РОК LXХII • ЧИСЛО 3 • МАРЕЦ • 2019 • ЦЕНА 100 ДИН
ОПШТИНСКА СМОТРА РЕЦИТАТОРОХ У Вербаше На Општинскей смотри рецитаторох у Вербаше участвовали трицец двойо школяре основних и штреднїх школох зоз шицких местох у тей општини. Смотра отримана у вербаским Доме култури, а медзи змагателями були и два рецитаторки младшого возросту зоз ОШ „Братство єдинство” у Коцуре. Теодора Ґайдош рецитовала по руски, а по сербски. Пририхтали их учительки Славица Чельовски и Мария Полдруги. Обидва школярки ше пласовали на Зонску смотру хтора и того року будзе у Бачу. Рецитаторки зоз Коцура
У Кули У Културним центру у Кули змагателє рецитовали по руски, мадярски и сербски. У младшим возросту участвовали дванацецеро, а барз успишни були школяре зоз Руского Керестура. Перше место завжала Ема Живкович, треци бул Иван Планчак, а на Зонску смотру ше пласовала и Яна Варґа. У штреднїм возросту ше змагали Минеа Югас, Валентина Новта и Анита Чизмар, а пласман на Зонску смотру посцигли Минеа Югас и Валентина Новта. За змаганє их пририхтали Наталия Зазуляк, Оленка Живкович и Ивана Дудаш. У Новим Садзе На Општинскей смотри у Новим Садзе участвовали два школярки хтори рецитовали по руски у катеґориї младшого возросту: Кристина Ковач и Теодора Рамач, а до Бачу на Зонску смотру ше пласовала Теодора Рамач.
Рецитаторе зоз Руского Керестура
У Жаблю Народна библиотека „Велько Петрович” У Жаблю була домашня Општинскей смотри рецитаторох. Змагателє рецитовали по руски и по сербски. На Зонску смотру ше пласовали Кристина Дюранїн (штреднї возрост) зоз ОШ „Й. Й. Змай” у Дюрдьове хтору пририхтала наставнїца руского язика Мария Самарджич, и Иван Молнар (нїзши возрост), Милица Михальовски (штреднї возрост) и Валентина Салаґ (старши возрост) зоз КУД „Тарас Шевченко”, хторих пририхтал Яким Гарди. На змаганю у Жаблю зоз стихами по руски участвовали и Мария Канюх, Ксения Вереш, Ясмина Мудри и Марина Барна.
ГОДЗИНИ РУСКОГО ЯЗИКА У ҐОСПОДЇНЦОХ
НА МЕСНЕЙ СМОТРИ РЕЦИТАТОРОХ У КУЛИ
У Основней школи „Жарко Зренянин” у Ґосподїнцох того школского року на годзини руского язика з елементами националней култури ходза аж тринацецеро школяре од першей по осму класу. Наставу трима наставнїца Ана Мария Рац каждей стреди. Гоч даєдни дзеци нє знаю приповедац по руски, а даєдни анї нє Руснаци, любя ходзиц на тоти годзини. М. Р.
Янко Рац, школяр другей класи ОШ „Петефи бриґада” у Кули, поряднє ходзи на годзини руского язика, як и на грекокатолїцку виронауку. Наставнїца руского язика Тамара Хомова помогла му научиц рецитовац писню Й. Й. Змая „Жаба чита новини” прешпивану на наш язик, зоз хтору участвовал на школским, а потим и на месним змаганю рецитаторох.
^ASOPIS ZA DZECI
Direktor dr Boris Var}a Odvi~atelqni redaktor Melaniy Rimar Vihodzi raz na me{ac u {kolskim roku • Vidava NVU “Ruske slovo” • Bulevar o{lwbodzeny 81/VII 21 000 Novi Sad, • Telefon (021) 6613-697 • @iro rahunok ~islo: 160-923244-82 • Ro~na predplata 1 000 dinari; za ino`emstvo 25 evra • Dizajn: Mariy Gudak Kompxterski obrobok: Mariy Gudak • Lektor: Bla`ena Homa-Cvetkovi~ • Rukopisi {e nw vraca • Drukuw drukarny: “SAJNOS DOO”, Нови Сад
Здраво, заградкаре! Приходза вше цеплєйши днї и вонка, а и у школских учальньох. Блїжи ше и тромешачє, та нєт дня без преверйованя и утвердзованя знаня. Громадза ше оцени, а шорую ше и змаганя, алє знам же сце вредни и совисни, та шицко постарчице. По конєц школского рока маме пририхтац ище три числа „Заградки”, а же би були красши як шицки потерашнї, мушиме ше здружиц шицки вєдно. Предложце теми о хторих бисце любели читац на бокох свойого часописа. Напишце о своїх товаришкох и товаришох хтори ше зоз змаганьох, турнирох лєбо манифестацийох врацели заквицени з дипломами, плакетами, медалями... Най „Заградка” нє будзе остатня хтора дозна о замеркованих успихох своїх сотруднїкох. Будзце здрави, шмели, сцели и весели! Шицко тото жада вам ваша редакторка
YU ISSN 0353-9938 E-mail: casopiszahradka@gmail.com Ilustraci>: Aleksandra Medw{i
CIP – Katalogizacija u publikaciji Biblioteka Matice srpske, Novi Sad 821-93 ZAGRADKA: ~asopis za dzeci / odvi~atelqni redaktor Melaniy Rimar. – Ro~. 50, ~. 1 (1991) – . – Novi Sad: Ruske slovo, 1991 –. – Ilustr. ; 24 cm Mese~no tokom {kolske godine. – Nastavak publikacije: Pionirska zahradka ISSN 0353-9938
На насловним боку: Школяре на годзини руского язика у Ґосподїнцох
СЕРАФИНА МАКАЇ
МАРЕЦ Сцигол марец мальовани, привлєк хмари намурцани. Тераз веє, вец диждж лєє, вец заш блїска на дїдиска Шнїжнїка. А я трепем до пециска. Чекам април справедлїви, най одплаши марец лїви. Марец, марец, крича людзе, марец вше нєзґодни будзе.
