Diasabra februari 21 2026

DEN CASO DI AYDEN LANOY, POLIS

A DECLARA CU EL A HAYA BLACKOUT

Noticia di Corte

Hues cu preguntanan critico riba polisnan cu a tira mata ayden lanoy

ORANJESTAD – Awe henter mainta den sala di Corte di Husticia, a trata e caso penal cu Ministerio Publico a cuminsa contra e dos agentenan di Polis M.V.(38) y R.G.D.(29). A usa 2 sala pa asina tur hende por a presencia tratamento di e caso. Den e sala caminda e caso a wordo trata, tabata e famianan di e victima q.e.p.d. Ayden C.J. Lanoy, den e di dos piso tabata mas bien agentenan di Polis y por a mira tambe Comisario di Polis presente. Den un otro sala di Corte, via video, hendenan por a sigui e caso.

SOLO DI PUEBLO por a compronde cu den sala di Corte, varios miembro di famia di e victima tabata bisti cu flanel preto y dilanti di e flanel tin potret di Ayden y den lomba ta skirbi: “Justice for my son Ayden C.J. Lanoy”.

PERSECUSION A CABA DEN TIRA MATA AYEDEN

E acusacion cu Fiscal a presenta contra M.V. y R.G.D. ta cu nan ta complice di a mata Ayden C. J. Lanoy riba 9 Februari 2025 door di intencionalmente a tira riba e auto den cual Ayden tabata. Subsidiario, Fiscal ta acusa nan di complice di intento di mata y mas subsidiario complice di intento herida severo.

Hues a haci preguntanan critico na e agentenan M.V. y G.R.D. Hues a mustra cu riba e anochi di 8 pa 9 Februari 2025 cu e incidente a sosode, tabatin problema na Calibra, asalto na San Nicolas y problema na hospital. Central di Polis a manda e patruya di M.V. y G.R.D. na Lekker Bar pa mira si tur cos tabata bayendo bon. Na retonde Palm Beach M.V. y G.R.D. a mira e Toyota cu Lanoy tabata core sin luz di patras. M.V. tabata core e patruya y a dicidi di core su tras. Despues di retonde Super Food e auto a bira na man drechi pero diripiente a bira man robez bay direccion Bubali. E patruya tabatin luznan sendi y sirena y tabata papia via microphone pa para e auto. R.G.D. a bisa Hues cu el a mira tambe e auto y a bisa via

microphone pa para na banda. El a kere cu e chofer lo tabata bou influencia. Hues a bisa cu investigacion ta mustra cu ta un luz patras so no tabata traha. Hues a bisa cu e sistema di usa luz y alarma por laga un chofer kere cu e mester hala un banda pa laga Polis pasa.

NO TABATA CORE DURO

Tabatin un persecusion y M.V. a bisa cu e mester a subi velocidad. R.G.D. a bisa cu for di un retonde pa e otro, Lanoy a subi velocidad. Hues a bisa cu investigacion ta mustra cu e auto no tabata core mas cu 80 km., o sea no tabata core cu velocidad halto.

PAKICO A SACA ARMA?

E persecusion a sigui te Madiki Kavel. Tabata 5.10 di mainta y Central di Polis a bisa e patruya cu si e seguridad ta den peliger pa stop e persecusion. Hues a puntra M.V. y R.G.D., pakico nan a persigui e auto. M.V. a bisa cu e hecho cu e chofer no kier a stop y e forma di core, el a pensa cu ta sospechoso. Hues a bisa cu tras di cas 136 den Madiki a yega na un caminda sin salida. M.V. a bisa cu a blokia e caminda y el a mira un homber ta move den e auto. El a baha for di patruya y a mira cu e auto tabata bay den su direccion. El a tuma posecion di tira. Hues a sigui cu R.G.D. kende a bisa cu el a baha hunto cu M.V. y e tambe a saca arma. El a bisa cu e auto a hala atras y a subi velocidad y bay riba M.V. Hues a puntra pakico a saca arma. El a remarca cu por a hala un banda y nan bida no tabata na peliger.

NO POR A USA OTRO ALTERNATIVA ?

Segun R.G.D., e momento ey e tabata considera e auto como un arma. Hues a puntra cu no por tabatin otro alternativa pa actua? Pakico no a bolbe subi patruya y sigui persigui e auto. Segun R.G.D. el a mira M.V. y e ta haya cu no tabatin oportunidad pa esey. Pesey el a saca su arma. Hues a remarca cu tin reglanan stipula ki ora Polis por saca arma y mester ta cauteloso ora ta tira riba un auto. Hues a puntra e agentenan cu si mira bek riba e caso, lo no tabata mas mihor

pa a warda den patruya y mira kico e chofer ta haci? M.V. a bisa cu ora el a mira cu e auto no por a core bay, el a pensa cu e chofer lo baha y core bay na pia. Pesey el a baha for di patruya. E no sa ki momento exacto el a saca arma. Segun M.V. ora el a mira e auto a cuminsa move, el a sinti esey un menaza y a saca arma. Hues a remarca cu M.V. tabata envolvi den otro caso di tiramento y e sa cu e no mester saca arma sin mas. Segun M.V., tur cos a pasa asina liher y e no a pensa. R.G.D. tambe a bisa Hues cu tur cos a pasa asina liher y e no a pensa. R.G.D. a bisa Hues cu el a mira e auto ta bay den direccion di M.V.

A LOS 20 TIRO RIBA E AUTO

Hues a mustra cu M.V. a tira 3 biaha y R.G.D. a tira 17 biaha riba e auto. Hues a puntra M.V. riba kico el a tira y kico tabata su intension. M.V. a bisa cu el a tira riba e capa di motor pasobra e ta considera esaki un menaza contra su bida. Hues a puntra con M.V. ta mira cu M.V. a declara na Landsrecherche cu si e tira riba e capa di motor, e lo elimina e peliger. Hues a puntr’e si su intension tabata pa elimina Lanoy. M.W. a bisa cu no. Hues a remarca cu si mira bon, tira asina lo no para e auto. Hues a bisa cu Polis tambe ta hende y den casonan di tension, ta di spera cu como Polis lo mester reacciona mas trankil y no ta bay den panico.

