Diamars april 21 2026

A.T.A. TA AnunciA TrAbou di res TAurAcion y mAnTencion nA

rodger’s beAch

Aruba Tourism Authority (A.T.A.) ta anuncia cu 13 di april 2026 a inicia diferente trabounan di restauracion y mantencion na Rodger’s Beach, cu un fecha di finalisacion provisional pa final di juni di 2026. E proyecto ta forma parti di e compromiso continuo di A.T.A. cu siguridad publico, mehoracion y mantencion di espacio publico di calidad halto pa comunidad y bishitantenan.

Restauracion y mantencion di pier y plataforma pa sambuya Rodger’s Beach ta un luga recreativo di gran balor pa comunidad local y bishitantenan, ofreciendo un espacio pa relaha, landa y disfruta di diferente actividadnan di ‘leisure’. E pier y e plataforma pa sambuya ta

caracteristicanan iconico di e playa y a wordo uza constantemente durante hopi aña. Pa motibo di desgaste natural, exposicion prolonga na condicionnan di tempo y elementonan natural, pero tambe e ambiente marino, e structuranan aki a deteriora gradualmente, loke a crea e necesidad pa trabounan di mantencion y restauracion.

Cu e obhetivo di mehora siguridad, funcionalidad y sostenibilidad a largo plaso, A.T.A. ta inverti den e proyecto di mantencion general y restauracion cu ta enfoca riba e pier. Tambe lo restaura e plataforma pa sambuya cu enfasis riba fortifica e structuranan y mehora nan resistencia den e ambiente marino. E meta di e iniciativa aki ta sigura cu tanto comunidad como

bishitantenan por sigui disfruta di Rodger’s Beach den un ambiente sigur y bon manteni. E proyecto lo wordo ehecuta pa Varadero N.V. conhuntamente cu ACE Engineering como gerencia responsabel pa e proyecto. Coordinacion y financiamento ta den man di A.T.A.

Tur trabou lo wordo realisa riba sitio, cu planificacion den consideracion di tur cu ta haci uzo di e playa pa minimalisa molester y interupcion di acceso publico durante e periodo di e proyecto. Durante ehecucion di e trabounan, lo implementa tur medida di siguridad necesario. Ademas, como Rodger’s Beach ta un area marino protegi, ta sigura comunidad cu e contratista lo tuma e maximo cautela pa proteha e ambiente marino, y tambe ta sigura cu tur actividad ta wordo realisa na un manera responsabel y consciente di nos medio ambiente.

Reconstruccion di e ‘Facility Building’ E facility building actualmente ta den mal estado structural y lo wordo basha abou y reconstrui. E construccion di e facility building na Rodger’s Beach ta programa pa cuminsa dialuna 20 di april 2026, cu un duracion di aproximadamente 60 dia laboral. E obhetivo di e proyecto aki ta pa garantisa cu e area por sigui ta sigur,

funcional y apropia pa uzo publico.

E facility building ta sumamente aprecia pa comunidad, pa es motibo lo reconstrui e facility building nobo na e sitio actual y den e estilo cu usuarionan a bin ta aprecia, sigurando cu e edificio lo sigui ta na Rodger’s Beach pa generacionnan cu ta bini.

E facility building nobo lo wordo construi uzando materialnan duradero y di poco mantencion cu ta apropia pa condicionnan di costa, contribuyendo na confiabilidad a largo plaso. E diseño tambe ta considera accesibilidad pa permiti un uzo mas amplio y mas sigur pa publico. Ademas, e area rond di e edificio lo inclui plantacion di matanan Seagrape nativo (Cocoloba Uvifera). E especie nativo aki ta adapta bon na e ambiente di costa y ta apoya practicanan responsabel di maneho di tereno, mientras cu ta preserva e caracteristica di e area.

Durante henter e periodo di construccion, seguridad lo sigui ta un prioridad. Medidanan temporal lo wordo implementa pa proteccion di residentenan y bishitantenan. E publico ta wordo pidi pa respeta tur borchi y instruccionnan di seguridad rond y paden di e area di trabou.

E proyecto di reconstruccion di e ‘Facility Building’ ta wordo ehecuta den colaboracion cu Land Aruba como opdrachtgever, A.T.A. pa financiamento, ALBO Aruba N.V. ta e contratista responsabel mientras cu Dienst Openbare Werken (DOW) ta encarga cu e diseño, maneho, y supervision.

Cu e proyectonan aki, A.T.A. ta reafirma su compromiso continuo na mantencion di espacionan publico y su dedicacion na ofrece sitionan recreativo cu ta sigur, agradabel y sostenibel, tanto pa comunidad local como pa tur bishitante cu ta disfruta di Aruba.

ATRACO TEAM A DETENE UN SOSPECHOSO PA DIFERENTE ATRACONAN COMETI DEN SAN NICOLAS

Cuerpo Policial Aruba ta informa cu despues di un investigacion intensivo realisa pa Atraco Team (T.B.P.), a logra detene un sospechoso cu tabata biba den districto di San Nicolas y cu ta wordu vincula na varios atraco cu arma blanco den e luna di maart y April 2026.

Durante e lunanan menciona a registra un serie di incidentenan den e area di San Nicolas unda e sospechoso tabata uza un arma blanco (cuchiu/dolkmes) pa intimida su victimanan.

Ta trata di e siguiente casonan:

02 di maart 2026: Atraco riba un studiante na altura di Biblioteca Nacional den Peter Stuyvestraat.

E studiante tabata wardando riba su mayornan y ta wordo atraca, na unda e sospechoso ta pone cuchiu na su garaganta y ta bay cu su celular y placa.

19 di maart 2026: Atraco riba un empleado di MFA San Nicolas na e parkeerplaats di Plaza Lolita. Sospechoso ta pone cuchiu na su garganta y bay cu su celular, joyas y placa.

03 di april 2026: Atraco riba turistanan cu tabata admira e muralnan den centro di e ciudad. Sosopechoso ta saca cuchiu pa e turistanan y bay cu placa y documentonan personal.

09 di april 2026: Atraco riba un señora hunto cu su yiu despues di a sali for di cinema. Aki sospechoso a saca un cuchiu y a bay cu placa.

Basa riba e descripcion di e

sospechoso y e modus operandi, Atraco Team a logra identifica e persona responsabel pa tur e atraconan aki.

Despues di un investigacion bon haci a conduci cu riba 11 di april 2026, Atraco Team ta detene e sospechoso.

Ta trata di e homber di inicialnan H.S.L.B., naci na Colombia di 20 aña y ta ilegal riba nos isla.

Durante un entrada hudicial na e parcela den Theaterstraat, polis a logra localisa y confisca basta evidencia cu ta vincula e cu e atraconan menciona.

