РОК LXХIII • ЧИСЛО 11 НОВЕМБЕР • 2020 ЦЕНА 100 ДИН
КРЕАТИВНА РОБОТНЯ У ВЕРБАШЕ Наставу руского язика зоз елементами националней култури у ОШ „Светозар Милетич” у Вербаше маме два раз у тижню. Єдну годзину маме онлайн, а другу у просториї-учальнї на парохиї при церкви. Так нам ше лєгчейше орґанизовац и позберац, бо зме зоз розличних класох. Годзини нам трима учителька Славица Мали. Нєдавно зме мали креативну роботню на тему єшенї. Участвовали школяре од першей по штварту класу. Школяре першей и другей класи робели поєдинєчно, а треца и штварта класа у ґрупи. Лїпели зме єшеньски лїсца и вивирку и їжа як ше рихтаю за жиму. Тияна и Итана Косич, IV Вербас
Школяре II б класи у Руским Керестуре у Дзецинским тижню нарисовали и вельо цифровани балони Школяре руского оддзелєня другей класи у Коцуре у Дзецинским тижню вєдно офарбели весели рисунок и подаровали „заградкаром”
ДОБРА СТАРА БИЦИҐЛА Шестринїца и братняк, Адела Мецек, школярка першей, и Ерик Русковски, школяр другей класи, биваю у истей улїчки у Руским Керестуре, та ше часто вєдно бавя. Раз кед видзели як ше Сашо Палєнкаш вожи на старей бициґли, пожадали ше и вони пробовац повожиц на нєй, а вец ше и висликовац. Вон ю нашол на пойдзе, без колєсох и без ланца, та кед пододавал цо хибело, розбегла ше як нова. Дознал же ю його дїдо купел давного 1961. року. Прежила войну, кризу, бомбардованє и епидемию корона вирусу, та знова бега по валалє як дараз, кед зме вас ище нє мали.
С. П.
^ASOPIS ZA DZECI
Direktor dr Boris Var}a Odvi~atelqni redaktor Melaniy Rimar Vihodzi raz na me{ac u {kolskim roku • Vidava NVU “Ruske slovo” • Bulevar o{lwbodzeny 81/VII 21 000 Novi Sad, • Telefon (021) 6613-697 • @iro rahunok ~islo: 160-923244-82 • Ro~na predplata 1 000 dinari; za ino`emstvo 25 evra • Dizajn: Mariy Gudak Kompxterski obrobok: Mariy Gudak • Lektor: Bla`ena Homa-Cvetkovi~ • Rukopisi {e nw vraca • Drukuw drukarny: “MAXIMA GRAF”, Петроварадин YU ISSN 0353-9938 E-mail: casopiszahradka@gmail.com Ilustraci>: Aleksandra Medw{i
CIP – Katalogizacija u publikaciji Biblioteka Matice srpske, Novi Sad 821-93 ZAGRADKA: ~asopis za dzeci / odvi~atelqni redaktor Melaniy Rimar. – Ro~. 50, ~. 1 (1991) – . – Novi Sad: Ruske slovo, 1991 –. – Ilustr. ; 24 cm Mese~no tokom {kolske godine. – Nastavak publikacije: Pionirska zahradka ISSN 0353-9938
На насловним боку: Школяре руского оддзелєня першей класи зоз учительку Славку Хромиш у Коцуре (Фото: Оля Русковски) (Илустрация зоз Заградковей архиви, Лю. Сопка)
Здраво, заградкаре! Кажди школярски состав, лєбо писньочка, ме обрадує и такой енки правим место на боку у „Заградки”. Сиґурно видзице кед пременїм наслов, а знаце чом? Нє прето же ше ми нє пачи, алє як би випатрал бок кед би на нїм було три або штири состави под насловом Моя фамелия, Як сом препровадзел розпуст, Погришела сом, Злєкла сом ше, Пребач, виновати сом, Мой домашнї любимец... Алє, то нє гришки, и нє мушим виправяц и меняц наслови. То лєм редакторски интервенциї. А я виправям и гришки – язични и правописни. Кед я нє виправим, виправи лекторка и то зоз червеним пенкалом. У составе нїяк нє шме остац, наприклад: преживляванє, бавиме виї або джмурки, бавиме фодбала (треба – бавиме ше на оганячки лєбо на джмурки, бавиме фодбал лєбо ше фодбалуєме), нєшмем, нємаме (треба нє шмем и нє маме, занимљиве (а треба интересантне)... И запаметайце: наприклад ше пише вєдно. Кед найдзеце свой состав обявени у часопису, пречитайце го, та и сами увидзице дзе и цо виправене. Шицки ше на власних гришкох учиме. Чувайме язик, а нє калїчме го, бо то нїхто нє люби буц покалїчени, та анї наша власна, мацеринска бешеда. Мам и єдно надпомнуце: Нє забудзце ше подписац под свою роботу. Шицки зауваги и надпомнуца з найлєпшу намиру ваша редакторка
Ей, дїду, дїду,
яку ти маш биду, унука Миколу цо нє дзба за школу, нє ма руки злати, нє люби алати, нє збера дроцики, нє позна гвоздзики, млаток чи шекеру... Лєм, на компютеру оганя страшидла, якиш чудни бидла цо ше заганяю, ровно лєм штреляю, та ше забиваю. Дїдо лєм здихує, з главу одмахує: – Ровно лєм поцерпам же на тим екранє раз и тот мой унук занавше останє.
