РОК LXХI • ЧИСЛО 1 ЯНУАР •2018 ЦЕНА 100 ДИН
КРАЧУНСКИ КОНЦЕРТИ
У Руским Керестуре Традицийни крачунски концерт на перши дзень того велького християнского швета у Руским Керестуре отримани у Велькей сали Дома култури. Шветочносц отворели наймладши аматере зоз коляду, а потим преосвящени владика кир Георгий Джуджар шицким нащивительом и учашнїком повинчовал швето Рождества Христового. Найлєпши рецитаторе рецитовали крачунски писнї, а Дзивоцка шпивацка ґрупа и Хлопска жридлова ґрупа Дома култури шпивали коляди. Зоз колядами ше представели и члени Мишаного хору и Камерни состав. Венчик колядох за тоту нагоду пририхтал и Квартет гармоникашох ШОМО, оддзелєнє у Руским Керестуре, а того радосного вечара шпивали и члени танєчней секциї. М. Дж.
У Керестуре...
У Коцуре
Тогорочни крачунски концерт у Доме култури у Коцуре мал барз вельо нащивительох. Орґанизовало го КУД „Жатва”, а у програми участвовали представителє шицких националних заєднїцох котри жию у тим валалє. Шветочносц почала зоз рецитацию на церковнославянским язику и зоз уношеньом слами на бину. Потим наступели виронаучни дзеци зоз грекокатолїцкей церкви, Аранка Мезеї, и дзеци зоз євангелскей церкви хторих пририхтал лаицки пастор Александар Суботин. Коляди крачунскому концерту подаровали и члени Мишаного хору Дома култури и Катедралней церкви зоз Руского Керестура зоз дириґентку Лидию Пашо, як и Женска шпивацка ґрупа КУД „Жатва”. Участвовали и домашнї танєчнїки и госци зоз КУД „Завичайно врело”.
З. К.
У Дюрдьове На други дзень Крачуна у сали КУД „Тарас Шевченко” у Дюрдьове отримани шветочни концерт з нагоди швета Рождества Христового. Бина була як руске обисце чийо домашнї, Ганча и Йоаким Чапково дочековали шпивачох хтори колядовали и за тото доставали пакецики. Шпиваче були дзеци зоз предшколскей установи, школяре основней школи и члени секцийох у КУД-у. Пририхтали их воспитачка Марина Сабадош, учителька Мелания Саламун и руководителє секцийох у Дружтве – Михал Лїкар, Сенка Станкович, Тамара Салаґ и Мария Хромиш.
У Дюрдьове...
С. С.
^ASOPIS ZA DZECI
Direktor Martica Tama{ Odvi~atelqni redaktor Melaniy Rimar Vihodzi raz na me{ac u {kolskim roku • Vidava NVU “Ruske slovo” • Bulevar o{lwbodzeny 81/VII 21 000 Novi Sad, • Telefon (021) 6613-697 • @iro rahunok ~islo: 160-923244-82 • Ro~na predplata 1 000 dinari; za ino`emstvo 25 evra • Dizajn: Nela Tatalovi~ i Mariy Gudak Kompxterski obrobok: Mariy Gudak • Lektor: Martica Tama{ • Rukopisi {e nw vraca • Drukuw drukarny: “MAXIMA GRAF”, Петроварадин YU ISSN 0353-9938 E-mail: casopiszahradka@gmail.com Ilustraci>: Aleksandra Medw{i CIP – Katalogizacija u publikaciji Biblioteka Matice srpske, Novi Sad 821-93 ZAGRADKA: ~asopis za dzeci / odvi~atelqni redaktor Melaniy Rimar. – Ro~. 50, ~. 1 (1991) – . – Novi Sad: Ruske slovo, 1991 –. – Ilustr. ; 24 cm Mese~no tokom {kolske godine. – Nastavak publikacije: Pionirska zahradka ISSN 0353-9938
На насловним боку 1. Школяре на крачунским концерту у Коцуре (фото: З. Колєсар)
2. Привит Дїда Мраза у ПУ „Дюрдєвак” у Дюрдьове (фото: С. Саламун)
Здраво, заградкаре! Тогорочни жимски розпуст прешол без правей жими, бо нє було анї шнїгу, та нє росли Дїдове Шнїжнїкове, а нє було анї мразу, та ярки и долїни остали без шлїщанкох. Алє радосци було надосц, агейце! До шицких обисцох и церквох дзе єст дзеци, святи Миколай сцигол позаходзиц и обрадовац их з дарунками, а хто на Вилїю ходзел по шпиваню, зашпивал вельо лакотки, бависка и инше. И Дїдо Мраз бул велькодушни, а анї родичи и родзини нє сановали пенєж за дарунки своїм наймилшим. Та кед ше шицко поздава, мож гласно повесц: розпуст бул СУПЕР! Чкода же так швидко пребегнул. Друге полроче будзе длугше як перше, поведла бим – за два числа „Заградки”. Значи же шицки будземе мац вецей роботи. Рубрика „Школяре авторе” ма аж три боки, та януарске число лєдво направене зоз тих дакус литературних составох. Знам же вам лєгчейше нашвидко дацо нарисовац, як писац правилно по руски, а ище ше и трудзиц же би рукопис бул дакус красши, алє цо кед нє будзе досц состави и писньочки? Озда нє утаргнєме вашу рубрику? Нїзач! Нєодлуга пойдзем до даєдних школох дзе маме вредних сотруднїкох, та будземе пробовац вєдно писац за „Заградку”. За януарске число часописа найкрасшу литературну роботу „Уходзиме до швета одроснутих” написала, та достала награду Єлена Мудри, школярка VIII класи зоз Дюрдьова. Того мешаца наградзеним школяром буду однєшени награди. Вельо сцелосци за ученє жада вам ваша редакторка
МИХАЛ РАМАЧ
САНКАНЄ Роздарла ше перина била, нє видно нїч крем пиря. Лєм салаш стирчи яґод гиря на чолє поля цо натила. Уж оцец з пойда знял древянки. Я у покровцох забубани. Три тижнї конї нє прагани, як витор нєшу нашо санки. Гвижджиме по билючкей пени, за нами Бундаш и гачури. Лєциме польом аж ше кури и лєца копки и баґрени. Нє идзе ше ми до валалу, нє враца ше ми ґу домови: од оца сцел бим вжац дєплови и лєциц цали дзень, ноц цалу. Най конї бежа кадзи зосцу, най нє ставаю воднє-вноци, най вше ми шерцо так лопоци чудесно зляте зоз билосцу.