ЦАР И ЦАРСКА БЛИХА
Ж
ил раз якиш цар. Вон ше єдного дня искал и нашол блиху. Вжал тоту блиху, та ю кармел, кармел и потим зарезал. Вец розказал гласнїкови най звола людзох до царского дворцу и най потрафя чия то скора: хто потрафи, цар му да свою дзивку. Позберали ше людзе з цалого царства видзиц скору. Єден гвари: – То швиньска скора. Други гвари – воловска, треци – зоз бияли, штварти – овча, дахто тото, дахто гевто – нїхто нє потрафел. Наостатку пришол и дябол. И вон, нїби, нє знал чия то скора, та почал гуториц же є кожа, заяча, и на концу скричал: – Ша то блихова скора! Цар му дал свою дзивку, алє нє знал же то дябол. Пришли шицки дябли на свадзбу одвесц нєвесту. Кед прешли єдну часц драги, дзивка видзела же є медзи дяблами. Вона вжала зоз собу и два голуби, та написала писмо у хторим явела оцови же ше одала за дябла. Заквачела писмо за єдного голуба и пущела го. Так цар дознал же ше му дзивка нашла у дяблових рукох. Поволал гласнїка и розказал му най кричи и глєда людзох хтори би пошли одняц його дзивку. Людзе ше знова позберали, алє ше царови нїхто нє пачел. Наостатку пришли шейсцме браца. Цар ше им опитал хтори цо зна. Перши му гварел: – Я можем направиц таки коч хтори може исц анї по нєбе, анї по жеми. Други гварел: – Я чуєм барз далєко. Треци гварел: – Я можем зоз заячей дзири вицагнуц заячата так же би ме заячица нє видзела. Штварти гварел: – Я можем сциснуц камень з воденїци так моцно же з нього почнє чуриц вода. Пияти гварел: – Я можем направиц нараз таку кулу же ше можеме шицки скриц до нєй. Шести гварел: – Кед видзим ястраба як нєше ярабицу, я можем руциц копию и дочекац ярабицу з руками, а ястраба на копию. Кед их цар вислухал, гварел: – Идзце, ви можеце виратовац мою дзивку. Так вони рушели. Ишли, ишли и осмияднєли. Вец гевтот хтори могол напоїц, сциснул з руками воденїцов камень, та з нього почала чуриц вода и шицки ше понапивали. Потим рушели далєй. Ишли, ишли и наостатку видзели дяблох як ше одпочиваю на єдней пажици, а царова дзивка була на рукох велького дябла, свойого мужа. Вец треци брат вжал дзивку, а дябли го нє збачели. Перши брат направел коч котри идзе анї по нєбе, анї по жеми и сцекли. Кед дябли видзели же дзивки нєт, рушели здогонїц ю. Браца ше питали чи дябли уж блїзко, а гевтот хтори далєко чул, гварел: – Нє бойце ше, барз су далєко.
Сцекали далєй, а вец брат гварел же су тераз уж блїзко. – Палє, полапаю нас! Нолє, дай кулу – гварели. Вец пияти брат направел тварду кулу и шицки ше скрили до нєй. На кули була лєм єдна дзирка, тельо же мож було вохпац мали палєц. Дябли обколєшели кулу, алє нє могли до нєй войсц. Вец старшина дяблох гварел: – Ви нам ю уж одняли, алє допущце ми най єй видзим мали палєц през тоту дзирку. А браца ше згваряю: – Допущме му, цо нам може зробиц! Царова дзивка вихпала палєц, а дябол моцно задул на єй палєц и вицагнул ю. Браца такой вишли вонка, а наймладши брат кед видзел же дябол лєци з дзивку, руцел копию и дочекал царову дзивку на руки, а дябла преджобнул зоз копию. Вец браца вєдно зоз ню пошли ґу царови. Кед ю видзел, цар ше опитал: – Но, та, дзивко моя, хто це однял од дябла? Вона гварела: – Шицки ме однїмали, апо, алє кед би нє було того наймладшого, остала бим медзи преклятима дяблами. Вец ю цар дал йому за жену и направели вельку свадзбу. Македонска народна приповедка
ОБЛАЧОК ДО ШВЕТА ИҐОР КОЛАРОВ Єден з найзначнєйших сучасних писательох за дзеци и младих, Иґор Коларов, народзени 18. юлия 1973. року у Беоґрадзе. Писал писнї, кратки приповедки и романи. Закладал ше за осучасньованє лектири за дзеци. Добитнїк є велїх наградох и припознаньох. Спомнєме лєм даєдни: Награда Змайових дзецинских бавискох, награда Невен, Мали принц, Златна значка Културно-просвитней заєднїци Сербиї за творче доприношенє у ширеню култури, а два раз бул лауреат припознаня Политикин забавник. Найпознатши його кнїжки: Приповедка о скоро шицким, СМС приповедки, Дванасте морйо, Русвай, Фиона и други мистериї, Приручнїк за пинґвини, Сказка о кральови Дєрийови, Хижа тисяч маскох, а найбаржей го преславел роман Аґи и Ема по хторим зняти и филм. Роман преложени и обявени и по анґлийски, французки, италиянски и русийски язик. Иґор Коларов умар 12. мая 2017. року у Беоґрадзе.
АҐИ И ЕМА (Виривок) 89. – Нєшка таки красни дзень, мушим ци дацо подаровац. Ема пошла ґу комоди у дньовей хижи и зоз фийовки вицагла пакецик з белаву машлю. – За супер Аґия супер цошка. Гайде, отвор! Вон почал помали отверац дарунок. Чи нє забул на свой родзени дзень? Нє, родзени дзень прешол. Чи нє... нє, нїч му нє приходзи на розум. Аґи одкруцел украсни папер: у нїм була тека зоз скорянима, твардима рамиками и тинтове пенкало. – Пиш – гварела Ема. – Пиш цо сцеш и кеди сцеш. Тото ци помогнє же би ши, так як твоя мачка з двома целами ма два шерца, жил два животи.
Аґи пречитал тото цо написал и подумал: „Чи я тот Аґи?” Кед бисце ше питали Аґийови, поведол би же вон цалком случайно здабе на себе. 91. – Порихтани ши? – Гей, порихтани сом. – Гайде! – скричала Ема и намесцела калапчок зоз пирйом на своїм штредньовиковним шлему. Кед панї витяз, тот витяз муши буц панї. Ема и Аґи (облєчени у шветочних шматох хтори ше му цагали по жеми) вишли на штред улїци и застановели транспорт. Сцели ше бавиц праве на улїци...
90.
92.
На першим боку Аґи написал: „Аґи хлапец хтори: – зна заобисц єдну бару на драги до школи и спаднуц до другей – напише писмо Еми и руци го до поштовей ладички – дакеди плаче у орманє за ципели лєбо да даєдним другим месце – помага Еми кед оправя ствари – сце мац коритнявку лєбо брата – зашпи без чишлєня овцох – ма бачика хтори ма жену, а обидвойо звикнути спац пополадню и храпиц – пита ше мацери и оцови: „Як сце?” кед ше враца з роботи лєбо оддакаль, алє лєм кед є будни.”