ИРИНА ГАРДИ-КОВАЧЕВИЧ
ДЇДОВА БРИҐА
СЕРАФИНА МАКАЇ
ПЕТИЧКА
Д
арко и його оцец Славко уж давно жию сами. Зна Дарко же його оцови живот чежши як другим оцом, бо вон ше муши о шицким остарац, шицко поробиц и за шицко заробиц пенєжи. Прето ше Дарко трудзи оцови у каждей хвильки помогнуц и потримац го кед му чежко. Зна вон же оцова найвекша бриґа же би вон, його син, бул здраве и веселе дзецко и же би мал добри успих у школи. Єдного октоберского жимного рана Дарко станул скорей як звичайно, уварел оцови чай, а себе порихтал фриштик. Потим зобудзел оца, хтори бул нєсподзивани, бо звичайно оцец будзи сина и рихта му фриштик. – Нє чудуй ше, тату, нє могол сом спац, та сом станул дакус скорей! Вонка богата єшень пресцерала свою плахитку, благи мраз помали пражел траву и квеце у заградки, а оштри витрик наганял людзох же би ше озбильнєйше облєкали. Прето Дарко винял зоз ормана грубшу якну и цеплєйши патики и помали ше порихтал до школи. Пред оцом остал план за цали дзень и обовязка же би синови и себе уварел полудзенок. Бо дзеци муша добре єсц же би зоз нїх повирастали здрави людзе, а оцове тиж муша добре єсц же би мали моци робиц. Час пред поладньом прешол швидко, поладнє видзвонєло и пошвидко ше Дарко врацел зоз школи, алє застарани. А, ниа, цо ше стало: того дня його татови бул родзени дзень и син го сцел нєсподзивац зоз красним, алє скромним дарунком. Сцел му купиц уметнїцки фарби, бо його тато у
шлєбодним чаше люби мальовац.По закончених годзинох попонаглял до предавальнї, алє кед сцел виплациц, кишенка була празна. Страцел пенєжи. Так тераз бул у дилеми чи татови повинчовац родзени дзень так на празно, чи пойсц даґдзе пенєжи пожичиц, та купиц фарби. – Цоже, сину, цо ши таки застарани? Озда ши нє хори? Або ши у школи дацо погришел? – Нє, тату. Достал сом петичку зоз историї, алє сом ци сцел купиц дарунок за родзени дзень и повинчовац ци, а страцел сом пенєжи. Пойдзем од дїда пожичиц. – Нє, нє сину, твоя петичка ми наймилши дарунок. Дзекуєм ци... Оцец облапел сина и притулєл го на перши, скриваюци возбудзенє.
КСЕНИЯ ВАРҐА
НОВИ БУТИК Мацерино руки у нашим обисцу чуда стваряю, та ше на хвильку до правей скравецкей роботнї претваряю. - Танї надшиц панталони, тренерку прешиц Мижови, ґомбичку пришиц оцови... Подшиц би ище фармерки синови, зошиц заглавчок сушеди, а себе сукню ушиє на жиму док будзе вецей кеди. Парток би вишиц, чи дзирку зашиц на шестровим трикове, чи ище даскельо дзири справиц на моїх фармеркох бо тераз у моди таке нове. Шицко вони можу и знаю! Гварим, руки нашей мацери нови бутик шица отвераю. У тей писньочки єст даскельо слова хтори починаю зоз чарнєйшима буквами. Попробуйце и ви пренайсц таки слова хторим корень або основа исти, а початок або законченє иншаки, та вец вони зошицким инше знача. Ми вам кущик поможеме: писац – написац, уписац, преписац, записац... Кед ше вам сце, таки слова зложце до приповедки або писньочки и пошлїце до „Заградки”.
ОБЛАЧОК ДО ШВЕТА РАДМИЛА ТОМИЧ Сучасна сербска писателька Радмила Томич народзена 31. октобра 1960. року у Обреновцу. Закончела Педаґоґийну академию за образованє воспитачох у Беоґрадзе, а жиє и роби у Предшколскей установи у Обреновцу. Пише поезию, прозу и драмски тексти за дзеци и младих. Заступена є у велїх антолоґийох. Даєдни дїла єй преложени и на анґлийски, русийски, українски и на наш руски язик. Обявени єй кнїжки Дакеди жадам – дакеди шнїєм, Филипинова фийовка, Ципелова Пепелюґа, Вельки шветла малого варошу и Шерцо нє важи. Кнїжка Нєбо нє за одроснутих обявена авторки як награда за найлєпши писнї за дзеци на 25. Медзинародним фестивалу поетох за дзеци „Булка” отриманим у Червинки 2018. року.
ДЗЕЦИНСКИ ТИДЗЕНЬ Програми нам пририхтали и вельо радосци дали, цо нє сцигли, будзе ютре, так нам твардо обецали.
РОДИМИ КРАЙ
У ДЗЕЦИНСКИМ ТИЖНЮ шицки о нас барз дзбаю: сликую нас, любя, розмазую... гвизди з нєба зняц пробую.
Родими край то хижа твоя и тополї и баґрени, пах бишалмох и фиялки и улїци розбавени.
Обецали: Войни нє будзе. Шицки ше буду любиц. Здрави, весели буду людзе, и школи нови буду правиц.
То место дзе ше бавиш, шпацираш, дзе любови враци, дзе твоя лавка и древо цо ше нїґда нє затраци.
Най шицко обецане будзе любов – нє парада, най сам нїхто нє останє, и нїґдзе най нє будзе звада. Дзеци жадаю най тирва шветочносц, радосц кажди дзень, НАЙ РОК ЦАЛИ БУДЗЕ ЯК ЄДЕН ДЗЕЦИНСКИ ТИДЗЕНЬ.
То слики и пахи, памятки на дом цо щици, кед ши ту, и кед ши далєко цо це греє, цо ци швици.
ЧУВАЙ ГВИЗДИ З родзеньом нєбо нам гвизду дава на дар, а вона, чувствуєм, мой ангел чувар. Червени лїца греє и ошвицує ноци, за успихи, пораженя вше дава моци. Нєбо, модлїм це, кажду гвизду чувай – за Ацово: „Любим це” аж два ми дай.
ЯРНЇ ОЦЕНИ Яр кед рано скорей швитнє, кед пахню трави и квитки. Яр кед черешня квитнє и кед оганяш швидки лепетки. То час кед ше красше шнїє, сладше дума и и швидше бега, кед птица шпива док гнїздо виє, лєс шушоци, позно ше лєга... Яр кед нас жимне и цме напущує, зиходзи зоз сцени. Шицко пахнє, алє нє знам яки ми пах губи оцени.
