SIGUIENTE PASO
Dama heriDa Den acciDente riba Green corriDor
Green CorridorDiaranson anochi dos ambulance y polis a bay poco pariba di rotonde
Mahuma, e parti caminda cu ta bay pa Playa.
Segun informacionnan, un accidente serio a sosode y cu lo tin persona riba caminda herida.
Unidadnan cu a yega a constata cu tawata trata di un solo auto, un Daihatsu. Na stuur tawata un dama,
cu a wordo saca for di auto y keda benta riba caminda.
Ta mustra cu e vehiculo pa un of motibo a bay na su man drechi y dal duro contra cero/muraya di calichi hopi duro pa despues termina algun meter mas leu.
Door di e impacto violento, e dama a resulta bastante herida y segun testigo e tawata tin basta azeta di motor riba dje. Un testigo cu lo a mira mas o menos locual a sosode, tawata papia cu polis di trafico. Basta partinan di e auto a keda gespart riba caminda.
Silencio di gobierno ta cauSa pregunta: kico lo ta e Siguiente paSo di Sindicatonan
Awe ta marca exactamente un luna despues cu minister Geoffrey Wever a anuncia un aumento salarial pa funccionarionan di gobierno den skala 13 te cu 16. Un anuncio cu a causa reaccion entre hopi empleado publico cu no ta cay bou e skalanan aki. Segun informacion ricibi, e diferente sindicatonan a manda un carta oficial na minister-president Mike Eman solicitando un reunion urgente pa haya clarificacion riba e decision di ajusta e skala salarial.
Den e carta, firma pa SEPPA, SIMAR, SPA, SADA, SINBA, FTA y
TOPA, sindicatonan a pidi pa representante di DRH y Directie di Financién tambe ta presente den e reunion. Te awe, segun sindicatonan, ningun contesta oficial no a yega riba e peticion di reunion. E situacion aki ta crea preocupacion entre hopi empleado publico. Hopi ta sinti cu e decision di aplica aumento solamente pa skala 13 te cu 16 ta laga un gran grupo di funccionario afo, apesar cu costo di bida na Aruba a subi pa tur funccionario igual. Pa hopi empleado, e cuestion principal ta cla: costo di bida no a subi solamente pa un grupo di empleado publico, pero pa tur hende.
Parlamentario Xiomara Maduro:
Esaki ta haci cu e decision ta wordo mira como un forma di trato desigual dentro di aparato publico. Den medio di e silencio di gobierno, empleadonan awor kier sa kico ta e siguiente pasonan di sindicatonan. Hopi ta wak nan representantenan pa mira con e situacion lo wordo maneha y si lo tin accion pa defende interes di tur funccionario publico.
Pa hopi trahador di gobierno, e tema aki ya no ta solamente tocante un aumento salarial, pero tocante igualdad, respet y justicia laboralpa tur funccionario publico igual.
Dia 3 di maart ta un dia special den historia cultural di Aruba. Riba e dia aki 40 aña pasa, e Biblioteca Publico a cambia su nomber pa Biblioteca Nacional, marcando un paso importante den e desaroyo di un institucion dedica na preservacion di nos conocemento, historia y cultura nacional.
Desde su fundacion, e biblioteca a bira un centro importante pa estudio, investigacion y educacion. A lo largo di e añanan, Biblioteca Nacional a dedica su mes na colecciona, conserva y comparti
publicacionnan, documentonan historico y informacion balioso tocante Aruba y su pueblo.
Pa conmemora e ocasion historico aki, a planta un mata di Watapana cu ta simbolo di fortalesa, resiliencia y crecemento, cual ta refleha tambe e rol importante cu e biblioteca tin den nos comunidad.
Parlamentario Xiomara Maduro tabata presente pa felicita y gradici e directora y tur e personal di Biblioteca Nacional, pa nan dedicacion y servicio constante na bienestar di nos comunidad.
Noticia di Corte Ex miEmbro di CEA CondEnA pA posECion di ArmA dEClArA libEr
ORANJESTAD – Via video conference, Hof di Corte Superior a dicta sentencia den e apelacion di e homber F.vd B, contra su condena pa complice di posecion di arma di candela. Esaki a sosode Diaranzon merdia caminda Hof a declara F.vd B. liber.
SOLO DI PUEBLO por a compronde cu Procurador General (PG) a haya F.vd B. culpabel y a exigi 18 luna di prison di cual 12 luna ta condicional. Hof a bisa cu tin duda den declaracion di e 2 testigonan y ta declara F.vd B. liber.
Luna pasa tratamento di e caso a tuma lugar caminda F.vd B. a bisa Hof cu e no ta di acuerdo cu e condena di 20 luna di prison di cual 12 luna ta condicional cu 2 aña di prueba. El a bisa cu e no tabatin arma y cu tur e asunto aki ta un set up contra dje.
PISTOOL HAYA DEN TAS
Hof a mustra cu dia 7 November 2020, Polis a bay na un bar na Ponton caminda tabatin discusion entre dos hende homber. Polis a yega y a detene e homber P. cu tabatin un arma den un tas. Ta trata aki di un pistool Caliber 32. P. a bisa e agentenan di Polis cu ta F.vd B. a bis’e tene e arma p’e. Polis a detene vd B. tambe. Hof a bisa cu e homber P. tambe a wordo condena pa posecion di arma di candela.
ACUSADO TA CUESTIONA SET UP
Hof a puntra vd B., pakico el a apela cu e sentencia. Segun vd B., e ta convenci cu dos homber cu ta amigo di otro, a set up contra di dje. El a bisa cu P. y e homber L. a duna declaracion contra dje. F. vd B. a bisa Hof cu e no conoce L. Hof a mustra cu ta ora cu a detene P., el a bisa di biaha cu e arma ta di vd B. Segun vd B., e no sa cana cu arma y tampoco tas. El a bisa cu e ta cana cu cartera. Hof a puntra pakico vd B. ta pensa cu P. y L. a palabra pa bisa cu e arma ta di dje. Segun vd B., Polis no tin prueba
cu el a duna e arma na nan. Hof a bisa cu e dos hombernan ta hopi mas jong cu vd B. Segun vd B., e tabata 23 aña trahando cu CEA y a wordo kita door di e caso aki.
