РОК LXХV • ЧИСЛО 5 МАЙ • 2022 ЦЕНА 100 ДИН
ВЕЛЬКОНОЦНИ ВАШАР У РУСКИМ КЕРЕСТУРЕ У наших школох ше уж традицийно отримує вельконоцни вашар, чому ше школяре барз радую. Сами правя рижни прикраски и смачни колачи, та вец шицко тото предаваю у школским дворе. Отримованє вашару у Руским Керестуре предложел Школярски парламент. Школяре були барз радосни, бо шицко цо направели, попредали, а назберани пенєж похасную за естетске ушорйованє школи – купованє фарби за жардинєри, за квеце и инше.
РОЧНИ КОНЦЕРТ У ДЮРДЬОВЕ Аматере КУД „Тарас Шевченко” у Дюрдьове 24. априла, на Перши дзень Велькей ноци уж традицийно отримали свой рочни концерт. На нїх участвовали шицки члени активних секцийох, а найвеселши були наймладши. Од рецитаторох ше численей публики представели Мария Рамач, Владимир Молнар, Иван Молнар и Милица Михальовски. Младша дзецинска фолклорна ґрупа одшпивала єдну шпиванку, а представели ше и зоз своїм першим танцом „Любичица мала”. Танєчнїки старшей дзецинскей ґрупи одтанцовали „Буковински свадзебни танєц”, а патрачом указали и „Руски танци.” Нє знаме кельо учашнїкох було на бини, а же их було барз вельо, знаме.
ВЕЛЬКА НОЦ У КОЦУРЕ Перши дзень Велькей ноци почал на 8 годзин рано зоз школярску Службу Божу у нашей грекокатолїцкей церкви. После шпиваней Служби Божей парох коцурски о. Владислав Рац и капелан о. Данил Задрепко у церковней порти пошвецели кошарочки зоз пасхалним єдзеньом. Коло кошарочкох зоз єдзеньом було вельо весели дзеци, поприберани у найкрасшших шматох. На Други дзень Велькей ноци Архиєрейску Службу Божу служел владика кир Георгий Джуджар.
^ASOPIS ZA DZECI
Direktor dr Boris Var}a Odvi~atelqni redaktor Melaniy Rimar Vihodzi raz na me{ac u {kolskim roku • Vidava NVU “Ruske slovo” • Футожска 2/ІІІ 21 000 Novi Sad, • Telefon (021) 6613-697 • @iro rahunok ~islo: 160-923244-82 • Ro~na predplata 1 000 dinari; za ino`emstvo 25 evra • Dizajn: Mariy Gudak Kompxterski obrobok: Mariy Gudak • Lektor: Bla`ena Homa-Cvetkovi~ • Rukopisi {e nw vraca • Drukuw drukarny: “MAXIMA GRAF”, Петроварадин YU ISSN 0353-9938 E-mail: casopiszahradka@gmail.com Ilustraci>: Aleksandra Medw{i
CIP – Каталогизација у публикацији Библиотека Матице српске, Нови Сад 821-93 ЗАГРАДКА: часопис за дзеци / одвичательни редактор Мелания Римар. – Роч. 50, ч. 1 (1991) – . – Нови Сад: Руске слово, 1991 –. – Илустр. ; 24 cm Месечно током школске године. – Наставак публикације: Пионирска захрадка ISSN 0353-9938
На насловним боку: Облїванє у Руским Керестуре (Фото М. Афич)
Здраво, заградкаре! Конєчно озда почала цепла яр, така якей швечи у маю. Преславели зме и першомайске даскельодньове швето, дакус оддихли, опущели ше, надружели ше, та знова до школи, ище лєм єден мешац. А вец... за роздумованє и планованє як найкрасше препровадзиц лєто, тераз наисце нєт анї кус часу. Лєм шедзиц, учиц и буц активни на каждей школскей годзини. Найчежше школяром осмих класох, бо пред нїма остатнї одлуки до хторей штреднєй школи би ше найволєли уписац, а у тим вибераню найважнєйши посцигнути успих. Зоз нїм ше отвераю велї дзвери за дальшу драгу до живота. У маю нас чекаю вельо вшелїяки подїї, змаганя, манифестациї, вилєти, а за шицко ше треба добре порихтац. Чека вас и Стретнуце предшколских дзецох зоз руских оддзелєньох и друженє рускокерестурских школярох трецей и штвартей класи у Коцуре односно Дюрдьове, та о тих красних дожицох нїзач нє забудзце понаписовац и послац до своєй „Заградки”. Рисуйце и фотоґрафуйце ше, бо часопис шицки вашо роботи нєсцерпезлїво чека. Поздравя вас ваша редакторка
СИЛВЕСТЕР Д. МАКАЇ
БУДЗМЕ ПОЗИТИВНИ Хлапец шумни, подстригани, вичесани, вше прибрани.
Кед ше озвеш, вон ше збури, на каждого вше ше хмури.
Зна поздравкац, вон „узрети”, позитивни ма прикмети.
Та роздумай кадзи рушиш, и то, боме, такой мушиш!
Гевтот други барз лєнїви, здути, гербни, вше звадлїви.
Же чи будзеш позитивни, чи волїш буц неґативни.
„ЗАГРАДКОВ” 75. РОДЗЕНИ ДЗЕНЬ
ТОВАРИШСТВО
У СРИМСКЕЙ МИТРОВИЦИ
Цо то товаришство? То барз зложене питанє и нє мож на ньго барз швидко одвитовац. Шицки маю своїх найлєпших товаришох, та так мам и я. Мойо наймилши товарише то Мирослав, Саша и Зоран. З нїма ше найчастейше бавим. Кед зме були у интернату, вєдно зме бивали у истей хижи. Рано зме нараз ставали, фриштиковали и одходзели учиц. У пополадньових годзинох зме ше бавели, а вечар зме одходзели до варошу. Понеже ше на дзешец годзин вечар у хижи мушело загашиц шветло, ми поцме ище длуго приповедали. Нїґда зме ше нє вадзели и вше зме мали часу вислухац єден другого. Помагаме себе и так будуєме нашо товаришство. Синиша Лубурич, VII Вербас „Заградка”, число 3-7, новембер-марец 1993/1994
Од прешлей єшенї и у Сримскей Митровици орґанизована факултативна настава руского язика з елементами националней култури. Учителька Златка Сивч-Здравич зазберує школярох у Основней школи „Йован Попович” и учи их писац перши букви, читац перши слова, и вец рецитовац и шпивац на мацеринским язику. Шицко тото цо за кратки час з вельку дзеку научели, подаровали своїм родичом на програми за Дзень женох. На тей програми була и редакторка „Заградки” и писателька за дзеци Мелания Римар, як и Ирина Папуґа, предсидателька Дружтва за руски язик, литературу и културу. На осмомарцовскей програми у Сримскей Митровици основана и литературна секция „Ана Кнежевич”. „Заградка”, число 8, април 2001. року
Школяре зоз Вербасу и Кули на заєднїцкей програми
ОБЛАЧОК ДО ШВЕТА ЗОРАН ПЕНЕВСКИ Познати писатель, сценарист и прекладатель Зоран Пеневски народзени 1967. року у Панчеве дзе и тераз жиє. Пише романи, приповедки, есеї, прикази, критики. Преложел вецей як 50 кнїжки (анґлийски, нємецки и македонски), а його роботи прекладани на анґлийски, голандски, французки и македонски. За дзеци написал романи Сара и забута площа, Будимир и ридки файти и Сара и януар за два дзивчата.