ЩЕСЦЕ
Д
зецинство то сладки трапези. То период кед нас трапя рижни питаня: Хто, кому, цо? Чом нє нина, алє андя? Прецо ше нє гутори джидо, алє дїдо? Прецо нє шмеме сами прейсц прейґ калдерми? Чом нє можеме цали дзень буц у сушеда? Прецо тото, а чом нє гевто? А одвити, розуми ше, ище рижнороднєйши. Того дня, шицки були розположени. Слунко и хмарки ше прекрашнє бавели на високим нєбе. Витрик шпивал нїжни писнї, а древа ше гомбали з нїм у ритме. Шицки були весели, та таки були и дзецински питаня того дня. Поконцу валала, нєдалєко од желєней пажици бивал Яни. У його улїчки, вєдно з нїм, росли велї дзеци. Хлапци були нєсташнєйши як дзивчата, алє кед ше давало одвити на чудни питаня, шицки були єднак подковани. Скрите медзи власками желєного тепиха на пажици, розбавени дзеци глєдали щесце. А щесце, розуми ше, то бетелїнка зоз штирома лїсточками. Шпиваюци весели писнї, на кучаци глєдали по травки таку рошлїну. Велька спокуса була хто будзе найшвидши, бо озда будзе и найщешлївши. Ана нашла перша. Барз ше зрадовала. У єдней ручки чувала щесце, а з другу и далєй глєдала нове, можебуц ище векше. Так шицки. И наш Яни, гоч йому цошка нє ишла робота того дня. Кед уж шицки нашли свойо, помогли Яникови у глєданю. Покус забановани, гласкал траву з лїву, а вец и з праву руку, же би мал лєпши прегляд. Було бете-
ЗЛАТКА ЧИЗМАР
лїнки, алє нє и таки зоз штирома лїсцами за Яника. Кед вишпивали ище єдну писню, нашол и вон свою рошлїнку. Злєкол ше же останє сам нєщешлїви, алє му одлєгчало кед му до руки убегло щесце. Бависко було успишно закончене, та дзеци почерали щесца медзи собу. Тот тому, гевтот далєй и так ше нє знало дзе закончело тото перше. Та и Яни престал буц забриґовани. Кед приповедал дома своїм найблїзшим же як ше нєшка шицки ущесцели, потолковал мами же то було фантастичне искуство. Вон таки манди, анї нє знал як то щесце мож длуго глєдац, а вец кед ше го найдзе, треба го чувац и черац зоз другима, та будзе ище векше. Чудни, наисце чудни дзецински швет.
ДАНИЕЛА ТАМАШ
ЗЛАТНА ФАРБА Цо вецей вредзи од злата златного, того металу драгоциного? То кед ци мама або тато твойо цепло поведза: „Злато мойо”. Теди нам любов шерцо виполнює и зоз златну шветлосцу вона ошвицує.
РОЗКОНАРЕНИ ОРЕХИ ЕВҐЕНИЙ ЧАКАН
К
олєсо слунка червеного вечаром шедало. Фарби на нєбе накладло яки мож лєм задумац. А по тим нєбе, помальованим, прелєцовали врани, чарни, числени, цихо... Здогадуєм ше. Ишли зме з дїдом на санкох на салаш. Бул ище досц ясни дзень, гоч було пред вечаром, алє жима була оштра. Теди сом перши раз видзел врани з блїзка, у громадох, числени чарни. Нє лєцели ище дому. Цошка джубкали попри драги. Було их и опрез нас, на санїци. И там, у громадкох, джубкали. Було то давно. Познєйше од людзох, а и найвецей з народней литератури, дознал сом: врани зловисни, наявюю боль, жалї, аж и шмерц... * Єдней яри дїдо ме одвед на польо. Було перше копанє кукурици. З нами була и моя мац. Гони були длугоки, кукуричка слабка, барз зароснута. Мой дїдо ми гвари: – Видзиш кельо ґазу єст? То шицко треба очисциц. Даґдзе єст и по два-три кукурички. Зогнї ше, наймоцнєйшу зохаб, а гевти витаргнї. Меркуй, кед лєм єдна кукуричка, нє вируб ю. У кукурици було тараски, и фольовки, и младого ґордону, дзивого мугару и хто зна цо ище нє. Мац ми лєм надпомла: – Меркуй на векши грудки. Тварди су. Мотика оштра, одскочи и – пойду пальци! Спочатку дїдо и мац ми помагали най нє заоставам. За нами ше кукуричка желєнєла, на витрику колїсала, а нєпотребни рошлїни прели. По другим обраценю, дас у пол гонох, уж сом нє заоставал. Ишло ми копанє. Нараз дїдо скричал: – Меркуй, орех! „Яки орех? И дзе у стред гонох?”, чудуєм ше. „Хто го лєм ту посадзел? Ту кукурица.” – Врани – гвари дїдо. – Як же врани садза орехи? Дїдо випросцел похребцину, утар зной зоз чола и гвари: – Так: врана украднє орех, потим го у пискох ноши своїм малим. Кед врана у лєту гракнє,
орех єй зоз пискох випаднє. Нє жима, та го нє поглєда. Волї ше врациц по други. Такой того вечара зме их з дїдом и посадзели до загради. И полївали зме их кажди дзень пред вечаром. Орехи, посадзени до загради, прияли ше лєм два. Тераз вони уж вельки, розконарени, барз лїсцати. И приноша вельо плоди каждого року. Можебуц на нїх шеднє, по звичаю, и даєдна врана, отаргнє орех, одлєци, гракнє и – посадзи го даґдзе до даєдних гонох. Врани нє зловисни, нє наноша боль и жаль. Вони, нєсвидомо, и овоцаре.