Importante pa menciona ta cu durante e proceso di interogacion, e sospechoso ta admiti su culpabilidad den tur e casonan aki.

Atraco Team ta traha incansablemente pa resolve e casonan di atraco.

Noticia di Corte

Fiscal ta exigi 5 aña di prison pa homber envolvi den importacion di 381 kilo di marihuana

ORANJESTAD – E homber A.B. (49), a presenta den Corte pa e caso penal cu Ministerio Publico a cuminsa contra dje. E ta wordo acusa di ta envolvi den importacion di 381 kilo di marihuana riba 12 Mei 2025.

SOLO DI PUEBLO por a compronde cu Guarda Costa a intercepta e boto y Fiscal a exigi 5 aña di prison pa A.B.

BOTO MESTER A TRECE LOTE DI DROGA

Hues a puntra A.B. si e ta envolvi den e importacion di 381 kilo di marihuana y A.B. a bisa cu e tabata envolvi den e grupo di purba bin cu marihuana. El a bisa cu 1 siman promer un Venezolano a acerk’e y un Colombiano cu no ta na Aruba. E conoce nan pa asunto di droga den pasado. Nan a bis’e pa ricibi e droga cu lo bin for di Colombia. Nan a bis’e ki dia y ora e droga lo yega. E boto cu e droga lo mester a yega 12 Mei 2025 entre 1’or y 2’or di marduga na un rancho na Barcadera. El a bisa cu e no tabatin contacto mas cu nan. A.B. a bisa Hues cu e boto no a yega marduga sino 6’or di mainta.

GUARDA COSTA A INTERCEPTA E BOTO

A.B. a bisa Hues cu ora el a mira e boto ta bini y cu Guarda Costa tabata bayendo riba nan, el a dicidi di bay for di e rancho. El a mira con e boto a bira pa purba huy pero Guarda Costa a intercepta e boto. Segun A.B., e palabracion tabata 600 liber di marihuana. A.B. a bisa cu su trabao tabata djis ricibi e droga y e Venezolano

lo bay busca e droga. El a bisa cu e lo warda e droga den un cas di piscado te ora e Venezolano bay buske. Hues a bisa cu Guarda Costa a intercepta e boto riba cual tabatin diferente ice jug grandi.

381 KILO DI MARIHUANA CONFISCA

Segun raport di Guarda Costa, e boto a bira bay y Guarda Costa a haya e boto bandona den e mangelnan y a haya 7 ice jug cu basta paki di marihuana. En total a confisca 381 kilo di marihuana. Miembronan di Guarda Costa a logra detene un persona di e boto y a detene A.B.

ACUSADO 2 BIAHA CONDENA PA DROGA

Segun A.B. dos biaha el a wordo condena pa traficacion di droga. El a wordo condena dos biaha na 22 luna di prison. Tambe e tin un condena di 12 luna di prison pa traficacion di hende. Hues a puntra A.B. si e gusta prison pasobra ya ta 3 biaha caba cu el a haya condena di castigo di prison. A.B. a bisa Hues cu door di necesidad el a haci esey. A.B. a bisa cu e lo a haya 20 paki di marihuana como pago pa su trabao cu ta mas o menos 20 mil florin. Ta asina cu e no tin lugar di keda y tabata biba na e Rancho.

FISCAL A EXIGI 5 AÑA DI PRISON

Fiscal a bisa Hues cu e ta haya legalmente proba cu A.B. ta envolvi den importacion di droga.

Fiscal a bisa cu Servicio di Inteligencia di Polis a haya informacion cu A.B. lo tin importacion di droga. Fiscal a mustra cu tabatin auto ta warda e boto y ora Guarda Costa a bay riba e boto, e boto a drenta den e mangelnan y e hendenan a core bay. Miembronan di Guarda Costa a logra detene uno. Fiscal a sigui bisa cu Polis a haya combersacion di A.B. cu ta bisa cu e ta cla pa ricibi e cargamento. Den un otro cellular Polis a mira potretnan di e pier na unda e boto lo mester a yega. Fiscal a bisa cu e usamento di droga ta causa adiccion y fomenta criminalidad. El a remarca cu A.B. ta un residivista. Fiscal ta haya cu A.B. no ta realisa e daño cu e ta haciendo na comunidad. Fiscal a exigi 5 aña di prison y cu e 2 cellularnan lo mester keda confisca.

ABOGADO

Abogado mr. de Koning a bisa Hues cu e ta haya cu A.B. a purba y mester considera esaki como un intento di complice. Na opinion di e abogado, A.B. su trabao tabata solamente ricibi y warda e droga. Esey no a keda realisa ya cu e droga a keda intercepta. E abogado ta haya cu no tabatin cooperacion estrecho y pesey no ta haya cu por papia di complice. E abogado a bisa cu A.B. no tabata riba e boto y no tin nada di haci cu e organizacion di e viahe di e boto. El a bisa cu A.B. su trabou tabata mas bien facilita cu e droga ta wordo warda pa otro busca. E abogado a pidi Hues pa no considera A.B. complice di importacion di lote di marihuana. Hues a bisa cu dia 8 Mei 2026 lo tin sentencia

Endy a confronta GEoffrEy cu 16

miyon pa ata poni pa proyEcto:

ministEr

a bisa “mi no sa nada”*

nomber y den Conseho di Minister.

Oranjestad – Durante reunion di parlamento e siman aki, parlamentario Endy Croes a cuestiona Ministro di Turismo

Geoffrey Wever tocante un suma nunca antes visto di 16 miyon florin cu ta menciona den Corporate Plan/Budget 2026 di Aruba Tourism Authority (ATA). Un suma hopi halto y sin ningun descripcion pa su uso.

Den e documento oficial di ATA tin skirbi cu:

“The allocated budget includes an amount of Afl.16 million requested by the Minister of Tourism and the Council of Ministers…” (p.49)

Pero ora Endy Croes a pidi splicacion den Parlamento, contesta di Ministro Geoffrey tabata sorprendente: “Mi no sa nada di e 16 miyon ey di ATA pa proyecto.”

Esaki a crea red flag ⛳️ politico inmediatente.

Con por ta posibel?

Si e documento ta bisa claramente cu e 16 miyon tabata solicita pa e Minister di Turismo y Conseho di Minister, con ta posibel cu e minister di Finansas awor ta bisa cu e no sa nada?

Geoffrey Wever ta miembro di Conseho di Minister pero mas remarcabel ta fu e ta minister di finansas. Si Conseho di Ministrer a pidi e suma, e pregunta principal ta:

E tabata aproba sin conocimento di e minister di finansas?

