Issuu

Parlamentario Eduard Pieters (PPA): “UN OPORTUNIDAD

HISTORICO

INTRODUCCION DI LEY DI HOFA

DURANTE BISHITA REAL”

Dos persona heriDa Den acciDente serio pariba Di ex house of cheng

Avenida Nelson O.OduberDiadomingo marduga polis a bay riba e caminda di Avenida Nelson O.Oduber cu ta bay nort direccion rotonde Palm Beach.

Informacion a drenta di un accidente pisa. Mirando cu e area aki ta uno conoci pa accidentenan pisa, polisnan a bay cu urgencia.

Na yegada enberdad a bin topa cu un accidente unda un palo di luz a wordo ranca y dos auto destrui.

Uno tawata pariba di caminda y e otro pabou memey di e greppel.

E heridonan tawata den e auto pariba, un homber y muhe. E muhe tawata seriamente herida y tawata tin mester di ambulance cu urgencia. E homber tambe tawata herida, pero mester a warda un siguente ambulance.

Ambulance a transporta e muhe cu urgencia pa Hospitaal, algun rato

despues ambulance a yega pa busca e homber cu e sinta den un auto eybanda. Ora Paramediconan a yega e curpa a bira mas dolor y mester a yude sali di e auto.

Posiblemente tawata trata di velocidad hopi halto entre e dos autonan.

Elmar a wordo notifica.

E auto shinishi NO tin nada di haber cu e accidente.

5000 AmnistiA di dowers sin plAnning A creA chAos nA censo y

AZV perhudicAndo

E situacion critico cu nos ta biba aden awe na Censo no ta culpa di e trahadornan, sino e resultado directo di e decisionnan irresponsabel y sin planificacion di Minister di AVP, Arthur Dowers. Den un movecion puramente politico (promesa di campaña) y sin ningun base di infrastructura, Dowers a opta pa duna amnistia na mas o menos 5,000 persona ilegal, legalisando nan status den un solo tiro sin prepara e departamento cu mester a procesa nan.

Un Amnistia di “Show”

Dowers a bende e idea di un amnistia como un solucion, pero den realidad el a crea un problema structural cu awor a bira un desaster pa Aruba completo.

Bo no por legalisa 5,000 persona den un sistema cu ya caba tabata bou presion, sin agrega personal, sin modernisa e sistema digital, y sin duna e instruccionnan cla na e balinan di Censo.

E consecuencia di e falta di vision aki di e Minister Dowers ta loke nos ta mira awe:

Kiebro di Cita: E 5,000 personanan ey awor tur mester di un cita na Censo, loke a causa cu e personanan cu ya ta legal mester warda 6 luna pa un aña pa un simple tramite.

Falta di Personal: Dowers a carga e trabou riba e mesun dos personanan na Bali 1 y Bali 8, sin duna nan e hermentnan pa procesa acta di nacemento skirbi na man den un era digital.

Obstaculo pa Deporte y Scol:

Pasobra Dowers no a planea e registracion aki debidamente,

tur locAl

clubnan deportivo no por registra hungador y muchanan cu a nace na Aruba no por haya nan papelnan pa bay scol.

E Efecto di Domino di Mal Maneho

E decisionnan di Dowers no a afecta solamente e legalisacion mes, sino henter e cadena administrativo di e isla:

– Cantidad di estorbo: No ta haya AZV pasobra no a inscribi na Censo. No ta haya SVB. No ta wordo inscribi na Siad, pasobra no ta registra. Si un persona viaha, ora bolbe e mester paga $ 20.00.

DIMAS y Censo den Conflicto:

Mientras Dowers a duna permiso, e no a coordina cu Censo pa e registracion final. Esaki ta pone cu DIMAS awor ta rechasa permisonan pasobra e persona “no ta registra”, maske ta decision di Dowers mes a causa e fila largo aki.

Gastonan Extra pa Famia: Danki na e falta di planning di AVP, mayornan mester paga AFl 2,000 na seguro priva pa nan yiunan por drenta scol (EPB, EPI, Mavo, Havo), simplemente pasobra Censo no por procesa e registracion cu Dowers a priminti.

Pa conclui: Un herencia di desorden

E frustracion cu e pueblo ta sinti awe na e portanan di Censo tin un solo nomber y faam: Arthur Dowers. E falta di un “masterplan” pa compaña e amnistia di 5,000 persona ey a paralisa e sistema di AZV, SVB, SIAD y educacion. Aruba ta pagando e prijs caro di un maneho di AVP cu a busca popularidad cu amnistia, pero cu a lubida di traha e fundeshi pa esaki funciona.

Pelea grandi den hot zone a laga un Persona seriamente herida

J.E Irausquin Boulevard

- Diadomingo marduga polis tawata bastante druk cu diferente asistencia.

Den careda di 2'or di marduga varios unidad policial a bay area di Hot Zone, pa ta mas exacto tegenover di Hilton Hotel.

Den area ey, lo a surgi un pelea grandi entre un grupo. Parse cu di basta rato prome esnan eybanda a sinti cu lo bay tin baina locual no ta prome biaha y lo no ta ultimo tampoco.

Hasta den e baina grandi aki segun algun persona nan lo a scucha tiro.

Polisnan cu a yega no sa di biaha tampoco unda pa

cuminsa, mirando cu tur hende ta grita den otro. Parse cu security lo a sigui algun di esnan evnvoli den e parking lot pero nan a logra bay.

Na final a compronde cu 1 persona lo a wordo seriamente maltrata y mester a bay cu ambulance Hospitaal.

Ta mustra cu e baina lo a start entre algun hende cu tawata bishitando e clubnan nocturno eybanda.

Camaranan di seguridad eybanda lo a capta tur cos, y lo ta den polis su man pa averiguar kiko tur a sosode.

aunke no ta haya e manta den nos awa teritorial, e ta Proteha Pa nos leynan local

ORANJESTAD – Directie Natuur en Milieu DNM) ta informa tocante e especie protegi Manta.