ДЕЯН АЛЕКСИЧ
ЯК БРАМУШКА ПОСТАЛА ВАЖНА
О
длучела єдна брамушка постац важна. Алє нє знала як то зробиц. Нїхто ю у єй брамушнїку нє сцел научиц. „Добре”, подумала вона, „знам хто ме може научиц же бим була важна”. И пошла ґу лєвови. Лєв дримал под коруну баобаба. – Лєве, лєве, науч ме як най постанєм важна! – скричала брамушка нарату. Лєвови, розуми ше, нє падало на розум нїкого нїчому подучовац, бо ше найволєл вилєговац под баобабом. – Гайде, лєве, бо це випляскам! – загрожела му брамушка. Алє лєв бул таки поспани же нє мал шмелосци анї ше злєкнуц. Даремно брамушка пробовала. А кед вона даремно дацо пробує, вец то барз даремна робота. Прето розчарована гварела лєвови: – Ти, лєве, узрети за пензию. О, ту ше лєв таргнул. Прейґ того нє могол прейсц. Од давна ше зна же лєви найбаржей мержа пойсц до пензиї. Чом? Прето же вец муша читац новини у парку. А озда шицки знаю же лєви нєписмени. – Добре, гварел конєчно лєв – научим це буц важна. Ниа, так. И теди тот лєв зричал так моцно, так гарлато, а барз лєвовски же ше два километери отамаль єден кокос загойсал и одпаднул з конара. Алє то ище нє нєволя. Тамаль праве преходзел караван у хторим була и прекрасна, нїжна принцеза Живана зоз єдного европского дворцу. Жаль ми же тото мушим повесц, алє кокос спаднул просто принцези на главу и вона, замрачена, закончела на рукох сина поглавици Юрипупи. Кед би нєвольом ту бул конєц, шицко би ше даяк забуло. Медзитим, цалу сцену зоз своїм фотоапаратом призначел єден луцкасти папарацо. Розуми ше, ютредзень у шицких шветових новинох ошвитнул наслов „Любовна идила принцези Живани и сина поглавици Юрипупи!” На шицких шветових дворцох приповедало ше лєм о тим, и то, лєм прето же єдна брамушка сцела постац важна. Принцезов оцец, Його Кральовске Височество, бул огорчени пре скандал. Цали дзень роздумовал поцагнуц ше до пензиї и од бриґи шулькал свойо густи кральовски баюси. А кед вечар конєчно лєгнул спац, його баюси випатрали як вистата ластовка хтора му заспала под носом. Иншак, у нормалних условийох, ластовки вообще нє здабу на баюси. То мали, вертки птици хтори вєшенї лєца на юг. Там дзе єден мали Африканєц вше послуха мацер кед го пошлє одорвец кокос за вечеру... Преложела М. Р.
РУСОМИР Д. АРСИЧ
ЄШЕНЬ Нєбо уж шиве цми хмари водзи, та чупор птицох на юг одходзи. Забилєла ше перша ина, голи конари витор зогина. Урожай ше збера нови, сцигла хвиля за трикови. Прешпивала М. Римар
ЗОЗ ШВЕТОВЕЙ ЛИТЕРАТУРИ ДЖЕК ЛОНДОН
ГЛАС ДЗИВИНИ (виривки) (Бек сцигнул на Аляску. Його вєдно з даскелїма другима псами, медзи котрима ше барз видзвигує вельки, били пес зоз Шпицберґу, Шпиц, и искусни алє лєнїви Дев, купую глашнїки канадскей влади Перо и Франсоа. Бекови на сиверу шицко нове: шнїг, били ескимски пси, алє ше найбаржей нєсподзивал кед го запрагли до санкох.) рансоа притвердзел на ньго якиш венєц ременьох и капчох. То були штверци яки дома кочияше кладли на конї; и яґод цо видзел же робя конї, так и його упрагли до роботи: санки на котрих шедзел Франсоа, цагал по лєс котри ше гранїчел з долїну, а отамаль ше врацал з полнима санками древа за огриву. Гоч його достоїнство було боляцо уквилєне же з нього створели цагаце бидло, заш лєм бул досц мудри же би ше пре тото нє процивел. Повиновал ше и робел як найлєпше могол. Франсоа бул строги, глєдал наглу послухносц и дзекуюци його батогу, тота послухносц нє заоставала. Дев бул приученши при цаганю, та кусал Бека за заднї ноги накадзи би тот погришел. Шпиц бул предводитель, тиж добре приучени, та гоч анї нє могол вше долапиц Бека, замурчал би з часу на час як знак гнївного опомнуца. Бек лєгко учел, при зєдинєним подучованю двох своїх товаришох и Франсоа, обачлїво напредовал. (Запрагнути пси рушаю на длуге путованє. Бек барз швидко учи и о кратки час упознава звичаї Сиверу. Медзитим, приходзи до нєприятельства медзи нїм и злобним Шпицом. Шпиц найглавнєйши пес у запрагнуцу, їх предняк, а з тим припознати за наймоцнєйшого. Бек жада присц на його место, и сцерпезлїво чека конєчни обрахунок. До обрахунку приходзи кед єдного дня шицки пси рушели до лову за заяцом.) Бек нє пущал глас. Нє застановел ше, алє ше розбегнул на Шпица, плєцо попри плєцу, так моцно же нє потрафел гарло. Котуляли ше и котуляли по шнїгу дробним як прах. Шпиц нагло скочел на ноги, скоро як кед би анї нє бул звалєни, укушел Бека за плєцо и одскочел. Два раз му зуби цвенкли як челїчни писки коня док ше поцаговал же би завжал цо лєпше положенє, а длугоки и подзвигнути нозґри ше скруцовали и мурчали.
Ф
Шпиц бул вивежбани борец. Зоз Шпицберґу, през Арктик, та прейґ Канади и Баренса вон указовал свой звичай медзи шицкима расами псох и посцигнул власц над нїма. Обняти зоз страсцу кусаня и знїщеня, вон нїґда нє забувал же и його процивнїк ма исту жажду. Нїґда нє нападал, покля нє бул порихтани прияц нападанє. ... Алє, Шпиц страцел битку. Бек, побиднїк, моцна жвир, котра забила и думала же то добре, стал и припатрал ше на подїю пред собу. (Робота Пероа и Франсоа закончена. Шицки пси на чолє з Беком були предани поштаром, а потим нєзнаходлївим приселєнцом, котри днями нєзлюдно гоня вигладнєти и вистати пси. Кед сцигли до лоґору познатого ловара Джона Торнтона, витрапени Бек нє сце пойсц далєй. Били го його панове, аж док го Торнтон нє однял. Його любов ґу новому панови и подзекованє безконєчне. На вецей заводи му виратовал живот. Приповедки о Бековей моци и красоти лєца по Аляски. Окреме ше преславел з подвигом хтори зробел у малим варощику Доусону. После розгварки у карчми „Елдорадо”, дзе ше якиш людзе вихвальовали зоз своїма псами и вишмейовали Бека, Торнтон бул примушени бранїц свойого пса. Твердзел же вон може рушиц примарзнути санки на температури минус шейдзешат ступнї, на хторих терха – двацец мехи муки, чежка тисяч фунти – пол тони. Бек рушел санки и бежал з нїма сто ярди. Тормтон достал ставянку – тисяч долари. Алє... при Бекови ше вше частейше будза звикнуца його дзивих предкох. Гласи з дзивини го волаю до шлєбодного живота, до дружтва вовкох. Одупера ше им звязани з любову ґу Торнтонови, аж покля Торнтона нє забию Индиянци Їхати. Теди ше Бек приключел ґу чупору вовкох.)