Hues a puntra R.G.D., pakico el a tira 17 biaha. Segun R.G.D., el a mira e auto ta bay cu velocidad y a scucha un tiro. Hues a bisa cu ta M.V. a tira. Segun R.G.D. e no tabata sa cu M.V. a saca arma. Segun R.G.D. den banda di su wowo el a mira M.V. y no a paga tino si M.V. a saca arma. Segun R.G.D., el a kere cu ta for di e auto a tira. Hues a bisa cu R.G.D. a declara na Lands Recherche cu el a haya un black out y ta te ora e balanan a caba, el a stop di tira.

Dialuna awor, 23 Febuari 2026 lo sigui cu tratamento di e caso.

EVELYN WEVER-CROES DURANTE IPKO:

“NOS MES POR”

Aruba por maneha su finansas SIN rijkswet HOFA

ORANJESTAD -

Durante reunionnan interparlamentario cu a tuma luga na Aruba, Fraccion di MEP a duna statement hopi fuerte dilanti e parlamentarionan Hulandes: NOS MES POR.

Lider di Fraccion Evelyn Wever-Croes den su presentacion durante reunion a cuminsa cu duna un splicacion con e situacion financiero di pais Aruba ta actualmente, den un palabra BON. “E anja aki nos tin un surplus di 2.6% di GDP, y den 2 anja nos lo yega e meta di nivel di debe den percentahe di GDP, 47%. E target ta 50%. Esnan cu conoce e historia

financiero di pais Aruba, sa cu esaki ta un logro grandi, mirando cu na 2015 e gobierno e tempo ey a redobla e debe, y awe nos ta bahe te hasta bou di e target. Cu esey mi kier bisa cu nos mes a haci’e”.

Lider di fraccion di MEP Wever-Croes a sigui bisa cu Aruba riba propio forsa, cu e vision di e gobierno di Aruba y cu e marco di supervision existente, a logra esaki. Sin e ley di reino.

“Pesey mi ta di opinion cu e ley di Reino no ta ni necesario. Sin a papia mes di e hecho cu e concepto ley di reino HOFA cu awor ta riba mesa ta contra nos

Constitucion, ta contra pabracionnan hasi den IPPKO di 2022 y 2025, y ta contra e acuerdo haci entre Aruba y Hulanda na 2024. Ademas, e concepto di ley di Reino no ta conta cu mayoria den Parlamento, ni den comunidad”.

Na e momento aki Aruba ya caba a paga dos anja e interes halto “boete rente” di 6.9% na Hulanda. Evelyn WeverCroes tabata critico riba esaki. “Aruba ta pagando Hulanda 6.9% interes, y nos a paga dos anja caba. Curacao y Sint Maarten ta paga 3.4% interes. Pues

Hulanda ta gana riba nos 3.5% di interes, no pasobra Aruba ta un riesgo halto, of pasobra Aruba no por atende cu su finansas. Contrario, Aruba ta cumpliendo cu tur norma. Ta djies pasobra Hulanda ta persisti cu mester ta den bachi di rijkswet, y Aruba no kier bay di acuerdo cu esey, Hulanda ta gana 3.5% riba lomba di Aruba. Si Hulanda di berdad kier yuda Aruba, e ta baha e interes, sin exigi pa nos cambia e sistema di supervision den un ley di reino, cu no ta bon pa Aruba”

Na final lider di Fraccion a puntra director di finansas, cu tabata presente den e reunion, pa splica dicon Hulanda ta sigui persisti riba e bachi di ley di reino, apesar cu Aruba a pone tur cos financieramente na ordo. Riba e pregunta aki no tin contesta. “Mi ta convenci cu Aruba, tambe e gobierno aki, lo sigui cu e mesun curso financiero cu nos gobierno a stipula. Nos ta kere den supervision, hasta mas moderno, pero no den un ley di reino”, tabata palabranan di lider di fraccion Evelyn Wever-Croes.

Noticia di Corte Mayornan di ayden Lanoy

a expresa den Corte

Dos Polis ta mata mi yiu sin a dun’e chens di entrega su mes

ORANJESTAD – Awe mainta, durante tratamento di e caso penal contra e agentenan

M.V. y R.G.D., e mayornan y e pareha di Ayden Lanoy, a expresa nan mes den Corte.

SOLO DI PUEBLO por a compronde cu den sala di Corte famia tabata hopi emocional ora e mayornan di Ayden Lanoy a expresa nan mes.

MATA MI YIU SIN DUN’E CHENS PA ENTREGA SU MES

E mama di Lanoy hopi emocional a hiba palabra. El a bisa Hues cu hopi dolor como mama ta expresa su descontento con e Polisnan a actua asina contra su yiu. E mama, hopi emociona di dolor y rabia, a bisa cu e dos Polisnan a mata su yiu. E mama a haci peticion na Hues pa investiga kico a sosode.

E mama a reclama, “pakico no a duna mi yiu chens di entrega su mes”. E mama a bisa cu e Polisnan no conoce Ayden. Hopi emociona

e mama a expresa: “Nan a nenga Ayden su derecho di bida”. “Cualkier sentencia cu Hues duna, no ta cambia e dolor cu mi tin”. “E Polisnan no a duna ningun oportunidad di bida na mi yiu”.

E mama a bisa cu Ayden no tin ningun problema cu husticia. Tur cu conoce Ayden, conoc’e como un hende alegre y sin razon e Polisnan a kita su bida.

E mama a bisa: “con Hues por supone cu mi tin cu biba cu dos individuo cu a mata mi!” yiu y bisa cu nan tabata haci su trabao!” E mama a bisa cu e sa cu Hues kier trece claridad den e caso. E mama a cuestiona cu: “Polis cu mester percura pa seguridad y orden a trece luto pa mi”.