Hof a mustra cu Polis a haya e cellular di vd B. den e tas di P. Segun vd B. e discusion tabata pafor di e bar y el a laga su cellular riba mesa den e bar. E ta kere cu nan a coy su cellular for di ariba mesa.
PG A EXIGI CASTIGO
PG a bisa Hof cu vd B. ta bisa cu e hombernan P. y L. a gaña riba dje cu e arma ta di dje. Polis a haya e arma den e tas di P. y un cellular. E cellular ta di vd B. P. a wordo condena na 22 luna di prison di cual 10 luna ta condicional. Na opinion di PG, P. na momento di detencion a bisa cu e arma ta di vd B. y L. tambe a confirma esey. PG a bisa cu P. ta traha cu vd B. y PG ta haya dificil cu P. ta bay gaña riba vd B. PG a bisa cu e no ta kere declaracion di vd B. cu ta e hombernan a coy su cellular. PG ta kere cu e tas ta di vd B. PG a mustra cu como miembro di CEA, vd B. tabatin un arma ilegal. E ta haya cu no tabatin motibo pa a apela e sentencia. El a exigi pa Hof condena vd B. na 18 luna di prison di cual 12 luna ta condicional cu 2 aña di prueba.
ABOGADO
Abogado mr. Steward a bisa Hof cu no tin prueba cu vd B. tabatin un arma di candela. Na opinion di mr. Steward, no por kere declaracion di P. y L. y ta haya cu no tin prueba di sosten. E abogado ta haya cu e dos hombernan P. y L., a tira e responsabilidad riba vd B. El a sigui bisa cu e declaracion di P. y L. ta contradictorio.
E abogado a mustra cu e homber L. a wordo declara liber siendo cu e tabata hunto cu P. El a bisa cu no a haya finger print di vd B. riba e arma. E abogado ta haya cu no tin indicacion cu e arma ta di vd B. El a mustra cu a haya e
arma serca P. E abogado ta haya cu Hof mester declara vd B. liber. E abogado a bisa Hof cu vd B. tabata traha cu CEA y door di e caso aki, el a wordo kita. E abogado ta lamenta cu e caso a tarda asina hopi pa wordo trata caminda a laga vd B. den incertidumbre.
VIDEO TA MIRA MOVECION SOSPECHOSO
Na opinion di Hof, no tin indicacion cu tur cos a pasa manera P. y L. a declara na Polis. Hof ta pensa cu e por ta cu nan kier a tira culpa riba F. vd B.
Hof a mustra cu den e tas di P. a haya e pistool y e cellular di F.vd B. Hof a bisa cu for di imagennan di video di seguridad den e bar, por mira cu P. a bay den bar y a coy algo for di un mesa. Hof a bisa cu no ta mucho cla kico P. a coy y P. durante interogacion na Hues Comisario, a bisa cu el a lubida kico el a coy for ariba e mesa.
ACUSADO DECLARA LIBER
Esey ta trece cun’e cu Hof tin duda den declaracion di P. y L. y ta declara F.vd B. liber
Fraccion di MEP: Un lider prepara no ta wordo sorprendi; nos ta exigi proteccion pa bo poder di compra
ORANJESTAD – "Aruba mester tin transparencia y un plan concreto. Nos no por permiti pa e tensionnan na Medio Oriente afecta e cartera di nos famianan sin cu tin un strategia pa wanta e sla," Evelyn Wever-Croes, lider di Fraccion di MEP a declara despues di a entrega un peticion oficial pa
un reunion urgente cu Minister Geoffrey Wever.
Liderazgo cu vision
Como un partido cu ta actua cu seriedad, MEP ta compronde cu un economia chikito manera di Aruba ta vulnerabel. E tensionnan entre Merca y Iran por nifica un subida
den prijs di gasolin y cuminda.
Pa MEP, e bienestar di bo famia ta bin prome, y e mihor forma di proteha esaki ta door di ta prepara y no spera te ora e crisis t'ey caba. "Pueblo di Aruba merece sa cu nan representantenan ta traha cu responsabilidad. Nos compromiso ta pa garantisa stabilidad y cuida e placa cu bo ta traha duro pe tur dia," Wever-Croes a enfatisa.
Exigiendo claridad y siguridad pa bo cas
MEP a pidi e reunion publico aki pa e Minister informa Parlamento y comunidad riba puntonan cu berdad ta conta pa bo bida diario:
• Analisis di Riesgo: Con e tensionnan aki por afecta nos importacion y turismo?
• Medidanan Concreto: Kico Gobierno ta bay haci awe y awo mes pa evita cu prijsnan lo keda subi?
• Scenarionan Realistico: Con nos ta prepara si e prijs di combustibel keda halto pa hopi tempo?
• Pasonan Preventivo: Con nos ta proteha bo confiansa pa e economia no para?
E diferencia ta e trabou
Den momentonan di duda y insiguridad den mundo, e diferencia entre un politico cu ta djis papia y un cu ta traha ta den e accionnan aki. MEP ta demostra un biaha mas cu nan ta e bos di seriedad.
"Nos no ta bini pa crea panico, nos ta bini pa exigi e profesionalismo y e transparencia cu Aruba tin mester aworaki.
Nos compromiso ta cla: interes di pueblo prome, awo y semper."
Ekipo di prEparadornan fisico di coa ta sigui cu cursonanan di capacitacion tEcnico
Entrenador Adolfo Gallego Salas ta duna curso di entrenamento y capacidadnan fisico
Despues di a ricibi un curso virtual algun siman pasa, ekipo di preparadornan fisico di Comite Olimpico Arubano (COA) a ricibi un curso di entrenador Adolfo Gallego Salas di Colombia. Adolfo cu ta di bishita na aruba, ta entrenador di hisamento di peso tambe
ta traha como preparador fisico pa diferente deporte na Colombia. Algun aña atras Adolfo tabata na Aruba como entrenador di e federacion di hisamento di peso “Aruba Amateur Weightlifting Association” (AAWA) unda a logra resultado historico pa Aruba hunto cu
atleta Joel Kuiperi, logrando un medaya di plata na e Weganan Suramericano Cochabamba2018.