НАУКА ЗА КАЖДЕ ДЗЕЦКО ЗОЗ СВЯТОГО ПИСМА
ПРИТЧА О КУКОЛЮ НАШО ХРИСТИЯНСКИ ШВЕТА
(Мт 13, 24-30)
ВОВЕДЕНИЄ Швето Воведениє або уходзенє до храму Пресвятей Богородици у нашим церковним календаре ма перше место после шветох на чесц Господа нашого Исуса Христа. То єдине швето котре нам припомина дзецински роки живота Мариї у Назарету. Понеже Йоаким и Ана длуго нє мали дзеци, вони ше завитовали же кед буду мац дзецко, пошвеца го Господу Богу. Так и було. Вони свою дзивочку Марию пошвецели Богу кед мала єден рок, а кед мала два роки, надумали ю дац до храму на воспитованє и школованє, а зисцели то кед мала три роки. Уход до храму бул барз святочни. Опрез нїх ишли дзивчата зоз запалєнима швичками, а за нїма родичи водзели за руки свою дзивочку облєчену до богатого облєчива. З нїма була їх родзина и велї зацикавени за тоту подїю. На уходзе до храму дочекали их первосвященїки на чолє зоз Захарийом. Вон Марию уведол аж до часци храму цо ше вола Святая святих, до котрей уходзел лєм первосвященїк и то лєм раз у року. Тота подїя зачудовала шицких. У храме Мария остала до дванастого року свойого живота. То бул час кед ше дзивчата одавали и розуми ше, виходзели зоз храму. Медзитим, Мария гварела своїм воспитачом же дава завит дївичества. Почитуюци тото, лєм ю заручели за Осифа, зоз роду Давидового. У храме ше Мария вельо модлєла, робела ручни роботи и читала Святе Писмо. На спомин уводзеня Мариї до храму, Церква уведла швето 21. новембра по григориянским, односно, 4. децембра по юлиянским календаре. Зоз кнїжки о. Р. Миза „Нашо християнски швета”
Другу притчу им винєсол (Исус) гуторяци: „Царство нєбесне подобне чловекови котри пошал добре нашенє на своїм полю. А кед людзе спали, пришол його нєприятель и пошал куколь помедзи жито и пошол. Кед шаце виросло и принєсло плод, зявел ше и куколь. Теди пришли господарово слугове и гваря му: ,Господару, чи ши нє пошал добре нашенє на своїм полю? Одкадз же єст куколю?, А вон им одвитовал: , То зробел нєприятель чловек., А слугове му гварели: ,Сцеш, отже, же бизме пошли и виплєли го?, Алє вон им гварел: ,Нє! Же бисце збераюци куколь вєдно з нїм нє витаргали и жито. Зохабце най и єдно и друге рошнє до жатви, а у чаше жатви повем косачом: Позберайце перше куколь, повяжце го до снопох най ше спалї, а жито позберайце до моєй житнїци,.” (куколь – белаве квеце у жице, коровче) БОГОРОДИЦА – окремна характеристика Мариї зоз Назарету, котру преглашел и дал єй тоту назву Собор у Ефезу 431. року. Так ю наволали прето же вона народзела нє лєм чловека Исуса, алє богочловека, особу котра источашнє Бог и чловек, зоз людску и божеску природу и волю. Богородици на чесц у єдним року припадаю шейсц вельки швета: Непорочне зачатиє, Рождество (Мала Матка Божа), Воведениє, Благовищенє, Успениє (Велька Матка Божа) и Покров Пресвятей Богородици.
МИХАЙЛО КОВАЧ
ХМАРА И ДЗЕЦИ Хмара з кончиком єдним до ягоди упарла, та ше на верщок ягоди розпарала, подарла. А вец ше з нєй водичка на жем спущела, дзецом бависка прервала и погубела.
МИКОЛА М. КОЧИШ
ХМАРА НА ВЕРХУ ТОПОЛЇ Здзала ше хмара на верх топольох, та йойчи, плаче, слизи по польох розлїва, лєє... Плаче и вола хто єй поможе, хто ю отамаль зняц тераз може, хто же ю знєє? А так бим дзечнє и сам то зробел, дзечнє ю знял, та место хмари, шивей и мокрей, слунко бим здзал.
ЇЖ И ЗАЯЧОК
ЯКИМ ОЛЕЯР
На концу лєшика жили себе єден їж и мали заячок. Були барз добри товарише. Часто ше вєдно бавели, приповедали и єден другому помагали. Алє пришла жима. Заячок себе порихтал цеплу малу хижочку, же би у нєй прежимовал. Наношел сухого лїсца и моховини, та спокойно чекал жиму. Їжик на шицко тото забул. Кед зажимнєло, нє мал дзе, та ше припитал ґу заячкови: – Пожич ми лєм кус места у твоєй хижочки. Заячок го пущел нука, та себе так жили вєдно и було им добре. Алє ше їжик почал шириц на шицки боки и зоз своїма джобацима игелками завадзал заячкови. Од їжикових игелкох заячок ше уж нє могол обрациц у своєй хижки. На остатку замодлєл їжика же би ше вибрал з обисца. На тото му їжик гварел: – Мнє ту цалком добре, а кед тебе нє, глєдай себе другу хижу.
МЕЛАНИЯ РИМАР ВАСИЛЬ МУДРИ
ЇЖИК И КОЛЯК Нє бої ше їж од вовка, анї коляк ше нє зрива: гоч обачи вельку чуку вон и далєй мирно плїва. Цо же за нїх гладни вовки, цо же за нїх чуки вельки? Ша, вони защиту маю процив каждого – игелки.
ЇЖ Їжа мож видзиц у парку, у лєше, при драги лєбо у сухим ярку. На хрибце ма вельо игелки джобаци, та з нїма грожи док ше нападач одкаль пришол нє враци.
КВИЗ ЗА НАЙМЛАДШИХ
О ДЗИВИХ ЖИВОТИНЬОХ Вивирка найволї: 1. Лїсковци 2. Хлєб з еврокремом 3. Брамушки
Жирафа ма: 1. Чарну шерсц 2. Платкасту месково-билу шерсц 3. Шиве пирє Лєвово дзеци: 1. Лєвчата, лєвики 2. Ящурки 3. Пергачи
Медведз вжиме: 1. Скака з пеца на главу 2. Лапа суньоґи 3. Твардо шпи до яри
Заокруж точни одвити и зоз стрелку их повяж зоз одвитуюцима илустрациями.