ЖИМА У ЛЄШЕ МИХАЙЛО КОВАЧ
Т
ри днї нє преставал у лєше витор и курнява. Витор завивал як гладни вовк, конари шкрипали и стресали зоз себе залядзени шнїг. Тото кус лєсових бивательох цо остало ту жимовац поскривало ше до своїх обисцох и анї нощок нє указую. Вивирка мушела добре позатикац уход до своєй шумнє ушореней хижи, бо єй витор почал гарсцами уруцовац шнїгу. Нєшка у лєше зацих. Аж нєобично як цихо. Жимно, правда, гоч аж и слунко швици, алє мир, мир то вжиме найважнєйше. А особено вон приємни по таких дурних дньох. Лїкар Джубайдревко вихпал перше главку зоз своєй худобней хижочки, а вец ше и цали вицагнул. Чудно же влєце нє чувствовал таку осаменосц як тераз вжиме. Аж и вивирково дружтво вжиме може церпиц. Озда прето же вона вжиме мирнєйша и нє роби пакосци як то зна буц влєце. Прето нєшка вихасновал красни дзень и вишол поопатрац хори древа, а источасно и прегвариц слово-два з найблїзшима сушедами. – Сушедо, сушедо, слунечко вишло, а ви у цми жиєце – задуркал єй лїкар на дзвери. – Нє фурка вецей? – з нєдовирийом ше питала вивирка. – Ище над раном престало, а тераз уж озда и поладнє – прешвечовал ю лїкар. Вивирка одомкла дзвери и бояжлїво вихпала главку, а лїкар пре векшу сиґурносц одлєцел далєй на найблїзше древо и почали бешеду: – Добре вам, сушедо – поносовал ше лїкар – маце цо єсц... – А хто же тебе виновати же и ти нє маш як я! Требало робиц и думац напредок – гандровала го вивирка. – Озда я нє робел, та и напредок думал, алє яки хасен кед мойо нє родзи на конарох як вашо, алє под скору, а то велька робота дойсц до ньго. – Велька робота, велька робота, а кертици нє велька робота глєдац єдзенє у жеми. А вона ше, видзице, постарала и за жиму. Хлїсти себе назберала полну коморку. – Нє будзе то так, сушедо, нє верим – кивал з главу лїкар. – Ша хлїсти озда нє шалєни чекац же би их дахто поєдол. – Учени, а нїч нє зна! – видрижньовала ше вивирка лїкарови. – Вона их пред тим порозкушує и так охаби. Половки жию, а сцекнуц нє можу. – Чи видзиш ти то? – щиро ше чудовал лїкар. – Но алє я заш нє мам хасну од того. Мойо хробачки цо их спод скори вицагнєм нє сцу жиц анї минутку. – Но та кед нє сцу жиц, цо ци я можем? Цо же ши пришол поносовац ше на свою биду кед себе сам нє знаш дац ради?
– Нє поносуєм ше я, и ради себе знам сам дац, алє ми допито самому, та сом пришол дакус на бешеду, а видзим же сце цошка нє у дзеки – умирйовал ю Джубайдревко. – Можем буц у дзеки кед така подла жима, же нє знам як витримац до яри. – Вец пойдзеце и викопеце скрити жалудзи спод дубового кореня цо сце их вєшенї там загребали... – А ти одкаль знаш тото? – Ша знам! – Вельо знаш! – Вельо, гоч ви гварели первей же нїч нє знам. – А цо же ище знаш? – Знам и прецо сце таки нє у дзеки! – Прецо, кед шмем знац? – Прето же ше вше лєм о себе стараце; та гоч кельо маце, нїґда вам нє досц! – А ти лєпши? – Лєпши – нє лєпши, алє сом нє таки себични, сушедо, а од роботи ше нє боїм анї вжиме анї влєце. – Я вецей нє мам цо з тобу бешедовац – гварела нагнївано вивирка и дуркла з дзверми. – Анї я з вами – гварел лїкар Джубайдревко и пошол на препатрунок хорих древох хтори го вше, и вжиме и влєце, радо дочековали.
O B L A ^ O K D O [ V E TA Мр Нада Вукович Дьокич, дириґент и вокални педаґоґ, народзена 1976. року у Беоґрадзе, дзе и нєшка жиє и роби, алє за себе гвари же бива у шерцох людзох хтори ю любя. Закончела Штредню музичну школу „Корнелиє Станкович”, а студиї, як и постдипломски студиї на Факултету музичних уметносцох у Беоґрадзе. Робела у основних и штреднїх школох, а петнац роки була професор на Академиї уметносцох у Беоґрадзе, дзе водзела хор, смикови и оркестер гармоникох, преподавала дириґованє, клавир, солфедьо зоз теорию музики, музични инструменти, як и гранє хорских и оркестерских партитурох. Часто є член жирия на музичних фестивалох. Зоз супругом Сашом 2011. року основала Школу шпиваня „Ґласови Наде”, дзе є тераз професор. Найвекша инспирация єй школяре, та так настал и роман „Зоя, мала пиянистка”. Обявени є з потримовку Здруженя музичних уметнїкох Сербиї. На першим боку романа авторка написала:
ЗА ПОЧАТОК То приповедка о уметносци и шицким цо ю твори прекрасну, о живоце хтори виткани з нєй, о людзох хтори одлучели подаровац єй свойо шерцо. То приповедка о Зої, малей пиянистки. Зоя була нєсташне дзецко, полне зоз щирима жаданями, залюбене до спорту и музики. Була пошвецена кошарки, покля єй кошарка, пре нєпредвидзени обставини, нє „обрацела хрибет”. Теди ше препущела граню на клавире, свойому другому таланту, и вецей нїґда ше нє оддвойовала од нього. Нєшка є професорка клавира, хтора своїм школяром дарує вельо вецей од схопносци граня на тим чаривним инструменту. Ма розуменя за дзецинске нєвежбанє, як и за їх гунцутства. Зоя инсистує на порядних годзинох, та школяре можу присц и нєпорихтани. Нє дума же траци час зоз школяром, алє з нїм бешедує, и часто з бешеду мотивує школяра пошвециц ше вежбаню.
ДЗИВЧЕ ХТОРЕ НЄ СЦЕЛО БУЦ ПРИНЦЕЗА Зоя ше рушела ґу облаку, най нє губи чаривну хвильку. Здогадла ше як у оводи достала тему нарисовац принцезу, праве таку яка жадала постац док вирошнє. Барз любела рисовац, алє єй папер теди остал били. Зоя гварела же нє сце буц принцеза. Воспитачка зачудовано попатрела на ню и питала ше прецо. Одвитовала же принцези вше даґдзе заварти и потребни им дахто хто би их виратовал отамаль. Потолковала же би дзечнєйше була боса, и шлєбодна. Теди воспитачка притулєла главу ґу Зойовей и шепла: „И я тото жадам”. Зої ше урезало до паметаня тото цо воспитачка гварела. Вельо раз чула подобне, же людзе жадаю шлєбоду, шлєбоду робиц тото цо любя, а нє видовольовац другим бо „так треба”, же би були нєопутани и щешлїви. Похопела же швет вельке кральовство, преполне зоз „принцезами у твердиньох”, а вона нє сцела буц єдна спомедзи нїх... Думки єй прервал Машов глас.
