Parlamentario Edgard Vrolijk
Avestruz:
Minister Geoffrey Wever ta lansa “entrepreneurs policy” y “export policy” pa acelera diversificacion econoMico y fortalece posicion internacional di aruba
Oranjestad, 2 maart 2026 - Minister di Finansa, Asunto Economico y Sector Primario, mr. Geoffrey Wever, ta presenta oficialmente e Maneho pa Empresarionan (Entrepreneurs Policy) y e Maneho pa Exportadonan (Export Policy). E dos manehonan aki ta forma un cuadro strategico integra cu lo acelera diversificacion economico, fortalece competitividad y amplia participacion di companianan local den mercado internacional. E iniciativa aki ta un paso concreto den ehecucion di e Programa di Gobernacion AVP-FUTURO 2025–2028, cu ta pone enfasis riba diversificacion economico, innovacion y desaroyo di un economia duradero.
Un economia resistente mester ta basa riba mas di un solo pilar. Cu e Entrepreneurs Policy y Export Policy, Gobierno ta crea un fundeshi solido pa mas iniciativa local, mas crecemento y mas presencia internacional di nos empresarionan. Negoshinan chikito y mediano (SMEs) ta representa 96% di negoshinan activo na Aruba, ta genera 42% di empleo den sector priva y 36% di salario na nos pais. E Maneho pa Empresarionan ta establece un roadmap cla pa elimina obstaculonan, simplifica proceso y stimula iniciativa comercial riba henter e isla. E maneho ta enfoca riba fortalecemento di educacion y entrenamento pa empresarionan y empleadonan, adaptacion na cambio tecnologico, simplificacion di proceso administrativo, reduccion di carga reglamentario, mehora acceso na financiamento y refuerso di servicio di sosten y desaroyo empresarial. E meta ta pa
crea un clima di hasi negoshi mas eficiente, accesibel y competitivo, unda SMEs por crece y amplia nan impacto economico.
Paralelamente, e Maneho pa Exportadonan ta dirigi riba un meta strategico concreto: diversifica e economia di Aruba fuera di turismo y converti exportacion den un growth pathway mas accesibel pa mas negoshinan local. E maneho ta reconoce cu Aruba mester amplia e cantidad y diversidad di empresanan cu ta exporta producto y servicio, particularmente SMEs cu tin potencial pa drenta mercadonan regional y global. Pa logra esaki, Gobierno lo cultiva un cultura pro-export, fortalece sosten institucional pa exportadonan nobo y exportadonan den etapa tempran, reduci gasto, riesgo y bareranan practico, y mehora coordinacion y claridad den proceso di exportacion. Atencion especial lo wordo duna na exportacion di servicio y actividatnan digital, como oportunidad real pa diversificacion economico.
“No por depende solamente di un sector. Exportacion mester bira un growth pathway real pa mas negoshinan local. Esaki ta parti di nos vision pa un Aruba mas diversifica, mas innovador y menos vulnerabel,” asina Minister Wever a expresa.
E dos manehonan aki ta integra den un strategia economico mas amplio cu ta inclui maneho fiscal pa desaroyo di Oranjestad y San Nicolas, ahustenan den acuerdo pa starters, modificacion den trato fiscal di beneficionan
secundario di empleo y decreto nacional tocante actividadnan di servicio permiti den zona liber. Implementacion lo wordo ehecuta door di colaboracion estrecho entre ministerio, partnernan institucional y sector priva, cu enfasis riba coordinacion, comunicacion y revision periodico pa garantisa progreso y resultado concreto.
Minister Wever ta gradici y felicita e team completo na DEZHI cu a traha duro ariba e dos policynan aki cu lo tin un impacto positivo pa e economia y entrepeneurs di Aruba.
Cu e Entrepreneurs Policy y Export Policy, Gobierno ta reafirma su compromiso cu un economia mas resiliente, mas competitivo y cla
pa futuro, unda empresarionan local por cuminsa, crece, innova y competi den mercado internacional. E Entrepreneurs Policy y Export Policy ta publica riba varios lugar online, E Entrepreneurs Policy y Export Policy lo wordo publica riba e website di Directie Economische Zaken (www.deaci.aw ), IDEA (www.idea.aw ), Exprodesk (www. exprodesk.com).
Parlamentario Edgard Vrolijk na Minister Gerlien Croes: Minister tin cu duna cuenta: transparencia no ta un opcion, e ta un obligacion legal
ORANJESTAD – Durante e reunionnan di IPKO cu a tuma lugar fin di Februari, tawata tin un tema cu a resalta bou di e delegacion Hulandes: e biahe den jet priva di Minister Gerlien Croes. Den combersacion cu dos ex-huez, kendenan tin un bista skerpi riba e materia aki, nan a expresa cu tin dos punto critico cu Minister Croes no por sigui ignora: transparencia absoluto y e reglanan estricto riba regalonan (gifts) pa un mandatario den funcion.
Un insulto na nos Constitucion y e derecho di Parlamento
Ta un berguensa nacional cu un Parlamentario mester acudi na un peticion di LOB (Ley di Openbaarheid van Bestuur) pa por haya informacion cu mester ta publico y accesibel. Den un democracia saludabel y den e resto di Reino, ta un norma cu un Minister ta duna cuenta di su biahenan y gastonan sin pone tanto ‘pero’ na e asunto. Articulo III.16 di nos Constitucion ta duna un Parlamentario e derecho sagrado di ricibi informacion. Preguntanan manera "Cuanto e jet a costa?" y "Ken a pag’e?" ta simpel, directo y fundamental. Si Minister Croes ta afirma publicamente cu e mes a paga pa e biahe di trabao aki, e ora e tin e obligacion moral y legal di duna e prueba di pago. Transparencia no ta wordo bisa cu palabra, e ta wordo demostra cu
recibo.
E bista riba Ley di Integridad: Un regalo of un infraccion?
Si e Minister no por prueba cu e mes a paga, e situacion ta bira legalmente precario. Conforme e Ley di Integridad, un biahe asina ta keda categorisa como un "gift" (regalo). Articulo 13 di e ley aki ta prescribi cu mester declara cualkier regalo dentro di un termino rasonabel. E termino ey a caduca caba.
Mas ainda, e Ley di Integridad ta dicta cu e Prome Minister mester informa Parlamento si un mandatario a ricibi regalonan. Esaki no ta un cuestion di "persigui" un Minister mane Minister Gerlien Croes kier pretende. Esaki ta un cuestion di exigi cumplimento cu e ley cu nos mes a vota pe den sala di parlamento. Ley ta ley, y pa un Minister, e mester ta e prome pa duna e ehempel.
E Codigo di Conducta: E limite di 250 florin
Un otro punto unda e Minister ta den un disputa legal ta e Gedragscode (Codigo di Conducta) vigente pa ministernan. Articulo 5 ta bisa bon cla: un Minister y su pareha mester registra tur regalo. Sea ta placa, servicio, of un buelo den jet priva.
• E regla di oro: Si e regalo ta bal mas cu 250 florin, e Minister tin e deber legal di nenga esaki. Un biahe den jet priva ta costa miles di florin. Pues, pa cuminsa, legalmente e no por ni wordo
"registra" pasobra e ta surpasa e limite permiti. Si e Minister a acepta e biahe aki como regalo, el a actua contra e Codigo di Conducta. Si e mes a pag’e, pakico e tin miedo di mustra e transfer anto?