E manta yama na Ingles Giant Manta Ray (Mobufa birostris) ta haya su nomber gigante como cu e ta esun di mas grandi di e mantanan di mundo. E por midi te cu 8 meter cu su halanan habri y por pisa rond di 2000 kilo. E embranan ta poco mas grandi cu e machonan. E manta aki por biaha te na un maximo velocidad di 40 kilometer pa ora. E manta gigantesco aki ta animalnan migrante cu ta crece poco poco. E manta su repoduccion ta sosode cada

2 pa 3 aña y e ta haya un yiu bibo. E yiu ta nace despues di 12 luna y ta midi 1 meter y mey. Nan por biba mas of menos 45 aña.

Por reconoce e manta pa nan curpa grandi den forma di diamante cu halanan largo cada banda. Tin dos variacion di color di curpa, preto cu bariga blanco of completamente preto. Nan wowonan ta cada banda di e cabes cu un boca grandi. Dilanti di nan boca nan tin dos structura yama ‘cephalic lobes’ na Ingles, cu ta extende y ta yuda crea un canal pa awa pasa. Despues e ta filtra e

cuminda prome cu e guli esaki. Nan ta alimenta nan mes door di filtracion via nan caicay (gills), nan ta come cantidad grandi di ‘zooplankton’ y tambe cabaron y otro piscanan chikito.

Rond mundo ta haya e manta gigante den ocean, awa tropical, subtropical y awa cu temperatura entre 19 pa 22°celsius, pero den otro parti tambe ta haya nan den awa cu temperatura entre 25 y 30°celsius. Nan menasa ta orcanan, especie di tribon y tambe hende cu ta gara nan cu meta comercio internacional. E demanda ta halto

pa e caicaynan (gills) di e especie. E sorto ta clasifica na peliger pa Union Internacional pa Conservacion di Naturalesa (International Union for Conservation of Nature - IUCN) y ta protegi den nos leynan local.

Parlamentario Eduard Pieters (PPA):

“Un oportUnidad historico perdi pa

frena introdUccion di ley di hofa dUrante bishita real”

Despues di haci un reflexion profundo mi persona pone hopi atencion na e discurso cu Minister Presidente Mike Eman a dirigi na Su Mahestad Rey Willem-Alexander riba dia 18 di Maart. “Maske e relato historico tawata bunita, nos como fraccion di PPA ta lamenta cu e mandatario a perde un oportunidad di oro pa cana den e pasonan di su antepasadonan y defende Aruba su autonomia structuralmente” Pieters ta relata.

dia 18 di Maart 1948, caminda el a acepta e peticion cu 2.147 firma pidiendo e derecho di autodeterminacion (Status Aparte). E fecha ey a keda marca como e momento cu Pueblo di Aruba a expresa su amor pa libertad.

Un paralelo historico cu a keda incompleto “Pa fraccion di PPA, ta netamente aki e mandatario mester a para keto. Si Minister Presidente ta reconoce e lucha grandi di su welo pa entrega un peticion personalmente den man di e bisawela di nos Rey actual, con por ta posibel cu e mes no a realisa e impacto cu e por a crea awe?” Edurd Pieters ta puntra.

"Bo por imagina bo con grandi e impacto lo tabata si, netamente riba e fecha historico di 18 di Maart 2026, e nieto di Shon Henny Eman lo a entrega un peticion similar na Rey Willem-Alexander?"

Eduard Pieters ta sigui

reflexiona.

Defensa di nos Status

Aparte contra HOFA

Na e momento cu Aruba ta celebra 50 aña di nos Himno y Bandera y 40 aña di nos Status

Aparte, fraccion di PPA ta considera esaki como un "gemiste kans" (oportunidad perdi). E escenario tabata perfecto: e Rey compartiendo e mesun podio cu e Minister Presidente.

Nos di fraccion di PPA ta subraya cu esaki tawata e momento ideal pa Mike Eman, den nomber di tur gremio di Aruba, entrega un peticion firma pa pidi pa kita e ley di HOFA. Esaki lo tawata e unico forma pa garantisa y proteha e Status Aparte cu tanto esfuerso a wordo logra den pasado.

Accion en bes di palabra

Mester tin coherencia entre e storia cu nos ta

conta y e accionnan cu nos ta tuma awe. No por djis recorda e heroismo di pasado sin aplica e mesun curashi den e desafionan di presente.

"E Rey tabata ey mes,

mas cerca no por a yega. Ta lamentabel cu a scohe pa rima bunita en bes di actua pa e futuro di nos autonomia." Eduard Pieters ta conclui.

Accidente grAndi nA PiedrA

PlAt diAsAbrA Anochi

Piedra Plat - Diasabra anochi a sosode un accidente grandi net dilanti di veld di Britania. Tawata trata di dos diferente accidente di trafico na e mesun momento.

Uno tawata tin tres auto envolvi, cu a dal tras di otro. Un poco mas pabou tawata esun mas serio, unda cu un di chauffeurnan esun cu lo a ocasiona e accidente tawata bou influencia.

Por a mira cu e Toyota Vitz color preto a hala bay na su mas robes y dal e auto blanco kiermen cu e Toyota Vitz a dal contra e auto blanco sin tene brake. Ambos auto ta right hand drive.

Tres ambulance tawata necesario y varios unidad di Brandweer a presenta pa a yuda saca chauffeur di Toyota Vitz. E chauffeur un homber di edad tawata parcialmente na tino.

Den e accidente unda tawata tin tres auto

envolvi, tambe nan a hiba un persona herida pa Hospitaal.

Daño material ta hopi. Pues un total di tres herido, unda cu chauffeur di Vitz ta esun mas serio herida.

Parlamentario Eduard Pieters (PPA):

“Di DiMP te Censo: inefiCienCia

Di Gobierno ta CastiGa e CiuDaDanonan CoreCto”

Den un pais cu ta papia di modernisacion, eficiencia y digitalisacion, e realidad cu hopi ciudadano di Aruba ta biba ta completamente diferente. Loke a cuminsa como un alarma na Departamento di Impuesto (DIMP) na februari 2026, awe ta revela su mes como un patronchi structural di mal gobernacion cu awor ta ripiti su mes na Oficina di Censo y Registro Civil. Sistema di servicio gubernamental fayando

Parlamentario Eduard Pieters di fraccion di PPA a pone e dede riba e herida desde trempan: “Ciudadano cu kier cumpli cu ley ta wordo frena pa e propio sistema di gobierno”.

