Pagina PAG. 1 24
Diasabra November 2024 DIAHUEBS 1818SEPTEMBER 2025
Afl.
1.25
DIAHUEBS 18 SEPTEMBER 2025
Diaranson mainta tempran, Aruba a ricibi e noticia cu nos musico Robert Jeandor a fayece na edad di 71 aña. Su partida ta laga un bashi dificil pa yena, tanto den mundo musical como den corazon di su famia y su amistadnan. Robert, a lanta den e bario conoci como Madiki, tabata un di 11 ruman den un famia hopi uni. Den su bida personal e ta laga atras su esposa Vivian y dos yiu, Robert Jr. y Anoushka, cu semper tabata un apoyo constante den su trayecto. Un bida entrega na musica Su pasion pa musica a surgi desde chikito, y oficialmente a cuminsa cu e grupo di aguinaldo Las Blancas Palomitas. Den e añanan setenta, su talento como bahista a duna paso pa uni cu Los Juveniles, banda cu lo marca historia den tumba. Den 1976, 1977 y 1978 el a gana titulo di Rey di Tumba tres biaha consecutivo, logro cu hopi poco a logra. Un di e tumbanan ganador mas conoci, E Bolobonchi, a logra captura atencion di musiconan internacional, entre nan e gran Johnny Ventura. E experiencia aki a habri porta pa Robert pa subi escenario cu agrupacionan renombra manera El Gran Combo, La Dimension Latina, y mas despues Los Hijos del Rey. Na 1985, den mei mei di su crecimiento artistico, Robert a funda su propio orkesta: Robert y Su Orkesta. Poco aña despues, na 1990, e a lansa un otro proyecto: Robert y Su Solo Banda Show, consolidando su rol como un pionero den e ambiento musical local.
Ultimo recuerdo riba escenario
E ultimo presentacion di Robert tabata durante un evento bailable, unda ainda a logra gara e publico y entretene su publico, sinta riba su trono musical. Esei a keda como un recuerdo visual di su entrega total na musico y na su seguidornan.
CONDOLENCia
Solo di Pueblo, y famia Croes, - Edmond, Sandra, Ever, Endy- ta manda condolencia na su famia, amigonan y conocirnan. Cu Robert por descansa den pas eterno, y cu su legado Sigui vibra den e alma di Aruba