Durante dos sesion na COA, e grupo a ricibi curso cu a trata diferente topico importante pa entrenamento fisico. A trata e tema di organisa un plan di entrenamento di preparacion fisico, cu ta conecta cu e necesidad di compronde e diferente capacidadnan fisico y condicional di cada atleta, cu por diferencia a base di e deporte cu ta practica. E capacitacion aki ta sirbi
pa asina por eleva e nivel di e preparadornan fisico cu ta continua traha cu tur atleta cu tin bista riba partipacion na e Weganan cu tin pa e Ciclo
Olimpico.
COA ta gradici Adolfo pa su tempo y conocemento comparti cu sigur lo yuda
nos entrenadornan sigui desaroya nos atletanan di TEAMARU.
#COA #ARUBA #TEAMARU
ipa ta tEnE un anochi di informacion
di E Estudio pa maEstro di EnsEñansa primario dia 16 di maart
Dialuna dia 16 di maart 2026 Instituto Pedagogico Arubano (IPA) ta tene un anochi di informacion pa tur studiante cu tin diploma di havo, vwo of mbo/EPI nivel 4 of cu ta den examenklas di un di e scolnan menciona, cu ta interesa pa haci e estudio pa Maestro di Enseñansa Primario na IPA.
E estudio aki ta forma maestro cu ta cualifica pa duna les na mucha di kleuter y of scol basico.
E anochi di informacion ta di 7:00 pm - 8:30 pm y lo tuma luga den Sala Madonna na IPA (Isaac Wagemakerstraat 11, San Nicolas).
Durante e anochi di informacion lo duna informacion general di e estudio pa Maestro di Enseñansa Primario.
Ademas di esaki lo elabora riba e procedura y prueba di admision
(beroepstest) cu mester cumpli cu ne. E prueba di admision ta obligatorio pa tur studiante cu kier continua nan estudio na IPA. Lo tin varios docente di IPA presente, cu lo duna splicacion di e materianan cu ta forma parti di e prueba di admision. Na final lo tin oportunidad pa haci pregunta.
Bo tin deseo pa bira maestro di enseñansa primario? Esaki ta e momento, bay p’e!
Milly Schwengle a huraMenta coMo MiniS ter PleniPotenciario
Diaranson merdia, na Cas Ceremonial di Gobernador di Aruba, Su Excelencia Gobernador di Aruba, Alfonso Boekhoudt, den presencia di Conseho di Minister di Gabinete AVP-Futuro, a tuma luga e huramentacion di mr. M.G.M. (Mildred) Schwengle como Minister Plenipotenciario pa Hulanda. Cu esaki, Aruba ta fortalece su representacion strategico den Reino y su presencia na Europa.
Mildred G.M. Schwengle LLM ta un experto legal cu amplio experencia den derecho constitucional, derecho publico internacional, gobernacion (publico y priva), financiamento y negociacion di alto nivel. Schwengle a studia Derecho Hulandes na Katholieke Universiteit Nijmegen (awor Radboud Universiteit Nijmegen) entre 1984 y 1989.
Su carera profesional
a cuminsa den Ministerio Publico como plaatsvervangend Procureur Generaal (19901992) y despues como griffier na Gerecht di Prome Instancia di Aruba (1992-1994) . Na 1994 Schwengle a bira abogado y desde 1996 te 2017 tabata partner na HBN Law, sirbiendo Aruba, Corsou, Boneiro, Sint Maarten y Saba.
Entre 2017 y 2023, Schwengle a ocupa e posicion prestigioso como miembro di Raad van State di Reino na Hulanda y a acesora Gobierno di Reino riba legislacion, decreto y tratadonan internacional, cu enfasis riba relacionnan den Reino. Ademas di su experencia institucional, Schwengle a actua varios biaha como abogado principal den proyectonan grandi di financiamento, privatisacion di fondo di pensioen y adkisicion internacional cu
interesnan miyonario. Actualmente Schwengle ta dirigi negociacionnan den Reino riba finansa publico sostenibel y supervision financiero pa Gobierno di Aruba.
Cu un trayectoria caracterisa pa liderazgo, integridad y experticio huridico, Milly Schwengle tin un combinacion unico di experencia di sector publico y priva. Gobierno di Aruba ta expresa su confiansa pleno cu Schwengle lo representa interesnan di Aruba cu dignidad, responsabilidad y vision strategico den Hulanda y den Reino.
Nombramento di
Schwengle como Minister Plenipotenciario ta marca un paso firme den fortalecemento di e posicion di Aruba den Reino, cu enfasis riba cooperacion, dialogo y defensa di interes nacional.
Premier eman a Planta mata di WataPana BiBlioteca nacional ta marca
celeBracion di StatuS aParte y hiS toria di inS titucion
En conexion cu celebracion di 40 aña di Status Aparte y 50 aña di Himno y Bandera, a tuma luga un ceremonia special na Biblioteca Nacional di Aruba, caminda Prome
Minister Mike Eman, acompaña pa Minister di Enseñansa Gerlien Croes y Directora di Biblioteca
Astrid Britten, a participa den e plantamento simbolico di mata di Watapana. E ceremonia aki ta conecta tanto cu e celebracion nacional como cu e historia di e institucion cultural importante aki.
A recorda un momento historico pa e biblioteca. Prome cu Aruba a logra su Status Aparte, e institucion tabata conoci como Biblioteca Publico Aruba. Sin embargo, riba 3 di maart 1986, poco despues di introduccion di Status Aparte, e nomber a cambia oficialmente pa Biblioteca Nacional Aruba, reflehando e posicion nobo di Aruba como pais dentro di Reino Hulandes.