Даниел Винаї, 5 роки Руски Керестур
Миколка Дротар, 6 роки Коцур Николина Копчански, 6 роки Коцур
Стефан Ґайдош, 5 роки Коцур Алексей Бесерминї, 6 роки Коцур
БЕШЕДУЄМ ЩИРО О СЕБЕ Кед бешедуєм о себе и своїх способносцох, заключуєм же сом иншака як други и же можем вельо того цо други нє можу. У каждодньовим живоце трудзим ше справовац цо лєпше можем. Мам и нє барз добри прикмети и любела бим их нє мац, алє сом ше так звикла, та ми будзе требац вельо часу одвикнуц ше. Думам же бим ше цо скорей требала одвикнуц спац до поладня, и трудзиц ше окончовац свойо задатки на час. Нє требала бим буц любоморна на других, анї зависна од других. Мам и мали, а добри прикмети. Любопитлїва сом, любим ше дружиц и буц у вельким дружтве, любим ше шмеяц и франтовац. Барз любим тренирац, гоч яки спорт, и дзбац о костираню и о красним физичним випатрунку. Думам же би ше кажде требал занїмац зоз даяким спортом. Найгорше ми патриц на дакого кед ше трапи, або кед го дахто уквилює, або биє. У каждей хвильки сом порихтана помогнуц каждому. Знам же то чеснота и же з тим можем вельо посцигнуц и мац вельо приятельох. Барз бим любела уписац ше до медицинскей школи, закончиц ю и робиц тото цо жадам ище од дзецинства. Гоч медицинска школа нє лєгка, потрудзим ше найбаржей як сом годна наганяц ше и закончиц ю, та посцигнуц свой циль у живоце. Думам же би було лєпше кед би дахто други о мнє написал состав, алє сом ше трудзела буц щира и написац о себе правдиво. Ясмина Мудри, VIII, Дюрдьов
ХМАРА ШЕ РОЗПЛАКАЛА Лєто прешло, єшень сцигла, лїсце опадує, а квеце преє. Хмари плачу уж цали тидзень, нє мож их змириц док нє слунечни дзень. Єдна велька хмара так ше розплакала же слунко доволала та ше дуга указала. Патрик Варґа, IV Руски Керестур
Хана Хромиш, I, Коцур
ЯК ШЕ ЛЮБИМ БАВИЦ Я найволїм бавиц бависка на компютеру кед сом сам. Алє кед ми приду пайташе, вец ше вшелїяк бавиме. Найволїме ше бавиц на праисторию, на войни и вожиц ше на бициґлох. Кед ше у бавеню врацаме до праисториї, дахто обрабя жем, дахто ходзи на лови, дахто рубе древа, а дахто копе руди – желєзо и углє. Динари нам видумани. У тим бависку ше нїґда нє повадзиме. Час нам швидко прейдзе. Кед ше бавиме на войни, єст нас вельо. Кажде ма свою базу и територию. Скриваме ше до даяких дзирох, лєбо на древа. Мнє ше найбаржей пачи кед ше вожиме на бициґлох, бо ше вец обегуєме, лєбо бешедуєме. Дакеди ше вожим и сам. На компютеру бавиме даяки горор бависка, лєбо бависка у хторих ше преживює або дацо виглєдує, прави и збера потребни материяли за таке бавенє. Любим ше з пайташами вшелїяк бавиц.
Андрей Горняк, I, Коцур
Арсен Станкович, V, Дюрдьов
Марко Станкович, II, Дюрдьов
ХМАРА ШЕ РОЗПЛАКАЛА Єдного дня хмара ше барз розплакала. Нє плакала вона од жалосци, алє од радосци. Видзела як ше дзеци бавя, як ше шмею и злагодза ше. Видзела и як єден бачи дава псови на улїчки єсц, як єдна жена помага дїдови позберац намирнїци цо ше му розсипали на драже. Потим хмара видзела и мою пайташку як помага єдней баби прейсц прейґ драги на други бок улїци, а видзела и як я помагам мацери у загради. Друга хмара єй пошептала же мой сушед помогнул людзом садзиц древа. Дознала и як мой оцец вредно роби на полю. Тота хмара ше барз зрадовала кед видзела шицки добри дїла, та ше од радосци розплакала.
Звонко Мудри, IV, Руски Керестур
Урош Плавшич, IV, Руски Керестур
ЄШЕНЬСКИ КРАСИ Найкрасша рочна часц єшень. Богата є зоз фарбами, овоцами и польопривреднима плодами хтори збераме и одкладаме. Вєшенї рана жимни, та ше баржей облєкаме, а през дзень цепло, та зоблєкаме грубши шмати. Вечари жимнєйши и вец знова береме шмати хтори зме мали рано. Єшеньски дижджи дробни, длугоки и допити. Древа и трава вецейфарбово. Зоз конарох опадує жовте, месково, червене и кафово лїсце. Найкрасши ми лабди єшеньских ружох хтори прибераю заградки, улїчки, парки... Кед ше пойдзе шеднуц вонка на лавочку и кусац маґочки, под ногами сущи спрете лїсце. По нїм дзеци весело скакаю и розгартаю громадки уж пограбаного лїсца. Кед повиставаю, одпочивок найду при пуканих ґестиньох. Ксения Катрина, IV, Руски Керестур
Яна Сивч, IV Руски Керестур
МАЧИЧКА И ПШИЧОК Була єдна чарна мачичка, барз ше бала од билого пшичка. Вше ю оганял, мира єй нє дал, кед пошла з дому, по дворе ю глєдал. И мачки вон хибел, та ше заш врацела, блукац по швеце сама нє сцела.