Ема трима у рукох гушлю. – Купела сом ю прейґ оглашки. Гварели ми же є трираз старша як найстарши чловек на Жеми. – Дзе єй дроти? – питал ше Аґи. – Нє знам. Пачело ше ми як пахнє. Нїґда сом нє почувствовала таки красни пах часу. 93. – Ема, сцеш ме одвесц до музею воскових фиґурох на нєдзелю? – Нє. Идзме нєшка. – Нєшка? – питал ше Аґи. – Можебуц ти нє будзеш вериц, алє мнє нєшка нєдзеля. Аґи, я така стара же ми днї у тижню нє стоя твардо на своїм месце!
РАДИО-ЕМИСИЇ ЗА ДЗЕЦИ Дзешец роки потим як Радио Нови Сад почал емитовац програму по руски (29. 11. 1949), почали и емисиї за дзеци на нашим мацеринским язику (1959. року). „Радио Нови Сад емитує емисию за руски дзеци уж дзешец роки. Велї дзеци зоз наших местох можу ше похвалїц же участвовали у нєй або особнє або зоз своїм прилогом. Дзепоєдни з нїх, хтори участвовали у перших емисийох за дзеци, нєшка уж мацери и оцове. Вони уж тераз своїм дзецом кажду соботу на 8 годзин отвераю радио же би вислухалу цо Радио Нови Сад емитує за наймладших. Дотерашнї редакторе були Йовґен Джуня, Фебронка Балїнтова и Мария Г. Пушкашова. Вони ше, зоз своїма сотруднїками през тоти дзешец роки емитованя емисийох, старали задоволїц дзецински жаданя, емитуюци рижни емисиї: драмски, литературни, музични, историйни, зоз науки и технїки, за наймладших, зоз дзецинского швета итд. Понеже дзецински жаданя безконєчно вельки и рижнородни, пожадайме же би емисиї мали и надалєй успиху у роботи з нашима дзецми и за нашо дзеци и же би их у шлїдуюцих рокох успишно виполньовали.” М. Г. Пушкаш „Пионирска заградка”, число 3, новембер 1969.
СЛУХАЙЦЕ ЕМИСИЮ ЗА ДЗЕЦИ „Каждей соботи на пол дзештей (9,30) можеце слухац емисию за дзеци на руским язику. У нєй як и вше, єст вельо интересантносци, а тиж так и вельо музики хтору ви любице.У цеку и конкурс за найлєпши прилог у емисиї, та кед пишеце писнї, приповедки або вистки о тим цо ше збува у вашей школи або месце, пошлїце нам. Шицки вашо прилоги обявиме у емисиї, а на кнцу школского рока вибереме найлєпши. Од того полроча запровадзуєме и цошка нове – а то же ше през тидзень (роботни дзень) у предполадньових годзинох можеце явиц до нашей Редакциї зоз даяку вистку вязану за дзеци, а ми вас знєєме на пантлїку и будземе емитовац у Емисиї. У Емисиї нам и далєй участвую на знїманю Борис Сакач, Оля Сабадошова и Марина Чижекова. И вони барз любя кед у нєй участвую вельо дзеци. А же би их було наисце вельо, завиши и од вас. Прето нам пишцеи явяйце ше – будземе ше радовац. Агнета Бучко, редакторка Емисиї „Заградка” число 3-7, новембер-марец 1993-1994.
ЕМИСИЇ ТЕРАЗ Дараз дзеци мушели ставац нa 8 годзин рано кед сцели слухац свою емисию, а тераз ше каждей соботи, кед нє маю школу, можу на мире виспац, та на 12 годзин и 30 минути уключиц радио и слухац полгодзинову емисию за дзеци по руски. Редакторка емисиї Владислава Гарди Костич нащивює дзеци у предшколских установох и школярох у школох дзе ше настава одвива по руски, та з нїма приповеда, провадзи дзецински програми, манифестациї, театрални представи и други подїї у хторих главни учашнїки менши и векши дзеци. У каждей емисиї слухаче можу дознац и научиц дацо нове, та од тераз нє препущуйце анї єдну емисию за дзеци по руски.
КСЕНИЯ ВАРҐА
Г
ЯК ПОПИЦ МЛЄКО
рудка до обисца сцигла пред двома мешацами. Мале, бундасте клубко перших дньох скинчало за своїм дружтвом, а вец ше звикло. Барз любело млєка и нїч инше анї нє сцело єсц. Таке округленьке, бундасте створенє на нєсиґурних ножкох шпотало ше по дворе и чекало же би го дахто погласкал. Найчастейше то бул Иван. Тримал же щенє його. Так ше порадзели кед першираз видзел Грудку у сушеда як ше бави зоз своїма двома братами. – Сцеме такого? – питал ше му оцец. – Даю нам го, лєм най дакус подрошнє. Иван ше кажди дзень през ограду припатрал на сушедово щенята. Шумни шицки штверо, алє йому ше найбаржей пачи гевто цо ма чарну джобку на носу. Лєм ше му видзело же якошик помали рошнє и же треба ище длуго чекац док ше пшичок нє преселї до їх обисца. Вец єдного рана, док зоз скоро залїпену твару за ограду патрел як ше пшички бавя, сушеди го поволали нука. Хторе найкрасше? – Тото кафове зоз чарну джобку на носу! – як з пушки виповед Иван. Кед сушеда вжала до рукох праве тото найкрасше, Иван випасал кошулю з панталонох, загнул ю, закруцел щенє и понаглял дому. Нє-же понаглял, алє бежал. През драгу надумал: „Грудка єй будзе мено, бо є така округла”. Истого дня у дутяну купена мисочка за єдзенє. – Така, глїбша най будзе – гварела сушеда. – Най ше млєко нє висипе. Ютре дзень Грудку чекал млєкови фриштик. У новей мисочки. Иван положел судзину опрез пшичка и чекал най почнє фриштиковац. А Грудка замачала браду, и якошик залапює млєко, як з даяку лопатку. Так смачнє! Аж ше єй ножки трешу, полнї ше брущок. Грудка постава ище округлєйша. Припатра ше пажерно Иван на Грудку и на уж скоро празну мисочку и пробує одгаднуц
же як то мож попиц млєко и без шольки и без ложки лєбо ложички и без пластичней цивки. Лєм так, зоз язиком. Наисце схопна тота його Грудка. А кед вон пиє млєко, цала парада у обисцу. За фриштик задлужена баба, бо го вона водзи до оводи. Родичи маю други обовязки. То випатра так же баба перше з полїчки вибере найкрасшу шольку, зоз сличку, и меркує же би млєко нє було жимне. Потим додава койяки чоколадово присмачки, нес квик, какао... Иван даскельо раз одпиє, а вец гвари: – Нє можем! Даремни бабово нагваряня. Нє помага. Млєко остава нє попите. Уж даскельо днї Грудка у новим доме. Звикла ше на домашнїх. Круци ше шицким попод ноги. Найволї Ивана, бо ше вон барз шмеє кед го цага за ногавку. Вон єй сипе млєко до мисочки. Кед кукнє ґу нєй, припатра ше як вона з язиком хлїпа млєко котре швидко капе зоз мисочки. И тераз кучи и шацує чи Грудка попиє шицко, чи зохаби так як ше йому скоро вше случує. Одразу станул и одбегнул до кухнї. Зна дзе стоя мисочки до котрих мац найчастейше черпа компот. Вжал єдну и насипал до нєй млєка. Спущел ю на жем, нєдалєко од Грудки. Вона ище вше уживала у своїм фриштику. Иван ше припатра на ню и видзи ше му же аж капки подскакую з млєковей поверхносци, та ше становяю на Грудковим носу. Ей, як пшички лєм знаю попиц млєко. Так з язиком, як з даяку лапишку. Або як з веслом кед розгарташ воду док ше вожиш у чамцу. Кед загарнєш, уж є аж у брущку. Требало би пробовац! Спущел ше Иван на колєна опрез своєй мисочки. Подопар ше на руки, а ґамби му були уж цалком при млєку, кед ше одкадзшик зявела баба. – Иван, нє цагай ше по жеми! Колєна на панталонох ци буду желєни од трави и... ! И сцела ище цошка повесц, алє кед видзела єдну мисочку опрез унука, а другу опрез Грудки, було єй шицко ясне. – Сцел сом пробовац же як Грудка пиє млєко. Агей же о тим нє повеш анї мами анї татови! – гварел Иван и влапел бабу за руку. Одведол ю до кухнї, а вец положел на стол два шольки, та ше пита: – Будземе какао, нес квик , чи чоколаду?
