РОК LXХIV • ЧИСЛО 3 МАРЕЦ • 2021 ЦЕНА 100 ДИН
ОЗНАЧЕНИ ДЗЕНЬ ЦЕЛОВИХ МАЇЦОХ
Д
зень целових маїцох, односно Дзень борби процив парняцкого насилства медзи дзецми 24. фебруара означени у велїх школох, та и у Основней и штреднєй школи „Петро Кузмяк” Руским Керестуре. Школяром другей класи пригодне преподаванє отримала педаґоґ Любица Няради. Вона дзецом бешедовала як ше треба справовац же би до парняцкого насилства нє приходзело, а тиж и цо робиц кед ше дзецко найдзе у ситуациї дзе ше случує насилство. Педаґоґ Мария Шанта роботнї на тему парняцкого насилства тримала школяром штвартей класи. Того дня шицки школяре мали облєчени целово маїци, або тот Дзень символично означели зоз целовима беджами. Тот Медзинародни дзень борби процив насилства на пригодни способ означели и дзеци у ПУ „Бамби” Кула, у рускокерестурским оддзелєню „Цицибан”. Виховательки у шицких воспитних ґрупох дзецом на способ прилагодзени їх возросту потолковали цо значи тот дзень, а потим шицки рисовали и бавели ше, наглашуюци розвиванє товаришства и почитованє каждого свойого товариша. Зоз школярами висших класох роботнї на тоту тему отримани онлайн. Дзеци направели и рижни плакати и целово беджи.
ДЗЕНЬ БОРБИ ПРОЦИВ ПАРНЯЦКОГО НАСИЛСТВА У Основней школи „Йован Йованович Змай” у Дюрдьове остатнєй стреди у фебруару Медзинародни дзень борби процив парняцкого насилства означели шицки школяре. По препорукох Министерства просвити, науки и технолоґийного розвою шицки оводи и школи у нашей жеми тот Дзень би требали означовац цали тидзень, алє епидемиолоґийна ситуация гамує нє лєм порядну наставу, алє и шицко друге. Школяре у целових маїцох мали орґанизовани роботнї на тему защити од насилства и дискриминациї, змоцньованє нєнасилного ришованя конфликтох и почитованя розличносцох медзи дзецми.
^ASOPIS ZA DZECI
Direktor dr Boris Var}a Odvi~atelqni redaktor Melaniy Rimar Vihodzi raz na me{ac u {kolskim roku • Vidava NVU “Ruske slovo” • Футожска 2/ІІІ 21 000 Novi Sad, • Telefon (021) 6613-697 • @iro rahunok ~islo: 160-923244-82 • Ro~na predplata 1 000 dinari; za ino`emstvo 25 evra • Dizajn: Mariy Gudak Kompxterski obrobok: Mariy Gudak • Lektor: Bla`ena Homa-Cvetkovi~ • Rukopisi {e nw vraca • Drukuw drukarny: “MAXIMA GRAF”, Петроварадин YU ISSN 0353-9938 E-mail: casopiszahradka@gmail.com Ilustraci>: Aleksandra Medw{i
CIP – Katalogizacija u publikaciji Biblioteka Matice srpske, Novi Sad 821-93 ZAGRADKA: ~asopis za dzeci / odvi~atelqni redaktor Melaniy Rimar. – Ro~. 50, ~. 1 (1991) – . – Novi Sad: Ruske slovo, 1991 –. – Ilustr. ; 24 cm Mese~no tokom {kolske godine. – Nastavak publikacije: Pionirska zahradka ISSN 0353-9938
На насловним боку: Школяре IV б класи у Руским Керестуре барз любя математику. Рихтали ше за змаганє, алє є одказане. (Фото: Веруна Медєши, учителька)
Здраво, заградкаре! Видзим же з часу на час треба припомнуц учительком и наставнїцом най їх школяре пишу, рисую и най ше фотоґрафую, а вец шицко тото и най посилаю до „Заградки”. Була сом застарана же нє мам материялу за боки наменєни дзецинским роботом, та сом ше волала на учительки. Наисце вредзело. До Редакциї сцигли вецей як 170 писньочки, состави, рисунки и фотоґрафиї. Знам же кажди тидзень доставаце нови информациї раз о порядней, а раз о настави на далєко. Епидемиолоґийна ситуация нє лєгка, та меня плани, алє ви ше мушице притримовац шицкого цо вам поведза же бисце защицели од того опасного вирусу перше себе, а вец и шицких коло себе. Указали сце же ше знаце учиц и дома, и у учальньох, та витримаце. Хвиля вше баржей пахнє на яр, а гоч ше нашалї и даєден слаби мраз, нє помаржнєце. Будзце цо частейше вонка, на швижим воздуху, а кед ше вам допиє бавиц ше, поуцагуйце ше до своїх хижох и потрудзце ше буц вредни и писац до „Заградки”. По конєц школского рока остали ище лєм три мешаци. Хаснуйце их наймудрейше як знаце и останьце здрави, жада вам ваша редакторка
Злєтнул ярнї витрик, и з лєгким криделком погласкал квецики, заколїсал травки и збуртал поспани у кошнїцох главки. Шмих ше розлял польом, в лєше чвиринканє. Поток бистри рушел гет, на путованє. Чи красши соловей цо яри вишпивує, чи красши лєси, луки, долїни, або веселе дзецко кед яр – богиню краси з бавеньом дочекує.