Den e caso di DIMP, situacion tabata tan absurdo, cu e bira simbolico pa un sistema cu no ta funcionando. E hendenan cu kier paga nan impuesto di auto no por haci esaki, paso no tin plachi di number disponibel. Esey a pone hende den un posicion imposibel: nan no por circula legalmente, nan mester huur of fia auto y nan ta carga costo extra pa un problema cu no ta nan culpa.

DIMP y awor Censo

“Con por ta asina cu un ciudadano cu kier cumpli

cu su obligacion fiscal ta wordo frena pa e propio departamento?” Pieters a cuestiona. Pero si esaki tabata un señal di alerta, e situacion actual na Oficina di Censo y Registro Civil ta confirma algo mas serio ainda: esaki ta parce cu no ta un incidente aisla, cu esaki ta un sistema cu no ta funcionando.

“Awe, e hendenan cu a paga nan permiso di estadia y trabou, cu kier inscribi pa haya nan derecho basico na AZV, ta topa cu un sistema digital cu simplemente no ta duna cita. No tin acceso. No tin claridad. No tin solucion. Y pio ainda, e consecuencia ta directo: hende ta keda sin seguro medico”, Eduard a enfatisa. Esaki no ta solamente un fayo administrativo. Esaki ta un fayo humano. Un fayo moral.

Un patronchi peligroso

Di DIMP te Censo, un patronchi peligroso ta sali na luz: Ciudadano cu kier cumpli ta wordo castiga, sistema gubernamental ta faya y responsabilidad no ta transparente.

“Gobierno ta papia di digitalisacion, pero realidad ta cu e sistema digital no ta funcionando. Gobierno ta papia di eficiencia, pero ciudadano ta topa muraya. Gobierno ta papia di servicio,

pero pueblo ta keda sin acceso. Tecnologia pa soluciona esakinan ta existi. Loke ta falta ta liderazgo, planificacion y coordinacion”.

Den e caso di Oficina di Censo y Registro Civil, e problema ta mustra claramente cu posiblemente ta e falta di coordinacion entre e ministerionan. Aumento den aplicacion pa permiso di estadia no ta compaña cu capacidad operativo. Resultado? Un sistema cu a colapsa. Un pueblo cu ta paga e prijs.

Y esaki ta e punto mas grave: ciudadano cu ta haci tur cos bon ta termina como victima di e sistema. “Responsabilidad fiscal

ta un caminda di dos direccion: ciudadano mester paga, pero gobierno mester duna servicio tambe,” Pieters a enfatisa . E situacion aki ta un test directo pa gobernacion di Aruba. No pa discurso. No pa promesa. Pero pa resultado concreto. Si un ciudadano no por paga impuesto…si un ciudadano no por haya cita pa por

inscribi pa haya seguro medico…anto e problema no ta di e ciudadano. E problema ta di gobierno.

PPA ta manda un mensahe cla: basta cu ineficiencia normalisa. Aruba no por acepta un sistema, unda e ciudadano corecto ta castiga, mientras e sistema cu mester sirbi nan ta faya.

Parlamentario di AVP, John Hart:

Parlamento tambe kier tende

kico aWSS ta haciendo Pa cu moleS ter na ParkietenboS

ORANJESTAD (29 di maart 2026)Parlamentario di AVP, Sr. John Hart, hunto cu sosten di varios otro miembro di Parlamento, a solicita formalmente un reunion na Presidente di Parlamento pa trata e situacion actual di holor na Parkietenbos, asina tambe e rol di Aruba Wastewater Sustainable Solutions (AWSS) y e desaroyonan relaciona cu e asunto aki.

Recientemente,

habitantenan di Cas Paloma y e vecindario rond di Parkietenbos a expresa nan preocupacion y a presenta kehonan tocante molester di holor fuerte den nan comunidad. Segun informacion suministra door di Aruba Wastewater Sustainable Solutions (AWSS), e molester di holor ta causa en parti pa sludge (slib) cu no ta seca suficiente despues di e proceso den e planta di purificacion na Bubali. Debido na trabounan

di mantenimento cu ta tumando luga actualmente, e sludge ta contene mas awa cu normal ora cu ta transport’e pa Parkietenbos. Consecuentemente, mester comprimi adicionalmente e material cu ta yega na e planta na Parkietenbos pa saca mas awa posibel, pa asina logra un estado mas seco.

Sin embargo, e instalacion na Parkietenbos ta un planta anticua y habri,

locual ta contribui na e emision di holor, principalmente proveniente di e awa cu ta separa for di e sludge, cu normalmente lo a yega eynan caba den un condicion mas seco.

Parlamentario Hart a indica cu e a tuma nota cu representantenan di Utilities, AWSS y e Minister di Energia ta presta atencion serio na e situacion y cu nan a comunica repetidamente tocante e pasonan cu ta tuma y e esfuerzo pa completa e mantenimento mas lihe posible.

No obstante, segun Hart, e preocupacion di e comunidad ta legitimo y mester dun’e prioridad.

“Mi a tuma nota cu representantenan di Utilities, AWSS y Ministerio di Energia tin atencion pa e asunto aki y cu nan a comunica di biaha kico ta e pasonan y cu nan ta trahando riba

solucion pa termina e mantenimento mas lihe posible. E preocupacion di e habitantenan ta serio y mi ta kere cu nos mester traha riba solucion structural y duradero.

Fuera di e parti tecnico di AWSS y e incinerator, na final di dia nos ta tratando akinan asuntonan cu tin di haber cu salud publico di nos habitantenan, y mi ta di opinion cu e ora a yega pa Parlamento di Aruba haya claridad riba e pasonan pa dilanti,” Sr. Hart a enfatisa.

Cu e solicitud pa un reunion parlamentario, Sr. Hart ta busca pa sigura cu Parlamento di Aruba por haya un panorama completo di e situacion actual, e medidanan cu ta tuma y e solucionanan structural cu ta necesario pa preveni ripiticion di e problema den futuro, siempre cu e bienestar y salud di e comunidad como prioridad principal.