СЛАВИЦА МИЛОШЕВИЧ
ПРЕВОЛОВАНЄ
– Е, мой Зоно! – гвари моя баба. А кед ми вона так пове, знам же сом цошка погришел. И жаль ми. Якош ше зменшам. А зменшам ше и прето же нє знам цо шицко баба зна. Нє знам чи вона зна цо сом нароком зробел, а цо ми ше вишмикло. Нароком сом єдол ягоди зоз Тодоровей загради. И дотхнул сом курче хторе ше праве вилягло. И закуковал сом през облак видзиц цо оцец и мац робя. А нє сцел сом прициснуц курче. И нє сцел сом ґунарови вирвец хвост. Сцел сом лєм видзиц чи будзе шлайфовац. Нє сцел сом анї нароком розбиц вайца и висипац млєко. Лєм сом сцел видзиц чи ше вайца упража на слунку и чи ше млєко увари. Вец надишла Жуйка и шицко полапкала. А Шаров нє сце млєко. Вон єден озбильни пес и є лєм тото цо нам останє. Ище сом нароком вжал палїцу, бо ме кура джубала кед сом брал вайцо спод нєй. Вец ме почал оганяц когут. А кед це вон почнє оганяц, розкричи ше и джубе це док нє придзе баба и нє нагнїва ше на це. Нароком сом коштовал Секулово грозно най видзим чи є узрете. Так сом коштовал, коштовал и коштовал, и вец ме почал болїц брух. А баба Анка ма якишик мали ґереґи, праве за дзеци. Здабу на лабди и досц ци єдна же би ши ше наєдол. Шицки зме єдли, а лєм я виновати же их вецей нєт. Найгорше ми же баба нє сце повесц цо шицко зна, лєм ми гвари: „Поведз.” И я нє знам цо повесц. Преложела М. Р. Зоз кнїжки „Кед сом бул мали”
СЛАДЯНА РИСТИЧ
АМРЕЛ ЯК ПАДОБРАН
Я
Амрелко, єден обични амрел направени у Фиренци. Свой живот сом предлужел у цифрованей предавальнї панї Вери Леви у Бечу, покля ме нє купела баба Ната и однєсла до Нового Саду. Була то любов на перши попатрунок. Такой сом ше єй попачел. Бул сом єй защитнїк од дижджу, шнїгу и слунка. Аж сом єй даскельо раз одменєл куку. Постал сом вирни приятель. Наша родзина, чловек хтори давно жил у Французкей, написал писню о амрелским роду: „Я мали амрел, щицим людзох кажди дзень, од нєба вибрани, лєцим як и падобрани.” У моїм живоце єст вельо авантури. Раз сом спаднул, бо ме вдерела велька груда. Круцело ше ми у глави. Алє того шивого дня витор так моцно задул же сом спаднул на жем. Вец ме преґажел авто и поламал ми дроти. Шицко ме болєло и нє могол сом ше рушиц анї на лїво, анї на право. Кед тото видзела баба Ната и єй унука Сара, розбегли ше ґу мнє, дзвигли ме и такой однєсли до лїкара Аґатона, славного майстра за амрели. Ах, Амрелко, наисце ши покалїчени. Питам ше як ци тоту рану вилїчиме, най будзеш гевтот стари.
Знал сом же нє будзем чаривни як амрел Мери Попинс, алє сом ше наздавал же ше знова будзем шпацирац зоз мою бабу Нату и зоз Сару. Теди сом чул як през сон їх гласи: „Модлїме вас, панє Аґатон, зробце шицко цо можеце же бисце му помогли!” Мойо лїченє тирвало длуго. Конєчно, о мешац сом вишол зоз лїкарскей ординациї з розширенима кридлами по найвекшей лєйби. Облапел сом бабу Нату и Сару, а вец зме вєдно зашпивали на дижджу, шляпкаюци по баркох: „Амрелко сом били/дижджу ше радуєм/Амрелко сом мали/нїч ми нє одняли/кед дзень хмарни и шнїгови/щицим як падобран нови”. Поправдзе, я нє знам шпивац, лєм дакеди засущим и на хвильку полєцим. Преложела М. Р.
ИҐОР КОЛАРОВ
НАЙОПАСНЄЙША РИКА НА ШВЕЦЕ Кристиян весла. Сам є у чамцу. Рика на хторей ше находзи, барз дзива и швидка. Його чамец идзе ґу велькому водопаду. Кристиян весла зоз шицку силу у процивним напряме. Медзитим, рика моцнєйша. Водопад барз блїзко. Теди до хижи уходзи оцец и кричи: – Лєнюху єден! Чи сом ци нє гварел най попораїш хижу? Ниа. Даєдни оцове ше зявя у остатнєй хвильки.