МЕЛАНИЯ ПАВЛОВИЧ
ЯРНЇ КРАСИ
КСЕНИЯ ВАРҐА
РИСУНОК A
ндрей уж єден цали мешац ходзи до школи. До першей класи. Вецей є нє оводарец, алє прави школяр. А то велька ствар. Тераз у його ташки нє тренерка и маїца за преблєканє, алє теки и кнїжки цо пахню на папер, на друкарску фарбу и на чисте. А школски двор вельки, нє таки як у оводи. Мож бавиц и фодбал и оганяц ше. У класи позна скоро шицких ище зоз оводи. У лавки перше шедзел зоз Матейом, а вец го учителька премесцела шедзиц з Монику. Моника ше му баржей пачи як Матей, бо нє маха з ногами док шедзи на карсцелю и ма длугоки швицаци и кандрасти били власи. Здабе му на принцезу зоз сказкох. Нєшка у школи з учительку приповедали о домашнїх животиньох. О тим як то вони жию з людзми, як ше чловек о нїх стара, а и вони му нє оставаю длужни. Дахто таки домашнї животинї мал дома, дахто у баби, у сушеда, або у познатих. Потим кажде до теки мал нарисовац домашню животиню котра му ше пачи, котру люби, або му є интересантна. Андрей отворел теку, вжал до руки клайбас и глїбоко ше задумал. Цо ма тераз нарисовац? Дома нє маю нїяку домашню животиню. У баби мал пшичка Кикия котрого барз любел. Кед приходзел до баби, Кики го чекал на капурки. Вони двоме шедали на ґарадичи. Андрей би му приповедал як розбил ґамбу кед ше вожел на тротинету, як Матей лєм раз закуши до фалатка на ужини а вец зохаби, як Зоя плакала у оводи, а вон ю цешел: „Нє плач, Зойо, ище нїкого родичи у оводи нє зохабели!” А Кики ше притулєл ґу Андрийови, опущел уха и слухал, слухал яґод же шицко тото розуми цо ше му приповеда. Вец єдного дня Кики скапал. Баба гварела же остала отворена капурка, а пшичок вишол на драгу и вецей ше нє врацел. Була ноц, а Кики перше бегал весело по улїчки, а кед ше сцел врациц, нє знал кадзи ма рушиц. Опаховал кажду капурку. По паху препознавал же то нє його дом. Бежал за преходнїками, алє го вони керовали, а даєдни аж и одганяли. Андрей барз чекал же Кики пренайдзе бабову капурку, же ше враци. Алє вше кед отворел капурку, пшичок го вецей нє чекал на ґарадичох. Тераз док слуха учительку и пайташох цо приповедаю о домашнїх животиньох видзи ше му же Кики бул вецей як домашня животиня, якошик йому блїзше створенє и ришел же го нє нарисує, гоч як му бул дакеди мили. Скоро таки як член фамелиї. Ришел нарисовац когута. Кед були раз у бачика Янка, видзел як його когут Марко гребе по дворе и кед нашол якогошик хробачка, зволовал гласно шицки кури коло себе: „Ко-ко-ко” – цошка сом нашол, цошка сом нашол! ”Цо-цо-цо!” – збеговали
ше кури коло нього. Мал длуги хвост и розкошне пирє. Алє на рисунку Андрейов когут випаднул якошик як нєдокармени. Ноги му були длугоки и ценки з велькима пальцами. Мал длугоки писки и ценки хвост як кед би потрацел пирка по дворе. На концу му Андрей нарисовал гребень. Вельки и розкошни, та випатрал як даяки когут- бетяр. Попатрел Андрей до Мониковей теки и нє верел своїм очом. Видзел нарисованого пшичка истого истучкого як и його Кики. Мал исти жовти лабки и жовту точку на чолє. ‒ Такого и я мал пшичка. Ти познала мойого Кикия?” ‒ питал ше Андрей. ‒ Нє. Анї дома нє маме куцова. Я барз любим пшички. Мам вельо кнїжки о нїх. Любим читац приповедки о животиньох. Рисунок сом сама здумала” – гварел Моника. ‒ Нарисуй и мнє такого истого куцова. И Кики бул исти таки ‒ замодлєл Андрей свою пайташку. Ґу когутови Моника нарисовала пшичка. Такого истого як и до своєй теки. Зробела то швидко и схопно. Рисунок випаднул барз весели. Когут сцека, а за нїм бежи Кики. Учителька обиходзи коло школярох, опатра теки. Стої при Моники и Андрейови. Патри раз до єдней, раз до другей теки. Сце ше цошка питац. Андрей видзи єй намиру и понагля перши повесц: ‒ Когута рисовал я, а того пшичка при ньому Моника. Я ю замодлєл най нарисує мойого Кикия. Кики ше страцел и нє знал ше врациц дому. Барз сом го любел! ‒ Рисунок барз красни. И твой и Моников. А и Кики ше можебуц враци – гварела учителька. Андрей ище длуго патрел на рисунок у теки. Пачел ше му Кики. Задумовал себе як вони двоме шедза на ґарадичох, а Андрей му приповеда о Моники котра зна нарисовац найкрасшого пшичка на швеце.
ОБЛАЧОК ДО ШВЕТА ОЛЕНКА ЖИВКОВИЧ наша новинарка, рецитаторка, активистка у култури тераз вошла и до писательских водох. Народзена є 2. септембра 1965. року у Вербаше. Основну школу закончела у Руским Керестуре, а ґимназию у Сримских Карловцох, напрям орґанизатор културних активносцох. Уж у основней школи нїтку ґу писаню, рецитованю и ґлуми обачел учитель Владимир Семан, котри ю унапрямовал же би писала до „Пионирскей заградки”, а познєйше и до МАК-у и до новинох „Руске слово”. Учитель Йовґен Медєши ю уведол до швета театралней творчосци, дзе познєйше участвовала у аматерских младежских и у виводзацким ансамблу Аматерского народного театру „Дядя”, сцена у Руским Керестуре. Активно роби и зоз рецитаторами младшого возросту и так помага розвивац мацерински, руски язик при нових ґенерацийох дзецох. Пише по руски, алє и по сербски, та свойо писнї прешпивює на обидва язики. Концом прешлого року у НВУ „Руске слово” обявена єй кнїжка приповедких за дзеци „Таньов швет”.
ПОРАЄНЄ ХИЖИ Н
їяк нє знам чи то у каждим обисцу так, чи лєм у нашим. Нє гварим же моя мама велька пораячка, же вше цошка роби, нє... Алє кед мнє задава роботи, то вше теди кед я нє мам часу. Нїґда єй нє бриґа же би я, можебуц, любела патриц дацо на телевизиї, лєбо же бим ше пошла бавиц, лєбо... Кед треба попораїц хижу, ту окреме нє потрафи час. Праве того дня кед ше мнє найменєй роби, и кед сом найменєй розположена за таку роботу, вона скричи: ‒ Таньо, ти правиш виставу у тей твоєй хижи? Палє, яки ци вашар, могла би ши попораїц... Тото кед вона пове „могла би ши” нїґда нє значи тото цо вона гвари. То найчастейше значи: енки, як сом ци гварела, мушиш поробиц цо сом розказала. Нє шмем анї хвильку почекац, анї прелїґнуц кед цошка єм. А пораїц хижу, йой, то барз зложена робота! Перше мушим позазберовац шицки гевти посцекани шмати зоз ормана. Патики, папучи, балетанки вше правя койдзеяки екскурзиї поза стола, попод кавча, споза фотелї...Требала бим орґанизовац окремну експедицию же бим понаходзела шицки ствари котри ше у тей малей хижи можу поскривац. Верце ми, нє знам як ше можу так позапихац койкадзи. Як лєм посцекали и поскривали ше там дзе би ми анї на конєц розума нє пришло.
А прах... Боже мили, под тим моїм кавчом вше єст тельо праху же ше налїпнє и до носа кед закукуєм и виберам даяки клайбас лєбо ґумку котри зоз стола одблукали под посцель, а нїяким концом ше нє знаю сами врациц. То таки якишик допити, мерзени прах. Вше го мушим очуховац, сцерац зоз ренду, а вон ютре ту ознова. Та цо вон себе дума! Гайде, кед би падал лєм у мамовей хижи, лєбо у кухнї, трпезариї, алє вон, видзи ше ми, окреме активни у моєй дзецинскей хижи. И ровно єднак чухай, сцерай, меркуй... Шицко як кед би було процив мнє. Просто нє розумим же як то шицко може буц наспак, як кед би ми упрекосцело. Кнїжки порозтресани, теки позатрацовани, вечар ше мама розшлїсла на фломастеру... И ровно єднак ми дошпинтує: порай, порай, нє будз лєнїва! А, добре знам, бо ми баба нє раз приповедала о мами и єй пораєню. Гвари баба же язик злїзала од гутореня мацери же би попораєла, а вона ми ту тераз койцо приповеда. Дума вона же я нїч нє знам о єй справованю кед була мала. Алє, цо можем, родичи як кед би позабували як то буц дзеци, та су тераз исти таки як и їх родичи. Озда то так муши буц, чи цо? А хижу, гоч як, мушим попораїц.