PAREHA DI AYDEN A PAPIA

E pareha di Ayden a bisa cu e incidente a cambia su bida totalmente. Emocional e pareha

di Ayden a bisa cu e ta keda anochinan sin drumi. El a sigui bisa cu e ta mira su yiu di 7 luna ta buscando su tata. Con e por splica su yiu cu Polis cu mester cuida hende, a mata su tata. E pareha a bisa cu ta hopi dificil biba sin Eyden.

Tabata hopi emocional den sala di Corte. Hopi hende tabata yora. Miembro di CEA tabata parti tissue pa tur cu tabata yora.

PAKICO A TIRA ASINA HOPI RIBA MI YIU

E tata di Ayden, hopi rabia a puntra e dos Polisnan, pakico a tira asina hopi riba su yiu. El a puntra si nan tabata bou influencia di alcohol of otro substancia. E tata a expresa cu si tabata un arma cu tabatin mas bala, lo a tira mas bala. El a remarca tambe cu si tabatin mas hende den e auto, lo tabatin un masacre. Miembro di CEA tabata parti tissue pa tur cu tabata yora.

Dialuna awor 23 Februari 2026 lo sigui cu tratamento di e caso.

aunke no ta haya e Manta den nos awa teritoriaL, e ta proteha pa nos Leynan LoCaL

ORANJESTAD – Directie Natuur en Milieu DNM) ta informa tocante e especie protegi Manta. E manta yama na Ingles Giant Manta Ray (Mobufa birostris) ta haya su nomber gigante como cu e ta esun di mas grandi di e mantanan di mundo. E por midi te cu 8 meter cu su halanan habri y por pisa rond di 2000 kilo. E embranan ta poco mas grandi cu e machonan. E manta aki por biaha te na un maximo velocidad di 40 kilometer pa ora. E manta gigantesco aki ta animalnan migrante cu ta crece poco poco. E

manta su repoduccion ta sosode cada 2 pa 3 aña y e ta haya un yiu bibo. E yiu ta nace despues di 12 luna y ta midi 1 meter y mey. Nan por biba mas of menos 45 aña.

Por reconoce e manta pa nan curpa grandi den forma di diamante cu halanan largo cada banda. Tin dos variacion di color di curpa, preto cu bariga blanco of completamente preto. Nan wowonan ta cada banda di e cabes cu un boca grandi. Dilanti di nan boca nan tin dos structura yama ‘cephalic lobes’ na Ingles, cu ta

extende y ta yuda crea un canal pa awa pasa. Despues e ta filtra e cuminda prome cu e guli esaki. Nan ta alimenta nan mes door di filtracion via nan caicay (gills), nan ta come cantidad grandi di ‘zooplankton’ y tambe cabaron y otro piscanan chikito.

Rond mundo ta haya e manta gigante den ocean, awa tropical, subtropical y awa cu temperatura entre 19 pa 22°celsius, pero den otro parti tambe ta haya nan den awa cu temperatura entre 25 y 30°celsius. Nan menasa ta

PaPiamento, nos idioma, nos derecho!

Fundacion Lanta Papiamento na ocasion di Dia Internacional di Idioma Materno – 21 di februari 2026

ORANJESTAD, 20 di Februari 2026: Papiamento, idioma materno di sigur 80% di poblacion di Aruba y di dos idioma di tur otro, ta masha importante pa nos, manera tur idioma pa tur pueblo. Dicon?

Manera tur idioma

 e ta e medio mas importante pa comunicacion, conceptualisacion y expresion;

 e ta fuertemente relaciona cu historia di nos pueblo, nos cultura, nos bida social, nos manera di pensa y actua;

 e ta un aspecto importante di identidad di un persona, e ta e alma di un individuo, di un comunidad;

 e ta e idioma di integracion di habitante nobo na Aruba;

 y no lubida: e ta un creacion potente di mente humano.

Papiamento ta un idioma crioyo cu a desaroya pa motibo di colonialismo y sclavitud y cu, apesar di tur e obstruccionnan cu el a y ta topa riba su caminda, a consolida su luga den comunidad y awor tambe pocopoco ta haya su posicion den enseñansa.

Un efecto, impacto, consecuencia, resultado bibo te dia djawe di e colonialismo y sclavitud Hulandes ta e hecho cu ainda nos tin cu lucha pa nos idioma Papiamento haya reconocemento completo y cu ainda nos muchanan tin cu sigui un enseñansa cu no ta diseña pa nan.

Ainda despues di 163 aña di abolicion di sclavitud, despues di 70 aña di Statuut, despues di 40 aña di Status Aparte, despues di 23 aña cu Papiamento a haya un status oficial aki na Aruba, nos no ta caminda nos mester ta.

Nos a laga hopi oportunidad pa decolonisacion y emancipacion pasa, pa motibo cu nos no por los di e influencia di 500 aña di colonisacion cu a indoctrina nos di tal manera cu nos ta kere cu nos y nos cultura ta menos, subordina y primitivo. UNESCO, UNICEF, e innovadornan di enseñansa na Aruba y Corsou, e linguistanan, tambe diferente organisacionnan no-gubernamental (ONG) ta defende e ponencia cu idioma, tur idioma, tin un balor masha grandi pa e individuo y e pueblo pa kende e idioma concerni ta e idioma materno. Idioma nativo ta pertenece na e patrimonio cultural di su pueblo y mester ta proteha y uza den pueblo. Discriminacion basa riba idioma ta contra derecho humano, mescos cu discriminacion basa riba por

ehempel rasa, religion, sexo, edad, nacionalidad.

Constitucion di Aruba, Articulo 1.1. ta bisa: Tur persona cu ta biba na Aruba ta haya trato igual den circunstancia igual.

Discriminacion a base di religion, creencia, opinion politico, sexo, colo, idioma, origen nacional of social, asociacion na un minoria nacional, propiedad, nacemento of pa cualkier motibo, no ta permiti.

(Staatsregeling van Aruba: AB 1985, 26; geldende tekst AB 1987, GT 1.)

Kiermen, Aruba ta comete un crimen contra derecho humano y contra su propio constitucion cu e tipo di enseñansa cu nos tin. Ta discrimina e pueblo Arubiano masha pisa mes, pasobra e unico idioma cu no ta den enseñansa manera mester ta, ta su idioma materno y e idioma oficial di Aruba, Papiamento!