Of tin informacion cu no ta wordo comparti cu Parlamento?

Of e budget ta contene informacion incorecto?

Un contradiccion serio

Tin solamente tres posibilidad:

ATA a pone informacion falso of engañoso den su budget oficial, of

E minister no ta informa tocante decisionnan grandi cu ta carga su

Fraccion di MEP

Of tin dos conseho di Minister? Uno cu Geoffrey y otro sin Geoffrey?

Tur tres scenario ta serio.

16 miyon ta den laira; pa unda? Pa ken? Pa kico ?

Mas preocupante ainda ta cu e documento ta bisa cu detaye completo cu e 16 miyon no ta den e plan principal, pero den: “a separate internal document titled CP2026-DSU Budget 16M.”

Esaki ta nifica cu: Pueblo no por mira detaye. Parlamento no tabata informa claramente. Y hasta e minister ta bisa cu no sa nada Endy Croes pone dede den herida Cu su pregunta, Endy Croes a habri un asunto serio di transparencia y gobernacion.

Si un 16 miyon por aparece den un documento oficial, y ta menciona cu ta riba ordo di Minister y Conseho di Minister, sin cu

“Un Aña Gobernando, Pero Sin Direccion: confusion ta rEina dEn

ministro di finansa por splica, e pregunta ta e ora: Ken ta manda? Ken ta controla? Ken ta firma?

Credibilidad bao precion ATA ta papia di sostenibilidad, responsabilidad y bon gobernacion. Pero e caso aki ta mustra un otro imagen: confusion, contradiccion y misterio rond di suma miyonario.

Pregunta final pa Geoffrey y ATA Si e ministro no sa nada di e 16 miyon, Ken si sa?

ORANJESTAD - Despues di casi un aña di gobernacion, e gobierno actual ainda no a logra pone claridad basico den su propio structura di responsabilidad. Te ainda, e Landsverordening Instelling Ministeries LIM no a wordo aproba, loke kiermen cu oficialmente no ta sigur cua minister ta responsabel pa cua area. E situacion aki no ta solamente preocupante, pero tambe inaceptabel. Un gobierno cu no tin su propio reparticion di tarea formalisa,

ta crea confusion tanto internamente como pa Parlamento y pa pueblo. Esaki a bira mas evidente ora un otro minister, den e caso aki Minister Gerlien Croes, a aparece den Staten pa duna splicacion riba un tema cu formalmente ta cay bou di responsabilidad di e ministerpresidente, cu ta firma e reportahenan di Landspakket.

E resultado ta un gobierno cu ta opera sin

linea cla, sin responsabilidad defini y sin transparencia suficiente. Esaki ta debilita control parlamentario y ta mina confianza di ciudadano.

Nos pais merece miho. Gobernacion serio ta cuminsa cu claridad: ken ta responsabel pa kico, pa e minister ey por wordo yama pa duna cuenta. Ta tempo pa e gobierno pone ordo den su propio cas.

“Sin balanSa no tin Reino” PieteRS ta Pone adveR tencia tocante HoFa na den Haag

“Bon ley no ta nace di algo haci den pura, pero di critica, analisis y balansa.” Cu e mensahe contundente aki, Andy Lee, miembro di Raad van State na Hulanda, a marca e tono durante su encuentro cu parlamentario Eduard Pieters di fraccion di PPA. Un encuentro cu no tabata superficial, pero profundo, den cual e tema central tabata claro: e impacto di Rijkswet HOFA riba autonomia di Aruba y e balansa dentro di Reino Hulandes.

Raad van State: mas cu conseho, un pilar di gobernacion

Durante e combersacion, Andy Lee a pone enfasis riba e rol esencial di Raad van State como institucion independiente, cu ta evalua tur propuesta di ley; tanto rijkswetnan como e leynan nacional, prome cu nan yega na decision final. El a splica cu e rol aki no ta ceremonial, sino fundamental pa: ● analisa e contenido y e proceso di ley; ● haci pregunta critico riba legitimidad y impacto; ● y duna conseho pa mehora calidad di gobernacion.

Raad van State no ta tuma decision politico, pero ta influencia esaki cu conseho profundo y independiente, algo cu, segun Pieters, ta un salvaguardia esencial pa evita cu ley debil of desekilibra pasa sin cuestiona. “Esaki ta mustra cu dentro di Reino tin un Raad van State pa haci analisis profundo,” Pieters a indica.

Un proceso cu ainda tin pregunta habri

Andy Lee a reconoce claramente cu e proceso di e ley ainda no ta completo. E texto final ainda no a yega Tweede Kamer y ni e conseho

formal di Raad van State ainda no ta publica.

Segun Lee, solamente ora tur informacion, incluyendo: e texto final di ley, e proceso cu a sigui y e conseho huridico ta disponible, por forma un opinion definitivo. Pero e punto mas importante cu el a expresa ta, cu e discusion riba HOFA ta bay varios aña atras y ainda no a haya un solucion cla. Esaki, pa Pieters, ta un señal hopi preocupante.

HOFA: un ley cu ta laga pregunta fundamental sin contesta

Segun Pieters, e hecho cu un ley di tal impacto ainda ta draai rond cu tanto duda, ta precisamente e motibo pakico Aruba mester para firme. E preguntanan central ta keda:

● E ley aki realmente ta urgente of necesario?

● Ta proteha of debilita autonomia di Parlamento di Aruba?

● Ta fortalece Reino of ta crea un desbalansa di poder?

“Un ley cu no tin claridad no mester wordo imponi cu velocidad,” Pieters a enfatisa.

Sin consenso real, no tin legitimidad

Un otro punto clave cu a sali na cla durante e encuentro ta importancia di e proceso democratico. Andy Lee a subraya cu den Reino Hulandes, rol di e parlamentonan, tanto na Hulanda como na Aruba, ta esencial pa legitimidad di ley. Pieters a conecta esaki directamente cu situacion actual: “Si Parlamento di Aruba no a duna su aprobacion, con por papia di un ‘consensus rijkswet’?”

Pa PPA, esaki no ta djis un falta di formalidad, sino un falta di respet

pa democracia.

Aruba mester papia awor y no despues

Cu e ley aki ainda no a yega

Tweede Kamer, Pieters a enfatisa cu esaki ta e momento pa Aruba mustra liderazgo. “E decision final ainda no a wordo tuma, pero e direccion ta forma awor. Si nos no papia, otro lo hacie pa nos,” el a bisa. E mision di PPA na Den Haag tabata netamente pa pone contexto real di Aruba riba mesa, clarifica e implicacionnan di HOFA y influencia e debate prome cu ta bira definitivo.