ПОКАРАНА ПИХА МИХАЙЛО КОВАЧ
Е
й, чи мам когуцика! Ферка, когуцика. Вилєтнє на проща, та так кукурика же го аж на конєц валала чую. И прето го мойо домашнї часто гандрую. Кед я бул ище хлапчик, уджубнул ме тот скаранїк за пальчик. Алє ище и нєшка ше тот когуцик нє справує як спада, та вше пре його нєдоброту дахто страда. Лєбо курчата пахольчата скубе, лєбо качата рапущата джубе. Лєбо квоку Марципаню за гребень поцагує, лєбо ше сушедским когутом видрижнює. А люби и спреведац. Почнє так, наприклад, нараз гребац. Вец звола курки цалу громаду, як на даяку параду. Кажда курка себе рахує же ю Ферко найбаржей почитує и же праве єй тераз заренко вигребує. Чека кажда и дума же ше праве єй когутово заренко уйдзе, а вон нараз по жеми лєм так: джуб-джуб, та ‒ пойдзе. Ферко анї ноги пред спаньом нє умива. Моя мац прето вше ми предруцує кед ше нагнїва: ‒ Таки ши, гвари, нєшорови, як тот Ферко, лєм ци ище хиби хвосцик и у хвосце ‒ пирко. Часто роби зо мнє и франти: ‒ Могол биш з такима ногами пойсц спац зоз Ферком на банти. Гварим вам: ‒ Дзешец вельки мехи нє могли би прияц шицки Ферково грихи. Алє хто як роби,
так и ма. Когут пре тот його подли обичай раз так страдал же а-яй-яй! Кед уж од нєдоброти нє знал цо инше робиц, почал до цудзого двора ходзиц... Сушедов когут крашнє себе пошпивує, а тот наш ше му видрижнює. Ходзи по цудзим дворе таки гербни и стройни, сушедовому когутови ше то нє пачело, та я такой подумал: ‒ Будзе войни! И наисце: єдного рана, ми ище спали кед тоти двоме почали... Думам же звада була пре Марципаню... Сушедов когут зато лєпши. Вон дакус Феркови спочатку попущовал, алє тот наш го ровно напастовал. Почал му курки ганїц, а свою Марципаню до нєба хвалїц. То уж було вельо сушедовому когутови, та гварел на розум Феркови:
МИРОН КОЛОШНЯЇ
БЕЗ МОТИКИ – ХЛЄБА ЄСТ Шицко ше могло задумац, лєм тото нїяк нє; нїкому на розум нє ишло же ше годно так стац як цо ше стало: з крилатици жем же ше будзе гноїц, а крави же ше нє будзе з руками доїц. Вше ше твердзело: „Без мотики – хлєба нєт!” А нєшка анї мотики нє треба. Пришли якиш водички. Людзе место да копу, руцаю гербициди – и нєт хиби.
‒ Сушед! Ти ище барз млади, та ци радзим же би ши ше охабел звади. Алє Ферко, место же би послухал старшого, вон ище баржей сушедового когута геркал... Ей, кед тот сушедов когут зоз острожками зачеркал, кед зоз тима очми даскельо раз преврацел, кед ци мойого Ферка за гребень хвацел, кед ци вимахнул з тим нашим нялкошом як зоз даяким мещком, наш ци ше Ферко лєдво становел аж под желєним орещком. Ту под тим орещком була ище за качки викопана мала долїнка, а у нєй мутлянка як зоз парадичох мачанка... И цо вам далєй бешедовац? Ви ше можеце и сами здогадовац: Ферко ше нашол у тей мутлянки и вишол з нєй виваляни як даяке праше: Марципаня кед Ферка у долїнки видзела, мало хибело же би замлєла. Вец на верх шопки од страху вилєтла, та отамаль кельо гарла мала ‒ кричала: ‒ Ратуйце, ратуйце, людзе мойо мили... Мойого Ферка злодїє зоз сушедства на шмерц побили... А я єй гварим: ‒ Кед би Ферко нє бул таки неваляни, нє бул би анї поганьбени, анї покарани...
СТРАШИДЛО
У
загради дїдо Денчи и баба Иля вше мали роботи. И кед шицко посадзели и пошали, окопали, претаргали и виплєли, та випатрало же роботи нєт, вони ю видумали, бо озда нє буду од додня до змерку шедзиц на шамлох под конком и зазберовац нїч по нїм. Накадзи ше слунко випендрало на верх брадла, примкли капурку и приклєтни дзвери, та гайд до загради. А там... на плоце стреже чупор тащкох. Чекаю най ше голуби нафриштикую, та ше вони розложа на пашу. Кед их баба и дїдо збачели, почали верестовац на здирвете страшидло заджобнуте на штред загради. ‒ Прецо зме це ту насадзели, лєнюху древени! Напашнїки вицагали гращок, спасли младку шалату и розгребали цвиклочку, а ти ше счупело и дримеш! Страшидло ше зорвало зоз дримоти. Злєкнуте и увредзене нє знало кадзи патриц. Кадзи? Нїкадзи! Дїдо и баба ше нє удостоєли анї му направиц очни глїбки. ‒ Кед би тота моя рендана куля голєм кущик здабала на твар, можебуц би ше даєдно нєпоучене голубче и злєкло одо мнє, а так... Кридлати напашнїки ше анї нє стресаю же я ту стоїм. Поправдзе, баржей ше кляґам як стоїм. Шмело злєтую коло мнє и джубу, гребу, розтресаю... ‒ поносовало ше страшидло. Дармо ше поносовало. Нїхто го нє чул. А и як би го чул, кед нє мало уста за бешедованє. Кед би раз злярмало на тих крадошох, вецей би ше анї єдна птица нє одшмелєла кутатовац по загради, алє дармо кед тота древена палїца загуляна у гандрох нє мала дар бешеди. Страшидло анї саме нє знало цо є. На кого здабе? Ма дїдов винчани калап у хторим ше роками гнїздзел моль, ма бабов згайскани першняк и єдну и пол погрижену ногавку. Цинґалов завязани на шпарґи коло калапа гойсал ше на витре, алє нє цинґловал, бо му заардзавел гласни дроцик. Та хто би ше бал од дачого цо му и мено баржей шмишне як страшне: страшидло! Воно штреднього роду, як маче, щенє, голубче, коще, морче... Бої ше дахто од тих малих животинькох?