– Зойо, як тераз видземе на очи Ниновей професорки? – Тото препущце мнє. – Любела бим кед би Нина прешла ґу вам до класи. Ґу Мими зме ю уписали, бо зме чули же школярох водзи на змаганя, же од нїх барз вельо вимага и же ше при нєй нє мож вицаговац. Таке одношенє ґу школяром ми одвитовало, бо и я так исто воспитовала свойо дзецко. Нина ше, очиглядно нє знашла з ню. Видзи ше ми же з вами ма вецей дорушуюци точки. – Нє старайце ше. Мима розумна жена и знам же пристанє. Заш лєм, треба ше єй явиц, най нє випаднє же одходзице без поздраву. Так и було. Нина прешла до Зойовей класи. Мима ше нє процивела Ниновому одходу, а тому ше обрадовала и Ема, хтора Нину барз любела. Преложела М. Р.
КОГУЦИК ЯРАБИК Руски народни писнї за дзеци
Давного, 1897. року українски фолклорист Володимир Гнатюк два мешаци (у юлию и авґусту) бул у Руским Керестуре и Коцуре и записовал народни писнї, приповедки, сказки, басни, леґенди и инше зоз нашого усного народного скарбу. Людзе му дзечнє приповедали так як вони слухали и запаметали од своїх родичох, дїдох и бабох. Народна творчосц ше децениями преношела з колєна на колєно, та велї приповедки, писнї, розчитованя и сказки и нам старши приповедали кед зме були мали. Прешлого лєта наполнєли ше точно 120 роки як Гнатюк у наших двох валалох позберал 430 писнї, 220 прозни и други твори зоз народней литератури бачваньских Руснацох и так тото благо однял од забуваня. Концом прешлого, 2017. року Редакция часописа „Заградка” пририхтала своїм читачом окремну кнїжочку „Когуцик ярабик” у хторей обявени лєм писнї и розчитованя за дзеци, од тих наймладших – у яшелькох, та по найстарших школярох у основней школи.
У РОБОТИ... Гей, там за горами Ору страки, врани. Голуб житко шеє, Очко ше му шмеє; Овци польо браня, Фаркаш их заганя, Бо нєдобре браня. Миши житко коша, Ґовлї снопи ноша; Пульки житко вожа, Гуски брадло ложа; Швинї житко тлача, А пси сламу влача; Маґарица веє, Маґарец ше шмеє, Же нє добре веє, Квока уж роштує, Курчата зволує; Качур житко мелє, Качка мирку бере; Крава цесто миши, Буяк воду ноши; Конь у пецу палї Кобула го хвалї; Мачка хлєбик садза, Мачата ше вадза, Же нєскоро садза; А кед хлєб упекли, Шицки з нього єдли!
ХОДЗЕЛА КВОЧКА
РАЗ КУРОЧКА Раз курочка когуцика придала на валал, же когуцик вайца краднул, та пшичкови давал. Пшичок Бурко барз лакомни на лакотки тоти. До шерпенки их розбивал, та пражел ратоти.
Южнославяньских Русинох народни писнї. У мену Руского Народного Просвитного Дружтва Позберали и ушорели: Дюра Биндас и Осиф Костельник Руски Керестур, 1927.
Ой ходзела квочка коло колочка. „Кво-кво-кво”, - коло колоча. Ой вишедзела квочка штверо курчаточка. Ходзела квочка коло колочка. Штверо курчаточка вишедзела квочка.
ЧИЖМОЧКИ Уживали зме у веселих жимских дньох. Найкрасши були гевти рана кед ше зобудзиш
и видзиш же ше розляли слунково зарї по червених черепох. Причекали бизме поладнє най замоцнєє дакус жимске слунко, пооблєкали цепли шмати и виходзели на двор. Зоз стрехи вишели менши и векши цомплї у котрих ше опатрало зубате слунко. Наш конк здабал на замок зоз сказкох. Змагали зме ше хто збиє найвекшу цомплю. Найволєли зме покрадзме пойсц будзиц пчоли. Дїдо их позно вєшенї добре поукладал до кошнїцох и строго нам наказал най их нє знємирюєме. Алє наша дзецинска любопитлївосц нам нє дала мира. Поцихи бизме задуркали до кошнїци. Оздзивали би ше тисяч лєнїви пчолово гласи и ознова падали до жимского сна. Звичайно би кратко тирвала тота наша дзецинска пакосц. Так зме росли на салашу, на Державки, кажди дзень видумуюци нови бависка. Нє зоз бабками. Салашски живот нас геркал на авантури хтори нє вше приставали дзивчатом. Нє любелa сом жимски днї без шнїгу.Теди пре допити диждж шиве було и закрице на шопки на котру сом ше припатрала през облак, шиви були и древа, и нука у хижох у куце кучала шивосц. – Ми би ишли до валалу! – гварелa сом мацери єдного такого шивого рана док вона топела до пеца и рихтала фриштик. Тото „ми” то булa и моя младша шестра. – А знаш кадзи маш исц? – питала ше мац и розкладала порезани кромплї по тепшички. – Гей. Запаметала сом. Просто по дильове, попод дєпи! – потолковала сом свою намиру. – Вец ше зберайце, та идзце! – гварела мац, бо думала же ше затримаме даґдзе под конком. Вонка порошовал диждж и нє була хвиля за бавенє. Шестри сом гварела же нам за драгу до валалу найважнєйша обуй – значи, береме ґумово чижмочки. Вибегли зме на двор и рушели през дєпик котри бул коло салаша. А вец зме требали висц на драгу. Вшадзи були бари єдна векша од другей. На каждим крочаю шлїзкали ше под нами чижмочки. Влапела сом шестру за руку. Бала сом ше же спаднє. Зишли зме з драги и рушели през поля. Видзело ше нам же тамадз бизовнєйше. Направели зме даскельо крочаї, а потим нашо чижмочки остали залїпени за цестасту оранїну. Даремно зме пробовали рушиц далєй. Тримала сом шестру за руку и якошик вица-
КСЕНИЯ ВАРҐА
гла єдну ногу, алє з другу нє ишло. Шестра стала и анї нє пробовал а рушиц ше з места. Видзела же ствар озбильна, та зложела уста так до крива. Знала сом же ше такой розплаче. Пробовала сом ище раз поцагнуц и ногу и чижмочку. Нє ишло. Залїпели ше за оранїну як за смолу. – Чижмочки най останю. Идземе нука. У ботошох! Предложела сом таке шестри, бо ми у тим чаше нїч мудрейше нє пришло на розум. Нє розплакала ше. Влапелa сом ю за руку и чапкаюци през дєпик, през двор, зявели зме ше на приклєтних дзверох. Мац виберала тепшичку з кромплями з пеца. Приємно пахло. Попатрела на нашо ноги без чижмочкох, на блатни ботоши, и було єй шицко ясно. – Чижмочки остали на оранїни. Нє могли зме их вицагнуц! – Сцела сом потолковац мaцери причину нашей нєвитвореней драги до валалу. – Треба вжац и ашов. Барз ше залїпели! – финкаюци гварела шестра мацери. У цеплей води у лаворе умивали зме замарзнути ножки. На столє бул цепли фриштик. Була то перша моя самостойна драга зоз дому. Идуцей єшенї почала сом ходзиц до основней школи. Пешо, попод дєпи по дильове, знаюци же кед зидзеш з драги, нє вше можеш вицагнуц чижмочки з розмоченей оранїни.