Un Reino fuerte ta basa riba respet y no control

E encuentro cu Andy Lee a confirma un berdad fundamental:

Reino Hulandes no por funciona sin balansa entre e paisnan. Lee a enfatisa importancia di compronde contexto di cada pais, algo cu, segun Pieters, ta falta hopi biaha den e decisionnan na Den Haag. “Nos no ta contra Reino,” Pieters a conclui, “nos ta contra un direccion cu ta debilita nos derecho riba presupuesto di Aruba.”

E mensahe final for di Den Haag ta mas claro cu nunca: Bon ley ta nace for di critica, no den silencio. Democracia ta exigi participacion real y autonomia mester ta proteha, no negosha.

“Si nos no cuestiona awe, nos lo paga e prijs mañan,” Pieters a conclui cu firmeza.

Parlamentario Xiomara Maduro:

Parlamento di aruba ta aProba mocion unanime Pa conserva historia di e refineria

Durante e reunion publico pa trata e destino di e refineria, Parlamento den forma unanime a aproba un mocion pa conserva e historia di e refineria na Aruba. Cu esaki Parlamento ta pone enfasis riba un les importante di pasado, pa no laga Lago sigui e mesun destino cu e refineria Arend, miho conoci como Eagle Refinery.

cu Eagle ta bay fo’i nos memoria nacional.

Proteccion di memoria colectivo

E mocion ta urgi Gobierno pa no solamente mira e aspecto economico of tecnico di desmantelacion di e refineria, pero tambe e dimension cultural y historico. E mocion ta sugeri pa Gobierno:

• Conserva e parti visibel di e refineria Lago • Proteha structuranan cu tin balor patrimonial • Crea un museo, monumento of otro recordatorio permanente • Integra historia di e refineria den educacion y turismo cultural

Den pasado, Aruba a hospeda dos refineria grandi cu a marca su desaroyo economico: Lago Oil & Transport Company y Arend Petroleum Maatschappij (Eagle).

Mientras Lago a keda graba den e memoria colectivo di pueblo, poco hende ta corda Eagle. Pa falta di conservacion structural, gran parti di su historia a bira casi invisibel pa generacionnan nobo. Pa e motibo aki, Parlamentario Xiomara Maduro a tuma iniciativa pa den nomber di Fraccion di MEP, presenta un mocion pa conserva e historia di Aruba su pilar economico mas grandi: refineria Lago. E meta di esaki ta pa evita cu e ta disparce di mes manera

E mensahe ta cla: Aruba no por sigui perde parti di su historia industrial. Laga e falta di conservacion di Eagle sirbi como advertencia y como e impulso necesario pa nos preserva e herencia di e refineria Lago di un miho forma.

Cu e mocion aki, Fraccion di MEP ta confirma su compromiso pa mantene e historia di e refineria bibo, pa e generacion hoben por compronde di unda Aruba a bini y con e isla a desaroya.

Nos Poder, Nos PlaNeta ta e tema di dia di tera 2026

Cu tema aki nos ta refleha un berdad fundamental: Progreso ambiental no ta depende di ningun administracion of eleccion. E ta wordo sosteni pa accionnan diario di comunidad, docente, trahado y famianan cu ta proteha sitionan ta biba y labora.

Dia di Tera 2026, concentra riba e tema “Nos Poder, Nos Planeta,” ta ofrece un chens pa convertí e intenccionnan ey den accion sin e presion di perfeccion. Sea bo resoluccion ta parse di ta reduci desperdicio ora bo por, siña tocante asuntunan ambiental local, vota pa ideanan pa futuro di clima, of sostene organisacionnan cu ta traha pa cambio sistematico, cada paso ta conta.

Mescos cu e prome Dia di Tera a mobilisa 20 miyon di hende pa exigi proteccion di medio ambiente, e poder di pueblo di awendia, traha di accionnan chikito y imperfecto tuma pa miyones di hende, por obliga un biaha mas instituccionnan y gobiernonan pa responde. Transformaccion ambiental no ta rekeri individuonan perfecto; e ta rekeri participacion. Dia di Tera 2026 ta afirma cu progreso ambiental ta real, resistente y continuo apesar di insertidumbre di politika. Inovacion, educacion y solucciona problema di comunidad ta keda duradero. Sistemanan local, stad, scol, nacionnan tribal, ta sigui implementa soluccionnan cu ta fortalece energía confiabel, conserva recursonan, y reduci riesgo pasobra nan ta basa riba centido economico y seguridad publico. Explora nos recursonan y accionnan pa Dia di Tera 2026 y henter aña.

Progreso ambiental ta wordo

construí pa medio di accion di tur dia. For di comunidadnan cu ta proteha ecosistemanan te na inovacionan cu ta avansa soluccionnan. Aire limpi, awa limpi resiliencia pa clima no ta opcional, nan ta esensial. Pa Dia di Tera 2026, nos ta mobilisando na escala. Cada accion ta conta. Tur bos ta conta y ta importante.

Na un momento di incertidumbre aumenta y stres ambiental, un conclucion ta cla y ampliamente compartí: progreso den proteccion di nos tera, aire y awa ta real, resistente, y continuo.

Pilar Un: Resiliencia y continuidad Institucional E trabou ta sigui sin importa e politica federal. Accion ambiental ta lokal y decentralisa; cambionan di politica ta uma lugar den bo pueblo. Progreso ta operacional caba, no aspiracional; programanan solar, eficiencia, invercionnan, restauracion di ecosistema ta exsist y ta trahando. Economia, educacion y conservacion ta sobrebibi siclonan político; esakinan no disparse cu un cambio di administracion

Pilar Dos: Interesnan comparti y resultadonan

Interconecta

Proteccion di medio ambiente ta afecta tur hende, tur caminda

Salud humano; asma, malesa impulsa pa clima ta afecta famianan real

Seguridad Economico; cunukero, piscadonan, tur ta depende di un medio ambiente.

BalornanSspiritual y moral; administacion di Tera no ta politico, e ta biblico

Ecosistemanan global; loke ta pasa eynan ta afecta loke ta pasa aki

Calidad di Bida; mi yiunan por

pisca den lama? Nan por hala rosea limpi?

Cada individuo tin e poder pa crea cambio. Sea parti di limpiesa di comunidad, plantamento di mata of demostraccionnan pacifico. registrashon di votado, reunionnan di cas di pueblo, organisaccion di comunidad, cada accion ta fortalece e movemento. Tuma contacto cu funccionarionan electo, siña otronan. Hasi escogencianan sostenibel diariamente. Ora individuonan ta actua, comunidadnan ta forma. Ora comunidadnan papia, lidernan ta scucha.