Роман о тим чом шицко таке яке є Сара одблукала у думкох. Днями роздумовала о тим же нєодлуга будзе дзивка и лєдво чекала тот час. Прави чловек. Вецей нє дзецко. Анї нє дзивче. Чом за ню и за одроснутих нє важа исти правила, як то же од шицких наставнїкох математики на швеце праве єй ше ушол Саруман, чи наисце шицко таке як випатра и од чого зме таки яки зме? Сара ходзи до седмей класи, жиє у бачика и люби читац Миленово пости. Вони два ше нє познаю, алє обидва читаю стрип „Чарно-била заграда”. Милена одлучує зоз вибранима цитатами зоз стрипу ришиц проблеми хтори ю трапя, а Сара прилапює виволанє вибераюци свойо виреченя. Алє по новорочней журки за нїх януар достанє нове значенє. Вєдно зоз юнакиню „Чарно-билей загради” придзе конєц глєданя одвиту на питанє хторе ю трапи: чом тот швет праве таки? После чудесних подїйох на забутей площи, Сара ше знова руша до нєпознатого, водзаци читача през нови, нєсподзивююци авантури духа. 6. Слунко кущичко пребило хмари, та якиш жовти зарї вицифровали хижу. Алє и далєй було жимно. Сара ше понацаговала, вишла зоз хижи и збачела свою шестру як патри якушик серию. Мичко шедзел на рамику слики и джубкал мур. Потим ґравчаци полєцел и станул Дуци на плєцо. Вона го одогнала. Папаґай ґравчаци одлєцел, направел круг и злєцел єй на главу. Лєм цо спущел свой джубок до єй власох, Дуца зврещала. „Нєдоброто єдна, вирвем ци джубок док це влапим!” Перше бренканє телефона ше ище нє закончело, а Сара ше уж озвала.
„Лєм хвильку.” Потим положела руку на слухалку и озвала ше ґу Дуци: „Ти го нє можеш анї побочкац, а нє же би ши му вирвала джубок! Буду ци потребни тоти клїщи, комбинирки! Най ше пачи.” „Пардон, можеце повториц цо сце гварели?” чуло ше зоз слухалки. „Та, нїч. Гварим шестри же лєм зоз комбинирками може вирвец папаґайови джубок.” „Думам же сом погришела число. Довидзеня!” Вяза ше претаргла. Сара збунєто попатрела на слухалку як кед би на нєй стало даяке толкованє, алє тото ше нє случело. Цо би то мало значиц!? „Хто бул?”, зявела ше Мира, уж прибрана за виход. „Нїхто. Погришне число.” „Добре, я идзем до варошу, а потим на єдно важне преподаванє вязане за проєкт на хторим робим. Полудзенок у фрижидеру, а ви ше остарайце же бим вас нашла живих и здравих док ше врацим.” Накадзи Мира вишла, Сара виняла сладоляд зоз фрижидера (андя сиґурно нє думала на ньго кед спомла полудзенок), поєдла даскельо ложки и вжала мобилни видзиц цо ше збува у швеце. Маца ше сликовала у купальнї зоз полупрофилу, та було видно одраз єй твари (67 лайки за три минути), хтошка Пегавому винчовал родзени дзень (3 лайки), хтошка почал лїпиц поволанки за преславу Нового року, а Милена положела нови пост. Преложела М. Р.
ПОПРОБУЙЦЕ САМИ Нє знам як ви,
алє я ше опробовал уж у вецей занїманьох... Так, наприклад, до дньовнїка сом позаписовал койяки дожица. Кед будзем новинар, а може писатель, ту материяли котри би ше друковало яґод кнїжки, сценария... Свойо „кишенково” ровно записуєм: тельо и тельо сом приял, тельо сом дал за жуваче, а тельо до кина, пожичел братови... И такой зрахуєм кельо ми остало.
МИХАЛ РАМАЧ
ЗАПОР У МАЮ Шумни нам го натаргала каня! Крача ярком, чуц го аж зоз Шлайсу. Тащки и голуби пооганя и прибегнє обляц нашу кайсу. Пирска, чапка, чурчки себе прави. На дєпику ше з качками мачка. Квичи од радосци брест риняви, а под стреху пере ше купачка. Плющи, аж ше пенї на долїнє. Купа верби, чаплї и жабчата. Вец по житку бежи змиц пипинє и бишалму зрец цо скорей прата. Сипе ше вонконцом благодатни. Будзе житка, будзе випеканя. Гучи, сущи, трепе цали златни. Шумни нам го натаргала каня.
МЕЛАНИЯ ПАВЛОВИЧ
Дакус ми з початку шмишнє випатрало, алє, хто зна. Нїч ми нє почкодзи дакус знаня зоз економиї... Соки сам розправям; пудинґ знам увариц, шлаґ и пуслу трепац; стол порихтац за єдзенє... Хто зна, може мойо перше роботне здруженє будзе у готелу. Попробуйце сами, цо и як вам одрук идзе. Може ше нє сподзиваце за схопносци котри маце.