Conclusion: Entre integridad y e berdad
Minister Gerlien Croes ta kibrando un derecho constitucional door di keda sin duna informacion. Den Reino esaki ta inaceptabel. Ora un
Minister declara cu e mes a paga, e ta pone su mesun integridad den wega.
Si e no presenta prueba di e pago, e ora e ta admiti cu el a faya cu e Ley di Integridad y e Codigo di Conducta. “Minister Gerlien Croes, como Parlamentario, mi no ta perisgui y mucho menos pidi un fabor, mi ta simplemente exigi pa e ley wordo respeta. Pueblo merece transparencia, no excusa,” Vrolijk a termina bisando.
Noticia di Corte
30 y 18 luna di prison pa pareha envolvi den bendemento di lote miyonario di
ORANJESTAD – Den Corte di Husticia a trata e caso penal cu Ministerio Publico a cuminsa contra e homber J.O.T.y e muher V.V. Ambos ta wordo acusa cu entre 1 September 2025 y 23 September 2025, intencionalmente nan tabata bende, transporta of posecion di marihuana.
SOLO DI PUEBLO por a compronde cu Polis a confisca un lote miyonario di marihuana. Ta trata aki di 282 kilo cu a haya den un cas na Zeewijk. En realidad e lote tabata 350 kilo pero e otro parti a wordo entrega caba na otro hendenan.
BENDEMENTO DI PAKINAN DI MARIHUANA
Hues a puntra J. si e acusacion ta berdad y J. a admiti cu el a suministra marihuana. El a bisa cu 4 biaha el a transporta marihuana di un lugar pa otro. Tambe el a duna amigonan dos pa tres biaha marihuana. El a bisa Hues cu nunca el a haya pago pa e transporte di marihuana. El a bisa cu e homber Venezolano tabata yam’e y e tabata haya tas cu marihuana pa hiba na un lugar. Hues a puntr’e si e tabata bay busca e droga y si e tabata haya placa. J. a splica cu tur cos tabata depende unda J. tabata. Tin biaha e Venezolano ta hiba e droga p’e. Ta trata aki di pakinan di 1 kilo di marihuana. El a bisa cu e tabata cumpra for di e Venezolano pa 8 aña. Segun J., e tabata huma hopi marihuana y e tabata haya marihuana como pago pa e transportenan cu e tabata haci. Hues a puntra J. cuanto droga el a haya. J. ta calcula cu el a haya 200 pa 300 gram cu segun J. ta
mas o menos 300 pa 400 florin. Hues a puntr’e si e tabata bende cu amigonan. J. a splica Hues cu amigonan tabata pidi’e pa droga y e tabata contact e Venezolano y e Venezolano tabata trece e droga p’e y e tabata hiba e droga pa e amigonan. El a splica cu hopi biaha tabata 10 gram cu ta 80 florin. Hues a remarca cu e 300 gram cu J. tabata haya ta 2400 florin y no mas o menos 300 pa 400 florin. Hues a remarca cu si J. tabata tuma cen di amigo y bay cumpra for di e Venezolano, esey ta wordo considera como un bendedor. Segun J., e no tabata bende.
282 KILO DI MARIHUANA CONFISCA
J. a bisa Hues cu el a acerca e dama V., cu tabata un colega di trabao na un hotel, pa warda e lote di marihuana. Segun J. via V. el a papia cu e Jamaiquino pa e Jamaiquino y e Venezolano papia y yega na un palabracion pa warda e lote di droga. V. a declara cu ta e Jamaiquino a pidi’e pa warda e droga. Segun V. e conoce e Jamaiquino pa basta tempo. El a bisa Hues cu el a haya un yamada di un Venezolano pero e no conoce. El a bisa Hues cu el a bisa e Venezolano pa papia cu e Jamaiquino y despues e Jamaiquino a pidi V. pa warda droga p’e. Segun V., e lo a haya 5 mil florin pa warda e droga. Ariba pregunta di Hues, el a bisa cu e no tabata sa cuanto droga el a haya pa warda. Hues a remarca cu Polis a confisca 282 kilo di marihuana na e cas di V. Segun V., e no a haya pago. El a splica Hues cu e Jamaiquino tabata yam’e y bis’e cu tin hende ta bay busca droga. E persona tabata
marihuana -1-
whatsapp V. y V. tabata hiba e paki di droga na e persona y e persona ta paga. Despues e Jamaiquino tabata busca e placa serca V. Hues a mustra cu Polis a haya un schrift cu anotacionnan di droganan cu tabata wordo busca y cuanto droga y cuanto placa. V. a bisa Hues cu el a haci’e door di necesidad di placa pa paga school pa su yiunan. Hues a bisa cu e total di droga ta mas o menos 1 miyon florin. Ta calcula cu original tabatin 350 kilo di marihuana y un parti ya a wordo entrega caba. Ta asina cu J. tambe a bay 6 biaha busca paki di droga for di V. Hues a bisa cu tin 4 hende ta bisa cu a cumpra for di J. Segun J. e no tabata bende. E tabata yuda nan haya e droga.
FISCAL A EXIGI 30 Y 18 LUNA DI PRISON
Fiscal a bisa Hues cu dia 21 September 2025, Polis a detene J. cu tabatin marihuana den su poder. Den J. su cellular a mira potretnan di bultonan di marihuana. A haya
chat den J. su cellular cu e dama V. Investigacion a mustra cu e droga tabata warda na un cas na Zeewijk unda V. tabata keda. Despues a bay na e cas unda V. a keda. A haya 506 paki di droga y tambe un schrift di administracion cu V. tabatin. Fiscal a bisa cu en total mas di 285 kilo di marihuana a keda confisca. Tanto J. como V. a admiti. V. su funcion tabata pa warda e droga y tene administracion di e droga y placa. J. tabata transporta droga pa hende. Na opinion di Fiscal, en total ta 6 biaha J. a bay busca droga for di V. y hiba pa otro. En total 139 paki di droga J. a bay entrega.
Fiscal ta haya cu nan ta complice di posecion, transporta y bende droga. El a sigui bisa cu cada un tabatin un funcion den e asunto aki. Fiscal a mustra cu e usamento di marihuana ta causa adictonan di droga cu ta crea criminalidad y miseria den famia. Continuacion pag. 6
Parlamentario Endy Croes riba caso Avestruz: CorupCion tin un prijs y abo ta pagando p’e!
Mientras aMigonan di aVp tabata goza, pueblo a keda sin tereno pa traha Cas
ORANJESTAD – Segun nos ta acerca e veredicto final di Caso Avestruz na april proximo, Parlamentario Endy Croes ta recorda pueblo cu corupcion miyonario di AVP no ta djis un storia di pasado, sino un daño cu nos ta sinti te awe. "E corupcion aki a horta e futuro di bo yiu y di bo nieto," Croes a declara, mustrando e documentonan oficial di caso Avestruz.
E "Modus Operandi" di Caso Avestruz: Amigonan prome, Pueblo ultimo
Caso Avestruz ta e prueba di con un "gang" (grupo) sera di amigonan a enrikece nan mes cu loke ta di nos tur.