“Nos Poder, Nos Planeta, Nos Aruba”

E Dia di Tera 2026 aki, Aruba ta brasa e tema mundial “Nos Poder, Nos Planeta” dor di destaca e forsa colectivo di e Isla den proteha su medio ambiente natural y avansa solucionnan di energia sostenibel.

Como lider den energia renobabel den Caribe, Aruba ta sigui demostra con comunidadnan por traha hunto pa crea un futuro mas limpi y resiliente.

Nos mester sigui fomenta, limpiesa di playa, campañanan educativo, y proyectonan di sostenibilidad impulsa pa comunida, recidente y bishitantenan ta wordo encurasha pa tuma accion y reconoce e poder cu nan tin den forma e futuro di e planeta. For di conservacion di energia te na proteccion di e ecosistemanan marino, tur esfuerso ta contribui na preserva e medio ambiente unico di Aruba. Na momento cu tur esakinan ta bon fiha logicamente ta duna realse tambe na Aruba su Sector Primario

Dia di Tera 2026 na Aruba ta reenforsa un compromiso comparti, e poder pa proteha nos planeta ta sinta den nos tur.

MEP ta pone presion riba Gobierno: PETICION PA REUNION PUBLICO URGENTE RIBA

FALTA DI TRANSPARENCIA DEN PROYECTONAN

DI ENSEÑANSA SIN DESTAHO PUBLICO

Oranjestad – Fraccion di MEP a haci un peticion pa yama un reunion publico urgente di Parlamento pa discuti e decisionnan recien di e Ministerio di Enseñansa y Deporte, bou di Minister di Gerlien Croes, pa otorga varios proyecto pa desaroya material di enseñansa sin proceso di destaho publico.

E decisionnan, cu segun informacion den prensa, a wordo tuma na varios ocasion, y pesey no por papia mas di un excepcion. Esaki ta causa preocupacion serio pa loke ta transparencia, oportunidadnan husto y igual pa tur hende y maneho corecto di fondo publico.

Mas grave ainda ta cu e excepcion aki no a wordo usa incidentalmente, sino repetidamente den mesun ministerio, sin claridad tocante con a explora mercado of si tin otro proveedor.

E situacion ta trece un dimension politico serio, mirando cu e mesun minister, den su periodo como miembro di Parlamento, tabata sumamente critico riba uso di e mesun tipo di excepcionnan. Awor, den su rol como minister, ta haci uso constante di e instrumento aki, creando un duda legitimo riba consistencia, credibilidad y integridad di gobernacion.

Ademas, esaki no ta un caso aisla. E minister ya a bira conoci pa su falta di transparencia, particularmente den e asunto di biahe di trabou cu avion priva, unda te awe no a duna claridad suficiente na Parlamento ni na pueblo. E patronchi cu ta surgiendo ta uno di falta di transparencia y accountability.

Pa e motibo ey, Fraccion di MEP a pidi cu urgencia pa yama un reunion publico di Parlamento, unda e minister lo mester duna splicacion completo y documenta.

“Transparencia no ta opcion; e ta un obligacion. Pueblo di Aruba tin derecho di sa con ta

nan placa y con decisionnan importante den sector di enseñansa ta wordo tuma. Parlamento lo mester cumpli cu su papel

FORTALEZA PA FAMIA

Scirbi pa Pastor Marcel Balootje.

STOP DI BRINGA CONTRA DIOS, AREPENTI Y OBEDECE

Si un mucha no ta obedece su mayornan, e ta desobedece Dios, pasobra Dios ta bisa yuinan obedece boso mayornan.

Si un homber of muher sali caya y ta comete adulterio, sabiendo masha bon cu e ta casa, no ta solamente su esposo/esposa e ta contra di dje, pero e contra Dios, pasobra Dios ta manda homber/muher pa nan ta fiel na otro, stima otro, y somete na otro.

Ora un persona comete un delito, cual e tin di bay sera, no solamente e acto tin consecuencia humano pe ,pero tambe e tin consecuencia spiritual e a haci pica, pasobra ta Dios a estableci ley.Y a pone esnan cu tin cu mantene.( Romanonan 13:1-5).

Awor hopi biaha e enemigo tin e hubentud den su gara , y ta pone nan pensa cu si nan haci algo malo, ta cara di nan mayornan ta keda na berguensa, y nan ta lubida cu mesun cara cu bo tin awe, ta mesun cara lo bo tin mayan cu Dios kier, y cu ta bo mes tin di duna cuenta dilanti di Dios pa tur bo rebeldia.

Tene cuenta cu bo mayornan a biba nan bida, y cu awor abo ta lanta, y mas suave bo bay den bida, ta mihor pa bo mes, pasobra si bo kier

bringa contra Dios, bo ta bay sali perdi, pasobra no tin ningun hende cu a bringa contra Dios y sali gana , tur lider di paisnan cu a lanta contra Dios a sali perdi.(Exodus 14:27-28.) Y te awe e situacion a keda mesun cos.Tur hende cu a opone Dios y su poder y cay venci, pa e poder di Dios.

Pero e enemigo di nos alma cual ta e diabel no ta cansa pesey e palabra di Dios ta duna advertencia, pero ta parce manera hopi no kier tende, of nan kier tenta Dios, pero palabra di Dios semper lo keda mesun cos y e palabra di Dios ta bisa na tur hende mesun cos: Sea sobrio, sea alerta,boso adversario e diabel, ta cana rond manera un leon cu ta grunja buscando ken e por devora.( 1 Pedro 5:8).

Y e ta bolbe recorda nos atrobe: Pesey somete boso mes na Dios resisti e diabel y e lo huy for di boso.Hala serca Dios y E lo hala serca boso.( Santiago 4:7-8).

Y no lubida locual Juan 10:10 ta bisa E ladron solamente ta bini, pa horta, pa mata y pa destrui, pero Ami a bini pa nan tin bida, y pa nan tine na abundancia.

Awor nos ta sigi mira cu tempo ta bira

moderno, ciencia ta aumenta, y tin hopi ta sali for di boluntad di Dios y kier haci cambio den creacion di Dios, cambiando nan mes curpa y nan identidad, pero e base cual ta e alma ,e mente, y e curason ningun hende no por mishi cune, solamente Dios , pa medio di Spirito Santo por trece conviccion den bida di hende, pa nan arepenti y aparta for di pica.

Si boso no kier scucha e bos di Senjor, ma ta rebeldia contra e ordo di Senjor, e ora ey e man di Senjor lo ta contra boso,mescos cu e tabata contra boso tatanan.( 1 Samuel 12:15).

Pasobra e mente fiha riba e carni, ta morto,ma e mente fiha riba e Spirito ta bida y pas.