ЦУНЦА ЕВҐЕНИЙ ЧАКАН
–Й
МИРОН КОЛОШНЯЇ
ДЗЕ Я ШЕДЗИМ У КЛАСИ Я шедзим такой ту, при облаку, лавка ми у першим шоре; локец руки ми часто на лавки, а длань на чолє. Погляд ми як нїч часто пребиє ценки скла облака, а нїхто нїґда нїч нє обачує и нїхто нїч нє нагадує. За поглядом и думка вилєци так гнєтка на желєну пажицу, на улїцу до конарох древа, до гнїзда птици, до сушедового двора заблука, пообраца щенята у кошаре сушедовей суки, зацагнє ремень на штверци под брухом кобули и видзе горе на пооддзвиговани черепи кадзи вилєтую з пойда голуби. А вец, ище висше, висше, понад комин. понад хмари сами, за голубами... „Врац ше, врац ше з думками!” – кричи учитель на мнє. Я вец кус розжалєни охабям щенята, кобулу, птици, голуби под хмарами, горе, и мирно шедам до лавки при облаку у першим шоре.
овґенчу, вежнї голєм ти єдно щенятко, бо нє будзем знац кому их понукнуц кед ше преселїм. Ви маце дома места у дворе и гумнє, а мнє их жаль так поодруцац – гварел ми мой дакедишнї професор мальованя и росийского язика и стаємни мой режисер Петро Ризнич Дядя кед ше селєл зоз школи до приватного обисца. У Старей школи теди були древени шопкибараки, та хто сцел, у нїх могол тримац и заячки, и птички, и качки, и гуски, та аж и прашатко. Дядю преселєли ми, студенти, даєдни познєйше и його колеґове. Вибрал сом себе єдну сучку. Була била, дакус кафовкастей фарби, алє зоз чарнима очками. Була барз малючка. И кед виросла, нє була векша од обичней мачки. Ище була и дакус кратша. Дома зме теди нє мали нїякого пса, та була барз шлєбодна. Окреме ше мнє барз радовала кед сом пришол з Нового Саду як студент на викенд дому. Дому сом приходзел каждей другейтрецей соботи и оставал сом до пондзелку рана. Цунци сом пошвецел надосц часу. Одношел сом єй єсц. Була барз задовольна кед сом приходзел з єдзеньом. Думам же вона нє була така радосна пре єдзенє як пре нашо стретнуце. Можеце себе задумац кельо могла поєсц кед була менша од мачки. Тота радосц ше предлужовала през полни штири роки. Два роки сом студирал, єден рок сом робел у Коцуре як наставнїк, а тиж єден рок сом служел войско. Е, кед сом робел у Коцуре и кед сом бул вояк, барз ридко зме ше видзели. Зоз Коцура сом пришол дас штирипейц раз, а з войска лєм два раз дому. Замерковал сом же, кед ме збачела, перше була розчарована, як кед би ме нє познала, алє истого дня, кус познєйше, шерцо єй почало моцнєйше дуркац, радосц на єй твари була гет обачлївша. После одслуженого войска почал сом робиц у керестурскей школи Теди зме установели контакт яки припада найлєпшим приятельом. Кед сом сцигол дому зоз школи, прибегла ґу мнє, станула на два заднї ножки и радосно скинчала и танцовала. Вше ме здогадовала на найкрасшу балерину. Зоз преднїма ножками виводзела як и шицки балерини з руками – и горе, и долу, и на бок и напредок. Так исто и зоз своїм хвосциком. Зоз заднїма ножками скакала як по бини. И випнута була. Я нє бул нїяки дресерхореоґраф, та нє знам як вона тото шицко звладала, и то з якимшик чудним, умилним ошмихом. Тоту радосц, вешелє и любов при животиньох ридко сом дожил. Щенята нє мала, бо коло нас нє було „фраєра” такого нїзкого росту.
НЄСТАШНИ ЖАЛУДЗ
АНДРЕЙ ЖИВОР
ил раз на древе нєсташни жалудз. Вше кед дахто преходзел попод древо, вон би му скочел на главу, одбил ше и врацел ше на конар. Тото животиньом хтори преходзели през лєс досадзело. Раз швиня гварела: – Тераз я йому укажем! Кед скочи, причекам го з отворенима писками и прелїґнєм го. Кед преходзела попод древо, жалудз скочел, швиня отворела писки, а вон – чванґр – по чолє и одскочел на конар. Вец гварела коза: – Дораз го я! Кед жалудз скочи, я нє рознєєм писки, алє ше поцагнєм, вон спаднє и так го влапим. Кед коза преходзела попод древо, попатрела горе. Жалудз скочел, коза ше поцагла, а жалудз як спаднул на жем, одскочел и козу – банґ – по глави и знова скочел на конар. После якогош часу здогаднул ше заяц: – Знаце цо, товарише, принєшеме єден красни женски жалудз и охабиме го на жеми же би го прицагнул. Кед ше жалудз залюби до жалудзки, змири ше. Принєсли вони под древо єдну красну жалудзку. И наисце, жалудзу ше попачела и престал упрекосциц животиньом. Пошол зоз жалудзку на древо и вецей отамаль нє зиходзел. Жили щешлїво на конаре, а животинї ше шлєбодно преходзели попод древо и махали им.
Ж
ДУШАН РАДОВИЧ
ПРИПОВЕДКА О МАЛИМ ПАЛЬЦУ М
алим дзецом допито. Процив дзецинскей допитосци видумани бависка. Єдно бависко то ножнїчки. З ножнїчками мож штригац: кнїжки, сукнї и пальци. Друге бависко то млаток. З млатком мож прибивац: гвозди, биц по мурох и тиж по пальцох. Треце бависко то ширки. Зоз ширками мож запалїц: сукнї, прекривачи и знова пальци. Дзеци мали, а пальци найменши. Бул раз єден палєц и мено му було Дюра. Мал вельо братох. Раз браца Дюру одведли до фийовки. Дюра ишол остатнї и прищипел нохец. Други раз го одведли до рерни. Най видза чи там горуцо. И Дюра ше попекол. Треци раз ше бавели з иглу. Шицки ше поцагли, а Дюра ше уджобнул. Дюро, Дюро, озда ши нє найгорши палєц? Гей! Кед треба длобац до носа – гайде ти, Дюро. Кед треба до жимней води – дриляй Дюру. А кед треба замачац два пальци до маджуну, вец то даєдни други пальци, а нє Дюра. Того Дюру маю шицки дзеци. То тот пияти, найменши.