E plantamento di e mata di Watapana, scogi specificamente pa e ceremonia, pasobra e mata nacional di Aruba tin un
significado profundo den cultura y identidad Arubiano. Durante su discurso, Prome Minister Eman a enfatisa e simbolismo di e mata. “E palo di Watapana tin hopi simbolismo pa ken nos ta como Aruba. E ta crece den mesun direccion cu nos biento y e ta un simbolo di superacion y fortalesa di nos naturalesa,” Eman a expresa.
Segun e Prome Minister, e simbolo aki ta refleha tambe e historia di Aruba como pais cu a supera retonan grandi durante añanan, pero cu a sigui avansa cu determinacion y orguyo.
E actividad ta forma parti tambe di e esfuerso nacional di reforestacion cu gobierno ta promoviendo pa restaura e paisahe natural di Aruba y fortalece consciencia riba proteccion di nos medio ambiente. Cu e ceremonia aki, e celebracion di Status Aparte ta conecta historia, cultura y naturalesa, recordando e caminda cu Aruba a recore mientras e pais ta sigui traha pa un futuro sostenibel pa e siguiente generacionnan.
Minister Geoffrey Wever ta anuncia destaho publico pa
desaroyo di fintech
Oranjestad, fecha - Minister di Finansa, Asunto Economico y Sector Primario, mr. Geoffrey Wever, a anuncia oficialmente un destaho publico pa desaroyo di e Plan di Implementacion di FinTech pa Aruba, marcando un paso concreto den e strategia di gobierno pa modernisa economia di Aruba y fortalece su posicion como un hub financiero digital competitivo den region. Desaroyo di e Plan di Implementacion di FinTech pa Aruba ta forma parti di e Landspakket y lo wordo financia pa Hulanda.
Desaroyo di FinTech ta parti di e maneho economico pa un economia resiliente, diversifica y prepara cu ta crea oportunidadnan nobo pa innovacion, mas inversion y empleo di nivel halto pa reduci e dependencia di Aruba riba un solo sector economico. E destaho publico pa desaroyo di e Plan di Implementacion di FinTech pa Aruba ta forma parti di pasonan concreto di ehecucion di e maneho economico.
Den 2024 minister Geoffrey a cera un colaboracion strategico cu United Nations Economic Commission for Latin America and the Caribbean (UN-ECLAC), cu apoyo di Landspakket, pa analisa e potencial di FinTech, blockchain y digital currency pa futuro economico di Aruba.
Riba 12 di augustus 2025 Minister Geoffrey Wever a ricibi ricibi e estudio final riba e riesgonan, obstaculonan y oportunidadnan di e sector di FINTECH y evaluacion di e impacto di “Blockchain Technology” y “Crypto Currency”. E estudio a identifica diferente area cu ta rekeri modernisacion, incluyendo regulacion pa e-money, proteccion di data, seguridad cibernetico y servicio financiero digital. E resultado di e investigacion a ofrece un guia claro di reformanan necesario pa stimula innovacion mientras cu ta mantene stabilidad financiero y proteccion di consumidor. Como parti di e estudio, UN ECLAC a reuni diferente partners manera Banco Central di Aruba, Camara di Comercio, ATIA, Setar N.V., Cybersecurity Center of Excellence, Insurance
Association of Aruba, Aruba Bankers Association, Digicel, Directie Telecommunicatie Zaken, Qredits Aruba, Gamma IT y diferente personanan clave den e sector di FINTECH pa asina sigura cu e direccion strategico ta basa riba realidad economico y financiero di Aruba, mescos cu practicanan internacional di nivel halto.
Den cuadro di informacion riba 25 di november 2025 Parlamento di Aruba a haya un presentacion amplio di UN-ECLAC riba e resultado di estudio pa desaroyo di FINTECH na Aruba. UN-ECLAC durante e presentacion aki a delinea e condicionnan institucional, legal y tecnologico necesario pa desaroya un sector FinTech seguro, inclusivo y competitivo.
Como parti di ehecucion di maneho e destaho publico tin como meta pa busca e experticio necesario pa traduci e resultadonan di e investigacionnan den un mapa di implementacion concreto y den fase. E trabao ta encera diseño di medidanan concreto pa modernisacion regulatorio, fortalecemento di capacidad institucional y creacion di proceduranan claro pa innovacion y acceso na mercado den sector FinTech.
Entre e elementonan principal di e plan ta inclui desaroyo di cuadro regulatorio moderno pa transaccionnan electronico, firma digital y e-money, di acuerdo cu standardnan internacional manera esun establece pa UNCITRAL, asina tambe fortalecemento di capacidad di autoridadnan supervisor pa maneha tecnologia emergente manera inteligencia artificial (AI) y blockchain. Ademas, e plan lo explora mecanismo pa facilita innovacion responsabel, incluyendo posibilidad pa establece “regulatory sandbox”, cual ta permiti empresanan innovador prueba solucionnan financiero nobo den un ambiente controla y supervisa.
“Un di e retonan mas grandi den gobernacion ta converti vision den resultado real. Cu e plan di implementacion aki nos ta tuma un paso concreto pa construi un pilar economico nobo pa Aruba — uno cu ta crea oportunidad
pa aruba
pa innovacion, empleo di calidad halto y crecemento orienta riba exportacion. Door di atende cu transformacion digital na un manera responsabel, Aruba por posiciona su mes como un hub moderno di servicio financiero den region Caribe. e plan di implementacion ta representa e transicion di vision strategico pa ehecucion concreto segun minister Geoffrey Wever”
E proceso di destaho lo wordo conduci como destaho publico di acuerdo cu Comptabiliteitsverordening di Gobierno di Aruba.
E proyecto ta planea pa wordo ehecuta entre april 2026 y october 2026.