МЕЛАНИЯ РИМАР Видзело бидне пориско зоз злїзаней метли, обдзате у рондьох же ше нє вредзи скаржиц над свою судьбу, та ше знова зачирело до дримотох, ище глїбше як первей. Дїдо и баба розогнали лєтацих крадошох, та престали викриковац на страшидло. Видзели же є сеґинь и же ше доґмало скляґа на лїво до гращку, або на право до мауни. Надумали го одтаманїц. Кед уж нє розганя птици, най нє бридзи ушорену заграду. Було му цепло. Чувствовало як го нїжно гласка по калапе ярня заря. Аж кед го горучава и дим почали гартушиц, зорвало ше як кед би стануло на жирячку. А воно? Нє лєм же стануло на ню, алє цале лєжало у моцним огню под котлянку. У котлє ше кльохцело мидло. Дїдо и баба зазберовали по дворе сухи конарчки и койцо друге цо уж давно нїзач, а цо огень часом прелїґнє, та зношели ґу котлянки. Дим од страшидла ше сцел престрец по цалим гумнє, алє го витор хвацел и дзвигнул високо, гет ґу птицом хтори найволєли чеперкац по градкох желєняви. МИКОЛА СКУБАН
СТРАХИ
Мой прадїдо нє бул шмели, вше жил страхуюци: нє шмел ходзиц на бициґли ‒ бал ше же го зруци! И мой дїдо нє бул шмели, яґод мали дзеци: нє шмел шеднуц на гайзибан ‒ бал ше же одлєци! И мой оцец нє барз шмели, гоч є мудри, фини: нє шме исц на авионє ‒ ма страх од висини! За розлику од тих старших котри ше вше бали, я би шеднул до ракети... кед бизме ю мали!
РОБЕРТ ТАКАРИЧ
ОПРЕЗ ЖВЕРАТКА
Х
ториш дзень власи ми нє були на месце. Анї тераз су нє на месце. Була сом нєзадовольна зоз скору и фарбу очох. Павучайки ми були кратки, а нос узки. Анї чоло ми нє було на месце, бо би там нє требало буц. Тому чолу анї фотошоп нє може вельо помогнуц. Зуби нє були у найлєпшим порядку. Були як нєпослухне войско. Страшне! А знова патрим и шмеєм ше и задовольна сом. Як кед бим ше ознова народзела. Скакам и бежим. Нє дзбам анї о профилу анї о лайкох. Людзе, я ше наисце, алє наисце шмеєм. Жвератко ми красне и добре же є ту. Вибегла сом на драгу и просто до Инес. Знова базен. Скакали зме, плївали, чиряли ше, сушели ше, знова плївали, оганяли ше, скакали на главу, знова ше сушели, бавели одбойку у води, скакали, чиряли ше, скакали на главу и знова ше сушели. Вец зме знова скакали, плївали, чиряли ше, сушели ше, скакали на главу, знова ше сушели, бавели одбойку у води, чиряли ше, скакали на главу и знова ше сушели.
РУСОМИР Д. АРСИЧ
ЯР ПРИХОДЗИ Платки шнїгово дзе гущава густа, зобудзене слунко барз галаво хруста. Полями лєци, овоцнїки вита, бочка траву, дзеци, поточки и жита. Черешнї, шлївки, вишнї... шицко ше злагодзи, тераз им барз крашнє, БО ЯР ПРИХОДЗИ. Прешпивала М. Римар
Як єдноставно и крашнє жиц. Мац австралийска нас конєчно нарисовала. Инес скоро анї нє бешедує. Нє зна. Розуми сербски, алє нє бешедує. Нє ясне ми як ше можеме так крашнє дружиц, а скоро анї нє бешедуєме. Як? Преложела М. Р.
БОЖИДАР МАНДИЧ
ОЦЕНИ Вечар Ая зоз школи принєсла „квачку”. Ганьбела ше повесц „квачка”, та гварела – достала сом єдинку. Перше слово єй випатрало барз бридке, аж дакус и увредлїве. Важне принєсц дацо зоз школи, гвари єден поета, а я ше трудзим виправиц єй розположенє и нє направиц вину и страх пре оцени, бо то дакеди зна буц поражуюце. Оцени нє одраженє знаня, алє прилагодзованє ґу учительови. Наприклад, учителє ридко од школярох вимагаю знанє. Место же би им помогли, вони як кед би при школярох глєдали нєзнанє. Аж ше чувствує єдна файта супериорносци и гербносци... Школяре, поправдзе, знаю вельо вецей як указую и прето им треба помонуц. Єдноставно, можеш ше збунїц. Лєбо ци бул нїяки дзень. На концу конца, анї мозоґ нє може вше єднак робиц. Чи вец у питаню нєзнанє? Нє! Важне нє спреведац. Мушиш каждому, а насампредз родичом, повесц правду. Так ше здобуваю перши виправки. Перши зочованя зоз самим собу и своїм правдивим знаньом. А цо то знанє? Нє знам анї сам. Чи єден вельки гречески филозоф нє гварел: Я ЗНАМ ЖЕ НЇЧ НЄ ЗНАМ. Можебуц знанє и нєзнанє то цалком исте. У каждим случаю, кед достанєш єдинку з математики, а повеш тото своїм родичом, знай же ши достал петицу зоз щиросци.
ЗОЗ ШВЕТОВЕЙ ЛИТЕРАТУРИ РОАЛД ДАЛ (В. Британия)
Б
БАБА ДОСТАВА ЛЇК
аба шедзела згорбена на карсцелю при облаку. Зли дробни очи провадзели кажди Джорджов рух док приходзел ґу нєй. „Пожнїш!”, прасла вона. „Думам же нє пошнїм, бабо”. „Нє претаргуй ме на штред виреченя!”, скричала. „Алє ти закончела свойо виреченє, бабо”. „Ниа, знова вон. Вше ме претаргує и вадзи ше. Ти наисце допити. Кельо годзин?” „Точно єденац, бабо”. „Спреведаш, як и звичайно. Престань приповедац и дай ми лїк. Перше розмутькай фляшочку. Потим усип до ложки и меркуй, нє наполнї по верх.” „Прелїґнєш одразу, чи будзеш пиц помали?”, питал ше Джордж. „Цо я зробим, нє твоя бриґа”, гварела баба. „Наполнї ложку.” Кед Джордж знял покривку и помали почац сипац кафову чечносц до ложки, нє могол нє думац о тих дурних и чудесних стварох хтори ше случовали док правел тоту дурнїсту масу ‒ крема за бритвенє, знїмач лаґу, лїк процив парпльох, пращок процив блихох за пси, викс, чарни попер, хринова мачанка и шицко друге, най ше нє спомина моцни таблети за животинї, пращки, чечносци... и кафова фарба. „Отвор уста, бабо, а я ци усипем лїк”, гварел. Баба отворела зранцавени уста у хторих ше указали бридки, пожовкнути зуби. „Идземе! Прелїґнї до конца!, гварел Джордж и усипал єй масу до гарла. Вец ше поцагнул най видзи реакцию. Вредзело ше припатрац. Баба зврещала „Яааай” и цале єй цело подскочело у воздуху. Як кед би дахто прецагнул електрични дрот през шедзиско карсцеля и вец уключел до струї. Подскаковала як чловечок зоз шкатули... и нє врацала ше на карсцель... остала вишиц у воздуху... коло пол метера понад карсцель, ище вше у шедзацим положеню... алє тераз скруцена, залядзена... очи єй скакали... власи на глави ше дзвигали. „Дацо нє як треба, бабо? Добре ци?”, опитал ше умилно Джордж.