ЗОЗ ШВЕТОВЕЙ ЛИТЕРАТУРИ
ПРУТ И ГОВЕРЛА Карпатска леґенда
ПРУТ то рика, лїва притока Дунаю, ма жридло у Восточних Карпатох у України, твори природну гранїцу медзи Молдавию и Румунию. ГОВЕРЛА то гора, найвисши верх Українских Карпатох и цалей України (2061 м.), находзи ше на меджи Ивано-Франковскей и Закарпатскей обласци. Обидва тоти мена маю свою леґенду. У малим горским валалє жил хлапец по мену Прут. Кажди дзень напасал овци у гори. Раз ше длуго затримал у лєше, та одлучел же ту останє през ноц. Лєгнул под стару смереку и вистати швидко заспал. И шнїл ше му красни сон. Пришла ґу ньому прекрасна дзивка, у длугей желєней сукнї, мала желєни очи и власи длугоки аж по жем. Смутно патрела на ньго и нїжно го гласкала по власох. И поцихи шпивала. Прут ше нє могол напатриц на лєсову красавицу. Нацагнул руку же би ю дорушел, алє вона щезла. Патрел доокола, видзел лєм гвизди на нєбе. Идуцого вечара Прут знова нє пошол дому. Скрил ше за грубу смереку и чекал красну дзивку зоз свойого сна. И дзивка пришла. Шедла под смереку и зашпивала. Одгукнул по гори єй шпив. Дзивка нє збачела Прута, а вон пришол ґу нєй и облапел ю. Длугоки єй власи их обняли. Прут єй патрел до ясних желєних, глїбоких, чаривних очох. Як кед би ше до нїх зляла шицка краса вельких Карпатох! Дзивка ше ище вше бояжлїво тресла у його наручу. – Хто ти? – питал ше єй. – Я Говерла! – гварела поцихи и ошмихла ше. Од теди Прут нє ишол дому. През дзень напасал овци, а вноци Говерла и вон блукали по горох. Любов велька и щира виполнєла им души. Алє їх щесце нє тирвало длуго. Прут мал дома стару мацер, а Говерла нє могла нїґдзе пойсц без допущеня єй оца, горского цара. Дзивка мушела повесц оцови свою тайну. Кед чул за єй любов зоз Прутом, оцец ше розгнївал и преклял дзивку!
Прибегла Говерла ґу старей смереки, притулєла ше жалошнє ґу нєй и заляла ю зоз слизами. – Смереко-матко, пать яка доля моя. Алє я без нього умрем! Пребач смереко, пребачце гори, пребач голубе мой, кед нє будзем з тобу, за мнє живота нєт! – И крочела до бездни. Затресла ше жем, злял ше диждж, витор силни згинал древа, ламал шицко пред собу. Лєм блїскавка кеди-нєкеди ошвицела гори цо ше дзвигали з долїни. Аж рано буря престала. Вишло слунко, ошвицело Карпати. Ту дзе була долїна, виросла гора. Висока, аж по хмари. И верх под шнїгом. Вчас рано прибегнул Прут и нє нашол стару смереку. –Говерло, Говерло, дзе ши? – глєдал ю. – Ту сом! – чул ше цихи глас. – То я, гора, твоя Говерла. Прут ше вецей нє врацел ґу людзом. Лєм раз, медзи горами, зявела ше ричка. Пребивала ше през каменя, падала з прикрих стинох и цекла швидко далєй, чиста як слиза. Тоту ричку людзе наволали Прут, а високу гору при нєй Говерла. Пририхтал: Ю. П.
НАУКА ЗА КАЖДЕ ДЗЕЦКО ВОДИЦОВА ПИСНЯ
МАЙ – МЕШАЦ ПРЕЧИСТЕЙ ДЇВИ МАРИЇ ешац май пошвецени Пречистей Дїви Мариї. Чловечество озда нє могло найсц красши дарунок: найкрасши мешац у цалим року пошвециц найкрасшей особи – нашей Нєбесней Мацери. През цали мешац служи ше молебени на чесц Дївици Мариї, а у октобру ше ю велїча з модлєньом пацеркох кажди дзень пред Службу Божу. Добре знаме же Марийова краса нє у красних очох, власох и подоби. Тото нє значи же Мария була красна, анї же природна краса нє заслужує почитованє. Алє, ище сиґурнєйше же Мария була красна и на надприродни способ. Од свойого зачаца була очувана од гриху. Бог нє допущел анї у єдней хвильки же би була у власци диявола. Найвекша вредносц Мариї же вона и наша мац. Як цо нашо мацери нє любиме лєм прето же су мудри, красни, прибрани, же нам варя, випровадзаю нас до школи и з радосцу чекаю дому, алє же їх любов и доброта ґу нам нїґда нє гашнє, алє лєм рошнє... Лєм кед будземе як Мария – будземе мац тоту „лєпшу часц цо ше нє однєє од нас.” Будземе мац любов. У велїх жемох швета ше друга нєдзеля у мешацу маю означує як Дзень мацери – Божей и нашей. Того року то було 8. мая. Шицки можеме з малима дїлами любови, з молитвами, рецитациями и шпиванками указац тим двом мацером: Мариї, Божей Мацери и нашей власней мацери почитованє, благородносц и щиру любов. Заслужели ю.
М
о. Михайло Малацко
В Водици ше появела, о, Мария, Руски народ полюбела, алилуя. Радуйце ше, херувими, шпивайце серафими, Радуйся, радуйся, Мариє. В Керестуре при Водици, о, Мария, Дзе конопи були шати, алилуя. Чудотворней Мати нашей, о, Мария Руски народ писнї шпива, алилуя. Заблїснула у Водици, о, Мария, Славиме ю з цалей души, алилуя. Ми ше, шестри разом, о, Мария, Покланяйме пред образом, алилуя.
ЖЕЛЄНИ ШВЕТА Сошествує Святого Духа або Русадля припада на 50. дзень по Велькей ноци. Тото швето установене на спомин кед Святи Дух зишол на апостолох. Того дня Исус установел Церкву. Вшадзи ше тото швето слави два днї, а у Руским Керестуре аж три днї. Точнєйше, на треци дзень Русадльох Завитни дзень, кед ше з процесию идзе до Водици. Пред велїма роками на тот дзень була велька буря з каменцом котри збил цали хотар. Прето ше людзе завитовали же того дня нє буду робиц, алє буду ходзиц до Водици. Попри Керестурцох, до того Марийового святилїща приходза и вирни з других парохийох. Скорей приходзели на кочох, а тераз на автох и автобусох. На Русадля церква зоднука, а обисца звонка, капури и облаки украшени зоз желєнима конарами и квецом. Озда прето ше Русадля скорей, а медзи Українцами и нєшка волаю и Желєни швета. Зоз кнїжки „Наш стари дом” Ирини Фейса
МИХАЙЛО КОВАЧ
ЯР Яр – то нє лєм розквитнути квет, яр – то нє лєм розшпивани швет. Яр – то и мрази позни у маю, яр – то и поля диждж цо чекаю. Яр – то и хмара слунко цо криє, яр – то и зарно в влаги цо гнїє. Єдним вона брег лядови, другим квитна долїна. Єдним є початок жица, а другим вона кончина. Та заш лєм ю ми шицки жадаме: чловек, пчолка и шалвия... Бо яр, пре свойо рана слунечни, шицким – памятка и надїя.