Partidonan interesa por presenta preguntanan te 6 di maart 2026, mientras cu e deadline pa entrega di propuesta ta 20 di maart 2026. Interesadonan por solicita e Terms of Reference completo via e projectleider, Bryan Lenzinger, na b.lenzinger@deaci.aw. Por haña mas informacion tocante e destaho publico aki na https://www.gobierno.aw/nl/openbareaanbesteding-het-voorbereiden-van-eenimplementatie-plan-voor-de-ontwikkelingvan-de
Cu e iniciativa aki, Gabinete AVP-FUTURO ta sigui tuma paso concreto pa desaroya un economia diversifica, innovador y digitalmente conecta, garantisando cu pais Aruba ta keda competitivo globalmente mientras cu ta crea oportunidad nobo pa entrepeneurship, inclucion financiero y desaroyo economico duradero.
DRH TA DI VITAL IMPORTANCIA PA EFECTIVIDAD Y EFICIENCIA DI SERVICIO PUBLICO
Diaranson mainta, Minister di Husticia, Integracion, Transporte Publico y Energia, mr. drs. Arthur Dowers, a atende na e personeelsdag di Departamento di Recurso Humano (DRH).
E personeelsdag di DRH no ta solamente un momento di reunion, pero un oportunidad strategico unda e ekipo cu ta carga recurso humano di henter aparato gubernamental ta reuni pa evalua, analisa y actualisa tur data relaciona cu empleadonan publico. Ademas, e programa a inclui sesionnan dirigi riba fortalecemento di conocemento y capacidad profesional di cada empleado di DRH.
Minister Dowers cu tin e maneho di DRH bao su responsabilidad, a habri e personeelsdag y a expresa su aprecio pa e trabao importante cu e ekipo di DRH ta haci tur dia tras di cortina. E profesionalnan di DRH ta esencial pa garantisa cu cada departamento tin e personal adecuado, e structura corecto y e guia necesario pa sirbi comunidad di Aruba na e nivel optimal.
Como departamento cu tin e responsabilidad di supervisa y guia tur otro departamento di gobierno den materia di recurso humano, DRH ta ocupa un posicion structural den nos sistema gubernamental. Tin un bista cla y completo di e diferente aspectonan di e aparato publico, ta esencial pa por tuma decisionnan informa y guia mehoracion continuo di servicio publico.
Sin un DRH fuerte, profesional y bon organisa, no por tin servicio di gobierno eficaz y eficiente. Ta importante pa tin
data corecto, analisis profundo, procesonan bon defini y planificacion strategico pa asina fortifica transparencia, responsabilidad y calidad den servicio na comunidad.
“DRH ta un departamento cu ta sostene tur departamento di gobierno y ta esencial cu bo mes tin bo huishouden na ordo. E diferente procesonan den DRH ta canando y tin intencionnan hopi serio pa mehora e calidad di servicio na comunidad”, Minister Dowers a indica.
Pa trece cambio positivo pa e funcionamento di departamentonan gubernamental, DRH algun aña pasa a inicia cu Prestatiemanagement, Land Aruba Academy y algun luna atras a inicia cu Leiderschapstraining. Prestatiemanagement ta e sistema di evaluacion di funcionamento di empleadonan publico.
Cada seis luna ta haci evaluacion y ta duna guia pa mehora nan funcionamento y asina eleva e nivel di servicio na publico. Land Aruba Academy ta un portal digital di DRH cu ta contene cursonan gratis cu cada empleado publico tin acceso na dje y ta ofrece esaki na diferente nivel y riba diferente topico pa yuda expande conocemento di empleadonan publico.
E bishita di Minister Dowers ta confirma su compromiso pa modernisa y fortifica e aparato gubernamental, poniendo enfoke riba efectividad y eficiencia, profesionalisacion y bon gobernacion. DRH ta y lo sigui ta un pilar central den e proceso di mehoracion continuo di nos servicio publico.
Fiesta Rota R ia 2026
“Bini Uno, Bini tUR ”
Cu mas di 8 container di producto y mas premio pa mas impacto positivo na nos comunidad
ORANJESTAD (27 di februari 2026) –Rotary Club of Aruba ta orguyoso di anuncia oficialmente e fecha pa un di e eventonan mas grandi y mas spera di nos isla: Fiesta Rotaria 2026 lo tuma luga riba diadomingo 29 di maart 2026, for di 9:00am te 5:00pm, na Parking Lot Stadion Guillermo Prospero Trinidad na Dakota. Cu e lema “Bini Uno, Bini Tur”, e edicion 2026 ta invita henter comunidad pa reuni, celebra y alabes contribui na un causa noble. Manera ta conoci, Fiesta Rotaria ta mucho mas cu un feria; e ta un evento familiar grandi cu ta combina supermercado, paña, cuminda, coi bebe, producto pa cas, mata, wega pa grandi y chikito, musica, baile y entretenimiento y mas. Ta un dia caminda amistad, ambiente y solidaridad ta encontra den un solo lugar. Un di e punto culminante di e evento ta e gran rifa anual. Pa solamente Afl. 25,- pa ticket, participante tin oportunidad di gana un di 16 premio spectacular. E prome premio ta un Kia Carens 2026 completamente nobo, incluyendo un aña di seguro gratis. Entre e otro premio tin 2 pasashi Economy Class Aruba–Amsterdam–Aruba, un iPhone 17 256GB, varios gift certificates di Afl. 1,500, Afl. 1,000 y Afl. 500, weekend stay pa
dos persona na hotel, un aña di servicio di celular, un airco di 12,000 BTU, pasashi Aruba–Curaçao, joya y un premio cash di Afl. 500. E sorteo oficial lo tuma luga e mesun diadomingo 29 di maart 2026 pa 5:00pm na presencia di notario. Importante ta pa destaca cu, manera semper, tur fondo recauda durante Fiesta Rotaria ta bay bek directo den nos comunidad. Rotary Club of Aruba ta uza e entrada aki pa financia y sostene diferente proyecto social cu ta beneficia mucha, adulto mayor y otro grupo cu tin necesidad di apoyo. Asina, cada ticket cumpra y cada articulo bendi ta bira un inversion directo den bienestar di Aruba. Como parti di e anuncio oficial, Rotary Club of Aruba a ofrece diabierna mainta un conferencia di prensa pa comparti
mas detaye tocante patrocinadonan, premio y logistica di e evento. Aki a hiba palabra Rubiela Lampe, president actual di Rotary Club of Aruba, Shelby Maduro como relacionista publico di Fiesta Rotaria y Bert Kamsteeg di e comision organisado.