Так, вишаци у воздуху стара баба нє могла бешедовац. Шок хтори дожила од унуковей мишанїни сиґурно бул застрашуюци. По тим як ше одлїпела од карсцеля, поведли бисце же прелїґла розжирячену метлу. А вец ше швидко спущела на карсцель. „Волай огньогасцох! Брух ми гори!”, одразу скричала. „То од лїкох, бабо. Добри су и моцни”, гварел Джордж. „Огень! Огень у пиньвици!”, зврещала. „Принєш кабел! Черева! Швидко зроб дацо”. „Чит, бабо”, гварел унук, алє бул шокирани кед видзел же з єй носа и устох виходзи дим. Хмари чарного диму дриляли ше з єй носа и ширели ше по хижи. „Шокантне! Тебе наисце залапел огень!”, гварел Джордж. „Гей, видзиш же ме залапел! Упражи ме як кромплю! Увари ме як цвиклу!” Джордж одбегнул до кухнї и принєсол канчов води. „Отвор уста, бабо!” Лєдво видзел од диму, алє ше му удало усипац єй пол канчова води до гарла. Зоз глїбини бабового жалудка учуло ше шущанє як кед горуцу палачинкарню положиш под жимну воду. Стара подскоче ла, таргла ше и форкла. Почала лапац воздух. Гартушела ше. Зоз нєй почала пирскац вода, а дим ше розишол. „Огень загашени”, гордо обявел Джордж. „Знова ци будзе добре, бабо!” „Добре? Кому будзе добре? У жалудку ми лєм подскакує. У бруху лєм завива”, врещала баба и почала подскаковац на карсцелю. Очиглядно єй нє було приємно. „Тот лїк ци барз помогнє, бабо!” „Помогнє? Помогнє ми? Ша, вон ме забива!” Потим почала пухнуц. Надувала ше. Як кед би ю дахто пумповал, так випатрала! Чи експлодира? Фарба єй твари ше меняла зоз червеней до желєней! Виривок зоз кнїжки „Джорджова чудесна медицина”
НАУКА ЗА КАЖДЕ ДЗЕЦКО
АПОСТОЛ ПАВЛО Апостол Павло бул Юдей (Єврей) з племена Веняминового. Народзени є у городу Тарсу коло 10. року по Христови. Основне школованє и ремесло закончел у родним месце, а потим го родичи дали на школованє до теди познатого учителя и теолоґа Ґамалиєла у Єрусалиме. Павлово родичи були римски гражданє, та и вон бул римски граждан и мал два мена: Савло и Павло. Бул тварди фарисей и участвовал у прешлїдованьох перших християнох. Бул прешвечени же нове ученє о Исусови фалшива наука. Прето ше зоз шицкима силами борел викоренїц церкву у Єрусалиме. Ище як студент участвовал у каменьованю первомученїка Штефана. Чудесно ше обрацел вироятно 36. року, нєодлуга по Штефановей шмерци. Медзи шицкима подїями з його живота, искуство хторе дожил на драже до Дамаску найважнєйше за розуменє Павла и його посланя. Обрацел ше дзекуюци стретнуцу зоз Исусом. Павлово дожице Христа и його поволанка же би бул апостол и нависцовал Христову науку преламна точка у Павловим розуменю Христа. Потим постал апостол поганох. Його нависцованє Евангелиї допринєсло снованю Церкви: у Солуну, Филипох, Коринту и Ефесу, и створел цалу мрежу сотруднїкох и мисионарох хтори на рижни способи помагали у ширеню Евангелиї. Наказовал християнство и сновал християнски заєднїци у Антиохиї, велїх городох Малей Азиї, Македониї и Греческей. Нащивююци заєднїци и пишуци им писма, апостол Павло з нїма творел блїзкосц. Зрозумел же зоз Христом почина нова ера историї чловечества и же Бог твори нови Божи народ. Забити є у Риме под час Неронового прешлїдованя християнох коло 64. року.
ЦЕРКВА БЛАГОСЛОВИ И ПОШВЕЦУЄ Исус благословел людзох (апостолох, дзеци), ствари (хлєб, риби). Лїчел хорих и виганял дияволох зоз обшеднутих людзох. Кадзи ходзел, тамаль робел добре. На Його розказ и Церква так роби. Церква благослови. Вона модлї од Бога благослов за людзох и ствари хтори хаснуєме. Так, наприклад, модлї за мацер по породзеню (вивотки), за млодята на винчаню, за хорого, за покойного на хованю..., пошвецує паску, (єдзенє на Пасху), обисца, воду, поля (Дзуря кед ше пошвеца жито). Церква оддалює од людзох и стварох силу диявола. При благословох и пошвецаньох священїк у мено Церкви модлї и вше прави знак крижа, бо шицка моц благослова и моц над дияволом приходзи од крижа Христового. Дакеди при тим людзох, або ствари кадзи, пирска зоз швецену воду, помазує... Так тоти благослови и пошвецаня подобни як Святи тайни. Прето их можеме волац „мали святи тайни”. Од Святих тайнох ше розликую по тим же тоти благослови и пошвецаня установела Церква, а Святи тайни Исус. „Мали святи тайни” маю моц зоз молитвох Церкви, а Святим тайном моц дал Исус Христос. Як цо Исус вшадзи, кадзи преходзел, творел добре, так и Церква модлї за душевни и тїлесни потреби людзох. Єй молитву Бог вислуха. Так нам Церква помага побожно и по християнски жиц и хасновац ствари на славу Божу и нашо спашенє. Даєдни пошвецени ствари вше треба мац у обисцу: швецену воду, багнїтку, пацерки, розпяце, образи.
НАЙЛЄПШИ СТВАРИ Сиґурно знаце, а кед дахто призабул, най ше здогаднє хтори ствари у живоце найлєпши, а безплатни и барз мили. То: ОШМИХИ ПРИЯТЕЛЄ ПОЦИЛУНКИ СНИ ФАМЕЛИЯ ЛЮБОВ РАДОСЦ КРАСНИ ПАМЯТКИ
ЮЛИЯН КАМЕНЇЦКИ
ЇЖ Їж игласти дзешка дриме, дриме влєце, дриме вжиме. Пайташе го доволую же уж ярнї витри дую.
ЯКИМ ОЛЕЯР
НОВИ ПИСНЬОЧКИ Ноц ше спущела, мешачок плїва, а у травички цверчок ше скрива. Кед мешац зайдзе за єдну хмарочку, цверчок почина нову писньочку. Кельо єст на нєбе лєтаци хмарочки, тельо зна цверчок нови писньочки.