СЕРАФИНА МАКАЇ
МАЙСКЕ РАНО Майске ранечко, златне слунечко, трава желєна, жем оквицена. Запахла ранша росичка, зоз жита чує ше птичка; то соловейко вита препилку цо в жице скрита.
ЯКИМ ОЛЕЯР
ОД КЕДИ ПОКРИВА ПЕЧЕ Кедишик давно-давно покрива нє пекла. Алє, раз так зашол медзи квеце дзе росла и єдна покрива якиш нєдобри хлапец. Почал нємилосердно ламац и таргац квеце. – Ой, ой – заплакали квитки! – Тот хлапец нас шицких знїщи, а нєт нїкого хто би нас охранєл. – Нє плачце – озвала ше покрива. – Я го дораз покарем, бо мам таку силу од Бога. Праве теди приступел хлапец ґу покриви, же би и ю вирвал. Кед ше нагнул и дорушел ю, як опарени скочел и зйойчал од болю, бо го покрива попекла. Почал сцекац зоз загради, а квитки оддихли и зрадовали ше. Од того часу покрива ма силу же пече каждого хто ю лєм дотхнє.
МЕЛАНИЯ РИМАР
ТАНЯ И ЯБЛУЧКА Гонї Таня бициґлочку, ноши баби кошарочку. У кошарки два яблучка, бо компоту сце унучка. Од компоту мали лїчка почервеня як ружичка.
КВИЗ ЗА НАЙМЛАДШИХ
ЦО ДЗЕ ТРИМАМЕ
У орманє: 1. Бициґли 2. Шмати 3. Грабелки
У шпайзу: 1. Дунци 2. Коритнявки 3. Кнїжки
У фийовки: 1. Тепши 2. Кошари 3. Ложки и видлїчки
У спальнї: 1. Посцелї 2. Драбину 3. Циґонї
Заокруж точни одвити и зоз стрелку их повяж зоз одвитуюцима илустрациями.
Алиса Салонтай, 4 роки, Коцур
Синиша Копчански, 6 роки, Коцур
Матей Буила, 6 роки, Коцур
Леа Ранкович, 6 роки, Нови Сад
Алексей Уйфалуши, 6 роки, Коцур
НАЙВОЛЇМ СВОЮ МАЦЕР Я любим своїх пайташох и родзини, алє найволїм свою мацер. Мено єй Светлана. Барз є мила. Кед зме дакеди нєдобри, теди є строга и опомина нас най ше крашнє справуєме, алє ми ю и теди любиме. Мац ше крашнє облєка. Барз є красна и вредна. Ма кафово очи. Люби нам помагац коло робеня домашнїх задаткох. Дзечнє ше з нами и бави. Кед ма вельо обовязки, ми єй помагаме. Барз ю любиме и почитуєме. Любим свою мацер прето же є мила и барз добра. Павле Штефанко, IV Коцур
Андрей Давидович, V, Вербас
ОБЛЇВАНЄ Шицки дзеци любя облїванє. То єден зоз обичайох за Вельку ноц. Пондзелок нас хлапци зоз оддзелєня облївали. Були зме таки мокри, як кед бизме скочели до базену. Було вельо квичаня и шмеяня. Даєдни дзивчата ше так добре скрили же их хлапци лєдво пренашли. Нашо родичи облївачом подзелєли по сок и чоколадку. Вовторок ми, дзивчата, ходзели облївац хлапцох. Нє остали зме им длужни, та и вони були мокри, як кед би их влапел моцни диждж. За тото зме достали скромни дарунки. Кед зме пошли дому, поотверали зме их и засладзели ше. После кажда з нас пошла облївац хлапцох зоз своєй фамелиї. Ми любиме облїванє прето же ше вєдно радуєме и шмеєме. Милена Рамач, Клара Блаґоєвич, Леонтина Еделински, III Руски Керестур
ПРИПОВЕДАЛА МИ ПРАБАБА Дакеди моя прабаба и шицки жени у валалє ткали на старих кроснох. Тоти кросна були вельки и заберали вельку часц просториї. Прабаба ми приповедала о часцох тих кроснох. Мали подножє, бардо, чолнок и навой. Ткало ше гасури, покровци за конї, поньви на хторих ше тлукло пасулю. Ткало ше и мехи, партки, ручнїки и хлєбовки. У тим вику уж видумани практичнєйши кросна. Вони забераю вельо менєй простору у хижи. На нїх ше тка з индустрийну цверну, лєбо волну. Тка ше керпари, шали, ручнїки. Любела бим ше научиц ткац як на старих, так и на нових кроснох, бо думам же то барз интересантна и хасновита робота. Ксения Катрина, V Руски Керестур
ЗЛОЖНИ БРАЦА Мам брата Андрея. Вон ма дванац роки. Ходзи до шестей класи. Люби ше дружиц, та ма вельо пайташох. Чува ме кед мама и тато нє дома. Ми двоме ше крашнє злагодзиме и вєдно ше бавиме. Андрей тренира фодбал. У школи є одлични школяр. Барз го любим, а и вон мнє люби. Тони Чизмар, II Руски Керестур
НАША ЦЕПЛА ХИЖА
ЛЮБИМ БУЦ З ДЇДОМ Мойому дїдови мено Марко. Ма шейдзешат штири роки. Люби ношиц чарну тренерку. Барз є добри и прето го любим. Дзечнє ми помага кед робим домашнї задатки. Вон люби буц на швижим воздуху, та ше вонка часто бавиме. Ма за мнє часу, бо є у пензиї. У шлєбодним чаше люби пойсц на беґель. Дакеди там и роби. Милица Маджар, II Руски Керестур
Пред шейсцома роками достал сом свою першу хижу. Дзелїц ю зоз братом. Кед ше уходзи до хижи, чуц цихи, пискаци звук хтори приходзи од дзверох. Вони, гоч су стари, маю душу. Мой брацик ше до тих дзверох вдерел и розбил главу, а раз тоти дзвери, кед задул моцни витор, розбили жвератко и мур. Наша хижа мала, прето зме до нєй положели посцелї на поверх пре шпорованє простору. Долу маме ламинат котри прецерпел вельо материї цо на нїм були висипани. Мали зме бриґи, бо ше посцелї кивали, та их тато мушел утвердзиц зоз шрубами. У нашей хижи єст вельо ормани у хторих нє лєм братово и мойо облєчиво, алє и облєчиво наших родичох и дїда и баби. Мож повесц же тота простория випатра як маґазин. У нєй маме и вельке жвератко за хторе мама гутори же циґанї, бо єй указує же є тлуста. Ту и пикадо, дзе каждей соботи воламе пайташох. Теди випиваме рижни коктели котри сами правиме. У хижи и телевизор, та зоз дружтвом патриме спортски змаганя. Мама накладла квеце, бо єст вельо шветлосци, а з тим нам прикрашела простор. Гоч є нє велька, наша хижа цепла, крашнє пополнєна и украшена. Иван Молнар, VI, Дюрдьов
Матей Фейди, VIII, Нови Сад Емилия Мученски, IV, Коцур
МОЙ СЕДМИ РАЙ
БЕТИ И РЕКС
Мой седми рай ше находзи у баби и дїда. У нїх мам хижку, гомбалку, а од животиньох там кози и заяци. У моєй хижки ше любим бавиц зоз товаришами. Часто ше гомбаме на гомбалки. Дїдо дакеди пущи кози и заяци на двор най пашу, а я ше вец зоз нїма бавим. Любим скакац з нїма по желєней трави. Барз любим пойсц до дїда и баби и там ше бавиц як сцем. То за мнє седми рай.