ЯСМИНКА ПЕТРОВИЧ
ПОНДЗЕЛОК
Я
нє любим читац и писац. Моя мац огорчена прето. Водзела ме до лїкара за очи, вец до лїкара за уха, вец за гарло, та аж и до лїкара за брух. Думала же сом хора, алє ми шицки резултати одлични. Тераз моя мац ище огорченша як була. – Добре, дзецко. цо мам робиц з тобу? – Одведз ме до зоолоґийней загради. – Нє видумуй, Тамаро. Сцем з тобу озбильно приповедац. – И я сцем озбильно приповедац. Нє любим букви и вецей ме нє наганяй най читам! – Алє, дзецко, як ше ти думаш уписац на факултет? – Цо то факултет? – Пать, ище ши и безочна! Вец мац почервенєла у твари. Станула. Отворела облак. Знова шедла. Заварла облак и почала кричац на оца: – Шицко тото пре тебе! Пущаш ю най роби цо сце. Вона нє зна шора! Нє ма роботни звикнуца. Анї нє чудне же нє зна читац! – А ти барз прицискаш. Дзецко нє може дзвигнуц главу од обовязкох: балет, шпиванє, танцованє, гранє, рисованє, тенис... – Кед бим ше тебе питала, вона би ше по цалим дню бавела. ДЖИЛ МЕК ДУҐАЛ (Австралия) – Точно. Кеди ше дзецко будзе бавиц кед нє тераз? – Алє шицки други дзеци уж читаю и кирилку и латинку, окрем нєй. – Та цо? Єст часу, научи! – Алє кеди? Кеди!? – Док ю охабиш на мире! – Як най ю охабим на мире? Гайде, поведз ми як? Нє будзем нїґда прах уцерац, – Крашнє. Идз до фризерки. Нє будзем нїґда уцицовац, – Нацо ми фризуру кед вона нє зна читац? Нє будзем нїґда задатки писац, Док ше оцец и мац вадза, я можем робиц цо сцем. Анї свою посцель намесцац. Можем стац на єдней ноги, можем штригац шишки, рисовац риби по кадзи, дзиравиц ґумку зоз клайбасом лєНє будзем до рук метлу брац, бо паровац розлични ботоши. Раз ше так вадзели же сом Нє будзем нїґда бависка складац, вишла вонка. Нє могла сом их слухац. Алє, понеже опрез Зоз судзини пригорене, очом бридке будинку бул лєм гевтот дїдо з трецого поверху, такой сом Нє мам намиру нїґда ошкрабац. ше врацела дому. Озда ше нє будзем з дїдом бавиц Скоч, беж, га-га-га. Кед би ме победзел, нагнївала бим ше. Скрила бим Нє будзем дома нїч робиц, твердзим. му куку до гущави, а то нє крашнє. Заш лєм вон стари Нє будзем нїґда. Нє сцем и точка! чловек. Як будзе исц по ґарадичох без куки? Лифт скоАлє, знайце, цешим ше з тим, ро вше погубени. Бо я лєм єдна мала мачка.
ЛЄНЮХ
Зоз кнїжки „Од читаня ше рошнє”
Преложела М. Р.
З анґлийского на сербски прешпивал Педя Трайкович
АСТРИД ЛИНДҐРЕН
ПЕЛЕ ШЕ СЕЛЇ ДО ШОПИ
П
еле нагнївани, гей, таки є нагнївани же ришел напущиц свой дом. Нє мож жиц у фамелиї у хторей ше ґу дакому так поступа. Було то рано кед оцец мал пойсц до канцелариї, а нє могол найсц свой клайбас. „Пеле, знова ши вжал мой клайбас?” – питал ше и моцно сциснул Пелеа за руку. Правда, Пеле пожичовал оцов клайбас вельо раз. Алє нє нєшка. Нєшка оцов клайбас остал у кафовим капуце у ґардероби. Пеле бул цалком нєвиновати. А оцец го так моцно сцигнул за руку! Мац, розуми ше, була на оцовим боку! Тому муши буц конєц! Пеле ше сце виселїц. Алє дзе? Могол би пойсц на морйо. Гей, тото би могол, На морйо по хторим плїваю вельки ладї и дзе ше дзвигаю високи габи. Могол би одпутовац до Африки дзе ше шпацираю лєви. Задумай, оцец придзе дому з канцелариї и пита ше, як и вше: „Дзе мой мали Пеле?” А мац плаче и гвари: „Пелеа поєдол єден лєв!” Йой, йой, так им и треба кед оцец нєсправедлїви ґу ньому! Алє, Африка далєко. Пеле би мушел буц дакус блїжей же би видзел кед оцец и мац буду плакац за нїм. Пеле одлучел виселїц ше до шопи. Шопа мала древена червена хижа на конєц двора зоз шерцами випилєнима на дзверох. Гей, праве там ше виселї. Почал ше паковац. Лабда, тромба и бабка-хлапец. А вец и єдна швичка, бо о два днї будзе Вилїя, а Пеле планує Крачун преславиц у шопи. Запалї свою малу швичку и будзе грац на тромби „Ноц над Вифлеєм”. Будзе звучац барз смутно и будзе чуц аж горе, дзе мац и оцец. Пеле облєкол свой каменкови капуцик, вжал скоряну шапку и рукавици, паперову штаницлу з лабду, тромбу и швичку до єдней, а бабку-хлапца до другей руки. Помали прешол по кухнї же би мац видзела як ше вон виселює.
