Finansa pa Ministerio di Enseñansa pa asina por hisa e 'normbedrag' cu ta e suma cu scolnan ta haya pa por inverti den enseñansa. For di Ministerio di Enseñansa fondonan ta wordo realoca pa Ministerio di Asunto Social pa asina Cas Blenchi y Cas Briyante di nos hendenan cu limitacion por keda den funcion.

PRESUPUESTO CU 1% DI SURPLUS

Ta importante pa remarca cu aunke ta haci cambio na e Presupuesto 2023, toch resultado financiero ta keda mesun cos, cu un surplus 1% di GDP. E ultimo aki ta importante, ya cu despues di hopi aña Aruba ta conta cu un presupuesto cu un surplus.

Minister Xiomara Maduro:

“ARUBA A BIBA SU CULTURA YEN DI

AMBIENTE CU UN BUNITA PARADA CULTURAL DI DIA DI BRAZIL 2023”

Diadomingo ultimo Fundacion Chico Harms y comision un biaha mas a organisa e parada cultural enconexion cu Dia di Brazil. Minister Xiomara Maduro tabata presente pa sostene e bunita parada cultural cu cada aña ta creciendo. Un bunita parada y bon organisa, cu a conta cu Gruponan di baile y folclorico, reinanan cultural y musica cu a dorna y trece ambiente den e cayanan di Brazil pa asina un y tur por a biba y disfruta di nos cultura.

Danki special na scolnan di Brazil acompaña pa Myron Disco, Brazil den cunucu, Fundacion Rosea Cultural, Tanchi Netty acompaña pa Grupo Luis Maduro y Zonido di Antaño, Fundacion Bernadina Growell acompaña pa Frans Disco, Flota di Pilar Cultural, Matilda Paskel acompaña pa Caha di Orgel Melodia di Antaño, Noord bin fiesta acompaña pa Alvin Disco, Flota Fundacion Pro Cultura, Candy Dancers, Sonrisa, Trampolin acompaña pa disco, Gucci Dancers acompaña pa Rincon Boys, Alegria di Nos Culura acompaña pa Alma Folklorico, Grupo Antaño acompaña pa Un Brindis, Sembra Alegria di Corsou acompaña pa Patrick Disco y Fiesta di Sabana acompaña pa Brisas Tropical.

Danki na e organisacion y na un y tur cu a coopera pa haci e Celebracion Dia di Brazil e aña aki un biaha mas un exito grandi. Tambe danki na tur mirones para na banda di caminda cu a apoya, sostene y disfruta di e Parada Cultural Dia di Brazil 2023. Pabien!

POTRETNAN DI PARADA CULTURAL 2023

POTRETNAN DI PARADA CULTURAL 2023

JGZ TA BAY CUMINSA CU NAN CAMPAÑA

DI VACUNACION ESCOLAR

Diamars atardi Minister di Turismo y Salud Publico sr. Dangui Oduber a reuni cu Seccion Cuido Salud Hubenil (JGZ) na bestuurskantoor. Aki e mandatario a ricibi un presentacion tocante di e campaña di vacunacion escolar y tambe a ricibi e cifranan di e ultimo añanan di vacunacion pa muchanan di Wit Gele Kruis y JGZ mes. JGZ a comparti cu Minister e importancia di e vacuna y con e colaboracion entre JGZ y (WGK) a cana durante e añanan.

JGZ ta parti di Departamento di Salud Publico (DVG) cu ta encarga cu e programa di vacunacion den colabaracion cu WGK, esaki ta algo cu ya pa mas di 70 aña nan haciendo. JGZ tambe ta bishita tur scolnan kleuter y basis pa mas di 50 aña pa asina logra un grado di vacunacion halto na Aruba.