Esaki ta un crimen masha grandi mes. No lubida cu a introduci Hulandes netamente pa elimina Papiamento. E tempo aya ta e gobierno colonial a introduci e situacion anti-pedagogico ey, pero tristo ta cu awor ta nos mes gobiernonan y instancianan educacional ta mantene e situacion aki. Ta manera ta nenga tur investigacion y dato cientifico cu ta mustra cu e tipo di enseñansa aki no ta na fabor di nos pueblo. Ta manera cu ainda ta laga Hulanda dicidi pa nos con nos enseñansa mester ta. Ta berguensa nos tin pa lanta pa nos propio idioma, cargado y weso di lomba di nos identidad y cultura?

Otro prueba di e auto-discriminacion aki ta e propio ley di oficialisacion di idioma Papiamento cu ta bisa den articulo 6:

E idioma oficial cu ta permiti na Aruba como idioma di husticia, manera stipula den articulo 1 di ‘Wetboek van Strafvordering van Aruba (AB 1996 no.75) ta Hulandes.

E articulo aki ta den fuerte contradiccion cu nos constitucion.

Lamentablemente e ley di oficialicion di Papiamento no ta bisa nada di enseñansa.

FLP ta formula algun proposicion cu por yuda yega na un maneho di idioma cu ta exitoso:

 Gobierno mester carga su responsabilidad pa sostene un bon maneho di idioma cu ta na fabor di enseñansa y henter comunidad y percura pa continuidad den e maneho aki.

 Mester stablece urgentemente un Instituto Linguistico cu mester diseña maneho hunto cu DEA y cu ta traha riba cuido y desaroyo di Papiamento, teniendo cuenta cu tur e areanan di maneho di idioma.

 Departamento di Enseñansa Aruba (DEA) cu su expertonan riba tereno di enseñansa y di tur e materianan mester traha estrechamente cu e instituto linguistico y mester ta activo riba tereno di investigacion, desaroyo di material y control riba ehecucion di e maneho stipula.

 Instituto Pedagogico Arubano (IPA) mester percura activamente pa capacitacion y recapacitacion di maestro pa enseñansa primario y secundario, estrechamente den cooperaccion cu DEA y scolnan y e maestronan. Un idea ta pa traha riba e posibilidad pa prepara maestro di scol basico cu ta specialisa riba Papiamento, Hulandes y Aritmetica/Matematica. Un maestro general no ta di e tempo aki mas.

 Mester di un presupuesto cu ta alcansa pa tur loke mester. No por ta asina cu no tin placa pa cierto parti necesario, manera recapacitacion di maestro material di scol.

 E maestro mester tribi di ta critico y vocifera su ideanan, sigur ora algo no ta bay bon. Di berdad e maestro mester sinti su mes capacita pa ta un agente di cambio.

 Nos Sindicanto di Maestro, SIMAR, mester asumi su mision y boga pa un enseñansa Arubiano di calidad.

 Nos mester di un prensa bon prepara cu por aporta na un bon desaroyo y conocemento di Papiamento. Un bon curso obligatorio pa periodista no ta un exigencia exagera.

 Nos como pueblo mester siña kere den nos mes y sostene y proteha nos herencia y tribi di kibra cu e yugonan di sclavitud, colonialismo y post-colonialismo.

Noticia di Corte

Tin indicacion cu Ta un agenTe di Polis a Tira ayden lanoy maTa

ORANJESTAD – Awe mainta den sala di Corte, durante tratamento di e caso penal contra e agentenan di Polis, Hues a pasa e videonan cu tin di e tiramento na Madiki Kavel, caminda 2 Polis a los 20 tiro y a mata Ayden C.J. Lanoy.

SOLO DI PUEBLO por a compronde cu investigacionnan haci ta mustra cu ta un di e agentenan di Polis a tira mata Ayden Lanoy.

VIDEO DI TIRAMENTO PASA DEN CORTE

Hues a laga pasa video di e tiramento den sala di Corte. Promer Hues tabatin un reunion apart cu e mayornan di Ayden Lanoy, abogadonan di e agentenan y e agentenan. Despues Hues a sigui cu e caso caminda tur e publico tabata presente. Hues a bolbe pasa e video y a bisa cu riba e video ta mira e auto Toyota y e patruya ta yega na e caya cu ta caba na nada. E auto Toyota a bira y bay para casi pega cu auto di Polis cu a blokia e caminda. Despues e auto ta hala atras. Mientrastanto ta mira e dos Polisnan baha cu arma den man. M.V. tabata chofer y G.R.D. na banda. Hues a bisa cu loke ta notable ta cu mesora M.V. y G.R.D. a dirigi arma riba e auto. No tin sonido pasobra pero ta mira e tiramento. E momento di e promer tiro, ta un punto di discusion. Landsrecherche ta di opinion cu e promer tiro a cay ora e auto tabata bay atras,

mientras cu abogadonan di e Polisnan no ta di acuerdo cu esey. Hues a bisa cu por mira claramente cu M.V. y G.R.D. ta tira. M.V. tabata para dilanti di e auto y G.R.D. tabata na banda. G.R.D. a keda tira den banda y patras di e auto. Hues ta opinion cu e imagennan di e video di seguridad ta mustra cu e auto kier a core bay y no ataca e agentenan di Polis. Hues a bisa cu M.V., despues di a mira e video, a bisa cu e no ta cuadra cu manera el a experenci’e. G.R.D. si a bisa cu loke ta mira ta loke el a experencia. Hues a mustra cu riba e video por mira cu e auto ta kita na man drechi di e agente M.V. cu ta para dilanti di e auto mientras cu M.V. y G.R.D. tabata tira riba e auto. Despues di un rato e auto a para. Segun M.V, el a bula un banda y ora e tabata na suela el a mira cu e tire robez tabata den su direccion. G.R.D. a bisa cu el a mira cu e auto tabata bay riba M.V. Por a mira cu e auto a core bay poco poco y dal contra algo y stop. Hues a bisa cu Lanoy tabata drumi herida. A purba reanim’e pero el a fayece.