• E deal: Benny Sevinger tabata duna terenonan comercial grandi na un grupo selecto di amigonan contra tur regla.
• E benta: E amigonan aki tabata bira bende e NV mesora pa miyones di florin cu stranhero.
• E fabor: A cambio, Minister tabata ricibi "regalo" manera e fiesta di 15 aña di su yiu den ballroom di hotel.
Kico esaki ta nifica pa ABO, e ciudadano?
Parlamentario Croes a splica cu hopi hende ta pensa cu esaki ta un caso di corupcion di Gobierno y cu ta na Gobierno pa ‘deal’ cu e asunto. Pero e realidad ta doloroso, e caso aki ta afecta abo directamente:
1. Falta di tereno pa cas: Mientras Benny tabata regala hectarnan di tereno na su
amigonan pa nan bende y bira miyonario, awe abo mester warda 10 pa 15 aña riba un lista di espera pa un pida tereno pa traha un cas pa bo famia. Nan a bende bo derecho di tin un hogar pa nan mesun beneficio.
2. Costo di bida mas halto: Ora amigonan di AVP bende tereno di pueblo pa miyones di dollar na inversionistanan stranhero, e prijs di tur cos rond di dje ta subi. Esaki ta un di e motibonan pakico bida a bira asina caro pa nos tur.
3. Mega Debe: E placa cu mester a drenta den caha di
gobierno pa drecha bo caya gelapi, e scol di bo yiu, of bo centro di bario, tur e placa aki a bay den saco di e "gang" di Avestruz.
"Premium Brands" riba bo custia Den e dossier legal (pagina 38), Pristine Estates (Holiday Inn) a admiti di a paga USD 7.968,89 pa e fiesta di 15 aña di e yiu di Benny Sevinger.
"Imagina bo," Croes a bisa, "mientrastanto bo ta lucha pa paga bo recibo di awa y coriente, e elite di AVP tabata goza di alcohol di 'Premium Brands' paga pa
doñonan di hotel cu tabata busca fabor di Minister."
Un aviso pa luna di Maart Endy Croes a manda un aviso cla: "Tene boso toontjie lager." Durante luna di Maart, e lo sigui desmantela e caso aki pida pa pida. "Pueblo mester sa cu e falta di tereno pa bo yiu awe, tin un nomber, un fam y un partido politico: Benny Sevinger y AVP. Den April, husticia lo papia: Husticia por tarda, pero e ta yega si!"
30 y 18 luna di prison pa pareha envolvi
den bendemento di lote miyonario di
Fiscal a exigi a base di maneho di Hulanda, pa V. 30 luna di prison y pa J. 18 luna di prison. Fiscal a bisa cu e placa cu a keda confisca na cas unda V. tabata keda y e schrift mester keda confisca. Pa loke ta J., e placa, e cellular y tas cu droga ta keda confisca.
ABOGADO
Abogado mr. Canwood a bisa Hues cu J. a admiti tur cos y no tabata haya pago sino un tiki marihuana pa su mesun uso. E abogado a mustra cu ta promer biaha cu J. ta cay cera y su funcion den e caso aki tabata transporta e droga y a laga e Venezolano y Jamaiquino papia. E abogado ta haya cu J. y V. a wordo usa pa e Venezolano y Jamaiquino. E abogado a bisa cu
marihuana -2-
e placanan cu a haya di J., ta placanan di tips cu e tabata haya di su trabao na hotel. El a pidi Hues pa J. por haya e placa. Abogado ta haya e castigo exigi pa Fiscal ta na su lugar.
Abogado mr. Kuster a bisa Hues cu V. a admiti tur cos. E tambe no tabata bende sino a wordo usa pa warda e droga y haci administracion. Na opinion di mr. Kuster, J. y V. a wordo usa pa hendenan cu ta experencia pa esaki. El a bisa cu V. a wordo priminti 5 mil florin pero V. no a haya esaki. E abogado a bisa Hues cu e placa cu Polis a confisca ta placa cu V. a gana como waiter y el a pidi Hues pa V. haya e placa bek y ta laga e decision di castigo den man di Hues.
SENTENCIA
Hues a sera tratamento di e caso y a pospone e caso pa bay pensa. Despues di un rato Hues a bolbe y a dicta sentencia di biaha. Hues ta haya legalmente proba cu J. y V. ta complice di bende, transporta y posecion di marihuana. Hues a bisa cu e comportacion aki, J. y V. a mantene e circulacion di marihuana. Hues a bisa cu e ta tene cuenta cu maneho di Corte. El a mustra cu segun maneho, pa un mula di 25 Kilo di marihuana ta 21 luna di prison. Sinembargo, Hues a confirma e exigencia di Fiscal pa J. y V. Hues a hala nan atencion cu en realidad e castigo mester ta hopi mas severo. Pa loke ta e placa, cellular y schrift, Hues a bisa cu nan lo keda confisca.
Entre 9 cu 13 di maart na Carnival Village yamada pa scolnan, gruponan di baile, instancianan y fundacionnan cultural participa den feria patriotico
Comision Celebracion
Dianan Nacional (CCDN) ta extende un invitacion na henter comunidad pa asisti n’e grandioso Feria Patriotico cuminsando riba 9 di Maart 2026 te cu dia 13 di Maart 2026. Durante e Feria Patriotico aki por disfruta di diferente tentnan conoci pa nan cuminda y pasabocanan crioyo, arte y articulonan pa celebra nos dia di Himno y Bandera. E biaha aki CCDN a aserca entre otro scolnan basico y secundario, gruponan di baile, instancianan y fundacionanan cultural pa forma parti di nos celebracion historico den diferente forma manera creatividad den arte,
declama poesia, baile, canto y mucho mas.
Scol secundario por laga nan alumnonan participa den forma di boluntario pa asina laga e hobennan haya mas experencia den e parti logistico pa cu nos eventonan cultural. Scol basico y secundario tambe por participa den e parti artistico (baile, canto, declama poesia, Teatro y mas). Instancianan cultural y social tambe ta forma parti di e feria cultural den forma di un exposicion di Bon Comun caminda lo tin nan booth pa expone nan producto y/of servicio y duna informacion na publico general.
Mirando cu nos ta celebrando 50 aña di nos Himno y Bandera y 40 aña di Status Aparte, Gobierno di Aruba a opta pa expone y celebra esaki grandemente e biaha aki cu mas dia, pa asina comunidad henter por disfruta den un ambiente di celebracion. Entrada pa e Feria Patriotico ta completamente gratis. Esaki lo tuma luga riba e fechanan menciona na Carnival Village na San Nicolas di 7:00 pm10:00 pm.
E Feria Patriotico lo conta cu musica, baile, arte, canto y demas actividadnan cultural
pa entretene tur presente cu un ambiente cultural y patriotico.
Tur cu ta desea di participa na e Feria Patriotico por haci uzo di e siguiente linknan, tuma nota cu e link ta sera dia 4 di maart 2026; https://forms.office.com/r/ fnD344TihV (boluntario den e parti logistico)
https://forms.office.com/r/ fnD344TihV (artistico den cualkier forma den e programa)
Bin cu famia y celebra nos 50 aña di Himno y Bandera y 40 aña di Status Aparte grandemente den un ambiente familiar y cultural den Carnival Village.