НЕДЕЛЬКО ТЕРЗИЧ
ПИПИНЄ ЗА УЧИТЕЛЬКУ Червене пипинє место ружох ношиме учительки хтора пензионерски днї препровадзує у своєй скромней хижки. Струї ма, а воду приноши, бо лєгчейше приношиц воду, як приношиц струю. Так гуторела. Червене пипинє место ружох ношиме учительки; кед бизме мали учителя можебуц бизме однєсли палєнки, а вона драгша як вода, пече, гори, дави, як шаркань двоглави. Так гуторела. Червене пипинє место ружох ношиме учительки. Любела нам длуго, на шицких годзинох, окреме пополадню приповедац о житу и польох коло єй желєного валалу хтори би вона иншак офарбела. Так гуторела.
Прешпивала М. Р.
НАУКА ЗА КАЖДЕ ДЗЕЦКО
З
БОГ НАЙГЛАВНЄЙШИ
амерковали сце як ше старши любя похвалїц же познаю даєдну важну особу. Поведзме, на початку школского рока, кед треба дзецко уписац до школи, оцец лєбо мац ше здогадню же маю „вязу”, же познаю директора лєбо даєдного учителя, чи його оца, та му буду телефоновац и замодля го най їх дзецко достанє найлєпшу учительку. Гваря же нїч нє мож посцигнуц без познанства. Хто ма вецей приятельох и познатих, чувствує ше сиґурнєйши и моцнєйши. А хто найглавнєйши, наймоцнєйши и найважнєйши? Иус нам гварел: „То Бог, наш Оцец, Створитель нєба и жеми.” Вон нє пан єдного городу, єдней фабрики лєбо школи, анї нє предсидатель держави. Бог пан цалей вселени, шицких гвиздох и планетох, шицкого цо постої. Вон шицко зна и шицко може. Од нього ше нє мож скриц, анї сцекнуц. Алє, Бог нєвидлїви. Чи вец можеме з Нїм бешедовац? Гей, можеме, бо Бог любов. Вон вшадзи. Чує нас и з нїм можеме бешедовац без словох. Досц лєм думац тото цо сцеме повесц. Исус нас научел модлїц молитву „Оченаш”, алє ми можеме модлїц ЦИХА НОЦ и молитву зоз своїма словами лєбо думками. Можеме му Циха ноц уж жем прикрила, подзековац за красни и успина одпочивок час уж пойсц. шни дзень кед ше врацаме Най остатня думка будзе: зоз школи, лєбо го замодлїц Мой Исусе, добру ноц! най нас провадзи на нєпознатей драги. Вше ше можеме ґу Шветло вичне ту, пред Тобу, Ньому озвец, кед вериме же най заступа пламень мой. є ту и же є наш найглавнєйЗ ангелами шептам сциха: ши познати, найсиґурнєйша Мой Исусе, добру ноц! „вяза”. О, Исусе, Ти ме чекай, а я ютре придзем заш. Дай зоз своїм благословом души моєй добру ноц.
ВИРНОСЦ МАРИЇ Кристофор Колумбо плївал на заход до нєпознатого. Глєдал нове копно. Ладї на хторей плївал, дал мено САНТА МАРИЯ – СВЯТА МАРИЯ, и верел до єй помоци. У чежких животних опасносцох плївал два мешаци по морю вше лєм на заход. Його людзе уж були огорчени и сцели ше врациц назад. Алє Колумбо нє попущовал у своїм довирию до Мариї и одкрил Америку, виратовал себе и людзох на ладї. *** Почитователє Мацери Божей! И наша животна ладя идзе нєпреривно на заход. Чи на нєй пише: Санта Мария – Свята Мария? Чи Мария тота хтора водзи ладьочку нашого живота? Кед сцеме сиґурно сцигнуц до пристанїща спашеня, до слави нєбескей, вец ше модлїме Мариї, мацери Божей най нам будзе помочнїца у каждей хвильки. Зоз кнїжочки „Казанї о Мацери Божей” автора Мату Сакача, Дяково, 1995.
МЕЛАНИЯ РИМАР
У МУТЛЯНКИ Єдна жаба у мутлянки ше чиря. Кус задриме, вец ше зорве, та очи вищиря. Шнїє ше єй же ґовля ногата нєздобачки залєзла до блата. Чи ю ратовац, чи єй дац мира, док ше у мутлянки бидна секира. А мутлянка стої така густа, же ю жаба зоз зубами хруста.
ШТЕФАН ЧАКАН
ГОЛУБ И ЛАСТОВКА Припатрал ше голуб з голубнїка на ластовково гнїздо под стреху и кед ластовка прилєцела ґу ластовчатом, озвал ше ґу нєй: – Вельо на це, и твою пару, полне гнїздо ластовчатох, а лєм з мушками их кармице. Ми маме двойко, а и то зна буц вельо. Досц и єдно на карменє. А и гнїздо ци нє вельке. – Замерковали зме, голубе, же кед ластовчата вельо у гнїздзе, же маю вецей места. Ґу тому, як видзиш, прето же их єст вельо, чуваю чисто гнїздо, так же накадзи повилєтую, можеме до єшенї вилягнуц ище єдни ластовчата. Двоїм би у гнїздзе було допито. И кед би було лєм єдно – од допитосци би нам гнїздо розпрасло. Голуб ше дакус задумал и лєм тельо одвитовал: – Розумим це, ластовко, лєм ми нє розумлїве як то твойо ластовчата маю вецей места у гнїздзе кед их єст вельо? Випатра же тото добрим сушедом остало нєпотолковане анї до тераз.
МИКОЛА М. КОЧИШ
ПОЧАТОК ЧЕЖКИ Розбегнул ше Яни конїка прескочиц. – Коню, мирно стой! Прескочим це, ой! Коня нє прескочел, алє на нїм остал. Облїва го зной, бо високе – йой!
СИЛВЕСТЕР Д. МАКАЇ
КУП МИ ГАЧЕ Я би любел мале гаче, чи знаш, мили тату? Куп го, куп го на вашаре даґдзе у Банату. Ошедлам го, та до школи най ме видза дзеци, дїга, дїга-дїга, дїга, так кавбой лєци. Яки трактор и машини, або авто били, куп ми гаче, куп ми гаче, таточку мой мили!