Amistad cu mundo ta enemistad cu Dios ( Santiago 4: 4).

Nos tin cu tene bon cuenta pa e sistema di mundo , no separa nos for di caminda di Dios.

No lubida riba Romanonan 1:28-32.

Nos mester hala awe urgentemente serca Dios.

Sinceramente, Pastor Marcel Balootje.

“Sin conexion entre enSeñanSa

practica, aruba

competitivo”

ta

perde

y

Su bentaha

eduard pieterS a expreSa deSpueS di Su biShita na mondriaan

Durante su bishita di trabou na Den Haag, parlamentario Eduard Pieters a pone un tema clave riba mesa: futuro di Aruba su economia ta depende directamente di con nos ta prepara nos hobenan awe. Na ROC Mondriaan, un instituto di enseñansa vocacional (mbo), Pieters a haya un ehempel concreto di con enseñansa moderno mester ta: integra, inclusivo practico y conecta cu sector priva. Enseñansa mester ta conecta cu realidad

Hunto cu inversionista Jeroen Lente, cu tin mas di 25 aña experiencia den hospitalitalidad y real estate, e imagen tabata cla. “E ta sinti manera bo ta den un hotel berdadero. Live cooking, hotelkamer, hasta un bar, esaki ta un ambiente real. Esaki ta con enseñansa mester conecta cu loke sector priva ta pidi,” Lente a indica.

Segun Lente, e balor principal di Mondriaan ta e integracion entre teoria y practica. Pa Aruba, esaki ta mas cu relevante, mirando cu nos economia ta depende mayoria parti di turismo.

El a mustra tambe disponibilidad pa conecta cu e studiantenan di Aruba cu e oportunidadnan na Hulanda, manera stage y experiencia internacional. “Esaki sigur ta un paso sumamente importante pa fortalece e coriente di talento” segun Eduard Pieters.

Un modelo cu ta prepara pa mundo real

Den Pieters su encuentro cu e docente; Ilja van Reewijk, esaki un biaha mas ta haya confirmacion. Mondriaan ta traha cu diferente nivel (MBO 2 te 4) y tin un mescla di cultura, unda e studiantenan di Aruba, Corsou y otro pais ya ta participa. “Nos ta combina teoria cu practica y nos ta crea un ambiente cu ta refleha e mundo real. Esaki ta prepara e studiantenan pa e siguiente paso den nan carera,” Van Reewijk a splica.

Ademas, Mondriaan tin un “international stream”, cu ta algo unico y cu ta ofrece un espacio pa e studiantenan di Caribe integra y crece. Van Reewijk a enfatisa

cu e studiantenan di Aruba tin un bentaha natural: multilinguismo y adaptabilidad. Pero tambe el a pone un reto riba mesa: enseñansa mester sigui evoluciona. “Despues di COVID, mentalidad di e studiantenan a cambia. Nos mester scucha nan y adapta nos sistema na loke nan ta expresa,” el a bisa.

Un les importante pa Aruba

Pa Pieters, e bishita aki no tabata djis inspirador, pero tambe tabata confrontativo. Constantemente na Aruba ta papia di: turismo di calidad, experiencia premium y sostenibilidad

Pero sin un sistema educativo cu ta prepara talento local, esaki lo keda na palabra so (atrobe).

“Nos no por papia di turismo di nivel halto, si nos no ta forma e profesionalnan di nivel halto,” Pieters a enfatisa. El a subraya cu Aruba mester move for di pensamento aisla y limita: no djis forma waiter of koki, pero tambe managers, lider, entrepreneur y empresario den hospitalidad.

Cooperacion ta clave pa progreso

Un otro punto importante cu a sali ta colaboracion. Ya tin relacion estrecho cu Corsou y cooperacion

cu Aruba, pero e potencial ta hopi mas grandi. Cu e partnernan na Hulanda y kisas den futuro hasta e paisnan manera Suriname, por crea un red internacional di enseñansa, cu ta beneficia henter region.

Segun Lente, e meta mester ta cla: conecta enseñansa cu industria y crea oportunidad real pa e hobennan.

Un yamado politico cu direccion cla

Pa fraccion di PPA, e mensahe ta directo: enseñansa vocacional mester ta un prioridad nacional, sector priva mester ta integra den sistema y no por pospone inversion den nos hobennan mas y djis lag’e na documento y presentacion bunita. “Si nos no crea e conexion aki awe, nos ta perde nos bentaha competitivo como pais turistico,” Pieters a conclui.

E bishita na ROC Mondriaan a mustra cu tin e solucionnan, pero mester tin boluntad profesional y politico pa implementa nan. Futuro di Aruba no ta djis den e hotelnan so, sino tambe den e lokaalnan di klas, cu ta netamente prepara e hendenan cu mester maneha y traha den esakinan.

Gobierno a tene encuentro cu Fonds bijzondere journalistieke

Projecten (FbjP)

Prome Minister Mike Eman a sostene recientemente un encuentro cu representantenan di Fonds Bijzondere Journalistieke Projecten (FBJP), un fondo internacional cu ta enfoca riba apoyo na iniciativa periodistico.

E bishita di Wensley Francisco y Joëlle Terburg a forma parti di un recorido na diferente isla den Caribe Hulandes, cu meta pa informa y conecta cu periodista y creador di contenido local.

Durante nan estadia na

Aruba, e grupo a organisa un sesion informativo na Biblioteca Nacional, unda a comparti informacion general cu interesado den sector di comunicacion y produccion periodistico.

E iniciativa a enfoca riba apoyo pa desaroyo di proyecto creativo y periodistico, incluyendo diferente forma di “conta noticia”.

E encuentro cu Prome Minister a marca e segundo aña cu e dos partinan a topa, consolidando un dialogo continuo y constructivo.

Durante e reunion, e representantenan a expresa

nan interes pa contribui na fortalecemento di periodismo local. P

rome Minister Mike Eman a gradici e disposicion di e grupo pa comparti conocemento y explora oportunidadnan pa colaboracion, resaltando importancia di medio di comunicacion independiente den un sociedad democratico.

E encuentro a mantene un caracter general, enfoca riba intercambio di idea y cooperacion potencial. Bou liderazgo

di Prome Minister, Aruba ta sigui promove dialogo constructivo cu partnernan internacional, reconociendo cu intercambio di conocemento y colaboracion ta contribui na fortalecemento di sector clave den sociedad.