Дома мам два пси. Єдному мено Бети, а другому Рекс. Вони пекинезере. Маю длугоку кафову шерсц. Любя ше купац и чесац. Я ше барз любим бавиц з нїма, оганяц ше и шпацирац ше з нїма. Любя кед их гласкам и розмазуєм. Барз чуваю наш дом. Мой оцец им направел хижку, а мац до нєй положела заглавчки, та на нїх шпя. Радую ше кед ше врацим зоз школи. Чекаю ме при капурки и такой скакаю на мнє и махаю з хвостами.
Емилия Мученски, IV, Коцур
Ален Бики, III, Руски Керестур
ДВОМЕ ПАЙТАШЕ Єден заячок скакал по швеце. Скакал, скакал, та го аж ноги заболєли. Други заячок видзел, та швидко прибегнул ґу пайташови. Питал ше му: – Барз це боля ноги? – Нє, нє боля ме. Други заячок гварел: – Вец добре. Я ше застарал за свойого доброго пайташа. Перши станул, та вєдно почали скакац по швеце. Кристина Гарвильчак, I, Руски Керестур Страхиня Ковач, II, Нови Сад
МОЙ КУРНЇК Кед сом бул менши, жадал сом мац свойо животинї. Мал сом пейц роки кед сом достал перши аквариюм и рибки. Нє барз сом их поряднє кармел и нє менял сом им часто воду, та жили лєм по даскельо мешаци. Кед сом мал шейсц роки, питал сом ше родичом чи ми можу направиц курнїк и купиц кури. Тото жаданє ше ми виполнєло кед сом наполнєл дзевец роки. Перше було догварене же будзем мац лєм кури, алє сом вец надумал мац и качки, и заяци. Курнїк нє барз вельки, алє ма два часци. Єдна часц за жиму, а друга за лєто. Качки любя воду, та зме им викопали базен до хторого влєце сипеме воду же би ше качки купали. Куром сом направел драбинку же би там могли спац. Маю ладички зоз сламу, алє нє нєшу вайца, а нє за юшку су, бо су уж стари. Заяц ма свою хижку, алє нє люби виходзиц вонка, та є скоро по цалим дню нука. А кельо го кармиме и яки є тлусти, анї нє чудне же нє сце виходзиц зоз своєй хижки. Пред роком сом достал двойо гушата. Єдно загинуло, а друге зме очерали за самичку. Тераз треба знова врациц тоту єдну гуску. Обидва були хлопского роду, алє ше нє били. Єдна лєм падала и умивала ноги у води хтору требала пиц, та вше розплюскала и була смиядна. Тераз маю два судзини за воду и два за єдзенє. За гуски зме ушорели єдну просторию и тераз там жию. Курнїк нє вельки и нє маю вельки двор, алє шицко друге маю. Вше сом жадал курнїк, и тераз кед го мам, барз сом щешлїви. Понеже є нє цалком закончени, любел бим най ше го цо скорей закончи, та мойо любимци буду уживац. Арсен Станкович, VI, Дюрдьов
Анастасия Кучмаш, I, Коцур
СТАРЕ РЕМЕСЛО – КОЛЄСАР Дакеди у валалє було вельо колєсарох, прето же було вельо кочи. Цагали их конї. Кочи мали древени колєса. Колєсаре нє правели лєм колєса, алє и пориска за мотики, ашови, грабелки, шекерки и за други алати хтори було у каждим обисцу. Теди нє було машини, та людзе хасновали приручни алат. Хасновали ручни пилки, млатки, гоблї, шмирґли, дроти и древени клїнки. И тераз у валалє єст даскельо колєсарох. Медзитим, вони вецей нє правя колєса, лєм койяки пориска. Валентина (З) Гарди, V, Руски Керестур
МЕДЗИОКРУЖНЕ ЗМАГАНЄ ЗОЗ РУСКОГО ЯЗИКА
У Основней школи „Йован Йованович Змай” у Дюрдьове 2. априла отримане 12. Медзиокружне змаганє зоз руского язика и язичней култури за школярох висших класох хтори порядну наставу маю по руски, и окреме за школярох хтори свой мацерински язик зоз елементами националней култури у школох уча як виборни предмет. Зоз порядней настави ше змагали двацец шесцеро (Руски Керестур 13, Коцур 10 и Дюрдьов 3) и двацецеро зоз виборней настави (Нового Саду 7, Петроварадину 1, Сримскей Каменїци 1, Вербасу 2, Кули 3, Нового Орахова 1, Бачкей Тополї 2, Бачинцох 1 и Дюрдова 2.) Порядна настава: V класа I Валентина Гарди, Руски Керестур; II Тамара Салонтаї, Коцур; III Мария Сакач, Коцур VI класа I Каролина Пап, Руски Керестур II Теодор Штранґар, Руски Керестур и Иван Молнар, Дюрдьов III Иван Фейди и Алекса Сопка, Руски Керестур VII класа I Теодора Ґайдош, Коцур, Руски Керестур II, Ребека Сабадош, Руски Керестур и Сара Горняк, Коцур III Филип Хромиш, Коцур, Яна Варґа, Руски Керестур
VIII класа I Мартина Уйфалуши, Коцур и Емина Бики, Руски Керестур II Анита Чизмар, Руски Керестур III Патриция Будински, Коцур Виборна настава V класа I Андрей Рац, Бачинци и Алекса Бокан, Нови Сад II Миряна Бицок, Бачка Тополя III Янко Рац, Кула VI класа I Мартина Фейди и Сара Надрлянски, Нови Сад, Сара Надь, Вербас и Владимир Папуґа, Петроварадин VII класа I Серґей Дюранїн, Сримска Каменїца, Теодора Рамач и Никола Вукмирович, Нови Сад II Марина Барна, Нове Орахово и Сара Шовлянски, Нови Сад VIII класа I Никша Йоксович и Никола Рац, Кула, Матей Фейди, Нови Сад, Даниєла Бицок, Бачка Тополя и Мирослава Колошняї, Вербас III Ива Радишич, Дюрдьов Змаганє орґанизовало Министерство просвити, науки и технолоґийного розвою Републики Сербиї, Дружтво за руски язик, литературу и културу, и ОШ „Й. Й. Змай” зоз Дюрдьова. Л. В.