Иґор Загорянски, 5,5 роки Нови Сад
Милана Йованов, 6 роки Дюрдьов
Адрияна Штранґар, 6 роки Руски Керестур
Стефан Ковачевич, 6 роки Руски Керестур Марко Станкович, 6 роки Дюрдьов
МОЙ ТОВАРИШ Мойому товаришови мено Звонко. Ма осем роки. Ходзи до другей класи. Ми двоме ше барз крашнє бавиме кед пойдзем до ньго, лєбо вон до мнє. Звонко люби леґо коцки, а нє люби бавиц фодбал. Бої ше кед патри страшни филми. Люби єсц плазмову торту. Барз люби животинї. Дома у заднїм дворе ма кози, барана и овцу, прашатка, заяци и кури. Там ше найволї бавиц. Тони Орос, II, Руски Керестур
ШКОЛСКИ СИМПАТИЇ Кажде дзецко у школи ма симпатию хтору люби. Старши дзеци ше вишмеюю, а свойо любови затаюю. Од ганьби им горя лїчка, та су красни як ружичка. Часто ше скрити дописую, пре симпатиї себе здихую. Красни памятки велїм останю у їх дзецинским паметаню. Та док вирошню, постаню людзе, кажда памятка з нїма будзе.
Патрик Варґа, II, Руски Керестур
БАБОВО КВЕЦЕ
Уна Шеремет, IV Шид
Пришла яр. У бабовей заградки квитню ружи, тулїпани и друге квеце. Дїдо помага баби полївац заградку. Раз кед барз дул витор, зламал тулїпан. Други дзень баба видзела же єй витор напакосцел. Гварела дїдови же треба пойсц на пияц купиц други тулїпани. Матей Макаї, III Руски Керестур
ЛЮБИМ БРАТА Мам старшого брата Славка. Вон ма дзешец роки. Ходзи до штвартей класи. Вєдно ше бавиме и вожиме ше на бициґлох. Любиме вєдно бавиц фодбал. Вше ми помага кед робим домашнї задатки. Гоч ше дакеди и повадзиме, швидко ше помириме. Славко ме чува, док мац и оцец на роботи. Кед треба дацо помогнуц родичом, тоту роботу окончуєме вєдно. Вон каждому сце помогнуц. Барз є добри и послухни. Любим свойого брата найбаржей на швеце. Никола Йованов, III, Дюрдьов
Никола Прокоп, II, Шид
ПАЧИ ШЕ МИ МОЯ ХИЖА Моя хижа нє барз велька, алє мнє є цалком добра. Кед ше войдзе нука, у правим куце видно школску ташку и други ствари потребни за школу. На правим боку ми стої кавч. На нїм три вельки и два мали заглавчки. Над кавчом виша медалї котри сом подоставала на змаганьох у одбойки. На муре опрез дзверох два вельки облаки, а под нїма два мали фотелї. На лївим боку ормани пошоровани коло цалого мура. На єдним орманє место за телевизор. На лївим боку у куце стол на хторим ми компютер. На штред хижи мам мали тепих, а на нїм стол. Там шедзим кед ше учим и робим домашнї задатки. Моя хижа у червено-чарних фарбох. Барз ше ми пачи. Минеа Югас, VIII, Руски Керестур
ПИСНЯ О МЕШАЧКУ Мешачок плїва по нєбе вечарами, ошвицує и дружи ше зоз гвиздами. Кажду ноц слунко одменює, на одпочивок го випровадзує. Мешачок на нєбе швици и вечарши красоти нам указує, а коло нього кажда гвиздочка блїска и весели танєц танцує. Мешачок ганьблїво джмурка, и до облакох нїжно дурка. Будзи любов, здогадованя, а вец сни на очи наганя. Мая Ґайдош, IV, Коцур Надя Ґшвенґ, I, Вербас
ПИСАТЕЛЬ – Хто то писатель? питали ше мали дзеци. – Писатель на кридлох чаривних лєци! Вон описує красни дожица и думки цо шерцо квица. Ми их вецка читаме, на його кридлох лєтаме. Цо вон написал, ми дожиєме, по далєких крайох путуєме. И вше дацо нове научиме, и нєзвичайне зрозумиме. Дакеди ше нашмеєме, а дакеди задумаме. Цо писатель за нас напише, ми дзечнє читаме. Луция Бульчик, II, Руски Керестур
Александар Девич, IV Шид
МИЛА ПАМЯТКА
Йована Кишрацик, II, Савине Село
Братняк ми у Канади подаровал єдно бависко котре достал на томболи у школи. Тото бависко на подлоги ма штири нилски конї. Кажди иншакей фарби. Єден желєни, єден жовти, єден целови и єден помаранчецови. Положени су нука, у бависку. Бави ше так же ше до штредку положи двацец били лабдочки вельки як пильки. Прициска ше им хвости, та ше им вец отвераю глави. Подлога дакус углїбена же би нилски конї могли лїґац лабдочки. Хтори нилски конь прелїґнє найвецей лабдочки, вон побиднїк. Барз ше любим бавиц з тим бависком, бо ми то мила памятка. Здогадує ме на Канаду. Вше кед маме шлєбодного часу, бавиме ше з нїм. Стефан Колошняї, V Руски Керестур
РАНО Зашвицело слунечко ясне, най нам рано будзе красне. Когути кукурикац почали, волаю же би шицки поставали. Тато и мама ставаю вєдно, од билого рана робя вредно. Заробиц пенєжи треба, же би могли купиц хлєба. Будза дзеци най ставаю и до школи ше рихтаю. Єдни до школи, други до оводи, облєканє шицким муши буц по моди. Теодора Ґайдош, IV Коцур
Виктор Будински, I, Вербас
МОЯ МАМА Моя мама красна, добра, лєм є дараз строга. Кед до школи я одходзим, так ми наказує: „Добре слухай учительку и паметай цо вас вона научує.” Весна Бильня, IV Коцур
ЧИСТОТА У ПРИРОДИ
Тони и Миа були найлєпши товарише. Кажди дзень вєдно ишли до школи. Раз кед ишли, Миа попила воду зоз пластичней фляшки и руцела ю на жем. Тони скричал, нооооо... и опомнул ю най тото вецей нє роби. Миа ше розплакала. Тони видзел же муши дацо зробиц. Вжал зоз жеми фляшку и предлужели до школи. У школи Тони надумал Мии направиц квецик. Одштригнул верх з тей фляшочки и направел квецик. Дал го Мии. Вона була барз щешлїва и обецала же будзе мерковац на чистоту у природи. Кристина Сопка, II Руски Керестур
КРЕАТИВНОСЦ У ПИСАНЮ
Теми були: Бал сом ше повесц правду Любов нє ма гранїци Дзень без ошмиху страцени дзень Бул сом любопитлїви Любела бим упознац славного... Вода – чаривнїца и пакошнїца Нашо товаришство По церню ґу гвиздом Ваша и моя музика
Школяре Основней и Штреднєй школи „Петро Кузмяк” у Руским Керестуре 21. фебруар – Медзинародни дзень мацеринского язика плановали означиц зоз Креативну роботню, алє понеже теди, пре епидемию ґрипи, школи у цалей Сербиї мали нєплановани розпуст, Роботня отримана 28. фебруара. Уключени були вибрани школяре зоз шицких оддзелєньох висших класох основней школи и ґимназиялци зоз руских оддзелєньох хтори маю прихильносц ґу писаню. Присутни були и професорки руского язика Каролина Папуґа, Ксения Шовш и Люпка Малацко, а роботню Креативносц у писаню водзела одвичательна редакторка часописа за дзеци „Заградка” и писателька Мелания Римар. Вона школяром приповедала о важносци чуваня и пестованя мацеринского язика и наглашела же бизме дзбали о тим цо нам родичи усадзели накадзи зме ше народзели. Най нїхто з нас нє будзе виновати кед скапе мацеров лєбо оцов язик, так як ше занєдзбую и траца велї язики ширцом швета кед дзецом милше цудзе як свойо власне. Потим предложени коло дзешец теми спомедзи хторих школяре виберали єдну о хторей писали состав лєбо писню, самостойно лєбо по ґрупох.