Durante reunion cu ehecutivonan Minister Wendrick cicilia enFocando riba turisMo crucero cu Mas iMPacto Pa e localnan

Oranjestad, Aruba – Durante Seatrade Cruise Global na Miami, Minister di Turismo, Transporte y Labor mr. Wendrick Cicilia tabatin un encuentro productivo cu ehecutivonan di crucero conhuntamente cu delegacion di Aruba, entre nan Marc Figaroa, Ronella Croes, Philippe La Reine, Mario Arends, Patrick Melchior, Monica Bos y Rowin Bisslik. E reunion a enfoca riba fortalece e impacto di turismo crucero riba economia local.

Durante e reunion, Minister Cicilia a ripiti su vision di move den direccion di un modelo di turismo basa riba balor, poniendo prioridad riba gasto promedio mas halto pa bishitante en bes di un aumento desproporcional den volumen. Den e cuadro aki, el a enfatisa cu

Aruba ta confronta un presion significativo como destinacion madura, exigiendo un crecemento balansa y sostenibel.

Un di e puntonan clave di e reunion tabata crea mas oportunidad pa negoshinan local beneficia directamente di turismo crucero. Tambe a papia riba e posibilidad pa incentiva e bishitantenan pa prolonga nan estadia pa experencia mas di loke e ofertanan local tin di ofrece, incluyendo iniciativanan manera Ban Bek Caya y Carubbian den e cayanan di San Nicolas.

Den anticipacion di e iniciativa di Cruise Connect, Minister Cicilia a enfatisa e importancia di involucra un cantidad mas grandi di operadonan di tour local, garantisando

un participacion mas amplio y mas balansa dentro di e cadena di balor di e sector.

Tambe a trata e concepto di “Marine Rest Day”, un medida dirigi na promove sostenibilidad y proteha e recursonan natural di nos isla, alinea cu e esfuersonan di gobierno pa garantisa desaroyo turistico responsabel.

Minister Cicilia a reafirma su compromiso pa garantisa cu e beneficionan di turismo crucero ta traduci den oportunidadnan y prosperidad mas grandi pa e comunidad local. “Nos enfoke ta cla; turismo cu ta genera balor real pa nos hendenan, mientras ta proteha loke ta haci Aruba unico”, Minister Cicilia a enfatisa.

E AÑA ESCOLAR 2026 - 2027

Oranjestad, Aruba:

Inscripcion ta habri na SKOA pa muchanan y alumnonan cu ta bay cuminsa basis y mavo. Mayornan por inscribi nan yiunan na un scol cu ta resorta bou di SKOA pa asina sigura nan luga e aña escolar venidero.

E meta primordial na SKOA tapa enfoca ariba e desaroyo y crecemento di cada mucha y alumno. Skoa ta ofrece educacion

di calidad cu ta enfatisa ariba e balornan Catolico, comunicacion na nivel multilingual, diversidad, innovacion y actividadnan extra-curicular. Ademas mayornan por scoge e scol pa nan yiu pa asina sigura cu nan ta bon prepara pa nan futuro.

Inscripcion

completamente online Por inscribi via website www.skoa.aw pa asina inscribi completamente

online. Ora di inscribi mester pone bon atencion ariba e documentonan necesario pa asina por cumpli cu e proceso di inscripcion di cada yiu exitosamente. Pa mayornan cu ya caba tin yiu inscribi na SKOA por haci inscripcion di e yiu cu ta bay cuminsa basis via nos systema di SAS.

Contribucion di mayor E tarifa di contribucion di mayor pa e proximo aña escolar pa basis y mavo: ● Pa basisschool schoolgeld ta Awg. 275,- y airco geld ta Awg.150,● Pa mavoschool schoolgeld ta Awg. 350,- y airco geld ta Awg.150,-

Tur mayor cu inscribi nan yiu(nan) ta haya un periodo di 6 siman pa asina por cumpli cu e pago completo di schoolgeld pa e aña escolar venidero. Despues di 6 siman, si e pago no ta completo, e cupo di inscripcion ta wordo cancela cu consecuencia cu no lo bay tin un luga sigura na un scol pa e yiu por cuminsa eerste klas e proximo aña escolar.

Pa pregunta of informacion tocante inscripcion pa eerste klas na SKOA por manda un email na aplicacion@skoa.aw of manda un WhatsApp na +297 7485995. Pa cualkier otro pregunta of informacion tocante

inscripcion en general na SKOA por bishita nos website www.skoa.aw of por yama na liña directo 5231800. Mayornan cu ta desea por pasa libremente na nos oficina pa inscripcion. 04/2026

SUDOKU SOPI DI LETRANAN

Un feliz comienso di weekend colma cu hopi amor y bendicion di Dios.

Stima Señor, bo Dios, di henter bo curason, cu henter bo alma, cu henter bo mente, y cu tur bo forsa. E di dos mandamento mes importante: ”Stima bo prohimo manera cu bo ta stima bo mes. No tin ningun otro mandamento cu ta mas importante cu esakinan.” (Marco 12, 30-31)

Dios a crea bo segun su imagen, a duna bo e mesun capacidad pa stima, a supla den bo e mesun rosea di amor. Si bo ta cristian, bo tin cu tuma e antorcha di amor for di Cristo, carge cendi durante henter bo bida, y pase despues na bo yiunan, na bo amigonan y coleganan. E antorcha di amor aki tin cu pasa di man pa man, tin cu cende cas pa cas, ilumina curason pa curason y mente pa mente. Scuridad tin miedo di e antorcha di amor aki. Unda e antorcha aki ta cendi scuridad ta dirti bira nada, manera pida ijs. T’esaki ta amor: no ta nos a stima Dios prome, sino t'E a stima nos y a manda su Yiu pa E bira sacrificio pa pordon di nos picanan. (1Huan 4,10) Solamente ora bo ta descubri e tesoro cu ta den bo paden cu yama amor y solamente ora bo ta entrege na otro, lo bo ta feliz.

Oracion: Señor guia mi y proteha mi den Bo cosnan di haci di tur dia. Pa bo Amor ta semper hunto cu mi. Bo promesa ta real! No obstante ki tribulacion mi haya mi aden, mi sa cu Dios no ta laga mi bandona, den nomber di Hesus di Nazaret. Amen.

Mary Joan Foundation ta cuMinsa cu proyecto

nobo “chekeo den bo bario”proMe edicion:

25 di april 2026 na savaneta

Proyecto: Chekeo den Bario

Mary Joan Foundation ta lansa un proyecto nobo di salud cu e nomber “Chekeo den Bario”. Cu e iniciativa aki, e fundacion ta busca di trece cuido di salud mas cerca di nos comunidad y baha e barrera pa bishita un dokter di cas. Nos ta cuminsa na Savaneta riba diasabra 25 di april 2026, na MFA Savaneta, for di 8:00 di mainta te 12:00 di merdia. Despues di esaki, e proyecto lo sigui tur luna den un bario diferente.

