IslaOnline 1 Augustus 2023

PROME MINISTER TA FELICITA TUR E

GRADUADONAN Y TA DESEA NAN HOPI

EXITO DEN FUTURO

Durante e ultimo simannan, Prome Minister Evelyn WeverCroes cu honor a atende e graduacion di varios scol. Prome Minister a indica, cu pa mira cuanto graduado tabata tin e aña aki, ta algo cu Aruba completo mester sinti contento y orguyoso, pasobra esaki ta e fundeshi di formacion di un sociedad fuerte.

Prome Minister ta gradici cada un di nan pa nan esfuerso den logra haci e aña aki uno exitoso un biaha mas. Tambe, Premier ta gradici tur maestro pa e pasion y dedicacion cu nan a bin ta eherciendo durante añanan educando nos hobennan y fortalece e fundeshi primordial di enseñansa.

"Cada clausura ta un comienso nobo. Pa nos graduadonan esaki ta un comienso nobo. E diploma cu bo tin den bo man, ta e yabi pa bo futuro, y abo ta dicidi kico bo ta haci cu n’e. Cu Dios bendiciona cada un di boso riba boso caminda, pa tuma e miho decisionnan, y pa boso ta exitoso den boso estudio. Na e mayornan cu mester habri hala y laga e yiu bay studia den exterior, mi ta desea hopi forsa, pasobra e ta un di e tareanan mas dificil como mama. Confia cu e fundeshi di norma y balornan cu boso a construi pa boso yiunan, lo sa di guia nan den e trayecto nobo. Hopi pabien y exito na tur e graduadonan" Prome Minister a expresa.

" E diploma cu bo tin den bo man, ta e yabi pa bo futuro, y abo ta dicidi kico bo ta haci cu n’e"

Continuacion PROME MINISTER TA FELICITA TUR E GRADUADONAN....

MINISTER MADURO DI CULTURA TABATA

PRESENTE NA E FESTIVAL DI CAHA DI ORGEL NA CENTRO DI BARIO AYO

Un bunita festival dedica na musica tradicional di nos Pais

Diadomingo Minister Maduro di Cultura tabata presente na e Festival di Caha di Orgel cu a tuma luga na Centro di Bario Ayo organisa pa sr. Giovanny Geerman y famia di Cah'i Orgel Nos Herencia. Tabata un atardi yena cu musica tipico, cuminda crioyo y ambiente unico na unda cu grandi y chikito a disfruta di locual ta nos musica tradicional.

Un total di 15 caha di orgel a deleita tur presente, na unda cu e publico tabata por a baila e piesanan aki y asina contribui na nos cultura. E aña aki e festival a wordo dedica na sr. Nay Felicia, sr. Chomi Boekhoudt y sr. Juan Willems. Na e ocasion aki, Minister di Cultura a hiba palabra gradiciendo e grupo Cah'i Orgel Nos Herencia pa a organisa e festival y tambe na tur tocado di caha pa nan presencia pa asina sigui cu e bunita tradicion di musica di Cah'i Orgel. Pa Minister Maduro tabata un placer pa tabata presente y pa deleita e publico tocando un piesa riba e Caha di Orgel Johanna y despues marca algun paso riba e dushi ritmo di musica di Cah'i Orgel. Tabata bunita pa mira e entusiasmo cu tin entre e grandinan y tambe cerca e hobennan cu ta prepara pa sigui carga nos tradicion. ‘Cultura bo tin cu bib’e y esaki ta e manera pa haci’e, door di sigui cu nos tradicion, aprecia y carga locual ta di nos,' tabata palabranan expresa pa e mandatario.

Minister Maduro ta gradici grupo Cah'i Orgel Nos Herencia pa a organisa e tremendo festival aki y tambe tur esnan cu a presencia e festival aki y haci’e uno exitoso. E mandatario ta gradici specialmente sr. Giovanny Geerman kende a cumpli 30 aña dedicando su mes na locual ta e musica di Cah'i Orgel. Masha pabien tambe na e baluartenan sr. Nay Felicia, sr. Chomi Boekhoudt y sr. Juan Willems pa nan bunita trayectoria cuidando nos herencia cultural di musica di Cah'i Orgel pa nos por biba nos cultura.

MINISTER DI CULTURA A DUNA RECONOCIMENTO NA JOSELITO ALBERTSZ

Diasabra ultimo Minister Xiomara Maduro tabata presente na e celebracion di e di 15 aniversario di Antonio ‘Joselito’ Albertsz como International Chef di e prestigioso compania Disney. E mandatario a hiba un discurso na unda primeramente a gradici Joselito pa e invitacion y cu ta pa su persona un honor di forma parti di e bunita celebracion di 15 aniversario. Minister Maduro a comparti cu esnan presente cu Antonio Albertsz miho conoci como Joselito, e conoce for di temporada di scol. Ela sigui Joselito su carera for di tempo cu ela termina Aruba Hotel Management School e tempo ey na Bushiri Resort y te aworaki cu e ta Master Chef na un di e restaurantnan mas grandi na Orlando Florida.

Joselito tin un tremendo curiculo riba diferente tereno culinario internacional. Ela yega di participa na varios competencia y exposicion culinario na varios pais rond mundo manera New York, Miami, Houston, Los Angeles, Peru, Colombia, Brazil, Corsou y Japon. E mandatario a accentua cu Joselito na tur pais cu ela bishita ela laga nan cera conoci cu nos platonan crioyo di Aruba y tambe nos bolonan como postre.