ЗОЗ ШКОЛЯРСКЕЙ РОБОТНЇ МОЯ МУЗИКА, А НЄ ВАША
СОСТАВ БЕЗ ПОЕНТИ
Музика хтору я любим слухац, иншака. Розликує ше од сучасних писньох. Жалосне же велї дзеци починаю слухац музику хтору и други слухаю, лєм же би ше уклопели до дружтва, же би нє заоставали за моду. Писнї хтори вони слухаю, за мнє нє маю нїяку поенту. Тексти у нїх мнє барз слаби, празни, аж глупи и нє наменєни нїкому и нїчому. Навияцки писнї хтори я слухам, за мнє маю барз вельку поенту. Тексти єдноставни, алє за нас, навиячох „Червеней гвизди”, вони окремни. У нїх ше пренаходзим. Любим буц иншака як други. Любим слухац музику хтора мнє фина. Нє пачи ше ми же ше велї дзеци заглупюю зоз писнями хтори слухаю, лєм прето же би були прилапени у дружтве, а же ше ганьбя за музику хтора ше им наисце пачи и хтора им одвитує. Сцем слухац музику хтору я любим. Чудне же дзивче слуха навияцки писнї, алє я ше у нїх находзим. Нє сцем буц така, як и шицки други. Сцем буц иншака.
Шедзим. Штварта годзина у компютерскей учальнї у Школи „Петро Кузмяк”. Шедзим и роздумуєм о чим писац. Нїч ми нє приходзи на розум. На табли понукнути єденац теми и маме можлївосц сами виберац о чим написац состав. Тот состав можебуц нє ма смисла, алє гоч як, напишем о тим. Роздумовала сом же бим висцерала шицко тото, алє нїч нє совершене, та так нє будзе анї тото. Могла бим писац гоч о чим на тим ширим швеце, як би ше поведло, єст безконєчно вельо теми. Понукнуте нам писац о любови, музики, народних присловкох, щиросци..., алє мнє нїч од того нє интересує. Любов поняце о хторим мож койцо написац, алє я нє залюбена. Любоц ґу фамелиї, ґу спорту, товаришом... Народни присловки нє знам вельо. Щиросц... наисце барз обсяжна тема. Я вше щира и повем тото цо думам. Як сом попатрела на таблу, обачела сом тему: Вода – чаривнїца и пакошнїца. Цо рика? Рика чече вше лєм напредок и нїґда нє патри назадок. Думам же би так требали робиц и людзе. Цо ше случело у прешлосци, остава у прешлосци. Треба же бизме патрели напредок и нє оглядали ше. Як и наслов гвари, тот состав без поенти, та таке будзе и законченє, бо вецей нє знам о чим писац. Уна Планчак, VII
Ребека Семан, VII
БАЛА СОМ ШЕ ПОВЕСЦ ПРАВДУ Кажде ше дараз бал дацо повесц поправдзе. Окреме кед слово о оценох. Єдного дня кед зме мали контролни з математики, нє була сом порихтана. Нїч сом нє учела. Задатки були барз чежки и нїч сом нє знала виробиц. Пробовала сом преписац од пайташки, алє анї вона нїч нє знала. На концу годзини з вельким страхом сом придала контролни. Знала сом же достанєм слабу оцену. Барз сом ше бала, прето же кед сом прешли раз достала слабу оцену, родичи ми виключели компютер и интернет. Барз сом була смутна. Намагала сом ше виправиц оцену. Шлїдуюцого дня, кед нам наставнїца виправела контролни, знова сом достала слабу оцену. Бала сом ше повесц родичом правду, та сом гварела же сом достала тройку. Кед родичи пришли на родительску схадзку и видзели же мам слабу оцену, знала сом цо ме чека. Случело ше исте цо и прешли раз. Одтеди вше гуторим правду о оценох и кажди дзень ше намагам достац цо лєпшу оцену. Матей Виславски (V), Валентина Новта, Мая Ерделї, Емина Симич, Тадей Бодянец (VIII)
НАШО ТОВАРИШСТВО Кед зме були мали, ми ше упознали. Такой зме ше зблїжели, огваряц зме нє любели. Валентина нам наймладша, алє є найсладша. Андрея тренира атлетику и люби физику. Мая швидко бежи, на кросу вше победзи. Нена од нас наймудрейша, алє и найшмелша. Сандра ма желєни очи, люби єсц овоци. Лара ту найстарша и пайташка найшмишнєйша. Ми ше вше дружиме и тайни єдна другей гуториме. Барз ше любиме и памятки правиме. Лора Новакович, Сандра Джуджар, Хелена Новта, Мая Сопка, Валентина Олеяр, VI
ЄДНАКИ ДРЕВА
БЕЗ ГРИШКИ Учитель: – Як то, Марчо, же нєшка у домашнєй задачи нє маш анї єдну гришку? Марча: Прето же оцец цали дзень нє бул дома, та сом мушела сама написац домашню задачу.
НЄ ВИНОВАТИ
Автор Нела Таталович
Наставнїк: Миколко, уж пияти раз це опоминам най нє закукуєш тельо до Сенкового задатка! Миколка: – Я нє виновати. Вона так нєчитко пише, же ше мушим барз ужерац.
КЕДИ ШЕ УСУДЗЕЛ
Ту нарисовани 15 древа, а медзи нїма лєм 2 єднаки. Найдз их и заокруж.
Оцец ше вадзи зоз Яником: – Сину мой, я кед бул таки мали як ти тераз, нє усудзовал сом ше сциганїц. Яни ше пита оцови: – А кеди ши ше усудзел почац циґанїц?