НЄ ЗНАНЄ ЗНАНЄ МАЦ, АЛЄ ЗНАНЄ ЗНАНЄ ДАЦ Знанє то єдине богатство хторе нам нїхто нє може одняц, а воно ше звекшує кед го даваме, дзелїме и преношиме другим тель аж трицец осем роки и же го людзе у Русрамикох проєкту Креативне образованє за ким Керестуре барз почитовали, та нєшка єдна шицких, 14. априла у дюрдьовскей Основулїчка у валалє ноши його мено, а тиж и Основней школи „Йован Йованович Змай” отримани на и Штредня школа з домом школярох ноши проєкти дзень под слоґаном Нє знанє знанє мац, мено того учителя. Научел сом и же першу приалє знанє знанє дац. Циль того дня бул же би ше поведку, першу ґраматику и першу кнїжку по рушколу представело зоз вецей углох и же би ше ски написал Гавриїл Костельник – гварел Иван указало цо найбаржей краши тоту школу, а то Молнар, школяр шестей класи. троязичносц и мултикултуралносц. – Приповедали зме о Гавриїлови Костельникови и о Петрови Кузмякови, а моя класа одшпивала Костельникову писню Бачко моя, Бачко. Найбаржей ше ми пачела приповедка о тим як достал идею написац першу кнїжку по руски – гварел Андрей Балїнт, школяр трецей класи. – Я фарбел, лїпкал, и научел сом вельо о учительови Кузмякови и о Костельникови котри написал першу кнїжку на нашим язику З мойого валала – гварел Марко Бастая. – Моя класа мала задаток пречитац даскельо часци зоз Костельниковей кнїжки. Я читал о Крачуну – дознали зме од Владимира Молнара.
У
Школяре були подзелєни по станїцох и мали одредзени активносци. Виучовали сучаснїкох Й. Й. Змая. Тото дня ше и школяре и заняти врацели до 19. вику, дзе ше през облєчиво, календар и велї познати особи зоз гевтого часу здогадли на период у хторих жил єден з найпознатших дзецинских писательох. Школяре руских оддзелєньох трецей и шестей класи мали задаток блїжей ше упознац зоз Руснацами хтори жили у чаше кед и бачи Йова Змай, а вельо допринєсли рускей заєднїци. Їх проєкт ношел назву Змайово сучаснїки Руснаци. Вони подзелєли свойо упечатки о проєкту. – Моя улога у нєшкайшим проєкту була ґлумиц Петра Кузмяка и своїх товаришох упознац зоз животом того нашого найпознатшого учителя. Потим зме мали задаток на мапи означиц драги по котрих ше рушали Гавриїл Костельник и Петро Кузмяк. Нєшка сом научел же учитель Кузмяк народзени 1816. року, же робел як учи-
– Наша школа окрем до проєкту Квалитетне образованє за шицких, була уключена и до проєкту Вєдно ґу Штреднєй школи. Циль того проєкта бул же би школяре зоз социялно загрожених фамелийох закончели основношколске образованє, а потим предлужели далєй – гварела Соня Шанта, психолоґ у дюрдьовскей школи. Л. Вереш
ЛАВИРИНТ
Автор Нела Таталович
Одведз гусара ґу благу.
ОФАРБ РИСУНОК
Рисунок красни, алє кед го офарбиш, будзе ище красши.
ПОВЯЖ ЧИСЛА
Повяж числа од 1 по 65 и офарб рисунок.
Автор Нела Таталович
ПРЕЧИШЛЇ ЖИВОТИНЬКИ
Найдз и пречишлї задати животиньки, а вец до билих кругох напиш хторих кельо єст.
РОЗХОД ЄДНЕЙ ҐЕНЕРАЦИЇ За майске число „Заградки” вредни сотруднїки послали до Редакциї 82 свойо литературни, подобово и новинарски роботи. Коцур: Ана Тимко, Катарина Бесерминї, Алиса Салонтай, Давид Тимко, Алексей Уйфалуши, Синиша Копчански, Матия Салонтай, Емануел Жилник, Валентино Горняк, Матей Буила (овода); Хана Хромиш, Яна Тимко, Иван Тимко, Мирослав Бесерминї, Матей Сакач, Андрей Горняк, Виктор Кулич (II); Емилия Мученски, Юлияна Бесерминї, Емилия Уйфалуши, Павле Штефанко, Михаел Дротар (IV); Сара Горняк, Теодора Ґайдош, Дамян Радванї (VII); Патриция Будински (VIII). Вєдно 44 роботи. Руски Керестур: Кристина Гарвильчак (I); Николина Гарди, Аня Сендерак, Адрияна Штранґар, Милена Рамач, Клара Блаґоєвич, Леонтина Еделински, Стефан Новакович, Алексей Виславски, Андрей Виславски, Дарко Еделински, Тони Колошняї, Йован Цветанович, Стефан Афич, Никола Дудаш, Кристиян Банич, Ерик Русковски (III). Вєдно 22 роботи. Нови Сад: Леа Ранкович (овода); Наташа Ґркович, Иван Маґоч (I); Сташа Бєкич, Страхиня Ковач (II); Хелена Колєсар, Лана Вучинович, Йован Винаї (III); Мартина Фейди), Лана Бєкич (VI); Матей Фейди (VIII). Вєдно 16 роботи.