„Пеле, уж идзеш вонка?” – пита ше мац. Пеле нїч нє одвитує, лєм кус поцагує з носом. Чи идзе вонка? Га-гааа! Требала би знац дзе син идзе. Вона видзи смуток у його очох. „Мали мой Пеле, цо ци? Дзе ши ше рушел?” „Селїм ше” – гвари Пеле. „Дзе?” – пита ше мац. „До шопи” – гвари Пеле. „Пеле, таке нє можеш зробиц. Покля биш там остал?” „По конєц живота” – гвари Пеле и кладзе руку на клянку. „Вец оцец годзен дакого другого обвиньовац кед одрадзи свой стари клайбас.” „Мили Пеле, нє могол биш, заш лєм, остац при нас? Можебуц зме дакеди наисце нєсправедлїви, алє ми це барз, барз любиме.” Пеле роздумує, оклєва, а вец ше вицагує з мацерового наруча и одходзи по ґарадичох. Мац патри през кухньов облак и видзи малу каменкову фиґуру як ше траци за дзверми зоз випилєнима шерцами. Преходзи пол годзини. Мац чує даскельо слаби тони тромби зоз шопи. Там наисце приємни дом, дума Пеле. Кладзе лабду, тромбу и бабку-хлапца до кута, а швичку на облак. Ой, як смутно будзе стац на Вилїю вечар, кед мац и оцец през кухньов облак попатра долу. Крачунски ядловец! И крачунски дарунки! Пеле лїґа шлїну. Нє, нє сце дарунки од людзох хтори твердза же вон вжал клайбас. Знова грає мелодию „Ах, ти, красни Вермланду”. Час у шопи преходзи помали. Пеле ше пита цо тераз роби мац. И оцец уж сиґурно дома. Дзечнє би закукнул видзиц чи барз плачу. Думал, а вец швидко отворел дзвери и розбегнул ше по ґарадичох. Мац у кухнї. „Мамо, кед будзе крачунски винчованки за мнє, поведз поштарови же сом ше виселєл до шопи”... Виривок зоз кнїжки„Смолендски припитомйовач буяцох и други приповедки”
НАУКА ЗА КАЖДЕ ДЗЕЦКО
ИСУС СЦЕКА ДО ЄГИПТУ Кед ше Исус народзел, указала ше ГВИЗДА! Троме мудерци на востоку зрозумели значенє гвизди и пошли на далєку драгу, поклонїц ше Исусови. У Єрусалиму бул зли цар Ирод. Кед дознал же ше Исус ма народзиц у Вифлеєму, послал там мудерцох, алє гварел, кед найду Исуса, най приду и йому повесц, та ше и вон пойдзе поклонїц... а вон думал Исуса забиц! Мудерци ше поклонєли Новонародзеному, а по Божим порученю нє врацели ше ґу Иродови, алє по другей драги пошли дому. Кед Ирод видзел же є спреведзени, у вельким гнїву и страху дал розказ воїном най позабиваю шицких хлапчикох – до двох рокох у Вифлеєму и околїску, же би так забили и Исуса. Воїни пошли и позабивали шицких хлапцох, як им розказане. Же би Ирод нє забил Исуса, ангел ше явел Осифови и гварел: „Вежнї дзецко и Мацер Його и идз до Єгипту, и там остань док Ирод нє умре!” Святи Осиф з малим Исусом и Марию сцекол до далєкей и цудзей жеми. Так Бог очувал Исуса. Свята фамелия остала у Єгипту по Иродову шмерц, а вец ше врацела до варощику Назарету. Катакиз „Моя вира”
ПОШВЕЦАНЄ ОБИСЦОХ
МОЛИТВА СВЯТОМУ ОСИФОВИ О, святи Осифе! Тебе Бог придал на охрану малючкого Исуса Христа и Його Пресвяту Мацер. Прим и мнє под свою охрану. Я це модлїм и благам, вимодлї ми од Исуса Христа таку ласку, най захранїм свою душу и свойо цело у нєвиносци и чистоти през цали живот.
Нєшка (на Богоявленє) зме у наших церквох святочно пошвецели воду, а уж наютре можебуц до вас придзе паноцец пошвециц обисце и побешедовац з вами. Даґдзе священїк придзе зоз шпивачами, малима або велькима, а даґдзе придзе сам. Алє и тот сам священїк нє будзе сам. Вон вам зоз собу принєше благослов Божи, благослов нєба. А як вонкашнї знак же Бог вошол до вашого обисца буду тоти капки пошвеценей води, котри останю и заблїшню на мурох и образох у вашим обисцу. Тота подїя источашнє и нагода же би ше священїк цо лєпше упознал зоз своїма парохиянами и повязал ше з нїма. При тим стретнуцу барз важна тота заєднїцка молитва и благослов дома у котрим биваце. У тей хвильки шицки домашнї вєдно зоз своїм священїком подзекую Богу за ласки цо их у прешлим року од Нього прияли. То хвилька кед цали дом, вєдно зоз своїм душпастиром модлї же би Бог подаровал мир, любов, щесце и злагоду...; же би княз мира вошол до людского нємира... То хвилька кед фамелийна заєднїца, тота Церква у малим, винєше свойо щири жаданя и будзе модлїц же би их Бог у новим року провадзел на їх драгох живота зоз своїма ласками, же би им дал моци, а у найважнєйших хвилькох и активно помагал. То шицко, и вельо другого, змист и причина нащиви священїка вашому обисцу и його пошвецанє. Наша свята Церква глїбоко вери же вода пошвецена на Богоявленє лїк за душу и цело. Благодат йорданскей води най будзе з вами. Казань о. Романа Миза зоз кнїжки „Дар мудросци” – радио-писма священїка (1993. рок)
МИХАЛ СИМУНОВИЧ
ПАДА ШНЇГ Мали малючки, били билючки пада шнїг, а зоз нїм дзецински гласни, кричаци, трепеци шмих. Най пада били, най будзе мили и най закриє жем. Направим з нього, з шнїгу билого, цо ґод лєм сцем. Пахульки мали, били, лєгучки, закрийце дзецински швет. Падайце швидше, ище густейше, бо без вас вжиме радосци нєт.
КСЕНИЯ МУЧАЇ
ЖЕЛЄНИ ТРИКОВ – Аптї-ха, аптї-ха! – одгукує по хижи, а нука нїкого нєт. – Владку, дзе ши, Владку? – пита ше застарана мац. – Випатра же ши добре замарзнул. Гибай, уварим ци руменцови чай. – Владко одвитує: – Аптї-ха, глєдай ме! – А дзе же це мам глєдац? Дзе же ши? – Там дзе ми и ноги! – одвитує Владко. И наисце, спод кавча викукую два белави зокни, исти таки як и Владково. – Гибайце, зокночки, дам вам чаю! Приходза зокночки, а Владко кричи: – Чекайце ме, чекайце! И я сцем пиц чаю! Аптї-ха! – Наисце, Владку, дзе ши так знал замарзнуц? Нє зоблєкал ти свой цепли триков у оводи? – Мамо, а волну доставаме з овци? – загваря Владко. – Гей – одповеда мац. – Вец мой триков нє волняни, та ме прето анї нє греє и прето сом тераз кихал, аптї-ха! – Алє як ти то можеш знац? – муштрує ше мац. – Ти прехладзени, бо ши вельо бегал за ногами, а твой триков волняни. – Нє, то нїяк нє може буц. Нє можеш ме спревесц. Мой триков желєни, а таки овци нєт. Ми у оводи учели же овци єст били, кафово и чарни, алє желєни зме нє споминали – толкує тераз Владко мацери. – Но, а цо думаш, ти мудерцу, прецо твой триков желєни? – пита ше му мац. – Знам, добре знам! Мой триков желєни прето же овца паше желєну траву. Аптї-ха, аптї-ха! – мирно одвитовал Владко и обецал же вецей нє будзе зоблєкац триков кед вонка жимно.
АНА ТАМАШ
ПЕЦ Муровани пец вигризки сце єсц. Коло пеца лавка, на верх пеца главка. На патки мачичка, на пецу кантичка. Кед жима панує, пец нас притулює. Вше нас моцно греє кед вонка шнїг веє.