Автор Нела Таталович
СЛУНЕЧНЇК
Напиш до кругох числа од 1 по 7 по таким шоре як ше тот слунечнїк розвива.
Автор Нела Таталович
ЛАВИРИНТ
Єдна ластовка заостала за своїм ятом. Помогнї єй прелєциц по лавиринту и здогонїц товаришки.
Автор Нела Таталович
ОВОЦ И ЖЕЛЄНЯВА
На рисунку заокруж овоци, а на линиї напиш назви желєняви.
„ЗАГРАДКА” ПРЕДКЛАДА ТЕМИ ЗА ПИСАНЄ За марцовске число на адресу „Заградки” сцигли 107 литературни и подобово роботи. Вербас: Надя Ґшвенґ, Сара Сеґеди, Лука Стоїлькович, Серґей Такач, Виктор Будински (I); Тияна Косич, Итана Косич, Бояна Сабадош, Михайло Чизмар, Милун Колошняї, Йован Имамович, Андрей Давидович, Павле Скубан (II); Оленка Контра, Милица Миклош, Андєла Бубаня, Уна Рашич, Маґдалена Будински, Шарлота Стоїлькович, Наташа Костелник, Дуня Тешанович, Милица Милановски и 1 малюнок нєподписани (III); Таня Костелник, Миа Мандич, Мила Мандич, Оґнєн Сабадош (IV). Вєдно 33 роботи. Руски Керестур: Николина Олеяр, Адрияна Штранґар, Алексей Виславски, Андрей Виславски, Стефан Ковачевич (овода); Валентина Гарди, Ксения Катрина, Валентина Тот, Луция Бульчик, Яна Сивч, Тияна Сабадош, Миа Чордаш, Мая Надь, Кристина Сопка, Тони Орос, Звонимир Мудри, Исак Новта, Тадей Виславски, Урош Плавшич, Патрик Варґа (II); Ивона Рац, Кристиян Малацко, Даниел Надь (IV). Вєдно 30 роботи. Коцур: Катарина Штефанко, Тамара Салонтаї, Мария Сакач, Матия Макша, Дарко Колєсар (II); Мая Ґайдош, Теодора Ґайдош, Сара Горняк, Весна Бильня, Борис Чордаш, Синиша Буила, Филип Хромиш, Алексей Медєши, Лука Дорокхази, Дамян Радванї (IV). Вєдно 22 роботи. Нови Сад: Иґор Загорянски (овода); Альоша Сабадош (I); Сара Сабадош, Михайло Бики, Владимир Колбас (II); Ана Митошевич, Андєла Кривокуча (III); Андрей Монар (IV); Михайло Ковач (VI); Ана Монар (VIII). Вєдно 11 роботи. Дюрдьов: Марина Миланов, Владимир Молнар, Марко Станкович, Андрей Балїнт (овода); Елеонора Винаї, Ваня Роман, Стефан Ґнип, Иван Молнар, Арсен Станкович, Давид Такач (III). Вєдно 10 роботи. Ґосподїнци: Адриана Кодба (III) послала єдну роботу.
Кед нє знаце о чим писац, ниа, яки идеї ма ваш часопис! Ту даскельо наслови, та виберце єден и напишце состав лєбо писньочку и, пошлїце до „Заградки”. 1. Радосни (а) сом кед помогнєм 2. Любел(а) бим упознац славного... 3. Бул(а) сом шмели(а) 4. Яки плуг, така оранїна 5. Сцем пребачиц
КОНЦЕРТ МАЦЕРОМ У ВЕРБАШЕ У КПД „Карпати” у Вербаше з нагоди Медзинародного Дня женох отримани традицийни Осмомарцовски концерт. Коло 60 школяре хтори ходза на годзини руского и українского язика у вербаских основних школох, на тим концерту танцовали, рецитовали и шпивали. После програми було заєднїцке друженє. Драшко Перович. V, Вербас
Ана Монар VIII, Нови Сад
ЧУДО НА МЕШАЧКУ На Мешацовей поверхносци у цеку перши експеримент садзеня рошлїнох на тим нєбеским целу. Окрем того, перши успихи ту, та так китайска сонда послала фотоґрафиї на хторих видно младнїк памуку. Потераз ше рошлїни у вселени садзело на Медзинародней вселенскей станїци, а кед Китай до вселени лансировал сонду наволану по прастарей богинї Мешаца, послали и єдну канту зоз памуковим нашеньом, кромплї, квас и ваїчка винскей мушки. Медзи податками хтори сцигую на Жем, найдзена и слика младнїка памуку, а други рошлїнки ище нє виключкали.
ЧЕСКИ ВАЛАЛ НАЙМЕНШИ У ВОЙВОДИНИ Чески Валал у општини Била Церква (Банат) познати по манифестациї „Паприґашияда”, а ище познатши є по тим же то єдине населєне место у Войводини и у Сербиї дзе векшинске жительство Чехи. А найпознатши є и як найменши валал у Войводини. Ма лєм 36 стаємних жительох. Першираз у историї валал ше спомина 1415. року. Пременєл даскельо мена, а найпознатше Фабиян, як тот валал и нєшка волаю його жителє. Далєкого 1857. року поставени и перши учитель, а вец 1900. року збудована нова школа. По попису жительства 1910. року у Ческим Валалє було 216 жительох, од чого 191 бул Чех. Вец млади почали одходзиц до векших населєньох, та 1974. року заварта школа, а у тим будинку основани етно-музей. Валалчанє нє маю анї єдну предавальню. Маю лєм римокатолїцку церкву. Людзе у Фабияну, односно Ческим Валалє звикли на мир и цихосц, та би ше нїзач нє черали за живот у городу.
НАЙСТАРШИ РИСУНОК ЖИВОТИНЇ У пещерох острова Борнео найдзени рисунок животинї стари найменєй 40.000 роки. Фаховци гваря же то найстарши пренайдзени прикладнїк фиґуративного малярства. У тих пещерох єст ище тисяч рисунки, а тот бул у сериї нарисованих зоз червенопомаранчецовим пиґментом. Нє мож твердзиц хтора животиня представена, алє виглєдовацки тим предпоставя же то бантенґ, файта дзивей крави, хтора и нєшка населює тоту обласц. Други рисунки лилово, а стари су од 16 000 по 21 000 роки. На даєдних з нїх приказани и людзе. Pririhtala R. ]. Petrovi~
Борис Чордаш, IV, Коцур
Мирела Тиґань, VIII, Савине Село
Оленка Контра, III, Вербас
Андриана Кодба, III, Ґосподїнци
Валентина Гарди, II, Руски Керестур