BALA A PERFORA UN ADER PRINCIPAL

Investigacion ta mustra cu un bala a alcanza Ayden Lanoy di robez pa drechi. E bala a performa un ader mayor di Ayden Lanoy y door di perdida di sanger el a fayece.

Hues a puntra M.V. kico e ta pensa di e caso. M.V. emocional a bisa cu e no por a pensa cu door di usa arma un persona a fayece. El a bisa cu tur dia e ta purba sobrepasa e pensamentonan. Hues a puntr’e si e kier bisa algo na e mayornan di Lanoy. El a bisa cu nunca e tabata kier a haci algo asina. G.R.D. a bisa cu e caso ta traha riba dje tur dia. Mas tanto ora di drumi. E ta lamenta loke a sosode. El a bisa cu como Polis bo tey pa yuda y no algo asina. Hues a puntr’e si e kier bisa algo na e mayornan. El a bisa cu e no por bisa nada cu lo por cambia loke a sosode.

UN AGENTE A TIRA AYDEN MATA

Hues a bisa cu e pregunta ta, kende a tira e tiro mortal. Hues a bisa cu e peña di G.R.D. tabata benta abao bashi. Investigacion tecnico ta mustra cu hopi impacto di balanan na banda robez di auto. E bala na banda robez di e porta a alcanza Ayden Lanoy mortal.

Segun Hues, tur cos ta mustra cu e tiro a sali for di G.R.D. M.V. a los 3 tiro y 1 tiro so a alcanza e auto dilanti. G.D.R. tabata na banda y a los 17 tiro y ta parce cu un di e tironan a alcanza Ayden Lanoy. Segun M.V., el a los un tiro riba capa di motor, un tiro ora e tabata abao. E no sa di tres tiro.

como PresidenTe di e comision di eleccion

Pa comiTe olimPico inTernacional

Nicole Hoevertsz ta anuncia miembronan nobo di e Comision di Atleta di IOC

Ayera durante un reunion na e “Olympic Winter Games Milano Cortina 2026”, Nicole Hoevertsz cu ta Secretaria General di Comite Olimpico Arubano (COA) y miembro di Comite Olimpico Internacional (IOC) a divulga e resultado di e eleccion pa candidatonan nobo pa e comision di atleta di IOC. Pa e eleccion aki, Nicole a keda escogi como presidente di e comision y a percura pa tur proceso cumpli cu e rekesitonan necesario

y ta cumpli cu e procedura di “compliance”. Despues di a splica e diferente procesonan cu a tuma luga y demas informacion importante, Nicole a duna di conoce e resultadonan final. Si ta desea di sa mas di e momento aki y ta desea di sa ken a gana, mira e video unda Nicole hiba palabra y ta nombra e ganadornan. #COA #ARUBA #IOC #TEAMARU

Candela grandi den Parke Curason

Jaburibari - Diahuebs anochi algo prome cu 8'or alarma a wordo bati na 911, pa un candela den Parke Curason na Jaburibari.

Algun minuut pasa di 8'or un truck di Brandweer a yega y a bay directamente unda e candela tawata visibel. Esaki tawata e caya

panort di r parke.

Pero, no por a yega debi cu e entrada eynan tawata cera cu candal y aparentemente e truck lo no tawata tin tools pa cort'e.

Mirando cu e candela a cuminsa expande rapidamente tanto polis

y brandweer a usa un entrada banda di pariba pa a drenta.

Brandweernan a cuminsa combati e candela di

mondi, cu a bira grandi den un tempo record y a pasa bay pafo banda panort.

E huma tawata causando hopi molester pa e casnan

mas tanto parti pabou.

No ta conoci kiko por a start e candela.

Salud Publico ta monitor activamente

Pa detecta caso di Sarampi of Chikungunya tempran

ORANJESTAD, Aruba – 20 februari 2026: Ta tarea di Departamento di Salud Publico di Aruba (DVG) pa continuamente monitorea e situacion regional encuanto malesa nan infeccioso cu por influencia salud di nos poblacion. Pa e motibo aki cu Salud Publico ta monitor activamente caso nan di Sarampi y Chikungunya cu ta creciendo den region.

Segun ultimo dato nan disponibel, den region di America (PAHO), tin un total di 1031 caso di sarampi registra, di cual mayoria ta den Mexico y Merca.

Pa loke ta trata Chikungunya, tin dos caso registra e aña aki na Aruba cu a wordo importa for di pais nan cu ta experenciando brote di Chikungunya. Segun ultimo dato nan disponibel di PAHO, den continente Americano tin un total di 2351 caso confirma di Chikungunya y 1 morto a causa di Chikungunya registra.

Pa Aruba por evita importacion di sarampi of transmision local di chikungunya ta importante y nesario pa no solamente organisacionan di salud traha hunto pa señala y detecta casonan potencial trempan, pero ta importante pa comunidad tambe ta bon informa y sa kico pa haci ora nan tin cierto sintomanan of ta pensa di a wordo exponi na un di e malesanan aki riba menciona.

Sarampi.

Ta un malesa altamente contagioso cu ta pasa di hende pa hende na momento cu un persona cu ta contagia cu e virus ta tosa, nister of supla nanishi. Na momento di tosa of nister, particulanan di e

virus ta keda algun rato den aire y despues ta cay riba superficie unda un otro persona por piki esaki cu su man y atravez di boca, nanishi y wowo incerta e virus den su curpa. Despues cu e virus a drenta e curpa dentro di 7 cu 14 dia e persona ta cuminsa presenta sintoma di:

• Keintura halto

• Nanishi ta core

• Tos seco

• Wowo cora of inflama

• Dolor di garganta

• Cansancio fuerte

• Manchanan color cora riba cuero (rash), cu ta cuminsa na cara y despues ta plama riba curpa

Ta importante cu un persona ta presenta e sintomanan aki tuma contacto telefonico cu su dokter di cas, sigui tur instruccion di su dokter y evita contacto cu demas persona.

Chikungunya.