ЯНКО РАЦ
НЄ ШИЦКО СЦЕ ВИРОСНУЦ
Я
р. Вонка цепло, древка ше починаю будзиц, а людзе у заградкох и заградох копу и садза желєняву. У оводох як у кошнїци. Бриня дзецински гласи, а вец их на хвильку претаргує нїжни учительков глас: ‒ Дзеци, уж настала яр и шицко ше будзи зоз жимского сна. Зоз цеплих крайох прилєцели ґовлї и ластовки, ожелєнєли древа и шицко цо вашо родичи посадза, нєодлуга почнє сходзиц и роснуц... Учительки ше нараз привидзело же Наталка нє провадзи єй викладанє. Подумала у себе же дзивчатку можебуц треба висц вонка. ‒ Ти, Наталко, дацо сцела повесц, або ше опитац? ‒ Модлїм, гей, учителько. Ви гварели же шицко цо ше посадзи, та нєодлуга почнє сходзиц и роснуц. А як же вецка мнє нє зишла мамова годзинка, а посадзела сом ю ище прешлей яри? ЗЛАТКА ЧИЗМАР
ЮЛКА Юлка бабка моя. Два єй варґочики мама завязала. Кед ше зоз ню я побавиц сцем, вше би ше чесала. Юлко, бабко моя, варґочи ци крашнє стоя. Розвязац их и чесац сцела бим пробовац алє ше ручки боя, бо варґочи – краса твоя.
КВИЗ ЗА НАЙМЛАДШИХ
У МАРЦУ
У природи 1. Почина яр 2. Зреє слунечнїк 3. Закончує ше єшень
Славиме: 1. Дзецински тидзень 2. Ноц музейох 3. Дзень мацерох
Бавиме ше: 1. У винїци 2. У курнїку 3. У парку и на пажици
У обисцу: 1. Рихтаме новорочни пакецики 2. Садзиме квеце и желєняву 3. Кладземе жимнїцу
Заокруж точни одвити и зоз стрелку их повяж зоз одвитуюцима илустрациями.
Владимир Сабадош, 6,5 роки Дюрдьов
Заря Ковач, 6 роки Руски Керестур
Славиша Свирчев, 6 роки Руски Керестур
Кристина Рамач, 6 роки Руски Керестур
Катарина Варґа, 4,5 роки Вербас
ЖИМА ЖИМСКА РАДОСЦ Шнїг нападал, дзеци ше санкаю, квича и шпиваю, по шнїгу ше валяю. Дїда Шнїжнїка правя, вец ше оруцую. Шицки нашмеяни, бо ше барз радую.
Сцигла жима, санки порихтайце. Цепли якни, рукавици такой облєкайце. Шнїжнїка справиме, калап му здзеєме, а вец ше шицки оруцовац будземе. Тони Орос, IV Руски Керестур
Яна Сивч, IV Руски Керестур
КРАСОТИ МОЙОГО ВАЛАЛА Мой валал Дюрдьов. Нє вельки є, алє є красни. Находзи ше у Войводини, у Бачкей. Познати є по смачних ґереґох, а скорей бул познати по гращку. Окружени є зоз ровнима полями хтори людзе обрабяю и чуваю. У Дюрдьове ше находза штири крашнє ушорени парки. У першей часци ше находзи дзецински парк дзе єст вельо справи на хторих ше дзеци бавя. У другим парку студня на котрей людзе можу брац чисту воду за пице. У трецим парку маме православну церкву, а дакус далєй и грекокатолїцка церква. Наша школа „Йован Йованович Змай” находзи ше у штвартим парку. Барз є ушорена, ма вельо секциї за школярох и спортски активносци. Попри основней школи, у валалє маме и оводу и обданїще. Ту и велька Задруґа, а маме и два ресторани, од хторих єден Етно ресторан, а други Пицерия Трле. Окрем вшелїяких пицох, там єст и вельо смачни єдла. Валал ма и Дом здравя, а нєдавно отворена и квецарня Луна Лу у котрей єст вшелїякого квеца, а коло нього и рижни древка хтори нє рошню у наших крайох, як цо мандарини, лимуни и киви. Людзе у Дюрдьове ше найвецей занїмаю з польопривреду и статкарством. Шицки писмени и маю роботу. Каждей соботи у центру ше отримує пияц, дзе людзе предаваю свойо продукти и робу. Гоч є нє вельки, мой валал вше красни, та го вше будзем любиц. Арсен Станкович, V Дюрдьов
Яков Фурман, II, Беч
НАУЧЕНА ЛЕКЦИЯ Було то у штвартей класи, на початку другого полроча. Мали зме контролни задаток о даяких подїйох у прешлосци. Я ше нїч нє учел. Пришол сом до школи и шеднул до лавки. Учителька нам дала контролни задаток и нїч сом нє знал. Уж сом знал же достанєм слабу оцену и же ме дома буду гандровац. Поробел сом два задатки точно, а було их дзешец. Пришол тот дзень кед нам учителька врацала контролни задаток. Мал сом два од дзешец бодох и достал сом єдинку. Найгорше сом поробел тот контролни задаток. Пришол сом дому и роздумовал чи най вообще повем родичом же сом достал єдинку, алє мушел сом им повесц, бо би кеди-теди дознали за тото. Кед сом им гварел, барз ше зачудовали и нагнївали, та ми вжали телефон аж на єден мешац. Цали тот мешац сом мушел дома помивац. Тот период ми бул найгорши у живоце. Чувствовал сом ше глупо, бо ше нє требало вельо учиц, лєм ше мнє нє сцело. На концу сом виправел тоту єдинку и достал сом петицу. Иван Планчак, VI Руски Керестур
ЖИМА Мойо санки порихтани и корчолї з пойда зняти, лєм поглєдац ище мушим свойо жимски шмати. Мой ми тато так обецал же вон санки будзе цагац, лєм кнїжочку з оценами будзем мушиц я указац. Ксения Катрина, IV Руски Керестур
Алекса Влахович, I, Вербас
ГРОЖЕЛА МИ ОПАСНОСЦ Бул сом сам у загради и оберал сом малини. Наоберал сом даскельо кантички и вец мац направела торту. Пошол сом ище наоберац за вечеру. Отаргнул сом даскельо малини, кед одразу вискочел вельки страшни пес и сцел ме укушиц. Бежал сом кельо сом могол. Дошол сом по капурку и завар сом ю. Мац була у дворе. Кармела кури. Чула же ше надзерам и завязала капурку зоз манилу, та поволала сушеду най придзе по пса. Сушеда пришла и одведла пса дому. Бул сом прещешлїви же ме пес нє укушел. Алє, мац нє заварла дзверка од курнїка, та кури вишли. Одразу вилєтнул когут и почал ме оганяц. Почал сом сцекац до преднього двора, а мац пошла до коморки и принєсла даралов. Кури почали джубац даралов и когут ме престал оганяц. Мац живину заварла до курнїка, а я бул у преднїм дворе престрашени. Гварел сом: „Тот когут на нєдзелю закончи у гарчку”. Мац ми гварела: „Нє бой ше, сину, тот когут лєм бранї свою територию”. Так мнє у єдним дню грожели аж два опасносци. Андрей Рац, VI, Руски Керестур