E campaña di vacunacion escolar ta bay inicia y ta importante pa e mayornan concerni ta pendiente pa ricibi e carta informativo via scol di nan yiu. Durante e campaña, JGZ ta ofrece e vacunanan rutinario contra malesanan manera Difteria, Tetanus, Polio, Sarampi, Sarampi Aleman y Cacheton. Pa e mucha muhenan den 6de klas tambe ta ofrece e vacuna di HPV cu ta yuda preveni cancer na boca di matris.

Minister Oduber ta enfatisa cu e campaña escolar ta regarda solamente vacunanan rutinario, cu tambe ta wordo ofrece na Wit Gele Kruis (WGK), e vauna aki no tin nada di haber cu Covid19.

Durante e campaña escolar JGZ ta registra tur vacuna cu muchanan ricibi y por averigua, na inicio di cada aña escolar, cua vacuna muchanan den oudste kleuterklas, klas 5 y klas 6 falta. Minister Oduber ta pidi mayornan cu tin yiu den e klasnan menciona pa keda informa di e campaña di vacunacion na scol y yena e formulario di permiso pa JGZ por duna Bo(so) yiu e vacuna(nan) cu e falta.

Pa mas informacion tuma contacto cu Seccion Cuido Salud Hubenil (JGZ) na 5224200 of sigi e pagina di medio social di Departamento di salud Publico (DVG).

Vacuna escolar 2023, cada vacuna ta conta!

INTERES GRANDI PA CURSO FINANSAS DEN

Awor a toca turno na districto di Noord pa participa na e curso Finansas den mi Hogar. Un curso ofreci gratis na nos ciudadanonan a start riba dialuna, 4 di september, den districto di Noord. E curso financia for di presupuesto di Minister Geoffrey Wever ta reparti over di 4 siman. Durante 4 siman 60 participante lo ricibi e guia y conocemento pa tuma decisionan financiero cu impacto positivo riba nan bienestar. Cada participante lo ricibi material necesario manera entre otro pen, etui y un calculator, y na final tambe un certificado di participacion.

Pa duna un apoyo na nos ciudadanonan riba maneho di finanza, minister Geoffrey Wever hunto cu Fundacion Plan di Bida ta organiza e curso Finansas den mi Hogar den tur districto di Aruba. E interes tabata grandi pa e curso, cual ya caba a ser ofreci den Paradera, Oranjestad, San Nicolas y Savaneta. Ta demostra cu educacion financiero ya no ta un luho mas pero un necesidad. Awor ta toca turno pa districto di Noord pa ricibi e guia y conocemento pa tuma decisionan financiero cu impacto positivo riba nan bienestar.

Un necesidad si tene cuenta cu sondeo di Banco Central di Aruba ta mustra cu di cada 10 hogar, 3 hogar ta gasta mas di nan entrada tur luna. Esaki ta nifica cu tin hogarnan riba nos isla cu cada luna tin e reto di cumpli cu tur necesidad y responsabilidad financiero manera entre otro gasto pa vivienda, cuminda, y prestamonan personal. P'esey ta importante pa duna guia y conocemento pa conscientisa e consumidor, e participante riba e impacto di cada decision financiero riba nos cartera y nos hogar.

Den e prome sesion a enfoca riba con por ta efectivo den cas door di wak con por spaar y cumpra sin emocion. Cu subida di prijsnan internacional di productonan cu ta afecta e prijsnan di nos productonan ta importante cumpra conscientemente y crea e espacio pa spaar maske ta un tiki. Esaki por contribui na sea mas consciente di e balor di cada florin.

"E interes demostra di nos ciudadanonan den districtonan Paradera, San Nicolas, Oranjestad, Savaneta y awor Noord ta mustra cu ta hopi importante pa gobierno facilita e guia y conocemento na nos ciudadanonan y asina duna un contribucion importante na desaroyo personal di cada uno y nos pais", segun Minister Geoffrey Wever.

Minister Geoffrey Wever ta contento di por ofrece e curso aki gratis na nos ciudadanonan y ta desea cada participante hopi exito durante e diferente sesionan cu lo trata topiconan cu lo contribui sin duda na un maneho responsabel di nos cartera.