Chikungunya ta un malesa viral cu ta wordo transmiti pa e mesun sangura cu ta transmiti Dengue (sangura pata blanco). E sintomanan mas comun ta:

• Keintura diripiente,

• Dolor fuerte di articulacion

nan (pols, enkel, rudia, elleboog p.e.),

• Dolor di cabes,

• Dolor di musculo,

• Cansancio

• Rash riba cuero (tin biaha)

Normalmente e sintomanan ta presenta entre 2 cu 12 dia despues di a wordo pica pa un sangura infecta cu e virus. Ta importante cu un persona cu ta presenta e sintomanan aki (y den caso cu bo ta regresa di un pais cu tin brote di Chikungunya) tuma contacto telefonico cu su dokter di cas, sigui tur instruccion di su dokter y percura pa e no wordo pica mas

pa sangura. Haci esaki door di elimina criadero nan potencial, bisti paña cu man y pia largo, usa repelente contra sangura y evita areanan scur unda sangura gusta sconde.

Pasobra Bo Salud ta nos Prioridad, DVG ta sigui mantene comunidad bon informa.

Pa mas informacion like

nos Facebook page Directie Volksgezondheid DVG Aruba, Follow nos riba Instagram directie_volksgezondheid_aruba, of Follow nos den WhatsApp Channel, subi nos website www. dvg.aw, yama nos na 5224200 of mail nos na servicio@dvg.aw

Parlamentario Xiomara maduro tabata Presente na e charla “ban causa furor cu dia mundial di lenga materno” na biblioteca nacional

Dia 21 di februari, rond mundo ta celebra Dia Internacional di Lenga Materno. Pa e ocasion special aki Parlamentario

Xiomara Maduro tabata presente na un charla di sr. Mirto Laclé na Biblioteca

Nacional titula: “Ban causa furor cu Dia Mundial di Lenga Materno.” Un bunita evento na unda nos lenga materno Papiamento a wordo celebra den canto, poesia, musica y literatura.

E publico grandi

presente a wordo deleita pa cancionnan clasico presenta pa e artista Ronny Kock, Grupo Rondalla Universo y Academia

Musical Harpa y Cuarta bou guia di e maestro Edgard Kelkboom. Esnan presente a keda conmovi pa e poemanan declama pa e poetanan Aurelia Croes y Marilis Becker, y tambe pa e bunita dedicatorio postumo na Frank Croes qepd, pa su aporte musical.

Durante e anochi, e autor Desiree Correa a presenta su buki titula “Toi, toi, toi” cu ta un compilacion di obra di teatro na Papiamento. Tambe notario Ralph Yarzagaay a splica un tiki mas di e buki “El Papiamento, la gramática más sencilla” skirbi pa dr. Rodolfo Lenz na aña 1926. cu ta e prome investigacion scientifico riba Papiamento. E buki aki, cu porcierto ta cumpli un centenario y ta wordo considera di gran balor, a wordo re-edita pa notario Ralph Yarzagaray na aña 2009, y ta contene un introduccion di drs. Mirto Laclé.

Parlamentario Xiomara

Maduro ta gradici Mirto Laclé y señora pa un bunita evento na unda Papiamento a biba den mente y curason di tur presente. “Papiamento ta mi idioma y na unda e ta, mi tambe kier ta,”

ta palabranan cu cual

Parlamentario Xiomara Maduro kier extende un invitacion na Pueblo di Aruba pa aprecia, balora y papia nos lenga materno Papiamento.

Accion di Bario: Minister r ene Herdé tA enfocA ri BA

re B i BA nos BA rion A n

Durante un bishita den bario di Companashi den cuadro di Accion di Bario, Minister di Infrastructura, drs. Rene Herdé, a comparti su vision y compromiso pa mehora e calidad di bida den nos barionan.

“Nos a cana den bario paso pa nos, e bario ta na curason di nos politica. Nos ta kere firmemente cu barionan ta base di nos comunidad,” asina Minister Herdé a declara.

Segun Minister Herdé, e bishita no tabata solamente pa mira tocante e problema di limpiesa, sino pa scucha directamente dje hendenan di bario tocante nan preocupacion y necesidad. “Nos a bin pa scucha nan necesidad, pero e responsabilidad pa mehoracion ta di tur hende; gobierno y comunidad hunto.”

Minister Herdé a enfatisa cu gobierno ta trahando c’un enfoke mas structural. E plan no ta limita na limpiesa,

pero ta inclui mehoracion di infrastructura, atencion pa problema social y colaboracion cu organizacion di bario.

“Tin casnan cu falta mantencion y problema di infrastructura cu a keda sin atencion pa hopi aña. Esaki ta mustra negligencia di pasado, pero awor nos ta tuma responsabilidad pa drecha loke mester drecha.”

Minister Herdé a recorda cu ora gobierno a forma, un di e compromisonan principal tabata rebiba nos barionan. Rebiba bario, segun Minister Herdé, ta nifica pa bay di cas pa cas pa scucha hende, identifica e necesidad real, inverti den infrastructura, pone atencion na reto social, fomenta cultura y desaroyo comunitario.

“Esaki no solamente ta un accion simbolico,”

Minister Herdé a bisa. “E ta un compromiso cu nos a haci den campaña y cu nos tin cu cumpli.”

Segun Minister di

Minister Wyatt- r as ta reacciona riba carta anoniM o M enciona den

M edio di co M unicacion

Minister di Salubridad, Asunto Social, Cuido di Adulto Mayor y Maneho di Adiccion, sra. drs. Melvin Wyatt-Ras a reacciona riba un carta anonimo (“paskin”) cu recientemente a wordo menciona den medio di comunicacion.

Minister a desaproba e forma y contenido di e carta, cual segun su declaracion ta contene expression cu por wordo percibi como difamatorio y derogatorio tocante un profesional cu ta traha na e bureau. Segun Minister, e tipo di acusacion anonimo no ta contribui na un dialogo constructivo ni na un ambiente di trabou sano y respetuoso. E bureau ta funciona riba base di profesionalismo, responsabilidad y colaboracion. Diferente profesional ta aporta

nan conocemento y experiencia pa sostene e trabou diario di e ministerio y esaki ta wordo aprecia profundamente.