ИРИНА ГАРДИ КОВАЧЕВИЧ
ЕМКОВ НОЩОК Емка ма червени нощок, бо на ньго спадла пахулька шнїгова и такой була готова. Мокри бул Емков нощок, та мамка кед то видзела, хусточку з кишенки вицагла и Емки нощок сушела. Од уцераня, чи од финканя, Емки нощок бул ище баржей червени, пре влагу и жиму прехладзени.
МЕЛАНИЯ ПАВЛОВИЧ
ПАХУЛЬКА Пахульочка лєци, з криделками кива. На Мирковим нощку тераз одпочива. Вон ю сцел погласкац. Пахулька скапала. На його носику лєм капка остала.
Анамария Орос, 6 роки, Дюрдьов
Андрей Балїнт, 5,5 роки Дюрдьов
Пап Єлисей, 6 роки Руски Керестур
Владимир Молнар, 5 роки Дюрдьов Корина Будински, 6 роки Руски Керестур
КЕД Я БУЛ ВЕЛЬКИ Кед я бул вельки, наисце сом могол чуда правиц. Знал сом подскочиц аж по хмари и прескочиц шицки авиони. Могол сом и вельки камень розламац и часом з нього мурик вискладац. Бул сом аж и у Африки и преплївал сом вельо рики. Зоз жирафу сом лїсца збивал, а з лєвом сом ше у хладку одпочивал. Кед сом бул вельки, у школи ше лєм фодбал бавело. За домашнї ше дзецом нїч нє задавало. На школских годзинох ше спало, а на одпочивкох ше роздумовало. Кед сом бул вельки... кед сом бул вельки, шицко ми одвитовало. Лука Фа, II, Руски Керестур
УХОДЗИМЕ ДО ШВЕТА ОДРОСНУТИХ
Стефан Ґнип, II, Дюрдьов
ПОЗДРАВ НАЙМИЛШИМ Збогом, дїду, збогом, бабо, збогом, мойо учительки. Я одходзим барз далєко, гет, аж на Нови Зеланд, нови швет. Здрави будзце же сце ше старали за дзецинство мойо. Нїґда нє забудзем кельо сце мали любови за унучата свойо. На вас ше, мили мойо, вше здогадуєм и за шицко вам щиро дзекуєм. Елена Еделински, IV Петроварадин
Помали уходзиме до швета одроснутих. Тераз озбильнєйше прилапюєме даєдни ствари и баржей их розумиме. Уж зме нє дзеци. Нашо дзецинство прешло, а було барз красне. Мам старшого брата и кед зме були менши, вше зме ше вєдно бавели, покля вон нє вошол до рокох у хторих я тераз. У улїци у хторей биваме, єст барз вельо дзеци шицких возростох. Дзень нам вше починал и закончовал ше з бавеньом. Вечарами зме ше бавели на джмурки. Тераз зме ше розишли, бо нам менши дзеци почали допивац. Кажде глєда свою драгу и помали ше меняме. Уход до швета одроснутих прилапюєме на свой способ. Дахто ше меня на лєпше, а дахто на горше. Тераз уж сама знам заключиц хто яка особа, и зоз ким ше мам дружиц, а зоз ким нє. Сама приношим одлуки, робим так як я думам же би требало, алє ту и родичи же би ми помогли. Швет одроснутих випатра забавни и фини, а поправдзе, вон барз чежки и мушиме го прилапиц яки є. Ми тераз у пубертету и шицко нам шмишне, аж и тото цо, кед лєпше роздумам, барз глупе. У будучносци жадам буц адвокат. Тото занїманє ше ми попачело пре вельо ствари хтори адвокати ришую. После штреднєй економскей школи жадам ше уписац на факултет. Кед лєпше роздумам, видзим же ми дзецинство барз швидко прешло. Тераз зме школяре осмей класи и єдини проблем нам успих у школи. Патриме до хторей школи ше упишеме и цо будземе робиц у живоце. Любим же сом вошла до швета одроснутих и же лєгчейше можем ришиц велї ствари. Жаль ми же ми дзецинство прешло, алє ше вше будзем здогадовац тих найкрасших рокох. Єлена Мудри, VIII, Дюрдьов
ДОБРИ ТОВАРИШ Мойому товаришови мено Иван. Барз є добри. Ма осем роки, як и я. Вєдно ходзиме до школи и вєдно ше врацаме дому. Вон добри школяр. Люби бавиц фодбал и ходзи на тренинґи. Вон ґолман. Барз ше любим зоз нїм бавиц. И на фолклор вше ходзиме вєдно. Иван майстор за „патентици”, бо их оправя. Арсен Станкович, II, Дюрдьов
ЖИМА Любим жиму, а найволїм кед є била. Любим кед з нєба падаю били пахульки и кед закрию цали валал. Радуєм ше кед ше мож санкац, оруцовац ше зоз шнїгом, валяц ше по нїм и правиц Дїда Шнїжнїка. Жима радосна, бо Миколай ноши дзецом дарунки, а вжиме славиме и Крачун по григориянским и по юлиянским календаре. Тоту рочну часц любим и прето же ми родзени дзень.