Parlamentario Eduard Pieters (PPA): “Un oportUnidad historico perdi pa frena introdUccion di ley di hofa dUrante bishita real”

Despues di haci un reflexion profundo mi persona pone hopi atencion na e discurso cu Minister Presidente Mike Eman a dirigi na Su Mahestad Rey WillemAlexander riba dia 18 di Maart. “Maske e relato historico tawata bunita, nos como fraccion di PPA ta lamenta cu e mandatario a perde un oportunidad di oro pa cana den e pasonan di su antepasadonan y defende Aruba su autonomia structuralmente” Pieters ta relata.

Durante su discurso durante e acta ceremonial, Minister Presidente Mike Eman a comparti un anecdota personal y poderoso tocante e biaha cu e delegacion di Aruba a bay Hulanda na 1948. E tempo ey, autoridadnan na Den Haag a duna un conseho negativo pa no ricibi e delegacion Arubiano. Sinembargo, Reina Wilhelmina a dicidi riba su mes pa ricibi nan dia 18 di Maart 1948, caminda el a acepta e peticion cu 2.147 firma pidiendo e derecho di autodeterminacion (Status Aparte). E fecha ey a keda marca como e momento cu Pueblo di Aruba a expresa su amor pa libertad.

riba e fecha historico di 18 di Maart 2026, e nieto di Shon Henny Eman lo a entrega un peticion similar na Rey Willem-Alexander?" Eduard Pieters ta sigui reflexiona.

Defensa di nos Status Aparte contra HOFA

Na e momento cu Aruba ta celebra 50 aña di nos Himno y Bandera y 40 aña di nos Status Aparte, fraccion di PPA ta considera esaki como un "gemiste kans" (oportunidad perdi). E escenario tabata perfecto: e Rey compartiendo e mesun podio cu e Minister Presidente. Nos di fraccion di PPA ta subraya cu esaki tawata e momento ideal pa Mike Eman, den nomber di

tur gremio di Aruba, entrega un peticion firma pa pidi pa kita e ley di HOFA. Esaki lo tawata e unico forma pa garantisa y proteha e Status Aparte cu tanto esfuerso a wordo logra den pasado.

Accion en bes di palabra

Mester tin coherencia entre e storia cu nos ta conta y e accionnan

cu nos ta tuma awe. No por djis recorda e heroismo di pasado sin aplica e mesun curashi den e desafionan di presente.

"E Rey tabata ey mes, mas cerca no por a yega. Ta lamentabel cu a scohe pa rima bunita en bes di actua pa e futuro di nos autonomia." Eduard Pieters ta conclui.

Exprodesk ta Lansa Workshop di 3 Dia: “Creatives Without Borders: Turning Creativity into Export Opportunities”

ORANJESTAD -

Departamento di Asunto Economico, Comercio y Industria (DEACI), pa medio di su unidad Exprodesk, ta anuncia e workshop di

3 dia “Creatives Without Borders: Turning Creativity into Export Opportunities.”

E workshop aki ta enfoca riba yuda creativonan local explora con nan talento

por bira un oportunidad internacional y crea ingreso for di mercadonan pafo di Aruba. Participacion ta completamente gratis!

Durante tres dia, participantenan lo haya conocemento riba areanan esencial pa explora oportunidadnan di exportacion creativo:

Dia 1 (15 April, 6pm-8pm) –Your Creativity Is a Product: Understanding Creative Exports

Participantenan lo siña con por considera nan

creatividad como un producto pa exportacion. Lo discuti modelonan manera servicio digital, licencia, colaboracion internacional y benta di contenido creativo.

Dia 2 (16 April, 6pm-8pm)

– From Art to Income: Monetization & Market Access

E sesion aki lo enfoca riba con creativonan por genera ingreso internacional.

Participantenan lo explora “monetization models”, prijs pa clientenan internacional,

y con pa identifica mercadonan realista pa nan producto of servicio creativo.

Dia 3 (17 April, 6pm-8pm) –Protect, Position & Prepare: Your Next Steps as a Creative Exporter

E ultimo dia lo enfoca riba proteccion di trabou creativo, basenan di propiedad intelectual, y con pa posiciona bo creatividad pa audiencia internacional.

Participantenan lo haya guia practico pa prepara nan pa e siguiente paso den mercado internacional.

BO TA DEN E UNICO IGLESIA DI HESUS

PA E REINO DI CIELO OF BO TA DEN UN SECTA CU HENDE A LANTA PA FIERNO?

Bijbel Exodo 24: 7- 8, den e Evangelio aki, Dios Tata a cera e prome Aliansa cu e pueblo di Israel, pa medio di Moises. Bijbel 2 Samuel 7: 16, den e Evangelio aki, Dios Tata a eligi David, pa bira e prome Rey di Israel. Dios Tata a priminti Rey David cu su sucesornan,nan lo ta pa semper encabesa e Reino di Dios. Bijbel Mateo 26: 26 – 28, den e ultima cena Hesus a bisa Su apostelnan: “Boso tur bebe for di e copa di binja aki, esaki ta Mi Sanger, e Sanger cu ta confirma e Aliansa cu Mi ta derama pa hopi hende, pa pordon di pikanan.” Akinan Hesus ta confirma Su Sacrificio y morto na crus, deramando Su Sanger precioso, pa e Aliansa Nobo di Dios Tata, cu ta e pueblo Nobo di Israel. Bijbel Lucas 1: 32 – 33, ta bisa: “Senjor Dios lo duna Hesus e trono di Su antepasado Rey David y te den eternidad lo E ta Rey di e descendientenan di Jacob y Su Reino lo no tin fin.” Bijbel Mateo 16: 15 – 19: “Hesus a puntra Su apostelnan: Anto boso mes, ta ken boso ta bisa Mi ta? Simon a contesta: Bo ta E Mesias, E Yiu di Dios bibo! Hesus a bis’e: Felis bo ta Simon yiu di Huan, pasobra no ta hende a revela bo esaki, ma Mi Tata cu ta den Cielo. Mi ta bisa bo: Abo ta Pedro (o sea baranca) y riba es baranca aki, lo Mi lanta Mi Iglesia y forsanan di fierno lo no podera di dj’e. Lo Mi duna bo e yabinan di Reino di Cielo y loke bo prohibi na tera, ta prohibi den Cielo tambe y loke bo permiti