Minister a indica cu den cualkier organisacion por surgi situacion caminda un profesional ta dicidi di sigui su carera den otro departamento of institucion. Esaki ta un proceso normal den cualkier ambiente laboral y no mester wordo presenta den un contexto negativo.

Ademas, Minister a enfatisa cu comunicacion anonimo, unda remitente no ta identifica su mes, no ta promove transparencia ni dialogo habri. E ministerio ta kere firmemente den comunicacion transparente, honesto y responsabel.

Den e sentido ey, Minister a invita e persona of personanan envolvi pa bishita e bureau pa conoce e ambiente di trabou y dialoga. E portanan di e ministerio semper ta

habri pa intercambio di opinion y conversacion respetuoso. Ministerio di Salubridad, Asunto Social, Cuido di Adulto Mayor y Maneho di Adiccion ta sigui enfoca

riba su meta principal: traha den interes di pueblo di Aruba y garantisa un funcionamento responsabel y profesional den tur aspecto di su encargo.

r adio GaG a a ye G a biblioteca

E buki ‘Radio Gaga: un storia Rubiano’ a yega

Biblioteca Nacional Aruba y lo ta disponibel pa fia na biblioteca pa medio maart. Esaki ta un buki skirbi pa autor Julien Ignacio y traduci pa sra. Joyce Pereira. E titulo original di e storia di Ignacio ta ‘Radio Gaga: een Arubaans verhaal’.

‘Radio Gaga’ ta un storia ficticio poni contra e telon di e historia recien di Aruba: e preludio di Status Aparte, e tempo cu Betico Croes a duna voz na identidad Arubiano.

Julien Ignacio ta un

escritor HulandesArubano. Su di dos buki Goudjakhals (2023), un coleccion di storia tocante migrante a gana dos premio. ‘Radio Gaga, e storia final den ‘Goudjakhals’, ta un homenahe na su wela Arubiano di Dakota. Arte di e portada tabata na encargo di Kim Violenes. Violenes ta un artista Hulandes-Arubiano cu a biba na Aruba.

E publicacion gratuito ‘Radio Gaga’ y e programa educativo rond di dje, ‘Radio Gaga na Aruba’, ta un produccion di Fundacion Dakota den colaboracion cu sra. Olga Buckley, sra. Joyce

Pa combati crisis di adiccion, m inister d owers ta ex P lora solucionnan

structural y sostenibel

Diaranson mainta, Minister di Husticia, mr. drs. Arthur Dowers, den cuadro di su esfuersonan pa alivia e problema alarmante di adiccion y adictonan ambulante cu a bay for di man den e ultimo añanan, a haci un bishita di trabao na Stichting Hunto na Sero Colorado.

Durante e bishita, e

mandatario a haya un recorido den e facilidad y a topa cu e personal cu tin e tarea diario di guia adictonan riba e bon caminda y siñanan con pa keda riba e caminda aki. Stichting Hunto tin un capacidad maximo pa trata 40 adicto y ta conta cu 10 empleado dedica na guia y supervision. Actualmente, e centro tin 10 adicto bao

di nan supervision, di cual 7 ta homber y 3 ta muhe. Den pasado, e trayecto di rehabilitacion pa cada adicto tabata varia entre 8 y 11 luna, pero awendia ta logra e miho resultado na momento cu e team hunto cu e psicologo di e fundacion, haci nan evaluacion profesional y determina cu e cliente ta cla pa sali. Ademas

ta manda e cliente cu ta cla pa sali, pa nazorg den cual nan ta keda haya sosten psicologo, pero tambe ta haya nan relapse prevention plan cu ta inclui numbernan di telefon cu e cliente por yama den casonan cu mester.

Stichting Hunto na Sero Colorado no ta un luga di pasa dia sin mas. Cada dia ta yena cu actividad recreativo y structural cu ta mantene e clientenan ocupa y disciplina. Cada persona tin su responsabilidad specifico, incluyendo laba nan mesun pañanan, mantene nan espacionan limpi, participa den sesionnan individual y di grupo, y sigui e programa manera stipula. Ademas den fin di siman e clientenan ta liber pa ricibi bishita di famia cu ta imporante den e proceso di rehabilitacion. E trabao di guia adictonan no ta facil. E ta rekeri corahe, pasenshi, conocemento y empatia pa logra e meta di saca personanan for di e bicio di droga y forma individuonan cu por reintegra den sociedad y contribui na bienestar general.

Minister Dowers a keda impresiona cu e estado di e facilidad, e programa extenso cu nan ta ofrece

y, particularmente, cu e nivel di compromiso y conocemento di e empleadonan. Algun di e empleadonan mes a experencia un cambio profundo den nan bida den pasado y awo ta comparti nan experencia propio pa guia otronan.

E problema di adiccion ta un reto nacional cu mester un acercamento integral y sostenibel. E situacion ta rekeri accion firme y coordinacion entre aplicacion di ley y rehabilitacion serio. Ta tempo pa trata e problema di adiccion cu determinacion.

Ministerio di Husticia lo sigui fortalece colaboracion cu instancianan relevante pa asina crea un acercamento integral y sostenible den e esfuersonan pa combati adiccion na Aruba.

Fundacion Lanta Pa P iamento ta invita comunidad Pa bishita e x P osicion di b uki

tocante y na Pa P iamento

ORANJESTAD, 19 di februari 2026: Na ocasion di celebracion di Dia Internacional di Lenga Materno Fundacion Lanta Papiamento (FLP), den colaboracion cu Biblioteca Nacional Aruba, ta invita comunidad pa bishita e Exposicion di Buki ‘Papiamento’, un evento dedica na promove y duna balor na nos lenga materno.

E exposicion lo presenta un coleccion amplio di publicacion na Papiamento of tocante Papiamento, incluyendo:

• Buki cientifico

• Gramatica y ortografia

• Material di enseñansa

• Literatura

• Otro publicacion relevante

E exposicion ta habri di diaranson 18 di februari te diabierna 27 di februari 2026.