Матия Макша, IV Коцур
Матей Станкович, I, Коцур
МОЙ ДЇДО Мойому дїдови мено Дюра. Вон наставнїк у пензиї. У школи учел дзеци математику. Люби ше зо мну шалїц, наприклад: Як ци мено? Подколєно... Вше кед пойдзем до баби, идзем опатриц и дїда. Кед патри даяке спортске змаганє, и я з нїм патрим. Вон ме водзи до школи. Кед ма часу, занїма ше з польопривреду. Думам же мой дїдо найлєпши на швеце. Исак Новта, IV, Руски Керестур
Юлияна Бесерминї, III, Коцур
ЯК ШЕ БАВИМЕ З ПАЙТАШАМИ Як и шицки дзеци, и я ше любим бавиц з пайташами. Дакеди ше бавиме на оганячки, а дакеди на джмурки. Тот хто джмури, муши чишлїц до пейдзешат або и вецей, як ше догвариме. Вонка ше зоз двома лєбо трома пайташами бавиме и на преживйованє. Правиме рижни алати, оружиє, огень... алє шицко тото лєм задумуєме. Вец идземе на лови, глєдаме овоци: бобки и яблука, жридло води, материял и место за хижу. Вец ше бавиме же зме нашли даяке племе, та од нїх купуєме жито, лїки, єдзенє и конї. Потим пойдземе до пещери и глєдаме руди: метал, углє, бронзу и злато. Знаме ше дараз бавиц и на штрельби. Дахто полицай, а дахто криминалєц. Любим ше бавиц и на дзиви заход, та зме у тим бависку шерифове, кавбоє и фармере. Глєдаме криминалцох и застановюєме крадзи. Любим ше бавиц и на компютеру, и вожиц ше на бициґлох з пайташами або з брациком. Звичайно идземе до центру валала, або по Ґроблянску улїцу, або до парку, та вец назад. Любим и рисовац, алє ше найволїм бавиц вонка з пайташами. Стефан Ґнип, V, Дюрдьов
ЧАС ПРЕПРОВАДЗЕНИ У ИЗОЛАЦИЇ Пре вирус оберацей хороти котра шицким була позната, мушели зме пременїц свойо справованє. Здогадуєм ше як почало. Були зме у бачика на родзеним дню. Одразу на телевизиї гварели же пре епидемию преглашени позарядови стан. Виходзенє зоз обисца було нам огранїчене зоз полицийну годзину. Пензионером було забранєне виходзиц на улїцу. У изолациї сом похопел як ми барз хибя товарише и друженє. Час сом препровадзовал дома зоз фамелию. Зоз товаришами сом бешедовал лєм прейґ дружтвених мрежох. Шлєбодни час сом хасновал помагаюци оцови и бачикови на полю. Зоз оцом сом кошел бетелїну и садзел сою, а у бачика зме вожели гной и кармели статок. Тот час ми бул интересантни, бо сом нє мушел вчас ставац и рихтац ше за школу, алє лєм уключиц телевизор и провадзиц онлайн наставу. Домашнї задатки зме доставали прейґ интернету, та сом часто бул при компютеру. Кед ше нам дараз случело же зме забули виробиц домашнї задатки, наставнїца – класни старшина нам надпомла. Школски рок ше закончел дакус скорей як звичайно, и почал лєтнї розпуст. Нови школски рок почал у мирнєйшей ситуациї. У школи шицки школяре и наставнїци муша ношиц маски. Мали зме, а и тераз ище вше маме нєзвичайни дожица котри будземе паметац цали живот. Михал Хромиш, VIII Дюрдьов
ДЗЕЦИНСКИ ТИДЗЕНЬ
Дарунки за приятельох у „Белавей птици”
Дзецински тидзень того року тирвал од 12. по 16. октобер. Пондзелок у Школи у Руским Керестуре отримани квиз зоз математики „Иншака математика” за школярох трецей и штвартей класи. Окреме ше змагали школяре трецей класи, по петнацецеро у ґрупи, а окреме школяре штвартей класи. Додзелєни награди – перше, друге и треце место, а кажди учашнїк достал чоколадку.
Крос – хлапци
Крос – дзивчата
Младши дзеци, школяре першей и другей класи рисовали зоз крейдами по бетону на дворе. Вовторок бул подаровани дзецом у Здруженю за помоц ментално нєдосц розвитим особом „Белава птица” у Кули. Циль бул направиц дацо за дзеци, же би знали же ту маю приятельох и же можу присц нащивиц школярох у керестурскей школи. Даєдни оддзелєня правели древко порученьох за своїх приятельох, други рисовали найкрасше як знали, з любову ґу тим дзецом. Стреду школяре рисовали и правели вистали у учальньох и у школским голу на тему „Чом любим Сербию”. Штварток бул спортски дзень. Вєдно зоз учительом-тренером бешедовали и промововали рукомет шицким школяром. Пияток у школи отримани крос. Шицки програми у рамикох Дзецинского тижня були барз красни, а окреме кед дзеци правели древко приятельства.
„ВЕСЕЛИНКА” БУЛА ВЕСЕЛА
Фестивал дзецинскей творчосци Руснацох у Войводини „Веселинка” того року нє отримани у юнию як звичайно, вонка, алє аж 22. октобра нука, у велькей сали Руского културного центру у Новим Садзе, у условийох яки наклада ситуация пре корона вирус. Участвовали лєм новосадски дзеци (шицки зоз защитнима масками на тварох), а место шветочней програми орґанизована роботня на єшеньску тему. Наставнїци руского язика хтори у основних школох тримаю годзини мацеринского язика, Ана-Мария Рац и Оля Яковлєв поволали своїх школярох, алє и предшколски дзеци най зоз свою креативносцу збогаца „Веселинку”. Наш познати ґлумец, режисер и писатель Звонимир Павлович отворел Швето радосци и пречитал даскельо писнї Меланиї Павлович, писательки за дзеци по чиєй кнїжки „Веселинка” и Фестивал достал мено. Потим отримани мали квиз хтори обдумала наставнїца А. М. Рацова на тему єшенї. През бависко у хто-
Промовованє рукомету у Дзецинским тижню у Руским Керестуре
рим дзеци дополньовали виреченя, научели вельо нови слова по руски: овоцнїк, винїца, заграда, яблуко, грозно, диждж, амрел... Хто люби рисовал, мал нагоду вифарбйовац и виштриговац вшелїяки лїсца, а вец их лїпиц на древо направене зоз паперу. Направена и мала вистава нарисованих дунчикох зоз жимнїцу, а док ше дзеци бавели зоз фарбами, приказана ретроспектива знїмкох зоз скорейших програмох на „Веселинкох”. Фестивал финансийно потримала Городска управа за културу Нови Сад и Покраїнски секретарият за образованє, предписаня, управу и национални меншини. М. Р.
РОЗЛИКИ
Найдз и заокруж 10 розлики медзи рисунками 1 и 2.
