Eystrahorn 21. tbl. 29. árgangur
Fimmtudagur 26. maí 2011
www.eystrahorn.is www.eystrahorn.is
Til hamingju FAS og útskriftarnemar
Mynd: Sigurður Mar
Það var hátíðleg og ánægjuleg stund í Nýheimum á laugardaginn þegar fram fór fjölmennasta útskrift frá Framhaldsskólanum í Austur-Skaftafellssýslu til þessa. Unga efnilega útskrifarfólkið bókstaflega geislaði af gleði og fögnuði. Sömuleiðis leyndi sér ekki stolt og aðdáun aðstandenda og gesta. Á svona stundum verður maður betur meðvitaður um ómetanleg verðmæti framhaldsskólans fyrir samfélagið hér. Alls voru útskrifaðir 25 stúdentar, tveir stuðningsfulltrúar, tveir sjúkraliðar, einn leiðbeinandi í leikskóla og einn vélstjóri. Dúx skólans var Kristján Helgi Hjartarson og fékk hann einnig verðlaun fyrir góðan árangur í dönsku frá sendiráði Dana. Freyr Sigurðarson fékk verðlaun fyrir besta árangur í ensku en þau verðlaun gaf sendiráð Kanada, einnig fékk Freyr tvenn verðlaun fyrir góðan árangur í raungreinum sem gefin voru af Háskólanum í Reykjavík og Verkstjórafélagi Austurlands. Gerður Mekkín Gunnarsdóttir fékk verðlaun fyrir góðan árangur í þýsku frá sendiráði Þýskalands.
Margt athyglisvert kom fram í ræðu skólameistara, Eyjólfs Guðmundssonar. Í vetur hafa verið um 220 til 240 nemendur við skólann. Á þeim 9 árum sem skólinn hefur verið í Nýheimum hefur hann vaxið úr því að vera um 100 nemenda skóli í að vera um 200 nemenda skóli. Ungu fólki á hefðbundnum framhaldsskólaaldri hefur fjölgað verulega en þau eru nú um 120 og flest þeirra í stúdentsnámi á almennri braut. Fjarnámsnemendur voru 60 til 70, flestir í vélstjórar og skipstjórnarnámi. Yfir 30 nemendur 25 ára og eldri mættu reglulega í skólann í nám í íslensku, stærðfræði, ensku og dönsku undir heitinu „Aftur í nám“. Kennslan var seinnipart dags og við það miðað að allt námið færi fram innan skólans og að ekkert heimanám yrði þar fyrir utan. Einnig er námsmatið símat án hefðbundins lokaprófs. Skólameistari lagði áherslu á að ef fólki er skapað gott umhverfi til náms þá er það tilbúið að liggja mikið á sig til að mennta sig. Fram kom að töluverðar breytingar verða
á skipulagi og námsframboði í skólanum á næstu misserum og fjölbreytni aukin. Stefnt er að verulegri aukningu náms fyrir fullorðið fólk sem ekki hefur lokið framhaldsskóla og stúdentsnámið verður stokkað upp og komið á framhaldsskólaprófi og síðast en ekki síst verður stafsnám við skólann eflt verulega. Jafnframt eru bundnar vonir við að nýtt skipulag á félagsstarfi nemenda verði félagslífi þeirra til framdráttar en í viðhorfskönnunum meðal nemenda hefur komið fram óánægja meðal þeirra.
Skólameistari Eyjólfur Guðmundsson.
Fimmtudagar eru bíllausir dagar • Drögum úr orkunotkun