na tera, lo ta permiti den Cielo tambe.” Akinan Hesus ta bisa bon cla, Mi Iglesia, osea un solo Iglesia y no Iglesianan. E demonionan den fierno lo lanta diferente sectanan na mundo, pa podera y pa kibra e Iglesia di Hesus, pero nan lo no logra. Hesus a duna Simon e nomber Pedro, cu ta significa baranca, cabes visibel di Su Iglesia. Hesus a duna Pedro e yabinan di Reino di Cielo y esaki ta significa, cera of habri e unico portanan pa laga e almanan drenta den Reino di Cielo. Hesus a duna e autoridad na Pedro pa dirigi Su Iglesia, di loke ta permiti y di loke ta prohibi. Bijbel Marco 16: 15 – 16, aki Hesus ta bisa Su apostelnan: “Sali pasa na henter mundo y predica e Evangelio pa henter humanidad.”

E palabra, sali pasa na henter mundo y predica e Evangelio pa henter humanidad, ta significa, Universal, Hesus Su Iglesia ta Universal. E Iglesia Universal di Hesus, ta e pueblo Nobo di Israel di Dios Tata den e Aliansa Nobo. Awor, tur e sectanan na mundo y e Hudiunan mes, nan mester kere den Cristo-Hesus y nan mester drenta y bautisa den E Iglesia Universal di Hesus, pa nan por drenta den e Reino di Cielo. Hesus a duna Su apostelnan, Su doctrinanan di Gracianan di salbacion pa Iglesia: Bautismo Mateo 28: 19 – 20, Confirmacion Echonan di Apostelnan 2: 1 – 4, Confesion Huan 20: 23,

Eucaristia Lucas 22: 19 – 29, Matrimonio Mateo 19: 4 – 6, Apostolado Marco 3: 13 – 19, Enfermonan Hacobo 5: 14 – 15. Awor puntra bo mes, ta di con tin tanto sectanan na mundo y mientras ta un Iglesia Hesus a lanta? Na anja 1521, Martin Luthero, a inventa e theoria di e interpretacion liber di Bijbel. E interpretacion liber aki, a produci 36.000 diferente sectanan y oposicionnan na mundo. Tur e sectanan aki, ta pretende di ta di Hesus. Durante tempo, hopi di nan a lanta nan mesun religionnan y predicando e Bijbel den nan mesun manera y buscando hendenan debil den fe pa sigi nan. di Bijbel Echonan Apostelnan 20: 28 – 30, carta di San Pablo na su coleganan Apostelnan: “Cuida boso y di henter e rebanjo na cual Spirito Santo a pone boso como Obisponan pa warda e Iglesia di Senjor, na cual E’l a gana cu Su propio Sanger. Mi sabi cu despues di mi partida, lo drenta lobonan feros cu lo no tene compasion cu e rebanjonan y cu denter di boso mes, lo surgi hendenan cu lo sinja doctrinanan robes y nan lo gana discipelnan nan tras.” Ta manera cu Hesus a bisa den, Bijbel Mateo 16: 18, cu forsanan di fierno lo purba podera y kibra e Unico Iglesia Universal di Hesus, pero nan lo no logra. Husga pa bo mes. Nunca no ta laat pa compronde e berdad y pa comberti.

Scirbi pa Seferino Tromp Un mensahero di Dios.

SANTA ROSA CU TIPS CON PA APORTA NA REFORESTACION DI NOS MATANAN LOCAL

Un poco di historia:

Na 1975, e Seccion di Reforestacion di Servicio Veterinario a muda di e cunucu Santa Rosa na Wayaca pa su localidad actual na Piedra Plat. E tempo ey, e seccion a traha fahanan pa controla erosion ariba ceru y damnan pa tene awa den rooi rond di MiraLaMar, Parke Nacional Arikok. E fahanan e seccion a usa pa planta mata den bari na 15 m di otro. Regularmente trucknan di awa te dos aña despues a muha nan. Un percentaha chikito di nan a bira palonan grandi di cual, e Kwihi tabata esun cu a resalta. No ta nada straño si hende sa cu Kwihi ta un mata cu por crece ariba tera pober. Desde prome di Januari 1976, e seccion a bira Departamento di Agricultura, Cria y Pesca (DLVV) cu e responsablidad di sostene y di promociona e Sector Primario di Aruba. Alavez, e Departamento, conoci awe como Santa Rosa, a sigui promove plantacion di mata local pa jardin di cas y area publico. Eventualmente Gobierno mediante e Departamento, a boga pa instalacion di e parke cu a logra bira un realidad na 2000. Proposito y beneficionan di reforestacion:

Durante e existencia di e departamento, e initiativanan pa reforesta a sigui surgi, pero lamentablemente, ningun no a resulta den un bosque tropico. Actualmente tin un interes grandi cu a surgi for di nos communidad y DLVV Santa Rosa, ta conseha y coopera cu initiativanan particular cu ta peticiona, pa DLVV Santa Rosa por comparti e lista di matanan apto pa wordo planta y incorpora den cualkier projecto di reforestacion. Mester remarca cu DLVV no tin un lista specifico di matanan local cu ta wordo promociona pa ser planta, per mas bien DLVV Santa Rosa ta reconoce e importancia di tur mata local cu di un forma of otro por contribui na bienestar di e flora y muy especialmente e fauna di Aruba. Palonan por tin un preferencia pasobra pa medio di nan biomassa mas grandi, por ofrece mas na e fauna local. Ademas DLVV Santa Rosa su experto