Parlamentario Xiomara maduro ta haci aPelacion Pa madurez
Politico den maneho di salubridad
Gobernacion ta exigi madurez di parti di su mandatarionan. Ora un hende ta ocupa un puesto ministerial, e no por keda actua ni pensa manera si e ta den oposicion, y pa
colmo sin bin cu solucion concreto. Un minister mester por compronde e raiz di un problema y sa di distingi claramente kico ta un medida y kico ta un solucion structural.
Durante e reunion publico riba e situacion di nos grandinan, Parlamentario Xiomara Maduro a critica e hecho cu Minister
Mervin Wyatt-Ras ta keda pone enfasis y papia di “medida, medida”manera e tabata haci den oposicion. Sinembargo awe como minister, sra Wyatt Ras tin otro responsabilidad y ya caba mester cuminsa mustra dominio di su ministerio y madurez politico den su decisionnan.
Parlamentario Maduro ta referi specificamente na e expresion di Minister Wyatt Ras riba ‘medida di corta den medicina”. Ta parce cu ainda e Minister no a compronde cu e “medida di corta den medicina” tabata e prome condicion cu Hulanda a impone pa Aruba haya yudansa financiero den pandemia. Un condicion cu a afecta hopi hende, specialmente nos grandinan.
Segun Maduro, si tin madurez politico real, e minister mester a reconoce cu e tipo di medida aki y ehempel duna pa Hulanda, ta rason suficiente pa Aruba bisa “NO” na Rijkswet HOFA. Aruba no por duna Hulanda oportunidad pa bolbe impone medidanan riba nos pueblo y nos grandinan.
E parlamentario a agrega
cu ya caba den hospital ta sigui regla Hulandes na unda un hende ta grandi, no tin mesun balor pa invertí mas den su salud, paso e hende ta “grandi caba”. “Esey no ta nos cultura”, Maduro a enfatisa, mustrando su preocupacion pa e trato y balor cu nos grandinan merece.
Madurez politico, tambe ta exigi pa e minister realisa cu e situacion financiero actual no a surgi di nada. BBO na frontera no a “cay fo’i shelo”, esey mester a bin pa paga pa e debe cu sra Wyatt Ras mes como
Parlamentario a laga Eman yena Aruba cune . Awe, segun Maduro, ta ironia di bida cu e mesun fondonan y mecanismo financiero ta wordo uza pa paga pa proyectonan y duna alivio na nos grandinan.
“Sin placa no por paga debe, no por haci proyecto, y no por haci inversion nesesario pa nos grandinan,” e parlamentario a conclui, insistiendo cu e momento actual, ta pidi pa liderazgo cu responsabilidad, vision y madurez politico na bienestar di Aruba.
Desaroyo cultural y entusiasmo halto Den san nicolas pa celebracion na caminDa
Durante recorido den fin di siman na San Nicolas, Prome Minister Mike Eman a expresa su satisfaccion cu e desaroyo positivo cu ta tumando luga den San Nicolas, specialmente den marco di
Arubiano cu a representa Aruba internacionalmente y cu a gana reconocimiento na scenario mundial.
Segun Premier Eman, e momento aki ta ideal pa reconoce talento local cu a carga Aruba su nomber cu orguyo pa mundo. “E celebracion nacional no ta solamente pa recorda historia politico, pero tambe pa honra nos talento cultural cu a contribui grandemente na identidad di nos pais,” el a enfatisa.
historia y su impacto.
“E ta un artista cu a gana mas premio internacionalmente cu cualkier otro Arubiano. Su musica ta forma parti di e alma di Aruba,” el a indica. Ademas, e celebracion nacional principal di 17 di maart lo tuma luga na San Nicolas, un decision cu, segun Premier Eman, ta reenforsa e importancia di Pariba di Brug como
centro cultural y historico. E reaccion positivo di comunidad a confirma e entusiasmo cu tin pa e evento.
MinIster President Mike Eman a conclui cu e energia, creatividad y liderazgo cu ta surgiendo den San Nicolas, ta un señal cla cu e ciudad ta sigui crece como un pilar cultural y creativo den Aruba.
e celebracion di 40 aña di
Status Aparte y 50 aña di Himno y Bandera.
Un di e punto culminante di e recorido tabata e bishita na e mural dedica na artista local Julio Bernardo Euson, un talento
E mural, situa riba Chocolate City, ta forma parti di un ambiente cultural mas amplio, incluyendo exposicionnan y actividadnan cu ta pone enfasis riba e legado di Euson y cual lo forma parti di e celebracion nacional na caminda. Prome Minister a señala cu hopi hende conoce su musica, pero no tur generacion mas hoben conoce e profundidad di su
Zaida EvEron, E unico SommEliEr di Pan
ORANJESTAD, ARUBA
– 2 di Maart, 2026 –Despues di un aña exitoso riba nivel internacional, Zaida Everon y su panaderia, T2 Sourdough Boutique, a wordo nomina oficialmente como finalista den dos categoria pa e Caribbean Baking Awards 2026: Best Bakery Shop of the Year (Miho Panaderia di Aña) y Best Bread or Dough-Based Product (Miho Producto di Pan).
Everon, kende anteriormente tabata un docente di biologia prome cu el a haci e transicion pa e mundo di pan artesanal, ta e prome Certified Bread Sommelier den nos region. Cu su expertisio den e ciencia di microbiologia, el a logra eleva e nivel di panaderia na Aruba, combinando tecnica profesional cu e sabornan tradicional di nos isla pa crea un marca cu ta resalta pa su precision, calidad superior, y maestria tecnico.
E nominacionnan aki ta
bin despues di un aña 2025 hopi fuerte. Everon a keda reconoci como un di e 16 miho finalistanan den e prome World Bread Sommelier Championship na Alemania, posicionando su mes entre e mihornan den su profesion na nivel mundial. Esaki ta acompaña su Medaya di Oro pa su 'Pan di Tres Maishi' y un Medaya di Brons pa su Brioche Burger Bun na e World Bread Awards USA. Tambe, su pan di Pasco (Stollen) a ricibi un certificado di excelente calidad for di e Instituto Aleman di Pan.
"E nominacion aki ta un victoria pa henter e comunidad di Aruba," Everon a declara. "Riba e prome dia di e campaña so, nos a mira mas di 50,000 interaccion riba social media. Esaki ta prueba cu tin un aprecio profundo pa artesania y e ciencia tras di e pan real. Nos no ta djis traha pan; nos ta crea specimennan di salud pa nos isla."
Sosten di Comunidad & Votacion E ganadornan di Caribbean Baking Awards ta wordo determina pa un combinacion di huesnan den e industria y e voto di e publico. Ta curasha tur hende na Aruba y tur amante di pan pa cast nan voto diariamente te cu dia 1 di April, 2026. Con pa Vota:
1. Bishita e portal oficial: www. caribbeanbakingawards. com/vote
2. Busca e categorianan: Best Bakery Shop of the Year y Best Bread or Dough-Based Product.
3. Selecciona Zaida Everon / T2 Sourdough Boutique.
Tocante T2 Sourdough Boutique Funda pa Zaida Everon como un tributo na su tata, Tito, T2 Sourdough Boutique (T2Pan) ta un atelier di pan di luho na Aruba specialisa den fermentacion largo di
sourdough y Viennoiserie di halto nivel. E panaderia ta conoci pa su precision tecnico y su compromiso pa uza productonan local di Aruba.