Orario:

• Dialuna y diaranson: 8:00 am –7:00 pm

• Diamars, diahuebs y diabierna: 8:00 am –5:00 pm

Luga: Departamento Arubiana-Caribiana, Biblioteca Nacional Aruba ubica na Bachstraat 5

E exposicion ta ofrece un oportunidad pa conoce mas di desaroyo,

investigacion y creatividad literario na Papiamento. FLP ta invita scol, maestro, studiante, investigado y tur hende interesa den lenga y cultura pa forma parti di e iniciativa aki.

Pa mas informacion por tuma contacto cu Fundacion Lanta Papiamento of bishita Biblioteca Nacional Aruba. Promove nos lenga. Duna balor na nos identidad.

Minister di i nnovacion, M r. Gerlien c roes, ta lansa plataforM a nacional di G ital actividad.aw

ORANJESTAD, 20 di februari, Minister di Innovacion, mr. Gerlien Croes, oficialmente a lansa e plataforma nacional digital actividad.aw, un iniciativa strategico di Ministerio di Innovacion

cu lo wordo maneha pa IBiSA.

Cu e lansamento di actividad.aw, Gobierno di Aruba ta marca un paso importante den digitalisacion

y fortalecemento di conexion den comunidad. E plataforma ta reuni den un solo luga tur evento y actividadnan cu ta tuma luga riba nos isla, haciendonan mas accesibel, visibel y facil di haya pa tur hende.

Actividad.aw ta crea pa sirbi residente, bishitante y medio di comunicacion, facilitando acceso rapido na informacion riba evento cultural, actividadnan deportivo, reunionnan comunitario y experencianan familiar. E meta principal ta promove participacion, colaboracion y mas envolvimento den bida social di Aruba.

Durante e acto di lansamento, Minister Gerlien Croes a enfatisa importancia di crea plataformanan digital cu ta fortalece conexion y participacion: “Aruba ta mas fuerte ora nos ta bin hunto. Cu actividad.aw nos ta crea un espacio central unda hende por haya, comparti

participa

E plataforma ta ofrece un oportunidad pa organisador, fundacion, y organisacionnan local amplia nan alcance y aumenta visibilidad di nan evento, na mes momento cu ta brinda medio di comunicacion acceso confiabel y structura na informacion actualisa.

Pa bishitantenan, e ta representa un guia cla pa experencia mas profundamente e cultura y dinamica di Aruba. Cu actividad.aw, Gobierno

ta reafirma su compromiso cu innovacion, transparencia y participacion comunitario, posicionando tecnologia como un instrumento pa fortalece cohesion social y desaroyo cultural.

Comunidad ta wordo invita pa bishita www. actividad.aw, descubri e variedad di actividadnan disponibel y forma parti activo di e movemento digital nobo di Aruba.

actividad.aw – conectando actividadnan na Aruba cu su propio energia.

Un dia fructifero colma cu gracia na abundancia

El a contesta: ’Hipocritanan, profeta Isaias a describi boso bon bon ora cu el a bisa, manera ta skirbi: E pueblo aki, Dios ta bisa, ta alaba Mi cu nan boca so, ma den nan curason nan ta leu fo'i Mi. (Marco 7,6)

Locual ta molestia Hesus ta e hipocresia, e hipocrita ta fingi desconoce algo of fingi di ta inocente. Si tin buraco den e ley e lo uze p’asina hustifica locual e ta haci pa su cumbinencia. Esaki ta un blasfemia paso Dios bo no por gaña pero ta fingi desconoce of simplemente no ta worry. E di ocho mandamento ta bisa pa hende no lanta falso testimonio ni tampco gaña. Nos por puntra nos mes si na tur momento nos ta consciente di esaki y nos ta haci esaki. Hopi biaha nos ta faya, haci redo of lanta falso testimonio riba otro hende, p’esaki nos lo mester reflexiona y pidi pordon, confesion ta importante pa nos haci, p’asina cambia nos bida y pa sigui biba un bida corecto den fe y cu un curason limpi di pica y di tur mal pensamento p’asina nos no ta hipocrita y sigui riba caminda di Dios.

Oracion: Señor Hesus, duna nos e gracia di por compronde bo palabra y laga nos no wak e splinter den e wowo di otro mas bien yuda nos mira e biga den nos mes wowo. P’asina nos no gaña ni biba mane hipocritanan. Pa e motibo aki nos ta acudi na Señor, yuda nos cura nos mal accionnan cu ta aleha nos di e amor di Dios. Amen

MINISTER DOWERS A HACI INSPECCION

DI TRABAONAN ANDANDO NA CENTRO

ORTHOPEDAGOGICO NA DAKOTA

Diamars merdia Minister di Husticia, mr. drs. Arthur Dowers, a haci un inspeccion personal di e trabaonan di renobacion andando na Centro Orthopedagogico (OC) na Dakota.

Despues di su ultimo bishita na comienso di su encargo como Minister, e mandatario a considera importante pa bolbe personalmente pa evalua progreso di e trabaonan y constata e estado actual di e facilidad.

Durante e inspeccion, Minister Dowers a confirma cu tin adelanto visible den diferente aspecto di e renobacion. Sinembargo, a enfatisa cu tin ainda hopi pa haci. E facilidad ta den un estado bastante deplorabel danki na falta di mantencion durante e ultimo añanan.

Centro Orthopedagogico ta un facilidad crucial den cual hobennan ta keda bao supervision di Husticia. P’esey, no por neglisha e condicion fisico di e edificio sin mas, mirando cu esaki ta esencial pa garantisa siguridad, stabilidad y un ambiente digno tanto pa e clientenan como pa e personal cu ta traha cu compromiso diario. Inversion den infrastructura di husticia

mester garantisa un ambiente siguro y apropia. Ministerio di Husticia lo sigui monitorea e progreso di e trabaonan y tuma e

medidanan necesario pa asina logra un facilidad moderno, funcional y siguro pa tur esnan involucra.

no ta un gasto, pero un inversion directo den siguridad publico, prevencion y reeducacion. Ora nos ta papia di supervision di hobennan,