Rotary Club of Aruba ta extende un danki sincero na tur patrocinado, boluntario y miembro cu ta traha incansablemente pa haci Fiesta Rotaria 2026 un gran exito. Sin e compromiso di comercio local y e apoyo continuo di comunidad, e impacto social di e evento no lo tabata posibel. Marca e fecha awor: 29 di maart 2026. Bini Uno, Bini Tur – y haci parti di un tradicion cu no solamente ta celebra comunidad, sino tambe ta fortalece y yuda construi un futuro miho pa Aruba.
ACCION POLICIAL DEN CARIBE HULANDES
ACCION PA CU ENTREGA DI ARMA
DI CANDELA ILEGAL
Santa Cruz, ARUBA: Cuerponan Policial di Caribe Hulandes den cooperacion cu e Colegio di Hefenan di Cuerpo (college van korpschef), ta anuncia lansamento di un accion interinsular relaciona cu entrega di arma di candela ilegal.
E iniciativa conhuntamente ta un colaboracion di e organisacionnan di Caribe Hulandes cu cooperacion
SUSHI
di Ministerionan Publico di Aruba, Corsow, Boneiro, Saba, Sint Eustatius y Sint Maarten.
Pa prome biaha tur e islanan aki simultaneamente ta traha riba un accion di entrega di arma di candela ilegal.
E meta principal di e accion coordina aki ta, pa brinda tur esnan cu ta den posecion di un arma di candela ilegal, e
oportunidad pa di un forma boluntario entrega esaki durante di un periodo determina, sin cu e tin consecuencia
penal pa violacion di e ley di arma di candela.
Cu e accion colectivo aki e islanan kier manda un mensahe fuerte: arma di candela ilegal y violencia cu arma
no ta wordo tolera den nos comunidadnan.
E proyecto ta refleha e responsabilidad comparti di tur e islanan pa hisa e seguridad publico. E momento sincronisa di e accion ta demostra e strategia regional di union, pa alcansa na reducion di e cantidad di armanan di candela ilegal cu tin den circulacion y asina preveni tambe e cantidad di violencianan cu arma di candela.
A base di resultado di e
accion aki, e cuerponan hunto cu Ministerionan Publico lo intensiva e esfuersonan. Esaki dor di eherce controlnan y entradanan hudicial cu lo bai tin na tur parti y sitionan riba e islanan, buscando arma di candela ilegal. Cuerponan policial di tur e islanan ta haci un yamada na tur ciudadano pa asumi nan responsabilidad y contribui na un sociedad mas sigur,
DVG ta informa
dor di hasi bon uso di e oportunidad encuestion. Dor di entrega bo arma di candela ilegal awor, bo ta evita di keda persigui penalmente y ademas bo ta salba bida.
Mas detaye tocante temporada, localidad y procedura pa entrega di arma di candela, lo keda comunica dor di cada Cuerpo policial individualmente, den e dianan cu ta sigui
DEPOSITA NA DAMNAN TA MENASA PA SALUD PUBLICO
ORANJESTAD, Aruba – 04 maart 2026: Segun un noticia publica ayera. Departamento di Agricultura Santa Rosa a expresa su preocupacion pa cu e situacion unda sushi ta wordo benta rond di damnan na Aruba. Na diferente damnan, sushi ta keda tira na rand of asta den e awa mes, algo cu Santa Rosa ta cualifica como condenabel. E damnan aki no ta simplemente almacena awa. Na Aruba, hopi cunukeronan ta usa e awa di dam pa muha cosecha y tambe pa duna bestianan bebe. Ora sushi ta wordo tira na of
den e damnan aki, e awa por wordo contamina cu bacteria, sustancianan peligroso of resto di material cu por afecta salud tanto di animal como di hende. E peligro ta serio. Bestia cu bebe awa contamina por bira malo of transmiti enfermedad. Si e awa contamina ta usa pa agricultura, e contaminacion tambe por drenta den e cadena alimenticio. Esaki por crea riesgo pa salud publico, specialmente ora producto di tera local ta yega na consumo humano. Ademas di esaki, tambe ta
wordo haci un apelacion na companianan di chica poz pa tene cuenta cu e peligro cu nan por ocaciona. Deposita awa sushi den damnan of laba trucknan di chica poz cu awa di dam por contribui na contaminacion di e awa. Practicanan asina no solamente ta afecta medio ambiente, pero tambe por pone den peligro agricultura, bestianan y salud di comunidad.
E preocupacion ta aun mas relevante awor cu mercado di productonan local ta creciendo na Aruba. Cu mas produccion local ta wordo
promovi y consumi, ta mas importante aun pa sigura cu e awa cu ta wordo usa pa agricultura ta limpia y seguro.
Autoridadnan ta sigui insisti cu damnan no ta lugar pa deposita desperdicio. Mantene e damnan limpi ta esencial pa proteha produccion local, bienestar di bestia y salud publico di Aruba.
Pa mas informacion like nos Facebook page Directie Volksgezondheid DVG Aruba, Follow nos riba Instagram directie_ volksgezondheid_aruba, of
Follow nos den WhatsApp Channel, subi nos website www.dvg.aw, yama nos na 5224200 of mail nos na servicio@dvg.aw
DBB ta urgi ciu Da Danonan pa evita B iahe pa Me D io o riente
ORANJESTAD:
Ministerio di Asuntonan
Exterior di Reino
Hulandes, pa medio di Departamento di Relacionnan Exterior di Aruba (DBB), ta emiti un aviso urgente na tur ciudadano pa evita biahe pa Medio Oriente.
E yamada aki ta bini como resultado di e riesgonan di siguridad halto cu ta afectando e region actualmente.
Riesgonan y situacion actual E situacion na Medio Oriente ta keda extremadamente tenso y impredecibel. Tin un riesgo real pa ceramento
di espacio aereo y cancelacion di buelonan sin previo aviso. Ademas stranheronan, incluyendo ciudadanonan di Reino
Hulandes ta core un riesgo eleva di detencion arbitrario.