Contacto pa Prensa: Zaida Everon Doño / Bread Sommelier, T2 Sourdough Boutique Email: [Bo
Email Address] Telefono: [Bo Number di Telefono] Website/Social Media: [Bo Link]
CAft: "Fortalece control riba participacionnan gubernamental"
Oranjestad – Colegio di supervision financiero di Aruba (CAft) ta considera cu e intencion di Aruba pa bira e prome pais den parti caribense di Reino cu ta introduci politica cla pa beneficia maneho di participacionnan gubernamental y dividendonan, ta positivo. E politica aki, hunto cu un codigo di conducta nobo pa bon gobernacion (corporate governance code) por
di Aruba (RdA) a tuma luga cu condicionnan desfaborabel. Den caso di e prestamonan cerca AWSS, a interveni na tempo, entre otro riba conseho di CAft. P'esey ta importante pa distribui e rolnan adecuadamente; Minister di Finanza ta fungi como propietario na nomber di Gobierno, e sobra Ministernan ta duna encargo, y e companianan ta ehecuta esakinan. Di e manera aki ta laga cla ken ta responsabel pa kico.
yuda Aruba pa reconoce riesgonan financiero cerca companianan estatal den un fase mas tempran, y pa saca mas resultado y rendimento social di e companianan aki. Considerando experencianan anterior, den e marco aki CAft ta enfatisa e necesidad pa efectivamente implementa e politica aki, y aplica esaki den practica.
Politica di participacionnan Companianan den cual gobierno tin participacion, ta importante pa e pais, pero nan ta trece riesgonan financiero tambe. CAft a presencia varios ehemplo di esaki. Cerca Aruba Wastewater Sustainable Solutions (AWSS) tawata tin intencion pa contrata prestamonan innecesariamente caro, cerca Utilities a emplea dividendonan sin aprobacion di e accionista y e financiamento y destaho di algun proyecto grandi cerca Refineria
Aruba ta den proceso di implementa politica pa e participacionnan aki, cu reglanan pa pagonan di dividendo. Banda di esaki, ta traha riba un ley pa bon gobernacion pa medio di e Ordenanza Nacional Corporate Governance. E marconan aki ta un base fuerte pa miho maneho di companianan estatal, con tal cu ta implementa esakinan, y ta cumpli cu nan consistentemente.
Banda di atencion pa participacionnan gubernamental, CAft ta bolbe pidi atencion specifico pa e situacion di Dr. Horacio Oduber Hospital Aruba (HoH), pasobra e gastonan corespondiente na esaki ta carga pa Gobierno, mientras Gobierno no por interveni como propietario ni accionista. Aki tin riesgonan financiero considerabel y CAft ta urgi Gobierno pa yega na un solucion cu hospital y e propietario.
Proyecto di Ley di Reino Finanza Gubernamental Sostenibel Aruba (RHOFA)
Cu RHOFA, Aruba ta
enfrenta un eleccion importante. RHOFA y e ordenanza nacional corespondiente ta ofrece un marco di referencia pa supervision financiero, y nan ta genera beneficionan di interes pa Aruba. Cu RHOFA, por refinancia prestamonan contrata den exterior mas barata cerca Hulanda y Aruba por registra pa prestamonan nobo cerca Hulanda pa financia inversionnan. Esaki por duna Aruba un beneficio di interes cu ta ascende te AWG 60 miyon pa aña. Esaki ta mas cu AWG 500 pa cada Arubiano.
Maneho financiero CAft ta aprecia e progreso cu Aruba ta haci respecto di resolucion di e retrasonan den e cuentanan anual.
Algemene Rekenkamer Aruba a ricibi tur cuenta anual te cu 2024. E informenan tocante di e implementacion di maneho tambe a keda actualisa. Awor cu a resolve e retraso, mester cuminsa traha pa aumenta e calidad di e informenan. Aki Aruba ta enfrenta retonan considerabel.
Riba 26 y 27 di februari, CAft a bishita Aruba. Durante e bishita aki, CAft a papia cu Gobernador, Ministernan di Finanza, Asuntonan Economico, Husticia, Integracion y Transporte Publico, cu Conseho di Minister, Parlamento di Aruba, Algemene Rekenkamer Aruba y companianan manera Utilities y Refineria di Aruba.
SABIDURIA DEN NOS ALEGRIA
Skirbi pa Ruthy”Lady Ruth” Vrieswijk-Bergen
Bon dia yen di alegria ! Spera cu e dia a habri boso bon cu bon salud, alegria y sabiduria. Nos ta relata awe un crenchi di varios tema. Nos a bay canta karaeokee serca Hilda den Stars na King Plaza y a topa cu un grupo di turista di Michigan USA di cual un pareha entre nan ta biniendo Aruba ya pa 20 anja caba ! Nan tur ta loco cu nos dushi isla, pero e pareha tambe ta nota e cambionan cu no ta tur na Aruba su fabor. Entre otro e cantidad di auto cu ta core riba nos isla ta demasiado hopi pa un isla asina chikito. Un di e sra nan ta un super bon cantante y a deleita nos cu su bunita canto “uit volle borst” manera e dicho hulandes ta bisa. Mi tia Veny Tromp tambe a laga su bunita bos resona y toca e curasonnan presente. Verna Beaujon y mi persona a canta algun bunita cancion ranchera mariachi den duo y tambe como solista. Lady Ruth a canta su repertorio di su canticanan oldies na ingles y a peticion di nos tur, Hilda tambe a canta un super nice cantica na ingles, ki bunita Hilda ta canta ! Nos a pasa super nice den un dushi ambiente. Un super dushi ambiente tawata reina tambe den e studionan di radio Hit 94.1 FM dia
aya y aporta cu amor cu un of mas poema di y pa hende muher. For di awe
13 di februari ultimo cu nan dobbel celebracion. Nan a recorda e fecha natal di e fundador donjo propietario John Alex Habibe, 11 februari, (awe dfm) , conosi como Johnny Habibe The Anchorman cu su bos inigualabel na radio pa hopi anja largo. Lamentablemente Johnny tambe a bay nos dilanti den e reino celestial no mucho tempo atras y awor ta inspira for di ariba su tres prinsesnan Davina, Zina y Zia pa sigui maneha y supervisa e operacion den radio difusion di Hit 94 cu e.o. bon programacion di Junior Dorothal cu Fiesta 94, Brian Urquiza e tecnico pa e programa di diasabra mainta Cita cu Morgan y Stanley, Deporte 94 y Flashback cu Ulysis Maduro, nos bisinja antes den Dakota tur dia. E atardi bunita aki, e simpatico y beautiful Inge Dijkhoff a presenta un programa special dedica na su Omo Johnny Habibe rip. A para keto un rato riba Dia Mundial di Radio (Unesco) 13 di februari ,pa recorda Johnny Habibe The Anchorman su fecha natal 11 februari y tambe e 33 aniversario, (Den aire for di 15 februari 1993) di e emisora Hit 94.1 FM cu dushi bolo, refresco y mas