ЯК ШЕ ЛЮБИМ БАВИЦ Я мам пса Цукия. Зоз нїм ше часто бавим. Бавиме ше так же му я руцим конарчок, а вон одбегнє по ньго. Вец му гварим: „Дай!”, а вон ище вше бега з тим конарчком по цалим дворе, а я го оганям и пробуєм му го даяк вжац и знова руциц... Интересантне ми учиц го, виводзиц з нїм даяки нови дресури. Кед вонка цепло, на дворе го купам зоз його шампоном за пси. Окрем зоз Цукийом, бавим ше и зоз пайташками и пайташами. Найчастейше ше бавим зоз сушедом и пайташом Урошом. Ми двойо любиме бавиц кошарку у ньго на дворе. Кед нам допиє, приходзиме до мнє бавиц ше у моєй хижки на дворе, хтору ми дїдо направел. У нєй ми стоя бависка, та ше з нїма вше даяк иншак бавиме. Вонка на тераси любиме бавиц шах. Вечар, кед єст вельо дзеци на драже, бавиме ше на джмурки. Часто ше шицки бавиме зоз леґо коцками у моєй хижки. Бавиме ше и зоз велькима коцками зоз хторих правиме фарму. Любиме опатрац и енциклопедию. Дакеди нука бавиме бависка на компютеру. Дараз моя пайташка Дуня придзе до мнє, або я до нєй, та ше вєдно бавиме зоз бабками. У нєй ше любим бавиц зоз єй мачатком. Часто, кед придзе Дуня, Андєла и Урош, рисуєме зоз крейдами по бетону. Окрем зоз дзецми, любим ше бавиц и зоз псом Фифийом и зоз мачками Ґарфилдом и Шаренку. Бавим ше зоз нїма так же вежнєм павурово пирє и тримам на жеми, а Ґарфилд або Шаренка положи свойо лаби на павурово пирє и розширя пазури, а я вец цагам пирє. Дакеди ше и сама бавим зоз штранджґом за прескакованє, або руцам лабду до мура. Лабда ше враци, а я ю знова руцам вше швидше. Любим и боса бегац по дворе и руцац лабду до капури, а любим ше и сама бавиц на компютеру. Любела бим занавше остац дзецко. Елеонора Винаї, V, Дюрдьов
ПРИХОДЗИ ЯР Яр пахняца уж приходзи, шицки людзе ше радую. А дзеци и птички весело пошпивую. Зобудзело ше слунечко цепле и прекрасне. Селїдбенїци приходза, а шиви хмари одходза. А я? И я ше радуєм! Тамара Салонтаї, IV Коцур
ПРИВИТ ЯРИ Яр уж приходзи, жима нам одходзи. Птички весели з югу ше врацели. Дзеци ше радую, гомбалки пририхтую. Весело шпиваю, так яр витаю. Катарина Штефанко, IV Коцур
ПАХУЛЬКИ Пахульки лєтаю, з нєба падаю. Мили, били пахульки, нїжно сце лєтали, найкрасши дзень нєшка сце нам дали. Пахульки били, вше сце нам мили. Лєм длуго падайце, дзецом радосц дайце.
Патрик Варґа, IV Руски Керестур Мартин Рац, IV, Руски Керестур
ШНЇЄМ О...
Доротея Проданович, I, Вербас
Тей ноци шнїєм дацо иншаке од других снох цо сом скорей шнїла. Кед станєм, такой ми ше є. Шнїєм о нашим валалє, же є направени зоз лакоткох. Так випатра як кед би бул у даяким рисованим филму. Нєбо целове, а хмари цукрово волни. Вода як сок зоз даяких овоцох, та би падал сочни диждж зоз хмарох. Шицки людзе цо вонка, сцели би же би им сочни диждж капкал на язики. Древом стебла випатраю як чоколади, а лїсца вшелїякей фарби квашних бомбонох. Хижи вибудовани зоз кексох. Людзе кед виду вонка, дакеди поєдза даскельо лакотки хтори були на їх хижох. Тоти хижи мали на себе и чоколади на закрицу, а комин корнет за сладоляд. Кед ше натопи до пеца, видзе шлаґ зоз того корнета и випатра ми барз смачнє. На мурох маю вшелїяки бомбони: квашни, сладки, округли, коцкасти... Лїзалки у заградох рошню, а глїна цукер. Наш валал випатра барз чаривно кед є зоз лакоткох. Цали бим го поєдла. Лана Штранґар, VI, Руски Керестур
ДЗЕНЬ МАЦЕРИНСКОГО ЯЗИКА Вшадзи ше 21. фебруар означує як Дзень мацеринского язика. Гоч и влонї и того року велї програми, друженя, манифестациї и други дзецом весели подїї, пре епидемиолоґийну ситуацию нє отримани, або су отримани у скромнєйших условийох, учительки и наставнїци ше потрудзели по єдну школску годзину своїм школяром пошвециц теми мацеринского язика. Вшадзи бешедованє яке важне перше научиц свой мацерински (мацеров и оцов) язик, а вец ученє каждого другого язика будзе вельо лєгчейше.
Школяре першей класи у Руским Керестуре
МОЙО МЕСТО НА ЄДНИМ МЕСЦЕ Школяре руского оддзелєня другей класи у ОШ „Йован Йованович Змай” у Дюрдьове були уключени до проєкту на тему „Мойо место на єдним месце”. Зоз паперу правели значнєйши обєкти у валалє, а потим шицко зложели як макету родимого валалу.
МАЦЕРОМ ЗА 8. МАРЕЦ Школяре руского оддзелєня трецей класи у ОШ „Братство єдинство” Коцуре на єдней школскей годзини рисовали свойо мацери, а потим правели и винчованки за їх дзень – Дзень женох, та ше похвалєли зоз роботами зоз хторима обрадую наймилши особи.
ДЗЕНЬ ЗАЛЮБЕНИХ Дараз ше на Дзень залюбених у школох орґанизовало и маскенбали, квизи и други забавни бависка, а гоч того року нє було так, дзецом у рускокерестурскей школи нє завадзало означиц тот дзень так як могли. Рисовали шерца и други красни ствари, та им дзень бул весели, а озда ше и позалюбйовали, або себе голєм понаходзели симпатиї.
ВИТАНЄ ЯРИ Школяре першей класи у Руским Керестуре, так як и шицки дзеци, а и старши, барз чекаю праву яр. Вихасновали єден цепли дзень и вишли до школского двора зоз обручами за бавенє та ше цалу годзину физичней култури викруцали, радовали ше, квичали, и так яр витали.
ЛЇШКОВО ЦИНЇ
Найдз и повяж одвитуюци цинї зоз рисунками лїшкох.