encarga cu e Seccion di Naturaleza, no ta mira e nececidad di traha cu un lista specifico ya cu tin literatura, manera e buki di Sr. De Freitas publica na 1996, ta duna un amplio descripcion di tal mata y palonan. Es mas, DLVV Santa Rosa ta recomenda pa si tin un espacio di por lo menos 25 m2, pa cerca esaki pa protection contra herbivoronan. Cierto situacion delicado cu nos naturaleza mester enfrenta ta matanan invasivo manera Neem cual ta un mata toxico pa otro matanan y cual ta recomendabel pa wordo elimina. Un aspecto importante pa aporta na e desaroyo di nos flora, ta pa laga naturalesa mes tuma encargo di kiko lo crece. E parti interesante y ventahoso di e strategia aki ta, cu por ricibi datos di e sortonan di mata of palo cu lo sobrevivi e Cambio Climatico. Por ripara, cu den Caribe ya caba esaki a aumenta e severidad di secura cu 15 pa 17% y su extento espacial 7% abou di secura breve y 20% abou di secura severo, (Her-

rera et al, 2018). Aruba lo cay abou di esun di 20%. Si un persona ta desea berde instante den su cura of tereno, DLVV ta conseha pa pega un trankera di Cadushi, simembargo mester tene cuenta cu e Cadushi ta menciona den e Landsbesluit bescherming inheemse flora en fauna, mira www. gobierno.aw, ariba cua articulo 6 lid 2 di e Natuurbeschermingsverordening ta aplicabel. Con pa planta y mantene e matanan local:

Pa por hana mas mata pa replanta na fin di secura por stek y pega ariba otro anto e mes lo coy rais y sigui crece. Tur otro strategia lo encera:

Colleccion y almenacion di simiya di mata local, nan siembra, mantencion den un contenedor te cu nan ta apto pa planta, seleccion di area di plantacion, cobamento di buraco of construccion di un baki, planta y dunanan bon awa y planta na mas cu 3 m di otro, mes-

ter iriga e matanan semanalmente pa dos aña largo. Na Aruba, awa ta yobe poco y e otro fuentenan ta mas caro atrobe y scars, pero por semper opta pa busca awa di dam of usa awa condensa colecta for di airco.

E idea di reforestacion ta cu hende ta salta e succeccion natural di un vegetacion y di biaha por yega na loke ta esun climax. Sinembargo den conservacion ta asina cu ariba su mes caba tin poco conocimento na Aruba di cua lo tabata e vegetacion climax di Aruba, aunke e Brazil, Hameatoxylon brasiletto lo ta un bon candidato. Importante ta pa realisa cu esey tabata den pasado pero no necesariamente e mesun resultado pa futuro, pa motibo di e cambio climatico y e hecho cu na Aruba a urbanisa e paisahe.

Mas informacion por tuma contacto cu Ing. Facundo Franken, Chef Afdeling Natuur & Landschap na DLVV via 5858102 of via mail na info@santarosa.aw

FORTALEZA PA FAMIA

Scirbi pa Pastor Marcel Balootje.

APRECIO Y GRATITUD TA TERAPIA DI DIOS

Aprecio ta algo bunita cu Dios ta pone den nos,pa nos por demostra un na otro.

Hopi biaha nos ta pensa cu nos forma di demostra aprecio, mester wordo demostra cu un regalo, pero no tin nada mas bunita cu expresion di un curason sincero,

Especialmente nos como mayor mester corda cu nos yui mester wordo aprecia, y nos ta prome persona yama pa haci esey. Nos mester aprecia nos hobennan pasobra esey ta demostra amor, y tur hende kier ta den un cas caminda aprecio ta wordo demostra na nan.

E problematica di hoben ta bay rond henter mundo, pero abo como mayor mester duna aprecio na henter bo famia.

Hopi biaha nos ta busca ayudo di dokter y psycologo pa nos yiu, pero ta ta un simpel aprecio e mucha mester cu ta sali directamente for di curazon di su tata.

No lubida con Dios Tata a aprecia Hesus despues di e bautiso den riu Jordan , Mateo capitulo 3 ta bisa nos cu e Spirito Santo a

baha manera un paloma y keda riba Hesus, y ata un bos for di e cielonan , bisando esaki ta Mi Yiu stima den kende mi tin goso.

No tin nada mas bunita ora un mayor ta papia bon di su yiunan, ora un mayor ta contento cu su yiunan, pasobra kico cu pasa bo yiu ta keda bo yiu, e ta keda bo sanger, nunca e por wordo cambia, pasobra yuinan ta regalo di Dios.

Ningun regalo digital , tampoco piedra precioso no por reemplasa e amor y aprecio di un mayor.

Aprecio di Mayor ta habri cielo riba bida di su yiu, ta duna curashi , y yuda forma karakter, ta aumenta stabilidad den e mucha, pa e crece solido den boluntad di Dios.

Aprecio ta bini di Dios directamente for di cielo, pasobra e diabel no tin apresio, tur locual e por causa ta desprecio, pasobra ora un hoben cay den su man, e tin hopi chens di despresia su propio bida ( Juan 10:10)

Hopi biaha bo ta haña cu muchanan ta busca amistad di hende grandi pasobra nan kier siniti nan mes aprecia, y na cas den un bida di violencia domestico, infieldad y inmoralidad, nan no ta ricibi esey.

Aki nos por mira kico ta e balor di Aprecio den Famia.

Mas cu tur cos nos mester ta agradesido na Dios pa tur locual cu E a haci pa nos. Nos curazon mester ta yena cu gratitud na nos Dios, pa asina nos por expresa gratitud na nos famia, y pa asina un por sostene otro

Duna gradicimento na Señor, pasobra E ta bon, pasobra Su misericordia ta pa semper.

Laga e pas di Cristo goberna den boso bida,Tur locual boso haci, haci boso trabao di curason como pa Señor y no pa hende. Sabiendo cu ta for di Señor boso lo ricibi e recompensa di e herencia. Ta Señor Cristo Hesus

ta Esun cu boso ta sirbi.(Colosensenan 3:23+24)

Gratitud na Dios ta demostra crecemento, madures Spiritual,pasobra nos ta realisa cu Dios ta doño di tur cos, y den tur cos e ta misericordioso, E ta libera, y ta duna oportunidad pa cuminsa di nobo, pasobra E ta pordona tur pica y ta duna bida nobo, cambia nos curason, pa asina nos por gosa di e plenitud di bida.