dushi hapjes. Hopi di nos lectornan por corda tambe cu Lady Ruth tawata hopi biaha den e noticieronan serca Johnny cu semper cu radio y curason habri pa nos informacionnan riba tereno social cultural. Davina, e prinses director actualmente di Hit 94 tin e mesun carisma cu su kerido tata y tambe ta sigi invita Lady Ruth pa bin cu nos informacionnan, pero nos ta un crenchi ocopa ultimamente , pero pronto nos lo cuminsa of sigi bishita Hit 94 pa nos informacionnan positivo cu ta inspira tur rond di nos. Ta hopi dushi ora cu, como pensionado tin varios actividadnan social cultural cu por atende. Nos ta spera di por atende na e actividadnan bunita , organisa den cuadro di Dia Internacional di Hende Muhe 2026 aki
caba nos pabien na nos tur cu e dia bunita aki. Nos por reflexiona riba nos amor y poder cu nos tin como Hende Muhe, na bienestar di nos mes y na henter nos comunidad sin abusa di nos poder, pero use na bienestar , sinya para y mehora bida di y pa muchanan muhe y muhenan cu ta wordo abusa den un of otro forma. Por scucha na e symposium organisa pa Soroptomist International Club Aruba, specialmente pa Dia Internacional di Hende Muhe cu lo wordo celebra Diasabra awor 7 di Maart di 10 am pa 2 pm na Educampus, edificio ex Bon Bini Bazar den caya grandi temanan di gran importancia pa nos tur e.o comprende e diferente traumanan cu por pasa. Oradornan ta :
Clementia Eugene, Sueli Kelly-Quandt y Geraldine Lacle. Pa reserva bo lugar por yama libremente presidente di SICA sra Magaly Maduro na 561 9100 , entrada ta gratis. Un sonrisa !Yama pasobra cuponan ta limita. Lo tin varios standnan cu bunita cositanan na benta y mas. E anja aki CBPP ( Centro di bario playa pabao) lo tin su dushi y caluroso celebracion pa cu Dia di Hende Muhe cu charla interesante riba diabierna dia 6 di Maart cu e dinamico y simpatico profesional den prensa sra. Maritsa Maduro. Bin scucha kico ta kico ora di publica noticia pakico si y pakico no . Kico ta libertad di prensa etc. Lo tin tambe canto, poesia, un dushi treat y mas ! Nos a comprende cu Cede di Mep ta sold out caba cu su charla dedica na salud y bienestar di hende muhe pa Diadomingo dia 8 di maart mes. Lady Ruth su conseho y peticion di curason : Muhenan fuerte, balente, pero bunita yen di amor y ternura pa bo mes y pa comunidad, treat bo mes algo leuk y hasi algo leuk e dia aki. Manera Lady Ruth ta gusta hasi “ Form me to me” Awor, wardando pa Jardin Caribe entrega e bunita arreglo di flor cu nos mes a bestel pa dorna mi 8 di maart. No sinta warda riba otro mande pabo, nan ta lubida. Abo stima bo mes y pone bo mes na prome lugar despues di Tata Dios. Pabien tur hende muhe cu nos dia ! Boluntario, profesional, ama di cas etc. etc. wak pa boso briya e dia aki, mas cu nunca ! Nos a wordo escogi pa bira Mama ! Ta nos ta muhe ! Un fin di siman bendiciona nos dilanti cu celebracionnan pa cu Dia Internacional di Hende Muhe.
Danki pa lesa nos relato y pasa un dushi dia yen di sabiduria den nos alegria !! Un “bearhug”!
24 AÑA DI DEDICACION Y RESPONSABILIDAD
GUARDA NOS COSTA A CELEBRA SU ANIVERSARIO CU ORGUYO Y COMPROMISO
Diadomingo mainta, personal di Guarda Nos Costa a celebra nan 24 aniversario den presencia di Minister di Husticia mr. drs. Arthur Dowers.
Tabata dia 1 di maart 2002 cu Guarda Nos Costa a keda inaugura cu e meta pa tene control riba cumplimento di nos leynan di admision y expulsion. Actualmente
Guarda Nos Costa ta conta cu 40 agente di GNC cu ta duna sosten valioso na KPA, DIMAS, Inmigracion y otro partnernan den e cadena hudicial.
Na inicio di Guarda Nos Costa, Trudy Hassel y Chu Rincones tabata na cabes y a lidera e departamento aki pa varios aña.
Actualmente David Leer ta carga e responsabilidad temporalmente den dobbel funcion, tanto na Inmigracion como na Guarda Nos Costa, cu e compromiso pa guia ambos departamento cu profesionalismo.
E trabao di Guarda Nos Costa ta di control riba personanan indocumenta, cumplimento cu ley di admision, detencion di personanan no documenta, te cu nan expulsion for di nos Pais. E mainta aki, e personal di GNC a disfruta di un desayuno completo na Moomba Beach Bar
& Restaurant y a haya oportunidad pa bin hunto den un ambiente pafo di trabao.
Minister di Husticia Dowers na final a expresa su aprecio enorme pa e gran trabao cu cada un di e empleadonan di GNC ta haci diariamente, pero tambe a desea nan forsa y determinacion pa sigui cu e bon trabao aki.
Guarda Nos Costa ta sigui comprometi cu siguridad, responsabilidad y stabilidad den nos comunidad. 24 aña despues di su fundacion, e departamento ta para firme, cu un mision cla y un compromiso continuo pa proteha Aruba y su frontera.
BIN CELEBRA DIA INTERNACIONAL DI HENDE
MUHE CU LO TRATA E TEMA
“HENDE
MUHE DEN PERIODISMO”
Playa Pabao – Directiva di Centro di Bario Playa Pabao ta invita e ser femenino y nan pareha pa bin celebra “Dia Internacional di Hende Muhe” den nan centro. E anochi aki ta tuma diabierna dia 6 di maart anochi di 7 pm – 9 pm .
Orador invita pa e anochi aki ta sra Maritza Maduro
cu lo elabora riba e tema “ Muhe Den Periodismo”. Lo tin un ora social cu grupo di baile di CBPP, poemanan recita pa e poetanan Omaira Britten, Ruthy Vrieswijk y Ariana Koolman, cu ya por ser considera famia di CBPP. Pues un programa hopi varia y no lubida e cantenan masculino.
Danki na tur instancia pa alegra e dia aki un crenchi mas.