Minister Geoffrey Wever:

LO TIN 500K EXTRA ALOCA PA SAN NICOLAS PA

INICIA PROYECTO DI REVITALISACION DEN 2023

Awo cu presupuesto supletorio 2023 ta aproba den Parlamento di Aruba, por enfoca riba e proximo pasonan pa termina e aña riba un paso firme. Den reunion publico OV #26 den Parlamento di Aruba, Minister Geoffrey Wever a informa di e diferente plannan den preparacion final pa San Nicolas. Tambe a logra segura 500 mil Florin pa por inicia un ‘soft development’ pa e fin di aña aki caba

E vision ta pa eleva fluho di hende den e ciudad. Den Oranjestad tin proyectonan andando manera den Columbusstraat, y otronan andando of den preparacion manera di Huize Veneranda, Freezone, CBS, Aruba Fair Trade Authority cu ta sigui e mesun vision y strategia pa crea fluho di hende. Tambe

ta fihando posibilidad pa casnan pa studiante. Tambe a toca e tema di siguridad, pa cual minister Wever a menciona di ta contento di e colaboracion inter-ministerial cu ministernan Tjong, Oduber, Arends y su persona, pa eleva seguridad den e area di centro di ciudad, cual ta sostene e vision total.

Pa San Nicolas a papia cu diferente stakeholders pa desaroya un proyecto cu por tin impacto inmediato pa e centro di ciudad, mientras tambe fungi como un prome paso den un plan mas grandi di revitalisacion di e area completo di centro di ciudad a largo plaso.

Despues di varios sondeo y consultacion a logra crea un diseño a base di un concepto cual ta carga aprobacion di diferente stakeholders envolvi. Ta papia di ampliacion di espacio publico, facilidadnan publico, accesibilidad y parkeo, como tambe desaroyo di industria artistico y musical.

Minister Wever a indica cu lo aloca 500 mil Florin e aña aki (2023) pa ‘soft development’ di e proyecto, cual pronto lo ser anuncia. Na e momento aki falta un analisis tecnico di e desaroyo di e area, pero ta spera di por conclui cu esakinan pronto y inicia cu trabounan preparatorio pa e fase 1 di Revitalisacion San Nicolas.

Minister Geoffrey Wever durante OV #26:

CENTRO DI CIUDAD: NOS KIER HACI IMPACTO SIN TIN CU MANCA E BEGROTING DI GOBIERNO

Durante reunion publico den Parlamento di Aruba, Minister Geoffrey Wever a enfoca riba e diferente esfuersonan andando cu focus riba centro di ciudad Oranjestad, como tambe San Nicolas.

Den Oranjestad entre otro a inverti den renobacion di Huize Veneranda. Aunke e trabounan no a inicia ainda, pronto lo mira e groundbreaking. E vision ta pa eleva fluho di hende den e ciudad. Cu e mudamento di Departamento di Asuntonan Economico pa Huize Veneranda, y e mesun idea pa otro proyectonan den e area – manera Freezone, CBS, Aruba Fair Trade Authority – Gobierno di Aruba ta mustra su compromiso pa inverti den crea e atmosfera necesario pa atrae inversion priva den e area.

Renobacion di Columbusstraat y Wilhelminastraat a conoce retrasonan berdad, pero minister a indica cu e inversionnan adicional necesario mester a ser haci pa drecha infrastructura di rioolering bou di tera. Aunke no ta trabou cu hende lo por mira of aprecia, e ta necesario pa a haci e trabounan di reconstruccion di e ‘bakprofiel’ bou tera den e area, prome por a continua trabou ariba di tera. Pronto fase 1 di revitalisacion di e area lo termina, y e area lo por beneficia di e su espacio,

accesibilidad y bunitesa, cual, lo trece balor agrega pa tur compania cercano.