Laga tur hende realisa cu Aprecio y Gratitud ta un forma di biba cu ta bini solamente di Dios, cu nos mester expresa.

Sinceramente, Pastor Marcel Balootje.

Celular ta o Casiona insomnio

Di no por descansa bon of lo necesario, ta un problema mas habitual di loke nos ta kere.

Insomnio y stress ta dos di e patologianan cu ta generando mas preocupacion den e siglo 21 cu nos ta bibando aden.

Nos a para pa pensa dicon? Kisas ta debe na nos ritmo di bida, pa tin un agenda semper repleto di actividad, na no sa con pa ta cu nos mes of na abusa di aparatonan tecnologico y electronico.

Entre e ultimonan aki, un di e esunnan mas comun ta celular. Cada biaha nos ta duna nan mas uzo y ta dificil cu cualkier adolescente no pidi pe.

E manera nobo aki di comunica tin hopi bentaha, pero na ora di drumi, por ta e no lo ta un gran aliado.

Tecnologia no ta laga nos drumi

Kico ta lo ultimo cu bo ta wak prome cu paga luz y cera bo wowonan? Hopi di boso lo responde…. E Celular!

Esnan cu no por biba sin su smartphone mester sa, cu si ta bon, e ta bon pa hopi cos; tur cos den exceso ta contraproducente.

Y e aparato aki no ta libra, ya cu uza den oranan laat di anochi, por causa insomnio. E uzo di cualkier herment electronico cu tin un pantaya luminoso minuutnan antes di drumi (of purba di concilia soño), no ta permiti e celebro pa trankilisa y descansa manera cu mester ta.

Esey tabta e conclucion cu varios estudio a yega na dje, entre nan di e Instituto Politecnico Rensselare di New York (Merca).

E exposicion prolonga na aparatonan tecnologico manera e celular, television of tablet, ta afecta e nivelnan di hormoonnan regulador di e ciclonan di soño, e melatonina.

Tur cos ta debi na e luz blanco y briyante emiti pa e dispositivonan aki. Aunke cu nos paga e pantaya y e briyo ta regula, e nivelnan di melatonina ta reduci den un 25%.

Riba su mes nos no ta haci eskai. Asina ta, e ultimo bista riba bo email, rednan social of television ta perhudica e nivelnan cu nos no ta conciente di dje.

Celular ta afecta e sistemanan encarga di regula e ritmonan

circadiano. Esaki ta referi na e cambionan fisico y mental cu ta produci relaciona cu e luz solar y scuridad.

Si nan ta bon regular, nos lo tin soño durante anochi y nos lo ta mas alerta pa sali den solo.

Insomnio tecnologico ta preocupa dokternan

E malo nobo cu pashentnan cu ta yega na oficinanan di dokter, ta keha di dje, ta conoci como "insomnio tecnologico" y ta provocando e abuso di internet prome cu drumi.

Mas leu di e luminosidad di e pantaya, tambe nos tin cu tene na cuenta cu e ondanan electromagnetica cu e dispositivonan ta manda. Mescos cu adiccion, cu nos tin pa usa e celular net prome cu drumi. Den e hospital Casa de Salud de Valencia (Spaña) a realisa un investigacion unda cu ta sigura cu check e pagina di Facebook, mira un video riba YouTube of comproma un mail prome cu drumi, ta corta e oranan di soño y ta afecta e calidad di descanso. E uso nocturno di internet y di e aplicacionnan cu nos tin riba e celular (manera por ehempel, weganan) ta laga e celebro den estado di alerta.

Esaki ta haci cu lo mester di hopi tempo pa "bolbe na normalidad" y compronde cu ta ora di drumi. Ta sosode mesun cos cu si nos come sucu of bebe koffie despues di cuminda. Nos ta precisa di dos ora adicional pa concilia soño.

Ademas, durante anochi nos por lanta di golpi, tin pesadiya y drumi den posicionnan cu despues ta provoca dolornan di lomba y nek.

Neurofisiologonan di e hospital aki ta recomenda pa desconecta di cualkier aparato electronico, por lo menos, un ora prome cu nos drumi, paga e router y laga e celularnan p'afo di e camber durante anochi.

Rednan social ta provoca insomnio

No ta culpa di Facebook, di Instagram ni di Twitter, esey ta bon cla. Sino di nos forma di relaciona cu e plataformanan aki.

Segun un experimento cu a tuma luga pa specialistanan di e Universidad di Boston, a yega na e concusion cu e red social di e parha blauw y di 140 caracter ta ta esun cu mas ta relaciona cu insomnio y e problemanan pa concilia soño.

Dicon? Pasobra usuarionan ta conecta practicamente henter dia (incluyendo anochi) y sa publica entre 6'or di atardi y 10or di anochi. E piek di e publicacionnan ta 9'or.

E informe, ademas, ta indica cu e dia cu mayor insomnio di siman ta diaranson. Esaki ta debi, segun cu nan ta splica, cu ya nos a pasa e mayor parti di e dianan laboral y nos ta demasiado "acelera" cu asina tanto obligacion.

Koffie y refresco di cola ta e bebidanan mas consumi pa e Tweeters cu insomnio. Ambos ta contene cafeina, cu ta un

substancia causante di e sensacion di euforia of alerta pa e celebro. No obstante, e internautanan di e estudio a afirma cu su rasonnan pa no por drumi ta bata "pensa hopi," "nabega riba Twitter," "usa e celular durante hopi ora" y "wak television."

Aplicacionnan contra insomnio?

E por zona nos algo straño y contradictorio cu nos por uza e celular hustamente pa por concilia soño.

Esaki ta un bon manera pa nos no wak e aparato imprescindibel aki como un enemigo. Tecnologia por ta beneficioso of perhudicial, segun con, pakico y cuanto nos usanan. Nos por haya den tiendanan online di Android y iOS diferente aplicacion cu ta combati (aparentemente) e insomnio:

Sleepbot

E por monitorea e descanso di e usuario atrabes di sensornan di movimento y microfono di e aparato.