Сташа Малинович, III, Руски Керестур
Ана Папуґа, III, Коцур
ПТИЦА НА МОЇМ ОБЛАКУ Зацмело ше нєбо над моїм валалом. Почали падац пахульки. Я ше бавела у своєй цеплей хижи. Кед одразу, хтошка ми задуркал на облак. Попатрела сом, а то дуркала златна птица. Була гладна. Пошла сом опатриц чи маме хлєба, та сом єй дала отрушинки. Пошептала ми же єй и жимно и же єй зламане криделко. Отворела сом облак. Птица такой вошла нука. Помагала сом єй же би виздравела. Кед вонка дакус оцеплєло и птица ше окрипела, одлєтла. Од теди сом ю вецей нїґда нє видзела. Ребека Сабадош, III Руски Керестур
ВЕЄ ШНЇЩОК Шнїщок пада, шнїщок веє, нощок ше ми червенєє. Спод шапки лєм викукує, на шнїщок ше ошмихує. Сара Горняк, III, Коцур София Симунович, I, Руски Керестур
СТАРАМ ШЕ О ЖИВОТИНЬОХ
Ксенка Катрина, I класа, Руски Керестур
ЖИМСКИ РАДОСЦИ Вжиме найволїм Крачун, бо на тото швето доставам вельо дарунки. Кед ходзим по шпиваню, вшадзи достанєм пакецик. Радуєм ше и дарунком од святого Миколая и од Дїда Мраза. Крачун барз красни кед єст шнїгу, бо ше теди можеме санкац, оруцовац, корчоляц и розбивац ляд у барох. Накадзи спаднє перши шнїг, зоз свою шестру Емину правиме Дїда Шнїжнїка. Любим з татом одруцовац шнїг, кед треба. Аня Симич, III Руски Керестур
ПАХУЛЬКА До моєй загради пахулька злєцела. Кед спадла до води, вона ше страцела. За ню злєтли шестрички, шицки як пирє били. Тримам их на рукавички, бо су ми барз мили. Дзецински очка шнїг дзечнє привитали, радую ше му шицки и вельки и мали. Борис Чордаш, III Коцур
Моя наймилша животиня то пес Джеки. Достал сом го кед сом мал штири роки. Спочатку у нас нє випатрал щешлїви. Кед прешли два-три днї, сцел ше бавиц, шпацирац ше и купац. Давали зме му за єдзенє ґранули. Раз нам ше похорел, та зме му давали млєка. Кед виздравел, бул сом барз радосни. Такой ютредзень сом го купал. Направели зме му хижку. Джеки такой вошол до нєй. Водзели зме го и до ветеринара. Достал инекцию, а кед зме ше врацели дому, бул радосни же є у своїм дворе. Єдней соботи зме з татом були на найлон-пияцу, та сом гварел най му купиме мегчейши ременчок коло шиї. Барз любим Джекия прето же го мам од дзецинства и же ше барз радує кед ше врацим зоз школи. Борис Тиркайла, V Дюрдьов
МОЙ ЛЮБИМЕЦ Дома мам пшичка. Мено му Рекс. Достал сом го за родзени дзень. Вон кафови, ма длугоки хвост и вельки уха. Часто го водзим до парку. Барз люби кед му руцам лабдочку, а вон бежи за ню и вец ми ю враца. Кед придзе до нас мой товариш Борис, приведзе и свойого пшичка Макса, та ше шицки вєдно бавиме. Любел бим ше ище длуго бавиц зоз своїм пшичком Рексом. Иван Молнар, II, Дюрдьов
Емилия Ґачич, VII, Бaчинци
„ПАХУЛЬКА” ДОВОЛАЛА ДЇДА МРАЗА На концу першого полроча и пред самим початком радосних жимских шветох, и влонї, уж традицийно, у Руским културним центру, у Новим Садзе, отримана крачунско-новорочна програма дзецох. Шветочносц зоз своїм наступом отворели наймладши и найшмелши, дзеци хтори у обєкту „Палчочка” ПУ „Радосне дзецинство” раз тижньово маю єдногодзинове друженє по руски зоз виховательку Александру Колбас. На бину ше лєдво змесцели шицки школяре хтори у основних школох у городу маю и годзини руского язика як виборного предмету. Часточку того цо з наставнїцами Ана Марию Рац и Олю Яковлєв на годзинох понаучовали, указали своїм родичом, дїдом, бабом, сушедом и родзином, чийо моцни аплаузи учашнїком того вечара були найвекша награда. Публики ше з веселима стихами представели
рецитаторе, а члени дзецинского хору за тоту програму научели шпиванки о жими и даскельо коляди. Було солистох, дуети и триа, а музичну часц збогацели и талантовани школяре хтори ходза и до музичней школи дзе ше уча грац на клавире, на саксофону... Часц програми нащивительом подаровали и госци – школяре хтори рецитовали и шпивали по болгарски и словацки, а представели ше и дзеци зоз новосадского Каритасу. Интересантна була и презентация о крачунских символох и обичайох, а найвеселше було кед хор почал шпивац познату новорочну шпиванку „Дзвончки, дзвончки” на хтору Дїдо Мраз нє могол остац ровнодушни, алє ше привлєкол з вельким мехом у хторим було дарунки за кажде добре дзецко. М. Р.
ГУМАНИТАРНИ КРАЧУНСКИ ВАШАРИ У Руским Керестуре Традицийни гуманитарни крачунски вашар отримани и у Основней и штреднєй школи „Петро Кузмяк” у Руским Керестуре. Школяре за вашар правели винчованки, прикраски и колачи, а шицок заробок за свойо продукти подаровани особом у потреби у валалє. На вашаре участвовали и школяре трецей класи руского оддзелєня Ґимназиї. Вони за тоту нагоду порихтали мини концерт. М. Дж.
У Коцуре Парохийни Каритас у Коцуре и влонї, пред шветами, орґанизовал крачунски вашар хтори отримани у Церковней сали. Коло двацец викладаче зоз Коцура, Вербасу, Кули и Руского Керестура предавали крачунски прикраски, колачи, суху и орехасту овоц, маджуни и инше за крачунски швета. Приход будзе похасновани за потреби коцурского Каритасу. Вашар бул и у ОШ „Братство єдинство”. Кажда класа мала свой штанд на хторим предавали тото цо направели вєдно зоз учительками, наставнїцами и родичами, а то були крачунски и новорочни прикраски, лакотки, икебани и инше. Шицок пенєж за попредани школярски ручни роботи уплацени за лїченє Милоша Кнежевича, школяра першей класи зоз Вербасу.
Бул и Дїдо Мраз За крачунски вашар зме з учительку правели винчованки и рижни прикраски за нєпознатих приятельох хторим потребна щира помоц. На вашаре бул и Дїдо Мраз. Патульки шицким дзелєли „сладки пакецики” – бомбонки зоз щирима жаданями за радосц у 2018. року. Школяре першей класи зоз учительку
З. К.
ГУМАНИТАРНИ КОНЦЕРТ „ЗА НАШО ДЗЕЦИ” На гуманитарним концерту „За нашо дзеци” хтори отримани пред Крачуном у Руским Керестуре, участвовали шпиваче, рецитаторе, музичаре, а перше ше представели наймладши – дзеци зоз Музичней оводи Дзецинскей заградки „Цицибан”.
ПИРАМИДА Горизонтално: 1. Штварта буква рускей азбуки; 2. Два вокали; 3. Презвиско нашого писателя за дзеци („Лєсаров любимец”); 4. Продукт зоз жита, кукурици, сої...; 5. Обрабянє жеми зоз плугом; 6. Зарно за садзенє або шаце; 7. Єден школски предмет; 8. Ремесельнїк хтори плєце зоз пруца кошарки; 9. Мала цибулька (за садзенє). У перших квадрацикох вертикално: Єден музични инструмент.
ЛАВИРИНТ Док Дїдо Мраз дзелєл дзецом дарунки, його єлень ше дзешка одшпотал. Исц би дому, а єленя нєт. Помогнї Дїдови найсц драгу и през лавиринт сцигнуц ґу єленьови.
Автор Нела Таталович
ГОРУЦИ КАРСЦЕЛЬ Кирил трима карсцель над розгоруценим шпоргетом. Дїдо уходзи до кухнї, та ше зачудовано пита унукови: – Цо ши уж знова видумал? – Наставнїца ми гварела же кед думам виправиц єдинку зоз хемиї, мушим барз добре зограц карсцель – гвари Кирил дїдови.
СКРИВАЦИ ВИРЕЧЕНЯ У каждим з тих виреченьох скрита по єдна оцена якей ше радуєце лєбо ю керуєце у школи. Найдз их. 1. Ей, хлопе, ти цали коршов води сам попил, а и браца смиядни. 2. Нє двой каждому дзецку, алє лєм старшим. 3. То нїяки нє кумшт, вер, Катарино и попробуй сама вискладац коцку. 4. Нє плєц же поє Динка шицки косци з пуляка одразу. 5. Видзиш тот рой катичкох на сушедовим ґузбанку.