Minister Wever a indica cu lo tin 500 mil Florin extra aloca den presupuesto pa Oranjestad. Originalmente proyecto tabata inclui 3 fase, incluyendo parkeo. Pero pa por segura cu no ta sacrifica e area di parkeo despues cu costonan extra di ‘bakprofiel’ a surgi, a aloca e fondo aki pa por completa cu e proyecto tog den su totalidad, pa asina por tin e balor agrega pa comerciantenan.

“Nos kier haci nos impacto sin tin cu manca e begroting di gobierno.”

Asina Minister Wever a enfatisa durante su discertacion, mirando e impacto di inversionnan plania. Minister Wever a menciona di ta agradecido pa e colaboracion inter-ministerial cu ministernan Tjong, Oduber, Arends y su persona, pa eleva seguridad den e area di centro di ciudad, cual ta sostene e vision total.

“Ta importante pa duna claridad unda nos ta inverti fondonan di Aruba. Mi ta gradici Parlamentarionan pa nan preguntanan”, minister Wever a clausura.

DEN AÑA 2024 TA “RECAP” E PISTA DI

INTERNATIONAL RACEWAY PARK PALO MARGA

Masha pabien na organisadonan cu un exitoso

One Cool Summer Nationals 2023

Recientemente, Minister di Enseñansa y Deporte Endy Croes tabata presente na Palo Marga International Raceway Park, unda cu tabatin careda di One Cool Summer Nationals 2023 tumando luga. Tabatin un publico grandi presente cu a disfruta di cada careda riba e pista di Palo Marga. Durante e evento aki, organisadonan a reconoce tres (3) baluarte cu a traha hopi duro pa e deporte di drag race na Aruba, esta Sr. Manuel da Silva, Sra. Miriam Wouters y Sra. Kedy Koolman.

Minister Endy Croes tabatin e honor pa haci entrega di e reconocemento na e baluartenan di e deporte di drag race. Presente tambe na e ocasion aki, tabata e baluarte Sr. Andre Wernet y e legendario Sr. Henny Leo kende a hiba palabra durante e ceremonia. E aña aki Palo Marga International Raceway Park a cumpli 40 aña di existencia. Minister Endy Croes a indica cu a logra drecha 26 poste di luz na Palo Marga y a compromete cu pa aña 2024 lo “recap” e pista completamente pa asina cumpli cu standard internacional.

Pa finalisa, Minister Endy Croes a desea tur coredo hopi exito. Alabes a felicita organisadonan y One Cool Summer Nationals 2023 cu un tremendo y exitoso evento.

MINISTER ENDY CROES A PRESENCIA E PARTIDO FINAL ENTRE DECOS Y STRINGERS DEN LIGA 50 PLUS

Diadomingo atardi, un veld di Dragon Hitters na Barcadera carga cu fanatico y den un tremendo ambiente Minister Endy Croes acompaña pa su kerida esposa Dilailah Croes a gosa di e partido final den Liga 50 plus. E final tabata entre e dos miho ekiponan di e temporda, esta Decos y Stringers. Te cu den 5 inning e wega tabata hopi cera 7-6 pa Decos.

E partido a termina cu e score di 14-8 pa ekipo di Decos y asina titula campeon di e torneo. Aunke Stringers a yega final cu un solo wega perdi, ekipo Decos a bin dicidido pa gana. Pa conclui, Minister Endy Croes ta felicita ekipo di Decos cu a titulo di campeon y pabien na Stingers como sub campeon di e toreno di Liga 50 plus. Pabien na organisadonan cu un bunita campeonato.

Den conexion cu e problematica di coriente:

A INSTRUI UTILITIES PA HUNTO CU WEB Y ELMAR PRESENTA PLAN DI ACCION DEN 30 DIA

Dialuna mainta durante conferencia di prensa di Gobierno, Minister di Energia Glenbert Croes a elabora riba e situacion actual cu tin, na unda cu constantemente coriente ta bay den diferente barionan. Mirando cu e situacion aki ta uno inaceptabel pa Gobierno, a pidi Utilites pa liderisa e proceso encaminando cu e companianan WEB, Elmar un plan di accion den e proximo 30 dianan.