Den nomber di directiva di CBPP. Felis Dia di Hende Muhe diadomingo 8 di maart!!!! No Lubida nos actividad ta diabierna 6 di maart di 7.00 pm y lo termina 9.00 pm. Lo tin un treat pa esnan cu a asisti na e actividad aki
Un dia fructifero
y cu e luz di Cristo por briya den cada un di nos
" ... Pasobra tur hende cu halsa nan mes, lo keda humilia, ma esun cu humilia su mes, lo keda halsa". Lucas 18,14
Awe nos ta lesa e importancia di humildad y reconoce nos faltanan. Nos por ta manera e fariseo husgando otro y halsando su mes of manera e cobrado di belasting ta reconoce su falta y su necesidad di compasion. Cu humildad nos ta sirbi otro sin busca recompensa; scucha mas y papia menos, na balora e otronan pa loke nan ta y no pa loke nan tin of ta aparenta di ta. Reflexionando continuamente ta yuda evita na cay den orguyo y na mantene nos mirada fiho den e mision cu Señor a confia nos. Biba cu berdadero humildad ta nifica rechasa e mascaradanan cu hopi biaha nos ta pone pa impresiona of pa competi cu otro. No biba un bida superficial of di falsedad, sea un luz pa mundo unda e luz di Cristo ta briya den bo. Loke ta importa no ta con otronan ta mira nos, sino con Dios ta mira nos. Ser bo mes y cu humildad ta acerca nos na e berdadero esencia di nos fe y esey ta haci nos un instrumento den e man di Dios.
Oracion : Señor Hesus, haci mi curason pareu na bo curason. Manso y humilde y obedecido na bo Santa boluntad.
Amen.
DIA MUNDIAL DI YERBA DI LAMA: PROTEHANDO UN HERENCIA MARINO ESENCIAL PA NOS ISLA
ORANJESTAD - Dia
1 di maart ta observa Dia Mundial di Yerba di Lama (World Seagrass Day). Esaki ta un dia dedica na reconoce un di e ecosistemanan mas productivo y vital riba nos planeta. Na Aruba e ‘veldnan’ di yerba di lama tin un rol importante den e salud di nos costanan, nos beachnan, biodiversidad marino y e progreso di nos economia. Directie Natuur en Milieu (DNM) tin como meta informa tocante e importancia di e dianan observa pa Nacionnan Uni.
Dia mundial di Yerba di Lama, proclama pa Asamblea General di Nacionnan Uni na 2022, tin como obhetivo eleva conscientisacion riba e importancia di e 'veldnan' di yerba di lama. Hopi biaha ta ignora yerba di lama den comparacion cu e rifnan di coral, pero yerba di lama ta un di e ecosistemanan mas productivo y valioso na mundo. Hopi biaha ta confundie cu alga, pero yerba di lama ta masha special pasobra nan ta e unico mata den lama cu tin reis , stam y flor. Nan ta
forma sabananan extenso bou di awa cu ta funciona como e pulmonnan di nos oceano. Mester corda tambe cu tin diferente sorto di yerba di lama cu ta protegi pa nos leynan local.
Dicon Yerba di Lama ta importante pa Aruba?
Yerba di lama no ta djis "yerba den awa"; nan ta matanan cu ta crece y biba den tiki profundidad. Nan funcion ta fundamental pa Aruba su economia y ecologia manera:
• Refugio pa biodiversidad: E ‘veldnan’ aki ta sirbi como luga di crecemento pa hopi di nos pisca, cabay di lama y tortuga di lama manera e Turtuga Blanco. Sin e yerba aki, e cantidad di e especienan lo bira menos.
• Filtro natural: Yerba di lama ta purifica nos awa door di filtra sedimento y polutante. Esaki ta mantene nos lama cristalino, pa asina e keda saludabel y atractivo pa bishitante di lama.
• Cambio di clima y ‘Blue Carbon’: Aunke nan ta cubri solamente
0.1% di e fondo di lama globalmente, nan ta warda te cu 18% di e carbono
oceanico di mundo. Pa Aruba, esaki ta nos miho defensa natural contra e impactonan di cambio di clima.
• Proteccion di costa: E matanan aki ta reduci e forsa di e olanan, funcionando como e prome liña di defensa contra erosion di nos santo blanco y inundacion durante mal tempo.
Un recurso den peliger Lamentablemente, na nivel mundial, nos ta perdiendo 7% di e habitatnan aki tur aña.
Na Aruba, e presionnan principal ta bin di:
• Desaroyo acelera na costanan.
• Polucion y "runoff " di tera pa lama (ora awa yobe y lastra tera den lama).
• Actividadnan di boto y hancramento di boto cu ta ranca e yerba for di fondo.
• ‘Dredging’ (cobamento den lama pa saca santo) y cambio di clima.
Accion y Conservacion DNM ta enfatisa cu proteccion di yerba di lama ta directamente mara na e Metanan di Desaroyo Sostenibel
(SDGs) di Nacionnan Uni. Ora nos proteha nos yerba di lama, nos ta proteha nos siguridad alimenticio, calidad di awa y economia blauw.
Yerba di lama na Aruba ta enfrenta menasa serio asocia cu comportacion y actividad humano na nos costanan. P’esey tambe e yamada na comunidad y siguiente generacion, pa sea mas atento riba e balor di yerba di lama. Laga nos stop di mira yerba di lama como un "molester" na beach, y cuminsa mir’e como e proteccion di nos costa.
“Señor ta mi wardador, mi’n tin falta di nada
FORTALEZA PA FAMIA
Den cunucu di yerba berde e ta ponemi sosega.E ta hibami na awa trankil, Pa mi bolbe haña forsa”.Salmo: 23
Cu profundo dolor y tristeza na nos curazon pero conforme cu boluntad di Dios y agradecido pa tur locual ela nifica pa nos, nos ta participa fayecimento di:
Sra. Leoncita Ceferina
Donata-Danies
Mihor conoci como Chia, *06-11-1936 - †23-02-2026
Vda. di dfm. Federico Mercelino Donata
Su yuinan:
Franklin Donata
Vda. Vilma Marchena-Donata
Marlene Escobar-Donata y esposo Luis Escobar Sherwin Donata y esposa Ingrid Donata-Franken
Nuera: Maria Ridderstaat
Yerno: dfm Charles (Boei) Marchena y yuinan y famia
Su nieta nan y nieto:
Vanessa Donata y Angelo Anthony, Charlene Marchena, Je-an Donata y Rensley Vrolijk, Vilencha Marchena y Jason Leest, Luigene Escobar
Su bisanieto nan y bisanieta: Dayvion Willems, Kaedan Geerman, Geetesh Outar, Jayviënne Leest
Inmensamente agradecido na su ayudante nan: Elsy, Cecilia, Madeleine, Karen, Charline Y tur cu a duna un man pa su cuido
Su amistad nan di semper:
Maria Dijkhoff, Andrea Dirksz, Denisia Kock-Dijkhoff, Corry Laclé, Astrid y Ronchi na Corsow, Nanita Marti na Corsow
Sobrina y sobrino nan y nan famia, Prima y primo nan y nan famia
Tur iha nan / esnan mas yega na dje: Elmira Colmenares, Meveline Danies, Maria Brete, Carmensita Danies, Nino Faro
Su comper y comer nan
Bon bisiñanan: Brete y Dijkhoff Demas bisiñanan, famia y conocirnan, Tur cu a dune atencion durante su enfermedad
Inmensamente agradecido na su dokter di cas dr. M. van den Ham y su team di Cas di Dokter pa nan excelente atencion y servicio cu semper nan a brinda.
Ta invita pa acto di condolencia y entiero cu lo tuma lugar diamars 3 di maart 2026 di 2or pm - 4or pm na Aurora Funeral Home y despues pa Santana Catolico Pastoor Kraanwinkel na Paradera.