Остали ещи даскельо тижнї, днї, годзини, минути по конєц основней школи и вец розход єдней ґенерациї. Тото цо зме дакеди нєсцерпезлїво чекали и думали же нїґда нє придзе, уж є ту, пред нами. Здогадуєм ше рихтаня за перши рок у основней школи. Була сом щешлїва, алє сом ше дакус и бала, прето же то за мнє було цошка цалком нове. Перши септембер, пол осмей рано. Бренчок забренкал, шицки цихо и чекаю уход учительки до учальнї. Упознали зме ше зоз ню, ещи нєсвидоми цо нас шицких чека. Були красни перши штири роки у школи. Учителька нам була як мац. Научела нас вельо и порихтала за преход до висших класох. За тото зме єй барз подзековни. У висших класох зме достали и нови предмети и нових наставнїкох зоз хторима зме тиж препровадзели красни штири роки. Тераз зме уж школяре осмей класи. У думкох нам оставаю лєм красни памятки. Час хтори зме препровадзели вєдно, нїґда нє забудземе. Було шмеяня, приповеданя, проблеми хтори зме у злоги вєдно ришовали, помагали зме єдни другим, и на концу зме задовольни же зме нє попущели у чежких ситуацийох. Борели зме ше и були зме витримовни. Главне нам тераз по хторей драги живота ше рушиме, до хторей штреднєй школи ше упишеме. Чека нас нови початок, алє яки? Дахто ещи од скорей зна, а дахто ище дума хтору школу вибрац. Пред нами барз розлични драги и кажде з нас препознава знаня хтори нас одведу далєй, єдну ґарадичу висше. Найвекша бриґа школяром осмей класи то примаци испит. Треба же бизме го цо лєпше зробели, бо знаме же од того и од оценох яки зме мали, завиши на хтори бок рушиме. Шицки думаме же нам тераз найчежши период у живоце, алє кед лєпше роздумаме, то час кед шицки змоцнєю и буду порихтанши за нови початок. И кед випатра лєм як кратки сон, и кед зме ещи нєсвидоми, правда же ше нєодлуга розидземе. Кажде пойдзе по драги хтору вибере, а на хторей будзе вельо препреченя. Будземе ше трудзиц вибориц ше з нїма и посцигнуц цилї, прето „лєм напредок”! Патриция Будински, VIII, Коцур
ЯРНЇ РОЗПУСТ
Стефан Ґайдош, I, Коцур
Ми барз чекали ярнї розпуст. Априлски розпуст тирвал єденац днї. Теди була и Велька ноц. Зоз родичами зме були у церкви. Владика пошвецал кошарки зоз вельконоцним єдзеньом. Пондзелок зме були облївац дзивчата зоз класи, а вовторок облївали вони нас. Були зме цалком мокри, алє боме и вони. На ярнїм розпусту нам нє було допито. Дружели зме ше и бавели. Найвецей зме ше вожели на бициґлох и бавели ше на беґелю. Даєдни зоз нас були у Мадярскей. Там ше купали, алє и вельо того видзели: стари будинки у Будиму, парламент, скулптури. Окреме интересантне було видзиц морски риби, айкули, ражи и медузи. Ярнї розпуст нам шицким швидко прешол. И тим цо го препровадзели у Керестуре, а и тим цо даґдзе путовали. Заш лєм зме покус чекали най почнє школа, же бизме ше знова вєдно дружели зоз шицкима товаришами з оддзелєня. Дарко Еделински, Андрей Виславски, Тони Колошняї, Йован Цвєтичанин, III Руски Керестур
НЄПРИСТОЙНИ ПАПАҐАЙ Зоз театру у анґлийским варощику Бленфорду бул вигнати папаґай Перси. Мал озбильну улогу у театралним фалаце дзе у одредзеней хвильки мал повесц: „Яке чаривне благо!” Перси вше бул добри и слухал розкази, а вец одразу постал нєпристойни. На ґенералней проби главному ґлумцови, кед тот отворел ладу зоз златнїками и кед папаґай на тото мал повесц „Яке чаривне благо”, Перси безочно скричал: „Трац ше ми з оч, фраєру!” Управа театра такой енки одпущела нєпристойного папаґая и занавше му забранєла ґлумиц у представох.
НАЙСТАРША КОЛЕКЦИЯ МЕТЕОРИТОХ Глєдаюци векше количество метеоритох, же би ше на єдним месце лєгко утвердзело як часто злєцую, тим виглєдовачох одкрил богату и добре очувану збирку. Предпоставя ше же вона и найстарша на швеце. Тим твердзи же ше вельки процент метеоритох хтори спадли на Жем находзи на Антарктику и у горуцих пустиньох, алє же медзи нїма нєт пребарз стари прикладнїки. Прето за свою дестинацию вибрали пустиню Атакама у Чилеу хтора стара вецей як дзешец милиони роки. Вони на тим месце назберали 388 метеорити од хторих анализовали 54 прикладнїки. Були найстарши, коло два милиони роки.
БЕЛАВА РУЖА Барз длуго символ нєдосягносци, нєодлуга ше зяви у америцких и канадских квецарньох. Квет зоз роду коляцих ружох хтори представя белаволилову пиґментацию место червеного, билого и жовтого пиґмента. Белава ружа ше першираз зявела 2009. року у Япону, после двацецрочних виглєдовацких усиловносцох у компаниї „Сунтори”. Одкадз єй така фарба хтору нє мож видзиц у природи? Науковци ю єдноставно ґенетски вименєли, так же рошлїна може правиц пиґмент за белаве – делфинидин. Найоблюбенши квет у чловековей историї, голєм у любовних стихох, пестує ше длужей як 5.000 роки. Алє, вон нє оподобює лєм любов, алє и красу, политику и войну.
Пририхтала Р. Ґ. Петрович
Милана Йованов, III, Дюрдьов
Наташа Ґркович, I, Нови Сад
Ивона Цветкович, VI, Ґосподїнци
Михаел Дротар, IV, Коцур
Йован Йованович, I, Руски Керестур