Ta pidi pa tene cuenta cu, den situacionnan di crisis, e capacidad di Embahada Hulandes pa brinda asistencia consular por ta hopi limita of inexistente. E advertencia aki ta conta en particular pa biahenan pa Iran, Israel, Irak, Libanon, Emiratos Arabes Uni y e islanan Abu Musa y Tunb.
Instruccion urgente:
Crisis Contactformulier
(Deadline 6 di Maart) Ministerio di Asuntonan
Exterior di Reino Hulandes ta conseha tur persona cu ya caba ta den e region pa evalua nan situacion y sali for di e area si esaki ta posibel di un forma sigur y controla.
Actualmente e Crisis
Contactformulier ta wordo uza pa personanan cu a keda pega den e siguiente teritorionan: Israel, Territorionan Palestino (West Bank), Jordania, Iran, Irak, Libanon, Oman, Bahrein, Kuwait, Qatar, Saudi-Arabië y Emiratos Arabes Uni. E Crisis Contactformulier por ser haya riba e website
di Ministerio di Asuntonan Exterior di Reino Hulandes via e siguiente link: https://www. nederlandwereldwijd.nl/ crisis/formulier
• Deadline: E formulario aki lo cera diabierna 6 di maart 2026 pa 12:00 di merdia (ora di Hulanda).
• Condicionnan: Por yena e formulario solamente si bo ta pega den e paisnan menciona y bo ta biba na Hulanda of den e parti Caribense di Reino manera Aruba, y bo tin nacionalidad Hulandes (of bo ta partner/yiu di un persona cu nacionalidad Hulandes).
Asistencia y Registro Pa keda informa di e desaroyonan mas reciente, ta crucial pa registra via e Informatieservice: https://informatieservice. nederlandwereldwijd.nl/ . Esnan den necesidad por tuma contacto via e contactcenter 24 ora pa dia via: +31 247 247 247.
Departamento di Relacionnan Exterior Aruba ta enfatisa e importancia pa keda alerta, bon informa y sigui estrictamente e consehonan di biahe oficial via e website di Ministerio di Asuntonan Exterior di Reino Hulandes: www. nederlandwereldwijd.nl/ reisadvies.
repreSentante perManente Di nacionnan uni ta haci
BiShita Di
introDuccion cerca
Mini S ter Dower S
Sra. Lise Gregoire-van Haaren, Representante Permanente (apunta) di Reino Hulandes na Nacionnan Uni na New York, a haci un bishita di introduccion na Minister di Husticia, Integracion, Transporte Publico y Energia, mr. drs. Arthur Dowers.
Durante e bishita, a papia riba desaroyonan internacional actual, migracion, stabilidad regional y cooperacion internacional.
Sra. Gregoire-van Haaren tin un carera impresionante. Gregoire-van Haaren a traha na Ministerio di Asunto Exterior di Reino
Hulandes y a ocupa diferente funcion diplomatica na Den Haag, Bruselas, Paris y New York. Tambe a sirbi como Embahador y como
Representante Permanente suplente na ONU, entre otro durante membrecia den Conseho di Siguridad di ONU na 2018. Tambe
Gregoire-van Haaren a ocupa e posicion di Director di Union Europeo y Director-General suplente di Cooperacion Europeo na Den Haag.
Su amplio experencia den cooperacion Europeo, diplomacia multilateral y relacion internacional ta forma un base fuerte pa cooperacion continuo den Reino y na nivel di ONU.
E bishita aki ta enfatisa e
importancia di coordinacion estrecho entre Aruba y e Representabnte Permanente na Nacionnan Uni, mirando interes comun y posicion internacional.
Santa Misa 7 maart ’26 na Kapel di Kapel alto vista y Blue army San nic.
Pa 7 or di mainta, Santa Misa na Kapel di Curason di Maria (Blue Army y na Alto Vista.
Prome cu Santo Misa ta resa Santo Rosario pa 6.15 “Misterio Gososo”, despues ta sigi cu Salve Regina.Ta invita tur deboto y fielnan di Mama Maria pa asisti na e Santa Rosario prome cu Santa Misa. E ta entercede pa nos na nos Tata Celestial.
Papa Leon ta pidi pa henter mundo resa e Santo Rosario pa bienestar di henter mundo. Pa reina pas y trankilidad den nacionnan cu ta den guera.
Papa Leon X1V Y Obispo Charles y tur sacerdote, DiaconoNAN y laiconan cu ta hiba e bon noticia pa e pueblo di Dios. Pa nos Gobernantenan y tur cu ta carga responsabilidad pa nos pais Aruba. Pa enfermonan den exterior cu a bay busca
nan salud.Cu pronto regresa na Aruba pa sigi gosa di un bon salud den nan su famia stima. Luna di maart ta dedica na San Hose . Ban canta y pidi Jesus yuda nos den nos necesidadnan. Ban hinca rudia busca refugio na nos Mama Celestial. E ta guia nos riba e Caminda di Dios. Cu Mama Maria den nos curason, nos Mama stima, compaña nos den e caminda di pas. Ban hunto resa pa nos hogar y nos isla Aruba. Pa tin pas y comprencion un pa otro. Den nos oracionnan resa pa por yega na e pas desea.
Bendicion
Cordial saludo
Coordinador: Sr. Mario Werleman cel: 593 7048
Pastoor Huancho Pilongo 585 8378
Centro Pastoral Sta.Cruz
Marooning Practices
Exposicion final di residencia artistico Echoes of the Islands From Stor IES to Arch I v ES
San Nicolas, Aruba –Art Rap Foundation ta presenta Marooning Practices, e exposicion final di e residencia artistico Echoes of the Islands: From Stories to Archives. E apertura lo tuma luga riba diabierna 13 di maart pa 7:30 p.m. na Esquire Building, Bernard van de Veen Zeppenfeldstraat 67, San Nicolas, Aruba.