Автор Нела Таталович
ЛАВИРИНТ
Одведз того космонавта по лавиринту аж на Марс.
ПРЕРИСУЙ
Прерисуй лїви рисунок до одвитуюцого поля на право, а потим шицко офарб.
ПОЗДАВАЙ ЧИСЛА
Поздавай задати числа, та зоз фарбу хтору означує збир, офарб задати поля.
Автор Нела Таталович
МИЛА МАМА За марцовске число до Редакциї сцигли 174 роботи зоз даскелїх оводох и школох. Руски Керестур: Николина Олеяр, София Чуни, Ема Венґрин, Ника Дудаш, Катарина Дудаш, Теа Сабадош, София Сеґеди, Ален Бики, Стефан Ковачевич, Мартин Пашо, Теодор Гарвильчак, Стефан Арва, Лео Йованович, Леон Колошняї, Тони Колошняї (II); Силвия Папуґа, Мая Надь, Луция Бульчик, Яна Сивч, Ксения Катрина, Валентина (В) Харди, Тони Орос, Марко Драґутинович, Мартин Рац, Патрик Варґа, Тадей Виславски (IV); Лана Штранґар, Иван Планчак, Андрей Рац (VI). Вєдно 66 роботи. Вербас: Аня Аритонович, Катарина Варґа (овода); Марта Маркович, Маґдалена Скубан, Милена Корпак, Матеа Ґшвенґ, Мирза Курбеґович, Доротеа Проданович, Алекса Влахович, Иван Мелник, Павле Шашороґа (I); Даниел Фа, Иґнят Сабадош (II); Сара Сеґеди, Уна Аритонович, Надя Ґшвенґ, Чарна Скубан, Лука Стоїлькович, Виктор Будински, Серґей Такач, Данило Молнар, Лука Молнар, Милан Корпак (III); Николина Кошарко, Бояна Сабадош, Михайло Чизмар (IV); Маґдалена Будимски, Уна Рашич, Шарлота Стоїлькович, Оґнєн Сабадош (VI). Вєдно 43 роботи. Коцур: Яна Тимко, Надя Буїла, Хана Хромиш, Виктор Кулич, Матей Сакач, Мирослав Бесерминї (I); Даниєла Ґайдош, Надя Ґайдош, Рамона Будински, Николина Маґоч, (II); Юлияна Бесерминї, Емилия Уйфалуши, Павле Тимко, Михаел Дротар (III); Катарина Штефанко, Мария Сакач, Тамара Салонтаї, Матия Макша, Дарко Колєсар (IV). Вєдно 36 роботи. Дюрдьов: Владимир Сабадош (овода); Мария Рамач, Валентина Пушкаш, Марко Станкович, Андрей Балїнт, Владимир Молнар, Марко Бастая, Стефан Михальовски (II) послали 29 роботи.
Михаел Дротар, III, Коцур
Моя мама мила, добра, красна, щешлїва. Кед ме рано будзи, як слунечко ме огрива. Зоз свою доброту вше є на помоци. Любов ми дарує и вше о мнє роздумує. Кед придзем зоз школи, вона ше ми вше зрадує. Надя Ґайдош, II Коцур
МОЄЙ МАМИ Любим це, мамо, найбаржей на швеце, прето же ти мойо у заградки найкрасше квеце. Дзень ми зоз тобу почина кед ме будзиш кажде ранечко. Любов твоя моцна и цепла як на нєбе швицаце слунечко. Рамона Будински, II Коцур
Тадей Виславски, IV, Руски Керестур
НАЙВЕКША СЛУНКОВА ГОДЗИНА Точно на поладнє, на ярню ровнодньовицу, слункова шветлосц як ласерски сноп преходзи през отвор на самим верху куполи и ошвицує зданиє. Можебуц сце и були на тим месце, а нє знали сце о тим. У питаню познати Пантеон у Риме, вибудовани под час цара Гадрияна. Пантеон єден з найпознатших зданийох старого Риму, 2000 роки старе свидоцтво нєвимераней моци и богатства империї. Пробуюци одкриц тайну Пантеону нєдавно фаховци дошли до барз интриґантней теориї: храм збудовани по принципе слунковей годзини. Знак слунковей шветлосци ошвицовал колосалну капуру у хвильки владарового уходу до будинку. Пантеон сиґурно єден з найлєпших прикладох античного будовательства и найочуванши памятнїк античного Риму. Вибудовани є 126. року новей ери. Познати є и як Храм шицких богох – богох прешлосци, терашньосци и богох будучносци. Микеландєло го пред 500 роками преглашел за „баржей дїло ангелох як чловековей руки”.
СИБИРСКИ ЄДНОРОГ Сибирски єднорог, животиня чежка од 3,5 по 8 тони, вимарла пред 36.000–39.000 роками. Потераз ше верело же вимарли скорей и же нє були сучаснїки Неандерталцох и перших модерних людзох. Жили у Русиї, Монґолиї, Казахстану и на сиверу нєшкайшого Китаю. Були рошлїноєди, зоз барз зуженим вибором єдзеня, та лядови период онєможлївел їх обстоянє. Пре климатски пременки хтори потрафели траву и други рошлїни зоз хторима ше кармели, тоти огромни животинї вимарли. Здружени зоз метеровим рогом тот єднорог ше чежко знаходзел, а нє могол прилапиц иншаке костиранє. Нїзка популация и спомалшени темпо репродукциї здружени зоз огромну тїлесну масу ишли ґу вимераню. Виглєдованя указали же сибирски єднорог, односно носорог вельо дальша родзина нєшкайшого носорога. Предпоставя ше же ше їх предки оддвоєли пред коло 40.000 роками. Нєшка постоя пейц файти носорогох, а мале число жиє звонка националних паркох и резерватох.
РАДИО ПЕРШЕ БУЛ СТРАШНИ Як пред першу швидку локомотиву биоскопски патраче врещали и сцекали зоз сали, так и слухаче, после радио-вистки о инвазиї Марсовцох на планету Жем позлєкани сцекали зоз своїх обисцох. Року 1958. театер „Меркюри”, под управу Орсона Велса емитовал радио-продукцию „Война шветох” зоз лєгку музику, а претаргована є зоз вистами о зиходзеню Марсовцох на тло ЗАД, тиж познату панїку хтора отримовала ефикасносц радия як найшвидшого медия за комуникацию двацетих рокох прешлого вику. Року 1922, кед у Велькей Британиї уведзени радио-емисиї, було лєм 36.000 предплатнїкох. На териториї бувших югославянских републикох емитованє програми на радию почало перше у Заґребе 15. мая 1926. року, а о пол рока и у Любляни. Радио-Беоґрад програму почал емитовац 24. марца 1929. року. Пририхтала Р. Ґ. П.
Матеа Ґшвенґ, I, Вербас
Луция Бульчик, IV, Руски Керестур
Виктор Кулич, I, Коцур
Дарко Колєсар, IV, Коцур
Мая Надь, IV, Руски Керестур