Nos disculpa si pa motibo di nos dolor y tristeza nos por a lubida di menciona un of otro famia.
Ta duel nos pero nos no por ricibi bishita di condolencia na cas.
Ta bai tin 3 Santo Sacrificio di Misa na Misa Santa Filomena na Paradera dia nan: 5 maart 2026 7or pm, 7 maart 2026 7or pm, 10 maart 2026 7or pm
Despues di e ultimo Santo Sacrificio di Misa ta bay tin un Santo Rosario na cas Tanki Leendert 98-A.
Scirbi pa Pastor Marcel Balootje.
UN BIDA NOBO DEN SENJOR
Si nos nota algo tremendo, cu a pasa, nos ta keda boca habri, cu nunca ora Hesus tabata yama un hende e no tabata wak e situacion cu e persona tabata aden. Ora E tabata yama su disipulonan e tabata djis bisa nan sigi Mi, y e no tabata bisa nan bo tin algo di drecha, of bo tin algo cu no ta bon, pasobra Hesus tabata sa cu una bes nan sigi E nan bida lo cambia.
Hende no por cambia nada den nan bida, solamente Dios por haci cambio pa nos, pesey e ta bisa den Mateo 11:28 : Bin serca mi tur cu ta cansa y carga y lo Mi duna boso sosiego.
E no ta wak bo picanan, ni si bo ta rico of pober, gordo of flaco, tampoco rasa of color, tur hende ta bon bini serca Esun cu tin e poder pa cambia curason y bida di hende.
Awendia pa bo drenta cierto organisacion, ta wordo exigi, cierto adaptacion den bo bida pa bo bira miembro. Serca nos Señor Cristo Hesus, no tin condicion, pasobra tur esnan cu yega serca dj’E tin bida nobo.
Ta mas bunita ora nos lesa locual tin para scirbi den 2 Corintionan 5:17 : Pesey si un hende ta den Cristo, ta un criatura nobo e ta , e cosnan bieu a pasa caba, ata tur cos a bira nobo.
Tur e cosnan cu tabata causa stress, preocupacion, depresion, dolor di cabes, presion halto a pasa pasobra den Cristo Hesus tin bida nobo, ta E so por haci e cambio cu nos no por haci.
2 Corintionan 5 ;19 ta bisa cu nos: Esta cu Dios den Cristo tabata reconciliando e mundo cu Su mes sin tumanan pica nan na cuenta, y E a encarga nos cu e palabra di reconciliacion.
Diabel semper lo keda gaña hende cu nan no ta bon, cu hende lo papia riba nan.
Pero Dios den su inmenso amor ta habri su brasanan pa tur esnan cu kier bini serca dj’E.
Ora Hesus tabata riba crus y cu e criminal a bise, Señor corda riba mi ora bo drenta bo reino, Hesus a contesta, awe mes lo bo ta hunto cu Mi . Hesus no ta haci ningun pregunta na e homber pakico bo tambe ta riba crus, pero asina cu e homber a reconoce cu Hesus no tin falta di nada, ta suficiente pa Hesus tuma Su decision, pasobra e homber a demostra cu e ta arepenti.
Nos ta bibando den tempo den cual scuridad ta halando hende na boshi, hopi ta kere cu nan bida no por cambia, y cu nan tin di keda manera nan ta, pero hopi no ta altura, cu nan mes no por cambia nada den nan bida, ta solamente un bida nobo den Cristo Hesus ta un bida cambia.
No ta hende a reconcilia cu Dios, pero ta Dios a reconcilia cu hende, no tumando na cuenta nan pica,( 2 Corintionan 5:19) pasobra pica ta un ofensa pa Dios, pero Dios den su inmenso misericordia, no ta wak esey pasobra nos salbacion ta mas importante cu nos pica. Pasobra pica ta hiba hende fierno, pero salbacion den Cristo Hesus ta hiba nos tur na Bida Eterna.
Si Cristo Hesus no cambia nos bida, ta ken por cambie? E a muri na crus pa pordon di nos picanan, pa asina haci posibel pa nos tin bida eterna y cu nos tin entrada na cielo, serca Tata.
Sinceramente, Pastor Marcel Balootje.
Pica di un hende no ta obstaculo, pa e keda sin entrega su bida na Cristo Hesus.
Bin disfruta di Mercado Santa Rosa diasabra awo
For di algun aña caba Departamento di Agricultura, Cria y Pesca, Santa Rosa ta organisando su Mercado Santa Rosa riba diasabra. Esaki ta debi na e demanda pa cumpra y ta mas aclansabel productonan local fresco produci. Nos clientela den mayoria caso ta pidi pa esaki. Logicamente nos departamento a yega na e conlcucion pa organisa esaki den un escala mas chkito cu entre otro 15 pa 20 productor local cu ta bin ofrece nan producto. Tratanto tambe pa organisa esaki maske ta un biaha pa luna.
Na luna di Januari e aña aki nos a ranca sali cu nos prome Mercado Santa Rosa di cual un biaha mas tabata masha exitoso. Nos bishitantenan a yega for di tur parti pa hasi nan compras y combersa den ambiente placentero y probecha tambe pa disfruta di prijsnan alcansbel pa nan cartera. Esaki no ta un mrcado grandi manera ta nos tin gustumber di organisa. Esun di riba diasabra ta enfoca mas riba nos productonan local den un scala mas chikito, fasil conviniente y rapido. Diasabra awo 7 di
maart cuminsando for di 8’or di mainta te cu 12’or di merdia un biaha mas lo bai ta e caso caminda nos ta extende un invitacion na Aruba completo pa pasa hasi nos un bishita awor cu orario extendi y hasi bo compras di productonan fresco produci for di nos mesu suelo. Manera ta gustumber varios di nos producto local ta aki den nos mercado so bo por haye. Asina ta no perde e oportunidad aki di bin probecha y pasa un rato ameno y cu prijsnan alcasbel. Lo bai tin entre otro carni fresco, fruta y berdura fresco y sin laga
afo productonan natural. Pasabocanan dushi traha na cas pa nos mesun hendenan. Nos ta infroma tambe na nos clientela di Mercado Santa Rosa cu despues di dia 7 di maart awor nos lo continua riba tur diasabra aki mes na Santa Rosa cu nos for di 8’or di mainta te cu 12’or di merdia y asina complaciendo tur nos clientela cu ta desea di cumpra productonan fresco riba tur disabra awor esaki ta bira posibel. Asina ta marca bo calendario for di awor riba tur diasabra por bishita Mercado Santa Rosa pa cumpra bo producto. Nos mester menciona si cu
posiblemente lo bai yega un momento cu kisas no tin suficiente producto local e ora nos lo informa nos clientela cu un of otro Mercado Santa Rosa lo wordo posponi debi na falta di produccion. Tene bon cuenta cu esaki y sigur sigui nos pagina di Facebook caminda cu nos lo informa cualkier cambio di nos Mercado Santa Rosa. Pa e weekend aki di diasabra 7 di maart bo ta cordialmente invita pa hasi nos un bisita for di trempan 8’or di mainta te cu 12’or di merdia pa ercado Santa Rosa den un formato mas chikito pa abo por porbecha di locual ta bai tin pa ofrece.