Entrada ta completamente gratis y habri pa publico general.
Marooning Practices ta reuni artista residente y artistanan local cu nan practica contemporaneo ta aborda libertad no manera un historia sera, sino manera un condicion activo y den constante transformacion. Basa riba e contexto di San Nicolas — un ciudad post-petrolero y migrante, forma pa hopi historia y comunidad — e exposicion ta explora proceso di resignificacion di memoria relaciona cu esclavitud, mas leu di marco institucional y colonial tradicional. E residencia a conta cu participacion di Jafer Cruz Cordero (Puerto Rico) y Raily Yance (Colombia–Venezuela), cu nan investigacion artistico nan drenta den dialogo directo
cu archivo, experiencia bibí den tejido social di Aruba. Nan obra ta presenta hunto cu artista invita di Aruba: Alida Martinez, Natusha Croes, Olga van Bochove y Velvet Zoé Ramos, creando un intercambio dinamico entre perspectiva internacional y local.
E exposicion ta cura dor Nelson Gonzalez (Aruba), cu asesoria curatorial di Gerardo Zavarce (Republica Dominicana) y participacion como curador invita di David Guerra (Puerto Rico).
Marooning Practices ta enfatisa riba metodologia no extractivo, basa riba presencia, dialogo y agencia comparti. E obra ta activa archivo y conocemento comunitario pa cuestiona narrativa historico polarisa y propone forma nobo di relacion cu memoria, territorio y pertenencia.
Marooning Practices ta posiciona arte como un espacio di autonomia, reflexion y construccion colectivo den e contexto actual di reparacion historico y reinterpretacion contemporaneo.
E proyecto aki ta realisa danki na e apoyo generoso di Cultuurfonds Caribisch Gebied (CCG)
via DNB Fonds, VNO – Vertegenwoordiging van Nederland in Aruba,
Mondriaan Fonds y Art Rap Foundation. Pa mas informacion: Art Rap Foundation artrapfoundation@gmail. com
Un feliz dia y cu Dios bendiciona boso ricamente
”P’esey obedece y sigui tur cos cu nan bisa, ma no haci manera nan ta haci si! Pasobra nan mes no ta haci loke nan ta bisa. Mateo 23,1
Rumannan e Palabra di Dios ta siña nos cu nos mester ta atento, hopi hende ta papia bunita pero nan bida ta mustra e contrario.Nos mester purba sigui e bida di Hesus.
E no ta facil pero e recompensa ta Bida Eterno. Awo cu ta tempo di Cuaresma ban pidi Hesus laga nos cana hunto cu nE.
Si nos conoce su Palabra ban bibe. Ban cana cu Hesus, ora nos trompeca pidi’E lanta nos bek. Bunita ta cay y lanta bek y reconoce cu nos a comete un eror y pidi pordon. Sea humilde.
Oracion: Dushi Hesus nos kier ta humilde, cana den Bo pasonan. Guia nos y mustra nos cua ta e obra cu Bo kier nos haci den e Cuaresma aki. Laga nos papia y ta un ehempel di Bo den obra y nos bida diario. Amen.
Bin disfruta di Mercado Santa Rosa diasabra awo
For di algun aña caba Departamento di Agricultura, Cria y Pesca, Santa Rosa ta organisando su Mercado Santa Rosa riba diasabra. Esaki ta debi na e demanda pa cumpra y ta mas aclansabel productonan local fresco produci. Nos clientela den mayoria caso ta pidi pa esaki. Logicamente nos departamento a yega na e conlcucion pa organisa esaki den un escala mas chkito cu entre otro 15 pa 20 productor local cu ta bin ofrece nan producto. Tratanto tambe pa organisa esaki maske ta un biaha pa luna. Na luna di Januari e aña aki nos a ranca sali cu nos prome Mercado Santa
Rosa di cual un biaha mas tabata masha exitoso. Nos bishitantenan a yega for di tur parti pa hasi nan compras y combersa den ambiente placentero y probecha tambe pa disfruta di prijsnan alcansbel pa nan cartera. Esaki no ta un mrcado grandi manera ta nos tin gustumber di organisa. Esun di riba diasabra ta enfoca mas riba nos productonan local den un scala mas chikito, fasil conviniente y rapido. Diasabra awo 7 di maart cuminsando for di 8’or di mainta te cu 12’or di merdia un biaha mas lo bai ta e caso caminda nos ta extende un invitacion na Aruba completo pa pasa
hasi nos un bishita awor cu orario extendi y hasi bo compras di productonan fresco produci for di nos mesu suelo. Manera ta gustumber varios di nos producto local ta aki den nos mercado so bo por haye. Asina ta no perde e oportunidad aki di bin probecha y pasa un rato ameno y cu prijsnan alcasbel. Lo bai tin entre otro carni fresco, fruta y berdura fresco y sin laga afo productonan natural. Pasabocanan dushi traha na cas pa nos mesun hendenan.
Nos ta infroma tambe na nos clientela di Mercado Santa Rosa cu despues di dia 7 di maart awor nos lo continua riba tur diasabra aki mes na Santa Rosa cu nos for di 8’or di mainta te cu 12’or di merdia y asina complaciendo tur nos clientela cu ta desea di cumpra productonan fresco riba tur disabra awor esaki ta bira posibel. Asina ta marca bo calendario for di awor riba tur diasabra por bishita Mercado Santa Rosa pa cumpra bo producto. Nos mester menciona si cu
posiblemente lo bai yega un momento cu kisas no tin suficiente producto local e ora nos lo informa nos clientela cu un of otro Mercado Santa Rosa lo wordo posponi debi na falta di produccion. Tene bon cuenta cu esaki y sigur sigui nos pagina di Facebook caminda cu nos lo informa cualkier
cambio di nos Mercado Santa Rosa. Pa e weekend aki di diasabra 7 di maart bo ta cordialmente invita pa hasi nos un bisita for di trempan 8’or di mainta te cu 12’or di merdia pa ercado Santa Rosa den un formato mas chikito pa abo por porbecha di locual ta bai tin pa ofrece.