E ta graba e roncamento of zonidonan di ambiente pa defini e calidad di soño y ta inclui un alarma cu ta lanta nos si nos a pasa nos ora di descanso.

White Noise

E aplicacion aki ta yuda nos drumi rapidamente atrabes di musica y zonidonan relaciona cu relahacion y descanso.

Ta manera cu nos ta den un spa of den un tempel budista Tambe e ta ofrece un alarma suave pa lanta nos den bon beis.

Sleep Better

Tras di analisa bo soño, ta ofrecebo un rutina pa prome y despues di drumi. E ta basa riba e estado di animo di e usuario y den e actividadnan cu esaki ta wordo realisa parti atardi y anochi. Purba lesa, dal un baño relahante, haci algun tipo di ehercicio suave manera yoga prome cu drumi. Lo bo wak con rapidamente e nivelnan di activacion celebral ta descende y con esaki ta repercuta den bo nivel di relahacion corporal.

No obstante, si e insomnio ta persisti, ta preferibe pa bo consulta bo dokter.

Un feliz dia y cu Dios bendiciona boso ricamente

”P’esey obedece y sigui tur cos cu nan bisa, ma no haci manera nan ta haci si! Pasobra nan mes no ta haci loke nan ta bisa. Mateo 23,1

Rumannan e Palabra di Dios ta siña nos cu nos mester ta atento, hopi hende ta papia bunita pero nan bida ta mustra e contrario.Nos mester purba sigui e bida di Hesus.

E no ta facil pero e recompensa ta Bida Eterno. Awo cu ta tempo di Cuaresma ban pidi Hesus laga nos cana hunto cu nE.

Si nos conoce su Palabra ban bibe. Ban cana cu Hesus, ora nos trompeca pidi’E lanta nos bek. Bunita ta cay y lanta bek y reconoce cu nos a comete un eror y pidi pordon. Sea humilde.

Oracion: Dushi Hesus nos kier ta humilde, cana den Bo pasonan. Guia nos y mustra nos cua ta e obra cu Bo kier nos haci den e Cuaresma aki. Laga nos papia y ta un ehempel di Bo den obra y nos bida diario. Amen.

FORTALEZA PA FAMIA

Scirbi pa Pastor Marcel Balootje.

CUIDOU CU INSULTO CONSTANTE, DEN MATRIMONIO Y FAMIA

Insulto ta haci dolor, insulto ta crea herida, no tin nada cu ta haci mas dolor y ta trece berguensa, ora un yiu ta insulta su mayor, y ta falta respet, mescos cu ora cu den un matrimonio un pareha ta zundra otro constant, y ta tira cos nan cara di otro, dilanti di nan yuinan, sin tene cuenta cu nan mester duna un bon ehempel.

E no ta nada bunita ora hende ta insulta otro, den un palabra bisa insulto y sarcasmo, ta veneno pa tur relacion, y pa tur amistad, pasobra palabra ta herida mas profundo cu golpi, nos tin di tene cuenta cu for di nos boca no por ta saliendo cos malo y cos bon na mesun momento.

Tene cuenta cu Dios no a yama nos pa kibra otro pero pa edifica otro. No ta pasobra bo tin rason bo tin cu usa bo rason pa destrui, pero corda bo tin cu samina bo mes, y asina usa tur oportunidad pa construi, y mayan e persona lo ta agradecido na bo.

Manera nos tur sa cu Efesionan 4:29 ta bisa hopi cla, pa tur hende

comprende lo siguiente:

No laga ningun palabra danjino sali for di boso boca, sino solamente palabra cu ta bon pa edificacion, conforme e necesidad di e momento,pa esaki duna gracia na esnan cu ta tende.

Laga tur amargura,furia, rabia, griteria,y calumnia wordo kita for di boso, hunto cu tur malisia. Y sea carinjoso cu otro, misericordioso, pordonando otro, mescos cu Dios den Cristo tambe a pordona boso.( Efesionan 4:31-32)

Den un palabra bisa stop di persigi otro, biba consciente, biba na paz, no usa bo posicion pa kibra bo yiu, ruman, of prohimo, y manera e palabra di Dios ta bisa den 1 Thesalonisensenan 5:15 Mira pa ni un hende no paga otro malo cu malo,

ma semper busca loke ta bon pa otro y pa tur hende.

Tin un gran conseho matrimonial cu ta para scirbi den Efesionan 5:2128-33. Cual ta bisa na prome lugar :

Sea sumiso na otro den e temor di Cristo.

Asina esposonan mester stima nan esposa, manera nan mes curpa.esun cu ta stima su esposa ta stima su mes.Pasobra nunca un hende a odia su mes carni, ma ta alimente y ta cuide.

Mas cla cu esaki no por ta, e palabra ta demostra pa nos no insulta ni maltrata otro verbalmente of fisicamente, pasobra matrimonio ta papia di un solo curpa, y ningun hende cu tin sano huicio ta maltrata su propio curpa.

Asina anto laga cada uno

di boso stima su esposa, manera su mes, y e esposa percura pa e respeta su esposo.

Laga esun cu kier stima bida,y mira dianan bon,frena su lenga,di loke ta maldad,y su lipnan di papia enganjo. Y lage aparta su mes di papia maldad y haci bon.lage

busca pas y siguie.( 1 Pedro 3:10).

No pagando malo cu malo, of insulto cu insulto,ma mas bien dunando un bendicion, pasobra boso a wordo yama pa e proposito aki, pa boso por hereda un bendicion.( 1 Pedro 3:9).

Efesionan 6:4 ta para scirbi: Y boso tatanan ( Mayornan) no provoca boso yuinan na rabia,ma lanta nan den e displina y instruccion di Senjor. No ta pasobra bo ta mayor bo tin e derechi di insulta,kibra, manipula bo yiu constantemente, Dios no a duna e derechi ey na ningun mayor, no ta pasobra un mucha a haci un fout awe, bo tin cu lanta tur dia y insulte pa mesun cos.

Amor ta cura tur herida, amor ta vence tur maldad, amor ta di Dios.

Sinceramente, Pastor Marcel Balootje.