Joselito a traha tambe na parkenan di diberticion y varios hotel na Orlando. Ela cuminsa for di Sous Chef, Executive Chef, Chef de Cuisine y awor como Master Chef. Pues un carera impresionante den mundo culinario internacionalmente. Esaki Joselito a logra cu dedicacion, perseverancia, disciplina y mas importante pasion cu e tin pa su trabou. Esaki ta un bon ehempel, inspiracion y motivacion pa sigur nos hobennan, specialmente e studiantenan di e parti di Culinario di Hospitalidad y Turismo na EPI, cu ta demostra cu trabou duro bo ta logra realisa bo soño.

Minister Maduro a trece dilanti cu un bes mas nos ta ripara cu nos Pais ta chikito na tamaño pero carga na talento den por ehempel varios rango di deporte, arte, beyesa y awor den arte culinario tambe.

E mandatario a extende un invitacion na tur Arubiano pa ora nan bishita Orlando pa bishita e restaurant Crystal Palace na Magic Disney World y asina purba e platonan delicioso di nos Masterchef Arubiano.

Aruba ta orguyoso cu tin un Arubiano ta forma parti di e team di e cadena renombra di Disney Corporation.

Minister di Cultura, na nomber di Gobierno di Aruba a entrega Joselito un reconocimento y a gradicie pa promove nos Pais

Aruba na Orlando y unda cu e bay rond mundo. Danki pa ta un bon embahador di nos Pais Aruba. Y tambe masha danki pa semper tin Pais Aruba den su curason y bini un rato cas bek pa

hunto cu nos comparti su experencia culinario y celebra su 15 aña como International Chef den un ambiente Arubiano.

E mandatario ta felicita Joselito pa su 15 aniversario y ta desea cu Dios por sigui bendiciona Joselito pa e sigui celebra mas aniversario yena cu exito den su carera.

Tabata un celebracion masha ameno den presencia di Joselito su famianan y amistadnan.

“DANKI PA TA UN BON EMBAHADOR DI NOS PAIS ARUBA”

Continuacion POTRETNAN DI RECONOCIMENTO NA JOSELITO ALBERTSZ....

A

BASE DI RESULTADO DI INVESTIGACION

DI REPRESANTENAN DI CBN TA INDICA

CU E BENTANAN DI LOTTO PA DEPORTE TA

BAYENDO HOPI BON

Minister di Enseñansa y Deporte Endy Croes a reuni cu e representantenan di Canadian Bank Note Company (CBN) cu recientemente tabata na Aruba. E representantenan di CBN a presenta un rapport di e prome seis (6) lunanan di benta di Lotto pa Deporte. Tambe, a haci un comparacion di cifra di e añanan anterior. Banda di esaki, a haci diferente analisis di benta. E ultimo lunanan a haci un investigacion riba e mercado completo di wega di number na Aruba.

A presenta Minister Endy Croes tur cifra y dato di e resultadonan di investigacion. A presenta e rapport

caba na e directiva di Fundacion Lotto pa Deporte. Minister Endy Croes a expresa cu a base di e resultado di investigacion

ta indica cu e bentanan di Lotto pa Deporte ta bayendo hopi bon. Esaki sigur ta beneficioso pa deporte di Aruba en general y nos deportistanan cu ta central. E mandatario di Deporte ta mira atras riba un reunion fructifero.

MINISTER ENDY CROES TA DESEA TUR

STUDIANTE CU TA BAY CONTINUA ESTUDIO AVANSA DEN EXTERIOR HOPI EXITO

Minister di Enseñansa y Deporte Endy Croes ta desea tur studiante cu a bay Hulanda y den region hopi exito cu nan estudio. Diasabra ultimo, e prome grupo cu ta consisti di 24 studiante a yega Hulanda y a wordo ricibi pa Minister Plenipotenciario na Hulanda, mr. Ady Thijsen y director ad interim di Arubahuis, drs. Glenda Hernandez. Tambe tabata presente na nan yegada, e representantenan di Departamento di Enseñansa di Arubahuis, “studiementor” y e miembronan di e Plaatselijke Opvangcommissie (POC) cu lo guia e studiantenan durante e prome dianan na Hulanda.

Prome di augustus e grupo mas grandi a sali pa Hulanda, cual ta consisti di 100 studiante. Directora di Departamento di Enseñansa Aruba (DEA), Sra. Anne-Marie Proveyer y su team tabata presente na Aeropuerto Internacional Reina Beatrix pa despedi di nos studiantenan. Minister Endy Croes

ta encurasha tur studiante pa haci nan maximo esfuerso pa logra nan meta. Esaki ta un etapa cu no ta facil, mirando cu e studiantenan ta bay leu di cas y ta confronta cu diferente reto durante nan estudio den exterior, pero cu hopi perserverancia y determinacion ta logra.

E mandatario di Enseñansa ta conseha tur studiante pa aplica e cuater (4) C-nan di habilidad di siglo 21 pa tin exito durante nan estudio, cual ta para pa comunicacion, colaboracion, pensamento critico (critical thinking) y creatividad. Minister Endy Croes ta gradici directora di DEA, Sra. Anne-Marie Proveyer y su team cu a traha hopi duro pa e biahe di e studiantenan. Finalmente, Minister Endy Croes ta desea cu nan por termina nan estudio exitosamente y pa bolbe bek pronto pa contribui den e desaroyo di Pais Aruba.