Meta di e proyecto

Meta principal di “Chekeo den bo Bario” ta pa haci cu atencion medico bira mas accesibel pa tur hende.

Mary Joan Foundation a nota cu alrededor di 20% di e bishitantenan tin un anomalia of irregularidad den nan pecho. Den e caso ey, nos dokternan ta referi nan mesora na dokter di cas pa investigacion y examen adicional.

Participacion ta completamente gratis

Participacion ta completamente gratis, y no ta necesario pa bo ta inscribi na AZV pa participa den e chekeo aki. Chekeo tambe ta pa hende homber

Mary Joan Foundation kier pone enfasis cu e chekeo aki ta destina tanto pa hende muhenan como pa hende hombernan. Hopi biaha hombernan ta pensa cu chekeo di pecho ta solamente pa hende muhe, pero esaki no ta berdad. Hende homber tambe por tin irregularidadnan y mester presta atencion na nan salud.

Invitacion

Nos ta invita tur habitantenan di Savaneta y San Nicolas pa pasa y haci nan chekeo. Si bo ta prefera pa haci bo cita adelanta, bo por manda un e-mail na maryjoanfoundation@setarnet.aw.

Cu e proyecto aki, Mary Joan Foundation ta spera di yuda mas hende na un manera tempran, detectando problemanan di salud na tempo, y facilita acceso pa siguimento medico ora cu esaki ta necesario.

Informacion practico

Proyecto: Chekeo den bo Bario

Fecha: 25 di april 2026

Luga: MFA Savaneta

Ora: 8:00 AM – 12:00 PM

Costo: Gratis

Inscripcion na AZV ta necesario?: No Pa cita of mas informacion: maryjoanfoundation@setarnet.aw

Drenta su portanan cu gradicimento

Drenta su tempel cu canticanan di alabansa.

Glorific’e bendiciona su nomber

Salmo 100:4

A bay sosega cu un bunita edad di 94 aña:

Na nomber di su:

Yiunan:

†Franklin “Bagadjan” Maduro

†Milda Croes-Maduro

Reymundo “Maikel” y Elvira Maduro-Roza

†Robert “Robby” Maduro

Judith y Jimmy Tromp-Maduro

Mario “Ricky” y Linda Maduro-Zahler

Nieto(a)nan:

Jesica y Humphrey Franken-Maduro

Michelle y Sendy Farro-Maduro

Michael “Maikito” Maduro y Jessica Kock

Mildenny Croes y Shannon Silberie

Julia Tromp y Wilman “Ashrok” Reyes-Perez

Julian Tromp

Jôya Tromp

Bisanieto(a)nan:

Humphrey J. y Jearyselle

Gwendelyn y Daniel

Philip, Gerslyn

Q-chella, Q-elisa

DeSean, DeQuion

Tataranieto(a)nan:

Hailey-Jaë, Sophia, Daniel

Rumannan:

†Marianita Willems

†Francisco “Chico” Willems

†Vicente “Chento” Willems

Vda. Juju y †Hendrick Croes-Willems

Cornelia Maduro-Willems

Viuda di Mario Maduro Cariñosamente yama “Nea, Abelita, Awela” *17-02-1932 - †11-04-2026

†Victoriano “Tojanchi” y †Nora Willems-Danies

Carmen y Lu Dabian-Willems

†Ina y †Chano Flanegin-Willems

Vda. Sita y †Wilbert Roos-Willems

†Florencio Willems

Sobrino(a)nana:

Mariska, Stuart, Jozef, Hendrick Jesus, Francisco Miguel, Judelly, Win, Aldrin, Aymar, Amelaine, Janine, Vincent, Noraima

Ayudante: Diana Ventura

Primo- y primanan, ihanan, comer y compernan, bon bisiñanan di Ponton, amigonan y conocirnan.

Demas Famia: Willems, Maduro, Gomez, Comenencia, Vrolijk, Roza, Croes, Tromp, Zahler, Franken, Farro, Kock, Silberie, Reyes Perez, Danies, Celestina, Dabian, Flanegin, Roos, Zavala, Trimon, Restrepo, Vaca Ruiz, Wever, Orman, Martha, Pietersz, Quandus, Kelly.

Ta invita pa acto di condolencia y entiero cual lo tuma lugar na Misa San Francisco na Playa diaranson 22 di April 2026 di 2or pa 4or di atardi. Despues lo sali pa Santana Catolico na Playa. Disculpa nos

Hoben nan di Leo CLub aruba y rainbow for GirLs a HaCi Limpieza na beaCH di arasHi

Diasabra 18 di April ultimo, mainta trempan

LEO CLUB, bao liderazgo di nan Presidente Leo Cassandra Trimon, cu colaboración di Sra. Gesina Fung-AFat, kende ta Chairperson di e Organización

Internacional

Rainbow for Girls como advisor di e directiva y bao di supervision di miembronan di Aruba Lions Club, a hasi un gran parti di e area limpi na e Beach di Arashi. E evento a ser organiza den cuadro di e celebracion di dia di

MAMA TERA cu ta riba 22 di April proximo y ta tambe den e cuadro di un di e causanan di Lions Club

International cu ta Medio Ambiente. Ta importante pa tene nos hobennan na altura di e importancia di nos medio ambiente.

Cu determinacion y hopi entusiasmo nos hobennan a participa e mainta aki y a

recolecta bastante sushi. Tabata un mainta divertido, exitoso, educativo pa mustra e importancia pa mantene nos beach y e area rond limpi, no solamente pa nos mes localnan pero tambe pa nos bishitantenan ta den un ambiente saludabel y sigur.

Despues na final di a recolecta mas di 40 saco di sushi y contento di nan projecto existoso nan por a

saboria un dushi desayuno. Un projecto asina no por ta exitoso sin nos hendenan cu ta copera y sponsor nos hobennan cu nan projectonan. Pa e motibo aki nos kier yama un “Danki” na Sr. Eddy de Veer y Ecotech Aruba pa contribui cu e container pa nos por a deposita e saconan di sushi, na FL Lisa y FL Gilbert pa a contribui cu e desayuno, FL Igor Croes cu a transporta Leo’s nan y FL Presidente Edmar Lopez, nos Leo Advisor FL DietjeMaduro, FL Vanessa Olive, FL Mirla Koolman, FL Carolina Figaroa y FL Gerardo Figaroa pa nan presencia y nan guia durante e mainta aki.

E tres organisacionnan aki lo sigui traha hunto riba proyectonan similar pa e comunidad di Aruba. "We Serve"

Na nomber di Aruba Lions Club nos ta gradici e cooperacion pa e