ОФАРБ РИСУНОК
Автор Нела Таталович
Поздавай числа, а збир ци укаже хтора то фарба, та з ню офарб поля на рисунку. Наприклад: 12+6=18, а число 18 помаранчецова фарба. Значи же кажде польо означене зоз числом 18 треба офарбиц на помаранчецово...
НАРИСУЙ МАЧКУ
Автор Нела Таталович
Провадз рисунки, та крочай по крочай и ти нарисуй таку мачку.
Помогнї медведзови найсц у лавиринту дражку ґу єдзеню хторе вон найволї.
Автор Нела Таталович
ЛАВИРИНТ
ДЗЕЦИНСКИ ТИДЗЕНЬ У КОЦУРЕ И У ДЮРДЬОВЕ За новемберске число „Заградка”достала 73 литературни и подобово роботи, як и фотоґрафиї од вредних сотруднїкох и їх учителькох и наставнїцох зоз даскелїх школох. Руски Керестур: Ксения Катрина, Луция Бульчик, Валентина Тот, Валентина З. Гарди, Валентина В. Гарди, Яна Сивч, Патрик Варґа, Исак Новта, Тадей Виславски, Денис Ковач, Звонко Мудри, Тони Орос, Урош Плавшич (IV). Вєдно 37 роботи. Вербас: Аня Аритонович (4 роки); Матеа Ґшвенґ (I); Даниел Фа (II); Надя Ґшвенґ, Уна Аритонович, Лука Молнар, Лука Стоїлькович, Серґей Такач, Данило Молнар (III); Николина Кошарко, Тияна и Итана Косич (IV); Шарлота Стоїлькович (V). Вєдно 16 роботи. Коцур: Николина Копчански, Стефан Ґайдош, Алексей Бесерминї, Миколка Дротар (овода) и 1 рисунок школярох 2. класи. Вєдно 11 роботи. Дюрдьов: Елеонора Винаї, Иван Молнар, Стефан Ґнип, Никола Йованов, Арсен Станкович (V); Марина Барна, Ясмина Мудри, Ксения Вереш, Кристина Дюранїн (VIII). Вєдно 9 роботи.
У ОШ „Братство єдинство” у Коцуре школяре зоз учительками посадзели древо, рисовали по бетону и правели рижни бависка зоз еколоґийних материялох. Старши школяре у дворе посадзели квеце, а у Доме култури мали стретнуце зоз писательом Тодетом Николетичом. У рамикох Дзецинского тижня у физкултурней сали у Школи було стретнуце зоз спортистом Миланом Шолайом. Тидзень пошвецени дзецом з радосцу означели и предшколски дзеци у ПУ „Герлїчка”. Л. Кх.
У ОШ „Йован Йованович Змай” у Дюрдьове орґанизовани рижни активносци и у оводи и у школи. Наймладши направели зоз паперу древо товаришства и виложели го до валалскей библиотеки. Дзеци участвовали у музичних роботньох, рисовали, рецитовали и танцовали, а красна єшеньска хвиля им оможлївела бавиц ше и зоз лабдами и штранджґами на дворе и у парку. Зоз крейдами у фарбох мали уметнїки рисовали на тему „Подзелєне щесце два раз векше”. Школяре нїзших класох приношели до школи квеце, та з нїм украшовали конки. Старши школяре ушорйовали Еко куцик, а члени Школярского парламенту правели пакецики за особну гиґиєну младшим товаришом. У Дзецинским тижню орґанизована и акция пошвецена школярови хторому потребна помоц за лїченє ридкей файти хороти. О. Р.
Вистава роботох керестурских школярох на тему: Чом любим Сербию
Наградзени школяре на Квизу „Иншака математика” у Руским Керестуре
НАЙВИСШИ ГОРОД Високо у перуанских Андох находзи ше стари рударски камп злата на 5 100 метери надморскей висини. Там, у городу Ла Ринконада жию вецей як 300 000 людзе. Хвиля у найвисшим городу на швеце така як на заходних побрежйох Ґренланду, гоч город лєжи на лєм 140 од екватора. Лєта влажни, а жими сухи. Штредня рочна температура воздуху 1,20C. Населєнє нє ма драги, водовод анї канализацию. Хижи направени зоз плеху, без изолациї. То найзаґадзенши город на швеце, а таке, пре рударство, и цале околїско. Рударе нє доставаю плацу: робя 30 днї у мешацу без плаци, а 31. дня им дошлєбодзене вжац тельо руди злата кельо на плєцох можу однєсц дому.
ВАШАР ШМИХУ Стотки кловнох зоз цалей Латинскей Америки позберали ше у престолнїци Мексика з нагоди 17. медзинародней конвенциї кловнох, хтора пошвецена миру. Найважнєйша лекция на штиридньовим цифрованим сходу була як од звичайного франтовнїка постац прави майстор шмиху. У рамикох Вашару шмиху орґанизовани даскельо семинари и роботнї на хторих ше будуци кловни учели правиц фиґури зоз надутих балонох, шминкац ше и виберац костими. Участвовали хлопи, жени и дзеци, а на Вашаре мож було видзиц познати костими Чарлия Чаплина, Лудош Калапара и Алберта Айнштайна. Шмих здрави! Шмейце ше и приявце ше участвовац на Вашаре у Мексику. Хто зна, можебуц ше дакому пощесци вешелїц людзох у Мексико Ситию!
ПЕРШИ ЦУКЕР Цукер ше першираз зявел у Европи под час панованя Александра Велького (у III вику п.н.е.). Стари народи нє знали за цукер. Єдзенє сладзели з медом и зоз ману (сладким єдлом зоз хторим бог Яхве кармел Жидзох у вигнанстве). Перши вистки о цукровим наду пришли до Европи кед Александер Вельки нападнул Индию. У Индиї од давна людзе жували цукров над, цицали лєбо пили сок зоз тей пресованей рошлїни. Аж коло 300. року п.н.е. випродуковани перши тварди цукер. Под час крижарских войнох цукров над пренєшени перше на Кипар, а потим и до жемох сиверней Африки и южней Европи. После одкрица Америки пренєшени є до тамтейших колонийох, дзе ше на плантажох вихасновйовало роботну моц рабох. Пририхтала Р. Ґ. П.
Виктор Будински, II, Вербас
Павле Штефанко, III, Коцур Валентина Пушкаш, II, Дюрдьов
Ивона Рац, VI, Руски Керестур
Денис Ковач, IV, Руски Керестур