Minister Croes a indica cu comunidad di Aruba ta pagando un prijs considerabel pa awa y coriente y corectamente ta expect di por tin un calidad di suminstro optimal. E suministro di coriente mester ta confiabel y estable, specialmente den e temponan aki cu ta hopi calor. E mandatario ta spera cu pronto e companianan estatal por bin cu un plan di accion, pa asina

resolve e problema aki pa nos comunidad.

Mester traha cu un maneho cu ta premira unda inversionnan mester wordo haci pa distribucion y suministro di coriente permanece estable tur caminda na Aruba. Calentamento global ta un fenomeno conoci y como pais nos mester ta prepara pa por confronta y enfrenta tur e retonan cu esaki ta trece cu ne.

MINISTER DI ENERGIA GLENBERT CROES A

DUNA UN "UPDATE" RIBA E PROYECTO DI EAGLE LNG

Durante un conferencia di prensa di Gobierno di Aruba, Minister di Energia Glenbert Croes a duna un "update" riba e proyecto di Eagle LNG. Minister Croes a splica cu te cu awor, e compania a cumpli cu tur rekesito pa loke ta suministracion di informacion na e departamentonan concerni, pa tur loke ta e permisonan necesario, pa por continua cu e proyecto. Tambe ta importante pa menciona cu Eagle LNG a haya aprobacion di Ministerio di Defensa di Hulanda y Marinierskazerne pa loke ta e cooperacion pa pasa e tubonan. Esaki sigur ta un bon noticia paso awor cu tin e aprobacionnan aki e proyecto por continua cu su avansenan.

Minister Croes a indica di ta consciente cu hopi hende ta birando skeptico pa cu tardansa den desaroyo di proyecto di EAGLE LNG, pero cu mester compronde cu esaki ta prome biaha cu un proyecto di e indole aki ta wordo ehecuta na Aruba y tur departamento y/of instancia envolvi, mester di tempo pa por evalua y sigura cu e proyecto ta wordo implementa den un forma exitoso y mas cu tur, sigur. Pa Gobierno di Aruba introduccion di e proyecto di Eagle LNG pa suministra gas natural na Web Aruba NV, ta hopi importante, mirando cu e lo contribui grandemente na reduccion den prijs di awa y coriente.

EAGLE LNG ta un parti esencial den desaroyo di e Zona di Energia riba tereno di RDA na San Nicolas. No ta pasobra a anuncia un ‘refineria’ di hidrogeno, planta di electrolisis di hidrogeno pa Aruba, e Aruba Hydrogen Valley, esey kiermen cu esun lo reemplasa of tranca e otro. Tur lo contrario. Ambos lo cana simultaneamente. Cada un tin su meta y balor. “No cabe duda cu pa Pais Aruba y Gobierno di Aruba e proyecto di EAGLE LNG ta sumamente importante pa suminstra gas natural na WEB, pa nos por despedi definitivamente di nos dependencia riba Heave Fuel Oil, cu lo yuda nos enormemente den stabilisa y reduci prijs di awa y coriente, tur contrario na locual cierto medionan a publica. Pero mientras tanto, tin un tender tumando luga pa loke ta trata e supply di Heavy Fuel Oil pa FMSA. Nos ta haciendo tur esfuerso na diferente nivel, como tambe pa a corto y largo plazo logra establece y reduci prijs di awa y coriente pa nos pueblo”, e mandatario a splica.

E mandatario ta sumamente orguyoso cu Aruba ta liderisando su mes den Caribe como e isla chikito pero cu determinacion grandi pa por cumpli cu e acuerdo di Paris 2050. E futuro a cuminsa awor pa nos laga pa nos yiunan y nan yiunan, un pais sano cu un medio ambiente limpi, un isla cu nos tin presta y mester cuida pa por laga pa futuro generacionnan.