СИҐУРНИ ЛЇК – Пан дохтор, яки лїк ми можеце препоручиц процив ходзеня у сну? – пита ше пациєнт. – Посипце по патосу у спальнї райснеґли – одвитує дохтор.
ШАЛТЕР ЗА ИНФОРМАЦИЇ – Маце яблука? – пита ше жена у предавальнї овоци. – Нє маме. – А грушки маце ? – Нє. Вчера сом шицки попредала. – Добре, дайце ми вец дас два кили грозна. – Грозно сцигнє наютре. Вец на предавальню напишце на велько: ШАЛТЕР ЗА ИНФОРМАЦИЇ
РОЗЛИКИ
Гоч скоро єднаки тоти два слики, медзи нїма єст седем розлики. Найдз их! Автор Нела Таталович
ЯК ШЕ СТАРАМ О ЖИВОТИНЬОХ За перше тогорочне число „Заградки” до Редакциї сцигли 62 литературни и подобово роботи од вредних сотруднїкох. Дюрдьов: Анамария Орос, Владимир Молнар, Андрей Балїнт, Марко Станкович (овода); Елеонора Винаї, Иван Молнар, Арсен Станкович, Ваня Роман, Стефан Ґнип, Никола Йованов, Давид Такач (II); Марина Барна, Кристина Дюранїн, Ксения Вереш (V); Єлена Мудри (VIII). Вєдно 22 роботи. Руски Керестур: Корина Будински, Єлисей Пап (овода); Валентина Гарди, Ксенка Катрина, Яна Сивч, Луция Бульчик, Тони Орос, Исак Новта, Патрик Варґа, Денис Ковач, Марко Драґутинович, Звонко ? и єден нєподписани малюнок (I);Александар Драґутинович (V). Вєдно 16 роботи. Коцур: Мая Ґайдош, Сара Горняк, Дамян Радванї, Борис Чордаш, Лука Дорокхази, Филип Хромиш (III). Вєдно 13 роботи. Шид: Уна Шеремет, Александар Девич (III); Мила Євтич, Милан Гарвилчак (VI); Тияна Буйла (VIII). Вєдно 5 роботи. Бачинци: Антония Рац (4 роки) и Андрей Рац (I); Милица Пап (III); Татяна Литрич (IV). Вєдно 5 роботи. Риєка (Горватска): Малвина Папуґа Єленич (6 роки) послала єдну роботу.
У нашим обисцу єст три животинї. Маме пса, мачку и заяца. Мено им Маза, Чарна и Мицка. Маза нємецки овчар. Ма било-кафову шерсц и кафово очи. Чарна то наша мачка хтора ма чарну шерсц и длугоки хвост. Заяц Мицка ма билу шерсц и белави очи. То раса „пуфнастого заяца”. Найволї єсц мархви и трави. Нашо животинї кармим два раз або три раз на дзень. Давам им и швижей води. Барз ше любим з нїма бавиц. Мази руцам лабдочку, а вона бежи за ню. Мицка и Чарна любя кед их гласкам и розмазуєм. Вше кед ше врацим зоз школи, Маза подскакує коло мнє и забрудзи ми шмати. Кед одходзим з дому, мачка мявчи за мну. Шицки мойо животинї любя кед ше стараме о нїх и указуєме же су нам важни у обисцу. Любим животинї прето же ме можу розположиц, а часто и нашмеяц. Марина Барна, V Дюрдьов
Ана-Мария Малацко, V, Руски Керестур
ДАРУНКИ З НЄМЕЦКЕЙ На остатнєй годзини виронауки у першим полрочу чечуцого школского року школяре у своєй учальнї на парохиї при грекокатолїцкей церкви св. апостолох Петра и Павла у Новим Садзе достали дарунки од нєпознатих приятельох зоз Нємецкей. Дзеци ше барз радовали, та за нєсебичну любов даровательом подзековали зоз заєднїцку молитву.
М. Р.
ПЕРШИ ХЛЄБ У ЄГИПТУ
История хлєба
часц историї цивилизациї, бо хованє житаркох оможлївело преход зоз ловарского и номадского стилу живота ґу польопривреди. Утвердзене же перши хлєб правени зоз води и дзивих житаркох, поджамених и печених на камених плочох у пещерох. Перши хлєб зоз жита и ярцу пекли Єгиптянє ище 1 500 роки пред нову еру. Хлєб пекли у найрозличнєйших формох, часто у форми чловека лєбо животинї, а посиповали го зоз рижнима нашеньками. Познєйше Єгиптянє одкрили же кед о цеста, загнєценого зоз муки и води, додаю квас, хлєб будзе мегчейши и векши. Бул то перши хлєб, подобни як нєшкайши.
ДЗЕ ҐОД ДАҐДЗЕ СТИРОПОР
С
тиропор ше прави зоз ґранулох полистирену хтори здабу на зарна рискаши. Полистирен продукт зоз нафти. Стиропор ше нєшка хаснує у будовательстве як одлични изолацийни материял, алє и у других индустрийних конарох. Склєняна, полцорова, глїняна судзина, украси и други предмети транспортує ше запаковани до стиропору, а з того материялу ше прави аж и новорочни украси за ядловци. Стиропор нє мож знїщиц. Прейдзе од пейцсто до милион роки док ше стиропор нє розложи, а потамаль заґадзує животни штредок. Тот материял погибельни за живот у морйох, озерох, рикох. Плїва на поверхносци води, труши ше, а отрушинки здабу на покарму, та их животинї смачнє єдза. Кед, наприклад, морска коритнявка поє фалаток стиропору, вецей ше нє може замуриц до води, бо стиропор лєгки, та тота животиня загинє од гладу. Прето нїзач нє руцайце до води погари, шольки, мисочки або инше цо хаснуєце на вилєту, на плажи лєбо у Школи у природи, бо з тим пакосцице животиньом хторим дом у води. Woo Box природна алтернатива шкатулом зоз стиропору за транспортованє поживи и представя еколоґийне ришенє хторе нє заґадзує природу. Прави ше зоз рециклованей волни и древа, як алтернатива стиропору хтора освоює швет еколоґийней амбалажи.
ЦО ҐОД ДАЦО З ПАПЕРУ
Знаме же ше новини, теки и кнїжки прави з
паперу. Алє з того материялу єст и бависка, украсни предмети, танєрчки, тацни, шкатули... А знаме и жеше папер прави з древа. Древо ше перше подроби и зоз вареньом у вельких котлох претворює ше до каши. Так настава целулозна каша до хторей ше додаваю рижни состойки: лїпкаче, ґипс и инше. Потим ше одцадзи звишок води, а згуснуту масу ше препущує през машину и отамаль виходзи папер.
Pririhtala R. ]. Petrovi~
Алексей Медєши, III Коцур
Луция Бульчик, I Руски Керестур
Синиша Буила, III Коцур
Емилия Миїч, VI Бикич Дол Мила Мандич Вербас